1 Nyii kwɔnaŋna-ŋǝsi ethisi elŋe ŋa ŋǝṯiny-ŋi akkɔ ŋothɽor tig-tig, ŋiɽaŋal-ŋi ŋǝni ŋaalɔ, kila linaanɔ Laawḏikiiyyǝ, nǝ kila tatap liti limǝ-nyii ese kiyǝnǝ kinnǝni mac. 2 Mindaŋ mǝ rɔgwor reeŋen firllathala, nǝ ethi ɔɽɔmaṯṯi dɔŋw ṯamɽa-thi, mindaŋ ethaavi ŋɔrṯɔwa tatap ŋǝthi ṯilŋiṯṯa-na ṯir rerrem ṯǝthi ṯilŋithinǝ ṯir min-min, mindaŋ ethi-mǝ elŋe ŋiɽaŋali ŋǝthi Allah ŋuluccunǝ, ŋindǝr-ṯǝ ŋǝni Kwɔrɔstɔ. 3 Nǝ ŋɔrṯɔ ŋǝthi ṯǝthinǝ yǝnǝ-ŋǝ ṯilŋiṯṯa-thi tatap luccini duŋgwun-nǝ. 4 Ŋandica-ŋǝsi ŋɔ mindaŋ mǝŋǝsi kwizi kweere ere kǝɽinyjǝlɔ mac, ŋiɽaŋal-ŋi ŋaami. 5 Nuruccǝ-ŋǝsi-nǝ kinnǝni tok kwir aŋna, nǝnyii-tǝ ǝni kwɔnaanɔ yǝy-lɔ kwir ṯigɽim ŋaaŋa-li, nǝnyii nyeŋlena etheese niizaama kwaalɔ kwisaaw, nǝ ṯǝnḏǝlɔ tetter ṯaalɔ ki-ṯǝmminǝ-nǝ ethi Kwɔrɔstɔ-na.
Ŋimiitha ŋir min-min ethi Kwɔrɔstɔ-na.
6 Nǝ kaka mǝgwɔ ǝmminici Kwɔrɔstɔ-ŋw kwǝni Yǝcu kwir Kweeleny, ŋwɔṯaŋw, dirnaṯṯir duŋgwun-nǝ, 7 lǝnḏǝlɔ kidi-kidir, lǝccinǝ duŋgwun-nǝ lifirlli tetter ki-ṯǝmminǝ-nǝ ṯaalɔ kaka-ṯǝ ŋa ŋǝccǝr-ŋǝsi @allima. A urǝnni-nǝ deddep shukwur-gi.
8 Aŋrathir mindaŋ mɔŋweere kweere mac kwɔŋǝsi ṯuusici ŋaɽinyi ŋaalɔ ṯǝthinǝ-thi yǝnǝ ṯir ŋǝɽiyǝŋ ŋǝthi ŋizigwuŋǝŋ, ṯǝṯi ruuthǝ ki-ṯa@liim-na ṯǝthi lizi, ki-rigɽim-nǝ tok rimthi ṯurmunǝ ṯiti ṯinḏi naanɔ-gwɔ Kwɔrɔstɔ mac. 9 Kaka ninanni-gwɔ ṯobii@a ṯir min-min ṯǝthi Allah kaŋna-na wǝthi Kwɔrɔstɔ wir ŋizigwunǝŋ, 10 ŋwɔṯaŋw nǝthi ŋimiitha ŋir min-min duŋgwun-nǝ, nɔŋw-ṯoro kwir nda lǝthi ŋirǝ-iis tatap nǝ sɔlṯa tok. 11 Nǝ duŋgwun-nǝ tok nǝ uɽunni ṯuuɽunnǝ-thi ṯiti ṯir ṯǝthi rii mac, laakin nɔŋworo ṯuuɽunnǝ ṯǝthi Kwɔrɔstɔ, ṯigǝdinnǝ-thi ṯimǝ-thi kǝdinnǝ ki-ŋɔma-na ŋǝthi ŋikiya ŋǝthi aŋna. 12 Kinaŋw naari-ŋa @ammiḏa, nǝni laaninna Kwɔrɔstɔ-ŋǝli, nǝ ki-ma@muuḏiiyya-na tok, nǝ diiɽǝ Kwɔrɔstɔ-ŋǝli ṯǝmminǝ-thi ṯaalɔ, ŋɔma-ŋi ŋǝṯhi Allah wɔmǝ diiɽǝ ŋunduŋw ki-ŋiɽany-na. 13 Kinaŋw naayi-ŋa ki-ŋikiya-na ŋaalɔ, noro lizi lir Umam liira Sherii@a-na. Laakin kirem tǝ, Allah wɔmǝ-ŋǝsi miithǝ Kwɔrɔstɔ-ŋǝli; mindaŋ nɔŋw fivrici nyuŋwsi ŋikiyaŋi ŋǝri tatap. 14 Nɔŋw iɽinyaci nyuŋwsi kǝmsu-lɔ kallinna ki-rogɽo rǝri nǝ laazim ǝŋgir ɽaanyasi. Laakin nɔŋw avrasi ṯaay ṯette, mindaŋ nɔŋw pǝthǝ relme-ri ŋwuuɽi naana. 15 Nɔŋw urṯunǝlɔ wur ŋeeleny-ŋi nǝ ŋɔma, nɔŋwsi ruusi mǝthǝl, nɔŋwsi mɔltha ki-ṯillasa-na kii ṯuuŋwun.
16 Ŋwɔṯaŋw ǝṯi duŋgwǝcǝ kweere mac, ethi allasi ŋaaŋwɔsi ŋiɽaŋali naana ŋeere ŋǝthi ethne wǝṯi yee alla kweere kwǝṯi ii, alla ŋǝthi @iiḏ, ya ŋǝthi ǝwǝ wiyaŋ, ya ŋǝthi Sǝbiṯ. 17 Na ǝthi wɔ tatap oro suurǝ domony kwǝthi kwomne ŋgwa kwinḏi ethiila kwaathan-gi; laakin ŋa ŋir rerrem tǝ, nǝr naani ethi Kwɔrɔstɔ-na. 18 Ǝṯɔŋw kǝmthinǝ kweere ŋaaŋwɔsi mɔkaafa naana mac, ŋgwa kwinḏi-ŋǝ ethaavi, ṯǝjlinnǝ-thi ki-rogɽo ṯir ŋidiny, nǝ ṯɔgwɔgwɔccalɔ ṯǝthi kwogwɔcce limeleka-lɔ. Nǝ kwizi kwɔrtɔtɔŋw kwǝni kwippiŋǝ rogɽo ruuŋwun fikir-gi kwǝthi ŋizigwunǝŋ domony, 19 kwiti kwimthi Kwɔrɔstɔ-ŋw kwir nda mac, kwǝṯi-gwɔ aŋna tatap mithǝnnǝlɔ kidi-kidir, ǝṯɔŋw iithithi kǝzir wir ŋwɔɽɔjɔ-ŋwɔɽɔjɔ mindaŋ ǝṯɔŋw peŋe kaka ŋinaŋnasi Allah.
Ethi ai nǝ ethi miithi ethi Kwɔrɔstɔ-na.
20 Ŋaaŋa lǝni-pǝ limǝ ai Kwɔrɔstɔ-ŋǝli, mindaŋ nǝ kǝdinnǝ ki-rigɽim-nǝ rǝthi ṯurmun. Nǝ ŋaaŋa lotho linannathi-ta kwokwony kaka nǝṯoro lǝthi ṯurmun kɔthɔ? Ŋaaŋa lotho lirɔɔmɔ kwokwony ǝthiyǝ-lɔ wɔ wǝni-ŋwɔ: 21 “Ǝṯi mɔmmɔ ŋgwa mac”, “Ǝṯi nyiŋla ŋgwa mac”, “Ǝṯi mithi ŋgwa mac”? 22 Nǝ kwomne ŋgwɔ tatap kwǝṯi ernene mɔŋw ǝrrini, kwir kwomne kwǝthi ṯa@liim ṯǝthi ŋizigwunǝŋ domony. 23 Aw ŋiɽaŋal ŋɔ ŋǝṯi kǝzinni oro kaka ŋǝthi ṯǝthinǝ yǝnǝ ŋiri, ṯɔgwɔcca-thi limeleka-lɔ ŋɔmaŋi-na, nǝ ṯǝjlinnǝ-thi ki-rogɽo ṯir ŋidiny, nǝ ṯǝwɽǝ yǝy-lɔ ṯǝthi aŋna; laakin ŋɔ tatap nǝreere ǝthi faayitha kweere mac ethi iirici aŋna sɔɔrɔma kithaay.
aza 2
1 ŋwu ṯa, nyi kwunaŋnaŋazi eḏelŋe ṯukwurmɔṯana ṯinyi beṯe-beṯen ŋiɽaŋal ŋi ŋeni ŋalu, na ŋeḏi kla linani lawuḏikya, na kla tatap tɔk liti limenyeze kiyeyna lamin lere mac, 2 mindaŋ eḏi ma rugwor reŋen firlani la kəkiner gwu-na ṯamɽa ṯi, mindaŋ eḏafi ŋurṯua tatap ŋeḏi ṯilŋiiḏina tir minmin, eḏi ma elŋe ŋiɽaŋali ŋeḏi Allah ŋulucina, ŋir Kwruztu ŋundu. 3 na duŋgwun-na eṯi gwu ŋurṯu tatap lucini ŋeḏi ṯeḏinayeyna, na ŋeḏi ṯilŋiiḏina tɔk.
eḏorɔ-na Kwruztu gi lutuput, na ṯireca ŋiɽaŋal nana ŋir ŋəluŋ
4 ŋandizanyji ŋu eḏi kwizi kwere ere iidezi ŋaŋwuzi mac kandiza gi kir ṯideda. 5 iiranyi gwu kinna daŋgal-na kwir aŋna, nenyi ta nani kwir ṯigɽim ŋaŋa li, kwamina beten eḏeze nizama kwalu kwizaw, na ṯəmna ṯalu ṯimenḏelu kidir eḏi Kwruztu-na.
6 kaka enjer gwu ṯa Kwelenyi kwir Kwruztu kweni Yecu ki rugwor-na ralu, ṯaŋwu eti dirnaṯi duŋgwun-na. 7 enjeri rufu lu ralu teter duŋgwun-na; owcineri duŋgwun la kaka yiŋna, lifirli ki ṯəmna-na kaka ilŋiiḏiner ŋazi gwu; na eḏi rugwor ralu ami eca Allah ŋwu zukran beṯe-beṯen.
8 aŋraḏiri eḏi kwere ere mulḏani ŋaŋwuzi mac ŋiɽaŋal ŋi ŋiti ŋeḏi fayḏa mac, ya ŋeḏi ṯikeɽinjelu tir zagi, ŋiɽaŋal ŋi ŋumumritaḏi ŋeḏi papaŋa leḏi ṯurmun, ŋir əḏi wunani ṯayṯi, ŋiti ŋir ŋeḏi Kwruztu mac. 9 kaka duŋgwun-na, kaŋna-na wir ŋizigwunaŋ, eti gwu Allah nanni-na minmin, 10 na a limureni duŋgwun-na ŋimiiḏa ŋi dedep; kwunderṯa kwir nda leḏi lizulṯa tatap na ŋuma tatap tɔk. 11 na duŋgwun-na tɔk ŋaŋa limuɽuni, lakin ṯuɽuna kḏu titi ṯiri ṯidaɽmina rii ri mac, lakin ma ŋazi Kwruztu uɽu muŋw uɽuci ŋaŋwuzi yaŋna kiṯay yir rɔgwɽɔ ruɽun. 12 na mer baptazi ŋaŋwuzi a limɔ anani ŋundu gi, na ṯibaptizina ṯi tɔk a limɔ diɽi ŋundu gi, emnicaŋa gwu ŋuma ŋeḏi Allah wumɔdiɽi ŋunduŋwu ki ŋiɽany-na. 13 na ŋaŋa, eni ŋa gwu layyu ŋiɽaŋal ŋi ŋaki ŋa ŋi ṯay pir, na liti leḏi ṯuɽuna ki yaŋna-na yir ŋizigwunaŋ mac, na ŋazi Allah miiḏi duŋgwun-na, nuŋw fifrici nyuŋwuzi ŋiɽaŋali tatap ŋakir ŋi ṯay pir, 14 nuŋw irici nyuŋwuzi kəmzu tatap kiṯay kuluḏina kiṯam-na kuŋun ŋiɽaŋal ŋi ŋeḏi kuruu; kəmzu ŋga kir ṯuwən nyuŋwuzi nana, nuŋw afrazi ṯay ṯete nuŋw ipeḏa ŋwuɽi nana ŋwuɽmɔḏalu. 15 nuŋw ŋi urṯinelu kiṯay wur ŋir ŋeleny-ŋa lizulṯa li leḏi limaleyka, nuŋw zi ruwezelu pɔrpɔr, muŋw zi mulḏa ki ṯillaza-na ṯuŋwun ki.
16 ṯaŋwu, eṯere efrinji kwizi kwere mac eḏi ṯecici ŋaŋwuzi ŋiɽaŋal ŋi ŋeḏi eḏne, ya ŋeḏi iid, ya ŋeḏi owa wiaŋ, ya ŋeḏi ŋwamin ŋweni zabiṯ. 17 əḏi wu tatap wir zura domony kweḏi ŋgwa kwinḏi eḏila, lakin ŋimiiḏa ŋir rerem ŋeḏi Kwruztu ŋiri. 18 eṯere efrinji kwizi kwere mac eḏi kəmḏi ŋaŋwuzi mukaafa nana kwinḏi ŋa eḏafi, naŋnaŋw gwu ŋaŋwuzi eḏejilini ki rɔgwɽɔ ŋidiny, ya eḏi kwoce limaleyka lu, urŋw gwu zurum eḏeze kwɔmne kwir ŋiŋliṯ, ṯiŋaḏuŋw gwu ŋirnyelu domony ŋiɽaŋal ŋi ŋeḏi fikir kwuŋwun kweḏi ŋizigwunaŋ, 19 iti miḏuŋw gwu Kwruztuŋw mac kwir nda; na nda orɔ leṯi ɽuni aŋna tatap kezir wiiḏiḏuŋw gwu, wir ŋwojɔ na yiri, na eṯuŋw duŋgwuŋgwa ṯuduŋgwaḏa ṯi tinḏi nani gwu Allah.
20 ma ay eḏi Kwruztu-na ŋiɽaŋal ŋi ŋeḏi əḏi weḏi ṯurmun kḏu wunani ṯayṯi, ŋeḏre ŋalu ŋɔḏɔ ŋuruzeŋazi kaka kla leḏi ṯurmun kḏu? a lɔḏɔ emni əḏya wu: 21 eṯi mummi nana mac; eṯi nyiŋla mac; eṯi dugwuɽa nana mac? 22 na ŋiɽaŋal ŋu orɔ ŋeḏi kwɔmne domony kwinḏi eḏi kiyaḏalu mer eḏi, na eṯir kwaḏiḏa əḏya weḏi lizigwunaŋ ṯaliim ṯi ṯeŋen. 23 na kezni ŋiɽaŋal ŋu ner aɽani ṯeḏinayeyna ner ruzi lizi kaka kla leṯi miḏa ḏiina teter, leṯejilini ki rɔgwɽɔ, leṯi rəri yaŋna yeŋen, lakin ner ere eḏi fayḏa kwere ḏuṯ eḏi meci kwizi eḏi dirnini rɔgwɽɔ zurum kweḏi aŋna.