Bɔɔlɔs mɔŋgweele Urshaliim.
1 Ŋwɔṯaŋw nǝnyji aaganni mindaŋ nǝnyji ɔrlacci ŋwɔdoŋw. Mǝnyii uɽǝthǝ bahara-na linḏi dɔṯṯɔk mindaŋ nǝnyii iila Kuus; nǝ laamin lithaathɔ nǝnyii ɔppaṯhi Rɔɔḏɔs, e-ta nǝnyii diiɽǝ kinaŋw ninyeele Baaṯira. 2 Nǝnyii kaṯṯasi mɔrkǝbǝ kinanaŋw kwinḏi etheele Fiiniigiiyyǝ, nǝnyii-gwɔ dallɔ-la nǝny-geele. 3 Nǝnyii iila kǝzir wǝthi-nyii-gwɔ ŋɔma etheese Gɔbrɔs-ŋwa, mindaŋ nǝnyii daaraci jǝnuub-ŋgi etheele Suuriiyyǝ. Nǝnyii dappatha-lɔ ki-nḏɔṯṯɔm lǝthi Sɔɔr-ŋwɔ, linḏi-gwɔ mɔrkǝb ethi dappasi bɔḏaa@-lɔ kwuuŋwun. 4 Nǝnyii kaṯṯasi lizi lokwo kinanaŋw lǝṯhi ṯǝmminǝ, mindaŋ nǝny-li naani usbɔɔ@ wette. Nǝr andaci Bɔɔlɔs-ŋwɔ ŋɔma-ŋi ŋǝthi Ṯigɽim Ṯirllinǝlɔ ter etheere ele Urshaliim mac. 5 Laakin mǝ lɔɔmɔr lǝri ernene ŋundu-ŋǝli tǝ, nǝnyji ɔrlacci ŋwɔdoŋw nǝnyeele ṯaay-thi ṯǝri. Nǝr iila tatap laaw-lina nǝ nyelle-nyina tok nyeeŋen, nǝr ruuthǝ ki-mǝḏiinǝ-nǝ nǝny-leele ki-nḏɔṯṯɔm; nǝnyii-gwɔ kwee ŋwɔrgwɔ-lɔ tatap nǝnyii aari kiyiiriny. 6 E-ta nǝnyii aagannathisi-na, mindaŋ nǝnyii alla ki-mɔrkǝb-la ŋundu-ŋǝ tǝ nǝr aaɽitha dɔɔnɔ-na.
7 Nǝnyii aari isṯimir ki-safar-na kwǝri linḏ ŋaaw-la min Sɔɔr mindaŋ nǝnyeele Baṯuulmaayis, nǝnyii-gwɔ aaganni lizi lǝthi ṯǝmminǝ kinanaŋw mindaŋ nǝnyii naani laamin lette dak. 8 Mǝ laamin iila lithaathɔ nǝnyeele mindaŋ nǝnyii ɔppathi Gaysariiyya Nǝnyii-gwɔ naani kinanaŋw ki-dɔɔnɔ kwǝthi mɔbǝshir kwǝni Fiilibbus, kwir kwette kwǝthi kila lǝllirsi-nǝ lir dɔvokwɔɽony ethi mǝcci lizi Urshaliim. 9 Nɔŋwɔthi nyɔɔrɔ nyir nyiira kwaɽiŋan nyiti nyǝginǝ kinnǝni mac, nyǝṯi aari bǝshirǝ ŋiɽaŋali ŋǝthi Allah. 10 Nǝnyii naani kinanaŋw ŋwaamin ŋwuuru, mindaŋ nǝ kwiɽii kwette kwǝni Aghaabuus ɔppatha Yahuuḏiiyyǝ-ŋgi 11 Nɔŋw iila naaniny-gwɔ mindaŋ nɔŋw dimmi karraatha kǝthi Bɔɔlɔs, nɔŋw-ŋgi kǝkki ŋwaara ŋwuuŋwun wɔɽe-wɔɽeny rii-ri-na tok, mindaŋ nɔŋwaaraŋw, “Ŋindǝr-tǝ ŋɔ ŋandisasi Ṯigɽim Ṯirllinǝlɔ ter ŋǝniŋw: kwizi kwǝthi karraatha ŋga, kwinḏi ethi Yahuuḏ kǝkki-ṯǝŋw Urshaliim-na, mindaŋ ǝri inḏǝthǝ Umama.” 12 Mǝnyji neŋne ŋɔ nǝnyii tuurǝcci Bɔɔlɔs-ŋwɔla tur, nyiiŋǝ lizi-li kila linaanɔ kinaŋw etheere ṯaaŋi. Urshaliim mac. 13 Laakin nɔŋw ǝŋnici nyuŋwsi nɔŋwaarɔŋw, Aatha kwɔrɔ kwǝrrǝŋǝ ŋgwɔ, naari-ŋa mindaŋ mǝr-nyii kiici ṯɔgwori? Kaka nigittathiny-gwɔ etheere kǝṯṯini ki-sijin-nǝ ṯɔrɔk mac, laakin ethi kǝni ai Urshaliim-na ŋiɽaŋal-ŋi ŋǝthi yiriny yǝthi Kweeleny kwǝni Yǝcu.” 14 Mǝnyeere ǝthici ŋunduŋw ŋɔma-na ethi niŋnaci nyuŋwsi mac tǝ, nǝnyii duŋgwǝci nyithak, mindaŋ nǝnyii ǝccǝŋw, “Ethiroro ŋǝthi ṯɔgwor ṯǝthi Kweeleny.”
15 Mǝ ŋwaamin ŋwɔ ere, nǝnyii keṯṯe rogɽo-lɔ rǝri cɔgwo-cɔgwop, e-ta nǝnyii ṯaaŋi Urshaliim. 16 Nǝnyeele ṯalaamiiz-thi ṯokwo ṯǝthi Gaysariiyyǝ-ŋw, nǝrnyji mɔlo nǝrnyjiili ki-dɔɔnɔ kwǝthi kwɔr-ŋgwa kwiilathiny-gwɔ etheele ethi-gwɔ naani duŋgwun kwǝm Manaasuun kwǝthi Gɔbrɔs-ŋwɔ, kwǝthi ṯǝmmine kinaŋw-lɔ tuk ki-ŋwaamin-la ŋwiŋna.
Bɔɔlɔs mɔŋgweele ethi raaŋitha Ya@guub-ŋwɔ
17 Mǝnyii ɔppatha Urshaliim tǝ, nǝnyji liyǝŋgǝri aalanni ṯaamathina. 18 Mǝ ŋɔrpɔ-ŋgwa oro, nǝnyeele Bɔɔlɔs-ŋǝli ethi raaŋitha Ya@guub-ŋwɔ; nǝ lishiyuukh tatap lǝthi kǝniisǝ naani tok. 19 Nǝsi Bɔɔlɔs aaganni, mindaŋ nɔŋwsi baaŋaci kwomne tatap ŋgwa kwǝrrǝ Allah ki-lizi-nǝ lir Umam ki-ŋothɽor-na ŋuuŋun. 20 Mǝrsi neŋne naanɔ-ŋgwɔ tǝ, nǝr ɔrtatha Allah tatap, mindaŋ nǝraarɔŋw, “Ǝŋgǝri kwǝri kwǝni Bɔɔlɔs a kwǝthi ŋɔma etheese Yahuuḏǝ yir alaaf yimǝ ǝmmini, nǝr mithǝ tatap Sherii@a tetter tok kwǝthi Muusǝ. 21 Limǝrsi ilŋithini ethisǝccǝŋw, ŋa ŋgwala kwǝṯi ǝccǝ Yahuuḏǝ tatap @allima yinannɔ ki-bǝlǝḏ-nǝ kwǝthi Umam, ethi duŋgwǝci Sherii@a kwǝthi Muusǝ, na nǝsi andaci etheere undu nyɔɔrɔ nyeeŋen ŋwɔthrɔnya mac, wala ethi kwaathitha ǝthiyǝ-lɔ wǝthi Yahuuḏ. 22 Ŋinḏirsi ethi elŋe dedder ethaarɔŋw ŋa kwɔmǝ ɔppatha. A kwǝr ǝrri aathaŋw? 23 Ŋwɔṯaŋw nyiiŋǝ linaŋna-ŋa ethisi ǝrri ŋɔ ŋǝrŋǝsi andaci. Nyiiŋǝ kɔlɔ lǝthi lizi kwaɽiŋan dǝŋgǝr-nǝ luuɽucǝ Allah wa@ḏa. 24 Nḏi ǝli ɔɽɔmaṯṯi dɔŋw ki-ṯisuuɽunǝ-nǝ; ǝsi kettice ŋgwa kwinḏir ethi kette, mindaŋ mǝrǝthi ŋɔma ethi fiyǝŋni. Nǝ ṯǝrṯiib-thi ṯǝ kɔthɔ tǝ, ǝri elŋe tatap ethaarɔŋw ŋiɽaŋal ŋa ŋandicarsi ŋǝni ŋaaŋa ŋiti ŋǝthi yǝnǝ mac, laakin nǝ ŋa rogɽo-ri rɔɔŋwa, ǝṯisi mithǝ ŋǝthi Sherii@a kwǝthi Muusǝ. 25 Laakin ŋǝthi Umam wa wɔmǝ ǝthi ṯǝmminǝ-tǝ, nǝnyji ṯiŋacci juwaaba nǝnyji ǝccǝŋw, nyiiŋǝ lǝccǝ-ŋǝsi-ŋw laazim ere yee ethneya weere mac wa wǝṯir rillici riiɽuwǝ-lɔ, wala ŋin ŋeere, wala haywaana weere wumthinǝ kworo, mindaŋ laazim ethi rucci ŋiijinǝ-naǝ kinǝŋgwu tuk.” 26 E-ta nǝ Bɔɔlɔs mɔlo lɔɔrɔ, nǝ ŋɔrpɔ-ŋgwa nǝr-li ǝrri kuruu ŋga kǝthi ṯusuuɽunnǝ. Mindaŋ nɔŋweele nɔŋw ǝnḏi ki Heikal-na nɔŋwsi andaci ŋwaaminɔ ŋwinḏi ethoro tha ŋwinḏi-ŋi ethi lɔɔmɔr ṯimmayini lǝthi ṯusuuɽunnǝ, inḏir-gwɔ ethi kette kiraama tatap keeŋen.
Bɔɔlɔs mǝr-gwɔ mithǝ ki Heikal-na.
27 Mǝ ŋwaamin dɔvokwɔɽony aadithi ethi ernene, nǝ Yahuuḏ yokwo yǝthi Aasiiyya-ŋw ese Bɔɔlɔs-ŋwɔ ki Heikal-na. Nǝr ɔkkwazi ladɔŋw tatap, mindaŋ nǝr mithǝ Bɔɔlɔs-ŋwɔ. 28 Nǝr kegitte kwɔɔlalɔ nǝraarɔŋw, “Lɔr lǝthi Israa-iil! Mǝccǝr-nyji! Kwɔr kwirṯǝ-ŋgwɔ kwǝṯi irǝri ǝzir naana tatap, nǝ ǝṯɔŋw ǝccǝ lizi tatap @allima, ǝṯɔŋw andisasa lizi naana wǝŋ-wǝŋ lǝthi Israa-iil, nǝ Sherii@a kwǝthi Muusǝ tok, nǝ Heikala naana wɔ tok. Nǝ ŋgwɔ kwɔmaava kire-kirem-ŋgwɔ Umama wokwo nɔŋw ǝnyji ki Heikal-nǝ ethi ruuŋwi ǝzir naana wɔ wirllinǝlɔ ter!” 29 Ŋǝni ŋandisarsi ŋɔ kaka niisar-gwɔ Ṯurɔfiimus-ŋwɔ yǝy-yi yeeŋen kwǝthi Afasuus-ŋwɔ Bɔɔlɔs-gi ki-mǝḏiinǝ-nǝ, mindaŋ nǝr kittatha ethaarɔŋw kwɔma-ŋwɔ mɔlo nɔŋwa-nyji ki Heikal-na.
30 E-ta na mǝḏiinǝ lakkathina tatap, nǝ lizi avri nǝr aaɽathi dɔŋw, nǝr mithǝ Bɔɔbs-ŋwɔ, nǝr mɔlotto-lɔ nǝr ruwǝzǝlɔ parŋgi kwǝthi Heikal, ŋwɔṯaŋw nǝr lǝŋthithǝ ŋwɔbaaba tɔc ŋwɔthi Heikal. 31 Mǝr ṯǝcci ethi ɽeenye Bɔɔlɔs-ŋwɔ, mindaŋ nǝ ŋiɽaŋal erme gaa-iḏa naana kir Rɔɔmaani ŋǝniŋw, mǝḏiinǝ kwǝthi Urshaliim-ŋwɔ ŋgwana kwɔlakkathi-na tatap tuŋgwǝll. 32 Nǝ gaa-iḏ diiɽǝnni fittak tɔc, nɔŋw mɔlthanni ŋwɔzɔbaaḏa-ŋwɔsi jesh-gi kwokwo nǝr kwuɽutǝthi nǝr ɔɽi naanɔ-ŋwɔ dɔŋw. Mǝ lizi ese ŋunduŋw jesh-gi nǝr rilli nǝreere ippi Bɔɔlɔs-ŋwɔ mac. 33 Nǝ gaa-iḏ ele nɔŋw mithǝ Bɔɔlɔs-ŋwɔ, mindaŋ nɔŋw alla waamira ethi kǝkki ŋwɔɔɽɔŋw-ŋi ŋwɔɽǝn. E-ta nɔŋwsi uṯicǝlɔ nɔŋwsi ǝccǝŋw, “Kwɔr-ŋgwɔ kwundǝr kwǝndu, nǝ aatha kwɔrɔ kwǝrrǝŋwɔ?” 34 Nǝ kila lokwo lǝthi dɔŋw kegitte kwɔɔlalɔ ŋiɽaŋal-ŋi ŋette, nǝ lithaathɔ ŋiɽaŋal-ŋi ŋir ter. Ṯaŋw nǝ ŋiɽaŋal lakkathina mindaŋ nǝ gaa-iḏ ere ǝthi ŋɔma mac ethelŋe ŋiɽaŋali ŋǝmmǝŋ ŋa ŋǝrrinǝ, mindaŋ nɔŋw ǝllici lizi luuŋwun waamira ethi mɔlo Bɔɔlɔs-ŋwɔ ethigeele kǝzir wǝthi jesh. 35 Mǝr-gi iilici sillimǝ keṯṯok, nǝ jesh dimmǝlǝ kaka nuurǝzǝ lizi rɔgwori deddep. 36 Nǝr kwakithalɔ tatap lɔppɔna laarɔŋw, “Iɽinyithir kithaay!”
Bɔɔlɔs mɔŋwsi-gwɔ andasi ŋǝthi rogɽo ruuŋwun.
37 Mǝ jesh aadithi ethi ǝnḏi Bɔɔlɔs-ŋgi kǝzir weeŋen, nɔŋw andaci gaa-iḏa nɔŋwɔccǝŋw, “Ŋandaci ŋiɽaŋali ŋette ŋɔ-a?” Nǝ gaa-iḏ uṯicǝlɔ nɔŋwɔccǝŋw. “A kwilŋithi kandisa kǝthi Yuunaana? 38 Ŋati kwir mac ŋgwa kwir Kwɔmɔsrii kwiidiiɽu ŋǝryǝ-ŋi ki-ŋwɔɔmɔr-la ŋwokwo ŋwɔmǝ ṯamthɔ, mindaŋ nɔŋw mɔlthanni lizi kuṯṯu arba@ alf nɔŋw-li ele ki-sahraa-na?” 39 Nǝ Bɔɔlɔs ǝŋnici nɔŋwɔccǝŋw, “Nyii kwir Yahuuḏi, kwilŋithir Ṯarsuus kwǝthi Kiiliikiiyyǝ-ŋw, kwǝthi mǝḏiinǝ kwir mɔhim beṯṯen; min fǝḏlǝk duŋgwǝcǝ-nyii nyandaci lizi.” 40 Nǝ gaa-iḏ ǝmminici ŋunduŋw, mindaŋ nǝ Bɔɔlɔs rilli ki-sillim-lǝ, e-ta nɔŋw allaci lizi ṯii-la ethi naani tugwup. Ṯaŋw nǝr naani tugwup, mindaŋ nɔŋwsi andaci kandisa-gi kǝthi @ibraaniiyyiin nɔŋwsǝccǝŋw,