Bɔɔlɔs-ŋǝ Barnaaba-gi a-naanir Iyguuniiyǝ.
1 Nǝr-ṯǝ aaɽi nǝr ǝrrini ŋa ŋette-ŋette Iyŋuuniiyǝ, kinaŋw mǝ Bɔɔlɔs-ŋǝ Barnaaba-gi ǝnḏi ki-majma@-na, mindaŋ mǝr andasi-tǝ, nǝ lizi littǝzir lir Yahuuḏ mindaŋ nǝ lir Umam tok ǝmmini ŋiɽaŋali. 2 Laakin nǝ Yahuuḏ kiya yiti yimǝ ǝmmini mac, ɔkkwazi Umama lizi naana kila limǝ ǝmmini. 3 Mindaŋ nǝ yaavɔr nanni kinaŋw ŋwɔɔmɔri ŋwuuru, mindaŋ nǝr andasi ŋuuguli ŋiɽaŋali ŋǝthi Kweeleny, kaka nǝmminicǝ-ŋwsi ŋiɽaŋali ŋa ŋeeŋen ŋandisarsi, ŋǝthi ne@ma kwuuŋwun kwir rerrem, ninḏǝthǝ-ŋwsi-gwɔ ŋɔma ŋǝthi-ŋi ǝrri ŋilima nǝ ŋa ŋir ŋwundǝ-ŋwundǝ. 4 E-ta nǝ lizi lǝthi mǝḏinǝ uɽǝnninǝ: nǝroro lokwo Yahuuḏ-yi, nǝ lithaathɔ nǝroro yaavɔr-yi. 5 Nǝ Umam wokwo Yahuuḏ-yi, nǝ kila lir ŋwɔɽa ŋweeŋen ɔɽɔmaṯṯi dɔŋw, nǝr kette ŋiɽaŋali ṯuunyu ṯɔtɔpɔt ethi bii yaavɔra ṯurvǝ mindaŋ ethisi acci yall-yi. 6 Mǝsi yaavɔr biɽanni ki-yǝni-nǝ ŋɔ, nǝr avri nǝreele Lisṯira nǝ Ḏǝrbǝ tok, nǝ muḏun kwirikathisi-lɔ kwǝthi muḏiiriiyyǝ kwǝthi Iyguuniiyǝ-ŋw. 7 Nǝraari bǝshirǝ kinanaŋw tok Inyjiilǝ wǝthi Allah.
Bɔɔlɔs-ŋǝ Barnaaba-gi a-naanir-gwɔ Lisṯira nǝ Ḏǝrbǝ tok.
8 Nǝ kwɔr naani kwette Lisṯira kwilŋithir ŋɔborkon-ŋi-na, ǝṯɔŋweere ǝthi ŋɔma mac ethi irǝrǝlɔ. 9 Nɔŋw naanalɔ kinaŋw kwakkica ŋiɽaŋali ŋǝthi Bɔɔlɔs kizǝn, mindaŋ mǝ Bɔɔlɔs ese kwǝthi ṯǝmminǝ ṯǝthi sǝwi ŋunduŋw nɔŋw ecce tok-tok, 10 mindaŋ nɔŋwɔccǝŋw ṯogɽo-thi tɔppak ŋwɔ, “Ḏiiɽu irllathala cor-cor ŋwaara-ŋi!” Nǝ kwɔr purlǝthǝlǝ dirip, nɔŋwaari ibṯǝḏi tɔc ethi irǝrǝlɔ. 11 Mǝsi ŋwɔdɔŋw ese ŋa ŋimǝsi Bɔɔlɔs ǝrri, nǝraari ibṯǝḏi ethi ɔpɔna kandisa-gi keeŋen kǝthi Iyguuniiyǝ-ŋw, nǝraarɔŋw, “Riiɽu rimǝ rɔɔthɔna liziŋwunǝŋ mindaŋ rim-nyji-gwɔ dappitha-na!” 12 Nǝr ǝnyjici Barnaaba-ŋwɔ yiriny yǝni Zafas, nǝ Bɔɔlɔs nǝrǝccǝ Harmas kaka nǝṯɔ-ŋgworo nda-nda kandisa-na. 13 Nǝ kaahin kǝthi ṯiiɽu ṯǝni Zafas ṯǝthi heikala wɔnaanɔ parŋgala kwǝthi mǝḏiinǝ, nɔŋw aava nyithri ɔvɽɔny-yi-nǝ ki-lɔbaab, nǝ ŋundu-ŋǝ ŋwɔdɔŋw-ŋi, nǝr naŋni ethi kettice yaavɔra kiraama.
14 Mǝ Barnaaba-ŋa Bɔɔlɔs-gi neŋne ŋiɽaŋali ŋǝthi kwomne kwɔnaŋnar ethi ǝrri, nǝr diraŋtaŋ yirethi-na yeeŋen, mindaŋ nǝr avri nǝr ǝnḏi ki-lɔdɔŋw-na, nǝr ɔppɔna nǝrsǝccǝŋw, 15 “Ŋotho ŋǝrrǝ-ŋǝsi ŋɔ ŋɔrtɔŋw? Nyiiŋǝ lirṯa-pa lizigwunǝŋ tok kaka ŋaaŋwɔsi! Nyiiŋǝ linḏi kɔnɔŋw ethi andaci ŋaaŋwɔsi ŋiɽaŋali ŋisaaw, ethi urlǝ ŋaaŋwɔsi-lɔ kwomne-na kwɔrtalɔŋw ethaaɽitha Allah naana wa wɔgitta leereya nǝ wurǝyu, bahara nǝ kwomne tatap kwɔnaanɔ-gwɔna. 16 Nǝ kerreny nɔŋw tǝ duŋgwǝci lizi tatap etheele raay-ri rir kaka rinaŋnarsi ŋundu-ŋǝ. 17 Laakin ǝṯɔŋw ruttuwǝzi rogɽo-lɔ ruuŋwun ŋwaamin tatap kwomne-gi kwǝṯɔŋw ǝrri kwisaaw-kwisaaw; ǝṯɔŋw inḏatha ŋaaŋwasi kawwa ki-leere, na kithlayu kiriiɽp, ǝṯɔŋw inḏǝthǝ ŋaaŋwɔsi ethneya, mindaŋ ǝṯɔŋw urǝcci ŋaaŋwɔsi rɔgwori raalɔ ṯaamana deddep.” 18 Nǝ ŋɔ tatap nǝtǝ yaavɔr ere ǝthi ŋɔma mac ethi ṯiinyini lizi kiraama naana ŋga kinḏrsi ethisi kettice.
19 Nǝ Yahuuḏ iila yokwo min Anṯaakiya nǝ Iyguuniiyǝ; nǝr ǝgini dɔŋw ethoro leeŋen, nǝr accatha Bɔɔlɔs-ŋwɔlɔ yall-yi, mindaŋ nǝr mɔlotto-lɔ nǝr-gi rucci mǝḏiinǝ-nǝ ligittathɔ ethaarɔŋw kwɔmǝ ai. 20 Laakin mǝ ṯalaamiiz aaɽathi dɔŋw kwirikathirlɔ, nɔŋw diiɽi nɔŋweele nɔŋwaaɽitha ki-mǝḏiinǝ-nǝ. Mǝ ŋɔrpɔ-ŋgwa oro nǝreele Barnaaba-gi Ḏǝrbǝ.
Bɔɔlɔs-ŋǝ Barnaaba-gi mǝr-gwɔ aaɽitha Anṯaakiya kwǝthi suuriiyyǝ-ŋw.
21 Nǝ Bɔɔlɔs-ŋǝ Barnaaba-gi aari bǝshirǝ Inyjiilǝ Ḏǝrbǝ-nǝ, mindaŋ nǝr ǝŋini ṯalaamiiza ṯuuru. E-ta nǝr aaɽitha Lisṯira nǝ Iyguuniiyǝ tok, mindaŋ nǝr talli nǝreele Anṯaakiya kwǝthi Biisiiḏiiyyǝ-ŋw. 22 Nǝr firllasi ṯalaamiiza-la, mindaŋ nǝrsi firllasi-la ethi nannitha lir kiiɽi-kiiɽi ki-ṯǝmminǝ-nǝ, e-ta nǝrsi ǝccǝ @allima nǝrsǝccǝŋw, “Mǝr naŋni ethi ǝnḏ ki Ŋeeleny-na ŋǝthi Allah tǝ, laazim ǝrǝnḏi ki-ṯurvǝ-nǝ ṯuuru.” 23 Nǝr alla lishiyuukha ki-yǝniisǝ-nǝ yeere-yeere, nǝraari kiyiiriny mindaŋ nǝr mithǝ arminḏaani tok, e-ta nǝrsi kettice Kweeleny ki-rii-na ruuŋwun ŋgwa kwǝmminicǝr.
24 Mǝreele nǝr ruu muḏilriiyyǝ-ginǝ kwǝthi Biisiiḏiiyyǝ-ŋw mindaŋ nǝr ɔppathi Bamfiiliiyyǝ. 25 Nǝraari bǝshirǝ Bǝrjǝ ŋiɽaŋali ŋǝthi Allah, e-ta nǝr ṯamthɔ nǝreele Aṯṯaliiya, 26 nǝ min kinanaŋw nǝreele mɔrkǝb-gi nǝraaɽitha Anṯaakiya kǝzir wɔgittarsi-gwɔ ki-ne@ma-na kwǝthi Allah ki-ŋothɽor-na ŋa ŋimǝrsi ṯimmasi kworo. 27 Na mǝr ɔppathi Anṯaakiya tǝ, nǝr aaɽasi lizi dɔŋw lǝthi kǝniisǝ, nǝrzi andaci ŋa tatap ŋǝrrǝsi Allah ŋunduŋǝ-li, nǝ wɔglṯṯica Umama ṯaay aŋgwɔrɔ ethi ǝmmini. 28 Mindaŋ nǝr naani lǝlu-ttuk kinanaŋw ṯalaamiiz-thi.