1 Nyii kwɔrɔ kwir Shekh ŋgwa kwɔlɔcca-ŋa ŋaaŋwa kwǝni Ghaayuus kwǝṯir amɽi, nǝ kwǝṯi-nyii amɽi rerrem.
2 Kwimɽi kwiinyi kwǝṯi-nyii amɽi, nyii kwǝṯi aari kiyiiri mindaŋ mǝ ŋiɽaŋal tatap saawi ŋǝni ŋaaŋa, mindaŋ mǝ aŋna wɔɔŋa aami naanɔŋw tok; ŋilŋithi-nyji rac ethaarɔŋw a kwisaaw ki-rogɽo rɔɔŋwa. 3 Kaka naaminy-gwɔna beṯṯen liyǝŋgǝr-li lokwo limǝ ɔppatha, mindaŋ nǝr andasi shahaaḏa kwǝthi ŋethre ŋisaaw ŋir rerrem, kaka nǝṯsi-gwɔ elela ŋa ŋir rerrem. 4 Nyiiti kwǝthi ṯinyiŋla-na ṯeere kwokwony mac ṯithǝmthi-lǝ kɔthɔ, ethisi neŋne ŋa ŋǝthi nyɔr nyiinyi nyaami eleŋw ki-ŋiɽaŋal-na ŋir rerrem.
Ghaayuus mǝr-gwɔ biɽǝthǝ yiriny.
5 Kwimɽi kwiinyi kwaṯi-nyii amɽi, a kwǝni kwirllalɔ beṯṯen ki-ŋiɽaŋal-na ŋa ŋǝṯisi ǝrrici liyǝŋgǝri-ŋwɔsi, mǝroro kinnǝni lithimthina tok, 6 nǝrsi kette ŋǝthi shahaaḏa kwǝthi ṯamɽa ṯɔɔŋwa kiyǝnǝ yǝthi kǝniisǝ. Ŋǝni ŋisaaw beṯṯen mǝsi ɔɔsi etheele ki-thaay-la ṯeeŋen ethisi mǝcci kila lǝṯi ǝkkici Allah ŋothɽor 7 Kaka mǝr-gwɔ ruu nǝreele sǝbǝb-gi kwǝthi Kwɔrɔstɔ, nǝreere ǝmmini ethaavi kwomne kweere mac ki-lizi-nǝ liira ṯǝmminǝ 8 Ŋwɔṯaŋw nǝr ɔvthanni laazim ethi mǝcci lizi lir kaka ṯǝŋw mindaŋ mǝr-li ɔɽɔmaṯṯi ki-ŋothɽor-na ŋir rerrem.
Ḏiiyuuṯiriifɔs-ŋǝ Ḏiimiṯiriiyuus-gi.
9 Ŋimǝ-nyji locce kǝniisǝ ŋette; laakin Ḏiiyuuṯiriifɔs kwǝṯi amɽi ethi iŋni rogɽo ruuŋwun, nɔŋweere ǝmmini nyuŋwɔ ethǝthi sɔlṯa mac. 10 Ŋwɔṯaŋw mǝnyii iila tǝ, nyji ruwǝzǝlɔ ŋa tatap ŋǝṯɔŋwsi ǝrri, nǝ ŋa ŋǝṯɔŋwsi andisasa nyuŋwɔ naana ŋigii-ŋigii. Nǝ nǝreere urǝthǝ ŋunduŋw ŋa mac, laakin ǝṯɔŋwseere aalanni kila lir liyǝŋgǝri-ŋǝ mac, nǝ ǝṯɔŋwsi ṯiinyini kila lǝṯisi naŋni ethisi aalanni, nǝ ǝṯɔŋwsi rutti kithaay kǝniisǝ-nǝ.
11 Kwimɽi kwiinyi kwǝṯi-nyii amɽi, ǝṯeere ṯǝccicini ŋikiyaŋi mac, laakin ǝṯi kǝniny ṯǝccicini ŋisanna; ŋgwa kwǝṯisi ǝrri ŋigii ǝṯɔŋweere ese Allah mac. 12 Nǝ ŋǝthi Ḏiimiṯiriiyuus tǝ, ǝṯirsi andasi kila tatap ŋǝni ŋundu ŋisaaw-ŋisaaw, nǝ ŋa ŋir rerrem ǝṯir ruwǝzi ŋethre-lɔ ŋuuŋun; nǝ nyii wɔɽe-wɔɽeny ǝṯi-nyii kette shahaaḏa kwǝni ŋundu, nǝ nelŋe tok ethaarɔŋw shahaaḏa kwiinyi kwir rerrem.
Ṯaaginna ṯirimthithɔ.
13 Ŋǝthi-nyji ŋittǝzir ethisi lɔcca ŋaaŋwɔ, laakin ninyeere naŋni ethi lɔcca ŋaaŋwɔ galam-gi nǝ hibir-yi tok mac. 14 Nyii kwɔrittathɔ etheese ŋaaŋwɔ fittak, mindaŋ mǝndi iisithi kiyǝnǝ ethi andasi.
15 Ethi ŋiiɽǝnnǝ naani naani-ŋa-gwɔ. Limath laaginna-ŋa. Aaginna limathi tatap.
ṯurfa kaniiza-na
1 nyi, kwir kwijowiṯ, kwagne ŋaŋwu kweni gaayuz kweṯir amɽi, kwamɽanyi rerem.
2 kwimɽi kwinyi, nyi kwerici ŋaŋwu ki yiriny mindaŋ mer zey ŋeni ŋɔŋa tatap, na aŋna yi tɔk; ŋilŋiiḏinyji rac eḏaruŋw, ŋiɽaŋal ŋeḏi ṯugwor ṯɔŋwa ŋizawi. 3 nenyi nyeŋlena beṯe-beṯen ki lomur limɔ li lɔkwɔ leḏi ŋiaŋga ila, mer nyji andaci ŋeḏi ŋeḏre ŋalu ŋirlalu, kaka dirnaṯi ŋa gwu-na ŋirlalu. 4 ṯinyiŋlana ṯende ṯere ṯiṯemḏi kḏu, eḏi zi neŋne ŋeḏi kwelle kwinyi ŋaruŋw, kweṯi dirnaṯi ki ŋirlalu-na.
5 kwimɽi kwinyi, ŋami ŋazi ṯa errizi liaŋgaluŋwuzi tatap, kla keni liṯimḏina tɔk. 6 kla limerzi ruwece lu kaniiza-na ŋeḏi ṯimeca ṯɔŋwa. ŋofḏana rac eḏi zi meci eḏami eleŋw ki ṯay la ṯeŋen kaka kla leṯəkici Allah ŋɔḏɽor. 7 kaka mer gwu ru yiriny yi yuŋwun, na eṯir ere kita eḏafi kwɔmne kwere mac kweḏi lizi lir luŋw zagi. 8 ŋwu ṯaŋwu, ŋofḏana deŋgeri-na eḏi zi meci kwɔmne gi, mindaŋ eḏi li oɽmaṯi ŋɔdɽor-na ŋeṯi zi kikindeḏi ŋirlalu.
9 ŋulucanyji kaniiza rac, lakin kwor kweni diyuṯrifuz kweṯinaŋni eḏi piŋi rɔgwɽɔ ruŋwun deŋgen-na, nuŋw ere ketize zulṯa kwinyi yey mac. 10 ŋwu ṯaŋwu, menyila ta, enyji ruweze lu ŋeṯuŋw zi erri, ŋeṯuŋw zi balizi nyuŋwu nana, ŋiti ŋeḏi fayḏa kwere mac. eṯuŋw zi derne ŋundu eḏi zi enji kiloɽu-na lir ŋiaŋga, na eṯuŋw zi ṯinyini kla leṯi zi naŋni, eṯuŋw zi ruti kiṯay kaniiza-na.
11 kwimɽi kwinyi, eṯere kwaḏa ŋiɽaŋali ŋiki mac, lakin ŋa ŋeni ŋizaw. ŋgwa kweṯizerri ŋizaw, kwunde kwir kweni kweḏi Allah, na kweṯizerri ŋiki, kwiti kwumeze Allah mac. 12 kwor kwir ter, kweni dimiṯriyuz, kweni kwandizar tatap ŋiɽaŋal ŋi ŋizaw; aw, na ŋeḏre ŋuŋun tɔk ŋeni ŋirlalu. nyi kweḏi ŋuma nyi tɔk eḏi zi unḏizi ki ŋuŋun ŋeni ŋizaw; ŋilŋiiḏi ŋazi rac ŋinyi ŋir rerem.
13 nyi kweḏi ŋiɽaŋali ŋuru eḏi zi luca ŋaŋwu. lakin ŋiti ŋeŋgi ŋazi luca hibr yi galam gi mac. 14 nyi kwaki kizen eḏeze ŋaŋwu kwaḏan kwɔkwɔ, mindaŋ er zi mumri la ki yey-na titir.
15 eḏi ŋiɽena nani daŋgal-na. limeḏgeri lagnaŋa tɔk. agnicenyi limeḏgeri-ŋwuzi lere lere tatap.