Ṯaaginna.
1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu ṯɔgwor-thi ṯǝthi Allah. Kwɔɔzar ethi andasi ŋiɽaŋali ŋǝthi ŋimiitha ŋigittathir-ŋi ethisi ǝthi, ɔɽɔmaṯṯi-ŋgi dɔŋw ethi Kwɔrɔstɔ-nǝ kwǝni Yǝcu.
2 Nyii kwuusucǝ-ŋǝ ŋaaŋwɔ kwǝni Ṯiimɔɔthaaws, kwir tɔr ṯiinyi ṯamɽany beṯṯen:
Ethi Allah wir Papa nǝ Kwɔrɔstɔ kwǝni Yǝcu kwir Kweeleny kwǝri, ethɔŋw inḏǝthǝ ŋaaŋwɔ ne@ma-ŋwɔsi ŋimɽi-ŋi nǝ ŋiiɽǝnnǝ tok.
Ṯɔrtatha-ŋa ṯifirllǝ-thi naana.
3 Nyii kwǝṯi ǝccǝ Allah shukran wǝkkicǝ-nyii ŋothɽor ṯɔgwor-thi ṯɔsɔɔɽɔ-nǝ cɔr-cɔɽic, kaka-ṯǝ ŋa ŋǝrrǝsi lugwurnǝ liinyi. Wǝti-nyii ǝccǝ shukran mǝŋǝ kithaayini ki-ṯaara-na ṯiinyi kiyiiriny kulu-kulu kaaŋwɔn-kaaŋwɔn 4 Nyii kwǝṯi kithaayini ŋwal ŋwɔɔɽo ki-yǝy-nǝ yɔɔŋwa, ŋwɔṯaŋw ninyǝthi sɔɔrɔma beṯṯen etheese ŋaaŋwɔ, mindaŋ mǝnyii urǝnni-nǝ deddep ṯinyiŋla-thina. 5 Nyii kwǝṯi kikithaayini ṯǝmminǝ ṯɔɔŋwa ṯiira ŋejmeth-na, ṯir-ṯǝ kaka ṯǝmminǝ kitha ṯinaanɔ kerreny ethi laanyalɔ-na kwir kwugwurnǝlɔ kwǝni Luu-iis nǝ ethi laanyalɔ-na kwǝni Afniika, nǝ nyii kwilŋithi rerrem ethaarɔŋw, ṯinaani-ŋa gwɔna tok. 6 Nǝ sǝbǝb-gi ṯǝ ŋgwɔ, ŋa kithǝyini ethi ardasi iigǝŋi wir haḏiiyyǝ wa winḏǝthǝ-ŋǝ Allah kinaŋw nigitta-nyii rii rii-nyii kanda-la lɔɔŋwa. 7 Kaka niti nǝṯi-ŋwɔ Ṯigɽim kitha ṯinḏǝthǝ-nyji Allah ere ruusi nyuŋwsi nḏeny mac, laakin ǝṯɔŋw urǝzi nyuŋwsi-nǝ ŋɔma-ŋi nǝ ṯama-ŋǝ ṯikǝkkǝ-thi ṯǝthi rogɽo.
8 Ŋwɔṯaŋw ǝṯiŋǝ ṯɔrony mithi mac ethi kette shahaaḏa kwǝni Kweeleny kwǝri, wala ethi ṯɔrony yee ŋaaŋwɔ-na ṯǝni nyii kwir mahbuus ŋiɽaŋal-ŋi ŋǝthi Kwɔrɔstɔ. Ŋwɔṯaŋw, aava kǝniny lɔɔɽɔŋi lɔɔŋwa ethi bee ṯurvǝ ŋiɽaŋal-ŋi ŋǝthi Inyjiil ŋɔma-ŋi ŋa ŋǝŋǝsi Allah inḏǝthǝ. 9 Wundǝr-ṯǝ wɔmǝ-nyji kilǝthi mindaŋ nɔŋw ɔrnɔṯi nyuŋwsi ṯɔrnɔṯǝ-thi ṯirllinǝlɔ ter, nǝreere ǝni ŋothɽor ŋeere ŋǝrrǝrsi mac, laakin nǝroro ŋǝthi ṯɔgwor ṯuuŋwun ne@ma-gi. Nɔŋwɔni kwinḏǝthǝ-nyji ne@ma ŋgwɔ ŋiɽaŋal-ŋi ŋǝthi Kwɔrɔstɔ kwǝni Yǝcu, kinaŋw tuk niti nigittina-gwɔ ṯurmun kinnǝni mac. 10 Nǝ kirem tǝ, kwɔmǝr-nyji ruwǝccǝlɔ kinaŋw mǝ Kwiglǝthǝ kwǝri kwǝni Kwɔrɔstɔ kwǝni Yǝcu iila. Nɔŋw rilli ŋɔma ŋǝthi ŋiɽany, nǝ nɔŋw ruwǝccǝ nyuŋwsi ŋimiitha-lɔ ŋiyaŋ Inyjiil-yi.
11 Ŋwɔṯaŋw, ŋiɽaŋal-ŋi ŋǝthi Inyjiil wɔ, nǝrnyii alla ethoro mɔbǝshir, kaavɔr nǝ mɔ@allim tok, 12 ṯaŋw nǝ-ṯǝ sǝbǝb oro ŋgwɔ kwɔbiiyiny-gi ṯurvǝ ṯǝthi kwomne ŋgwɔ. Laakin nǝnyii ṯɔrony ere mithǝ mac, kaka nilŋithiny-gwɔ ŋgwa kwǝmminicǝ-nyii, nǝ nǝnyii elŋe dedder ethaarɔŋw kwinḏiŋw ethi aŋraci ŋgwa kwǝccicǝ-ŋwɔ nyuŋw wǝkiiǝ mindaŋ mǝ Laamin kila iila. 13 Mithǝthi ŋiɽaŋali ŋa tetter ŋir rerrem ŋa ŋǝccǝ-ŋǝsi @allima, ethoro mǝthǝl kwɔɔŋa ethisi rɔɔmi, a-nannatha ki-ṯǝmminǝ-nǝ nǝ ṯamɽa kitha ṯǝri, nǝ ṯɔɽɔmaṯṯa-thi ethi kwɔrɔstɔ-na kwǝni Yǝcu. 14 Aŋrica ŋiɽaŋali ŋa ŋir rerrem ŋǝccicǝr-ŋǝsi wǝkilǝ, ǝsi aŋraci ŋǝmmǝŋ ŋǝthi Ṯigɽirn Ṯirllinǝlɔ ter, ṯǝṯinyji-gwɔ ɔmina.
15 A kwilŋithi rac mǝnyii-gwɔ lizi tatap lǝthi muḏiiriiyyǝ kwǝthi Aasiiyya-ŋw ɔrlacci ŋwɔdoŋw, nǝ deŋgen-na, nǝ Fiijallus-ŋǝ Harmuujaanis-gi oro. 16 Ethi Kweeleny inḏǝthǝ kwǝthi Uniisiifuurus ŋimɽiyǝ kaka nǝṯɔ-ŋgwɔ kǝṯṯini nyuŋwɔ wǝŋ nyaamin nyuuru. Nǝ ǝṯi ṯɔrony ere mithǝ mac ṯǝthi ŋwɔɔɽɔŋw ŋwiinyi, 17 kinaŋw mɔŋw ɔppatha Rɔɔma, nɔŋw nǝŋninni nyuŋw-lɔ mindaŋ nɔŋw kaṯṯasi nyuŋw kimaara. 18 Ethi Kweeleny mǝcci ŋunduŋw, mindaŋ ŋwaavi ŋimɽiyǝ naanɔ-ŋgwɔ ki Laamin-la kila! A kwilŋithi-pǝ rac rerrem ŋothɽor ŋa tatap ŋǝkkicǝ-ŋwsi nyuŋw a-naani-nyii Afasuus.
aza 1
ṯagna na ṯortaḏa
1 nyi kweni buuluz, kwir kafur keḏi Yecu Kwruztu ṯugwor ṯi ṯeḏi Allah, wumɔ kitaḏa ŋimiiḏa ŋeṯi nanni eḏi Kwruztu-na kweni Yecu, 2 nyi kwagne ŋaŋwu, ŋa kweni timuṯaawuz, kwir tor tinyi tamɽa nyi beṯen.
eḏi ṯimeca ṯeḏi ŋimɽi nani ŋa gwu, ŋimɽi ŋi, na ŋiɽena tɔk ŋinḏi nani gwu Allah wir Papa, na Kwruztu kweni Yecu kwir Kweleny kweri.
3 nyi kweca Allah zukran, —weṯi nyi kwɔkwocelu ṯugwor ṯi ṯizuɽu-na cucuɽic, kaka eṯi gwu papaŋa linyi erri, —kaka eṯi ŋa ṯiṯiŋayini dɔk ki ṯara-na tinyi ki yiriny yuluŋa yaŋwunu. 4 kaka eṯi nyi gwu ṯiŋayini ŋaŋwu ŋwal ŋi ki ta, nenyorɔ zurum eḏeze ŋaŋwu mindaŋ menyi urenina dedep ṯinyiŋila ṯi-na. 5 nyi kweṯi ṯiŋayini ṯəmna kḏa ṯiira ŋidiny-na ṯeṯinani nani ŋa gwu; ṯinderṯa ṯinani kerreny ki ṯugwor-na ṯeḏi lanyalu kwir kwukwurna kweni luwiiz, na lanyalu kweni afniiki, nenyaruŋw, kḏa ṯa duŋgwɔŋa-na tɔk.
ṯoraca eḏi bonye
6 ŋwu ṯa ŋwu, ṯiŋayini eḏardazi igəŋi wir haḏiya winḏeḏa ŋa Allah, wunani duŋgwɔŋa-na kinaŋw ma ŋa gwu kete rii nana rinyi. 7 kaka iti inḏeḏa nyji gwu Allah ṯigɽima ṯeḏi ŋiḏeny mac, lakin ṯeḏi ŋuma, na ṯeḏi ṯamɽa, na eḏeni kweleny kweḏi rɔgwp, 8 ṯa ŋwu, eṯi ŋa ṯurony ere ye mac eḏi zi unḏici ki pɔrpɔr ŋeḏi Kweleny kweri, ya ŋeni nyi kwir mabuuz kwuŋwun, lakin a keni emni eḏindinyani ṯurfa nana ŋiɽaŋal ŋi ŋir injiil, ŋuma ŋi ŋeḏi Allah. 9 wunderṯa wumenyji kileḏi mindaŋ nuŋw ornuṯi nyuŋwuzi eḏeni lirlinelu ter. ner ere orɔ ŋeni ŋɔḏɽor ŋeri mac, lakin ner eni ŋeḏi ṯugwor ṯuŋwun, na ṯimeca ṯeḏi ŋimɽi ŋuŋun, ṯimɔ Allah inḏeḏa nyuŋwuzi Kwruztu ŋgi kweni Yecu kwizatuk; iti kitina gwu ṯurmun kinna mac. 10 ṯinderṯa ṯimɔ ruwenelu kirem ṯuruwene ṯi lu ṯeḏi Kwigileḏa kweri kweni Yecu Kwruztu, kweni kwumɔ iri ŋiɽany ki ṯay, mindaŋ ŋuŋw baŋaci nyuŋwuzi ŋimiiḏa ŋiaŋ, ŋeṯinanniḏa dɔk, ŋiɽaŋal ŋi ŋir injiil.
11 ner orɔ ŋeḏi injiil wu ŋimernyi ŋi alla eḏi zi andaci, na eḏorɔ kafur na muallim tɔk. 12 ner ṯa orɔ ŋu ŋeṯinyji indinyanici ṯurfa nana kḏu, lakin urir kinna ŋwu tɔk, eṯi nyi ṯurony ere ye-na duṯ, kaka ilŋiica nyi ŋgwa kweṯi nyi alliḏa ṯugwori nana, ŋilŋiica nyji rac eḏaruŋw, eṯuŋw eḏi ŋuma eḏi zi aŋraci teter ŋimɔŋw zi inḏeḏa nyuŋwu mindaŋ ma lamin kla ila. 13 miḏizi teter edi zi gwu izazi ŋa ŋir rerem ŋiniŋnaŋa zi nani nyi gwu, ṯəmna ṯi na ṯamɽa ṯi ṯinani eḏi Kwruztu-na kweni Yecu. 14 na ŋiɽaŋal ŋa ŋizaw ŋir gaali ŋimerŋazi inḏeḏa, aŋrica zi teter ŋuma ŋi ŋeḏi Ṯigɽim ṯirlinelu ter ṯeṯinyji gwu omi-na.
15 a kwilŋiica rac lumaṯi linyi tatap linani azya limenyi orlaci ŋwudɔŋw, na nden deŋgen-na eni fijalliz na harmujaanuz. 16 lakin eḏi Kweleny inḏeḏa duənuŋw kweḏi unizufiiruz ŋimɽya, kaka eṯuŋw gwu keṯini nyuŋwu wəŋ nyaminu nyaminu, na turony ere ye mac ŋiɽaŋal ŋi ŋeḏi ŋwuruŋw ŋwinyi. 17 na nanuŋw ruumiya, nuŋw ecece nyuŋwu mindaŋ nuŋw kaṯazi nyuŋwu. 18 eḏi Kweleny kweni Allah meci ŋunduŋwu mindaŋ muŋw inḏa ŋimɽya nani gwu Kweleny ki lomur la ṯa kla. ilŋiicaŋa gwu rerem kweni kweṯi nyi meci ŋamaŋ afazuz.