Kilyǝ kǝthi Kwɔrɔstɔ nǝ ŋgwa kwigii.
1 Nǝ ŋǝthi kilyǝ kǝthi Kweeleny kwǝri kwǝni Yǝcu nǝ ṯɔɽɔmaṯṯa ṯǝri dɔŋw ŋundu-ŋǝli, nyiiŋǝ lɔɔraca-ŋǝsi liyǝŋgǝri lǝri, 2 etheere fiɽigathi ethi ṯǝmbǝlni ki-ǝfkǝr-nǝ waalɔ mac, ya ethisi ere ṯeenye mac ŋa ŋǝniŋw Laamin lǝthi Kweeleny limiila. Kimanni-pa ŋimǝ-nyji kǝzinni andasi kinaŋw nandicar-ŋǝsi, ya kinaŋw nǝccǝr-ŋǝsi bǝshirǝ, ya ǝrŋǝsi lɔcca kǝzir weere ki-juwaab-na. 3 Ǝṯi duŋgwǝcǝ kweere mac ethi kǝɽinyji ŋaaŋwɔsi-lɔ; kaka niti ninḏi-gwɔ laamin kila ethiila mac, mindaŋ mǝ ṯuwǝn ṯɔppa ŋiɽaŋali iŋnanna keereny, mindaŋ a kwɔr kwǝthi ŋɔḏɔrllathɔ ruwǝnnǝlɔ, kwinḏi ethi kiirathalɔ. 4 Kwǝṯi ɔppɔthatha ŋiɽaŋal-lɔ, nǝ ǝṯɔŋw piŋi rogɽo ruuŋwun ethi ṯamthɔ-la ŋgwa kwǝṯir ǝccǝ ṯiiɽu, ya kwomne kweere nyithak kwǝṯir kwoccelɔ, mindaŋ ethi piŋi rogɽo ruuŋwun deŋgen-la tatap. Mindaŋ ŋwɔ kǝniny ǝnḏi ki Heikal-na wǝthi Allah, ŋwɔ ruusi rogɽo ruuŋwun Allah. 5 Ŋiti ŋimǝsi kithaayini kinaŋw mac-a, a-naaniny kinnǝni ŋaaŋǝ-li nǝŋǝsi andaci ŋiɽaŋali ŋa tatap-a? 6 Nǝ nǝsi elŋe ŋa rac ŋithiinyinǝ ŋunduŋw ethi ruwǝnnǝlɔ mindaŋ mǝ Lɔmɔr luuŋwun lɔvthanna iila. 7 Kaka mǝgwɔ ŋejmeth ŋǝthi ŋikiya akkɔ ŋothɽor kerreny tuk, laakin ŋa ŋinḏi ethi ǝrrini, ereere ǝrrini mac mindaŋ mǝr ǝvri ŋgwa kithaay kwɔmthisi. 8 E-ta ǝmǝ kwɔdɔrllathɔ ŋgwa ruwǝnnǝlɔ, mindaŋ a Kweeleny kwǝni Yǝcu ɽeenye wǝŋ-yi wǝthi kworo kwuuŋwun, nǝ ŋwɔ kiirasalɔ ṯurwǝnnǝ-thi-lɔ ṯuuŋwun mɔŋwiila. 9 Kwɔdɔrllathɔ ŋgwa kwinḏi ethilla ŋɔma-ŋi ŋǝthi Shiiṯaan, mindaŋ ŋwɔrri ŋilima ŋir ŋǝluŋw domony, nǝ ŋa ŋir ŋwundǝ-ŋwundǝ tok, 10 ŋwɔsi ǝrrici kila linḏi ethi kiirathalɔ ŋa tatap ŋigii ŋir ŋǝluŋw. Kaka nidirnar-gwɔ ethisi amɽi ŋir rerrem mindaŋ ethi kilaaw. 11 Ŋwɔṯaŋw mindaŋ ǝsi Allah ɔɔsicǝ ŋɔma ŋɔppa ŋǝthi ṯikǝɽinyjinǝ-lɔ deŋgen-na, mindaŋ mǝrsi ǝmmini ŋir ŋǝluŋw, 12 e-ta ǝrsi hakwɔmi kila tatap lidirna ethisi ǝmmini ŋa ŋir rerrem, laakin ǝṯir-ŋi aamina ŋa ŋir ŋikiya.
Lalli-ŋǝsi-nǝ ethoro lǝthi ŋiglǝthǝ.
13 Ŋɔvthanna liyǝŋgǝri, laazim ǝnyii ǝccǝ Allah shukran ŋwɔɔmɔri tatap ŋiɽaŋal-ŋi ŋaalɔ, ŋaaŋa kila lǝṯisi Kweeleny amɽi. Kaka nicca-ŋǝsi-gwɔ Allah-na kwon-kwon-lɔ tuk, ethi kilaaw ŋɔma-ŋi ŋǝthi Ṯigɽim, ethi ruusi ŋaaŋwɔsi lirllinǝlɔ ter lǝthi Allah, ethisi ǝmminici ŋir rerrem. 14 Ŋindǝr-ṯǝ ŋɔ mindaŋ nɔŋw ɔrnɔṯa ŋaaŋwɔsi Inyjiil-yi wǝri, ethim-ǝ aavi ŋinithi ŋǝthi Kweeleny kwǝri kwǝni Yǝcu. 15 Ŋwɔṯaŋw liyǝŋgǝri lǝri, ŋnyjǝr ŋwaara-lɔ tetter, mindaŋ ǝsi mithǝ ŋa tetter ŋir rerrem ŋǝccǝr-ŋǝsi-ŋi @allima ṯǝbshiir-thi ṯǝri nǝ juwaab-gi tok.
16 Ethi Kweeleny kwǝri kwǝni Yǝcu rogɽo-ri ruuŋwun, nǝ Allah wir Papa kwǝri, wamɽa-nyji mindaŋ nɔŋw inḏǝthǝ nyuŋwsi ṯigandizalɔ ṯǝṯi nannatha dok-dok, nǝ ṯǝkkizǝ kizǝn-ŋǝ ne@ma-gi. 17 Ethiŋw firlli rɔgwori naana raalɔ ethisi ǝrri nyaamin tatap ŋisaaw, nǝ ethisi andasi ŋɔvthanna.
aza 2
ŋiɽaŋal ŋir ter ter ŋiti yiri rerem mac ŋeḏi kilya kedi Kweleny
1 na ŋeḏi kilya keḏi Kweleny kweri kweni Yecu Kwruztu, na eḏi kadirḏi, nyiŋa loracaŋazi, lieŋgeri, 2 eḏere fiɽgaḏi eḏari ŋwoɽa-na tiŋgil tiŋgil ki ŋiɽaŋal-na ŋere mac, ya eḏapri rugwori ŋiɽaŋal ŋi ŋeḏi kwizi kwaruŋw, ṯigɽim ṯete ṯimenyilŋiiḏini ŋiɽaŋal ŋi ŋere, ya juwab gi kwere kwumer lɔ ŋidiny eḏorɔ kaka kwete kwinyi, kwaruŋw, lamin leḏi Kweleny limila. 3 eṯefrinja kwere eḏi keɽinji ŋaŋwuzi lu kezir were mac, kaka iti inḏu gwu lamin kla eḏila mac mindaŋ ma ṯuwən ṯupak iŋina, a kwor kweḏi ŋikya ruwene lu, kwir tor teḏi ŋikiraḏalu. 4 kwunderṯa kweṯi zi upupiḏaci ŋiɽaŋal lu, na kweṯi piŋi rɔgwɽɔ ruŋwun eḏi ṯamḏu kwɔmne la kweṯir eca yilim, na kwɔmne kwete nyiḏak kweṯir kwɔkwocelu, mindaŋ muŋw nanalu ki heykal-na weḏi Allah, kwuruza rɔgwɽɔ ruŋwun Allah ki yey-na yeḏi lizi. 5 a liti likiḏayina manya, kinaŋw nani nyi ŋaŋa li, na ŋazi andaci ŋu? 6 na elŋe rac kwunder kwendu kweṯi ṯinyini ŋunduŋwu kirem, mindaŋ ŋwu ma ruwene lu ki lomur luŋwun. 7 kaka errini gwu ŋejmeṯ ŋeḏi ŋikya kinna, lakin ŋgwa kweṯi zi ṯinyini kirem, ŋwu zi ṯinyini mindaŋ ŋwere kiṯay. 8 mindaŋ ŋwu ruwene lu ŋgwa kweḏi ŋikya, a Kweleny kweni Yecu eɽenye wəŋ yi weḏi kworɔ kwuŋwun ta, ŋwu irṯaze lu kiṯay ṯiruwenelu ṯi ṯuŋwun, muŋw ila. 9 na ŋuma ŋi ŋeḏi zeyṯaan a kilya keḏi ŋgwa kweḏi ŋikya, ŋwu eḏi ŋuma tatap yilim yi yir ŋidiny yeṯi zi liŋɽazi, 10 na ṯikeɽinja ṯi lu tatap ṯeḏi ŋikya ṯeḏi kla linḏi ki ṯay la ṯeḏi ŋikiraḏalu, kaka mer gwu derne eḏizamɽi ŋirlalu mindaŋ eḏi kilaw. 11 ŋwu ṯaŋwu nezi Allah uzica ṯikeɽinjelu ṯupa eḏizemni ŋir ŋəluŋ, 12 mindaŋ er zi ma hakwumi kla tatap liti lemnica ŋirlalu mac lakin leṯamina ŋikya ŋi.
ṯorṯaṯa na ṯara ki yiriny
13 lakin nyiŋa leṯeca Allah zukran ŋwamin tatap ŋeni ŋaŋa, lieŋgeri, lamɽazi Kweleny beṯen, kaka ma ŋazi gwu Allah eca-na ṯayṯi eḏi kilaw, ṯirline ṯi lu ter Ṯigɽim ṯi, na ṯəmna ṯi eḏizemni ŋirlalu. 14 ner ṯa orɔ ŋwu, ŋornacaŋw zi ŋaŋwuzi ŋiɽaŋal ŋi ŋizaw ŋeri ŋir injiil mindaŋ eḏi ma afi ŋiniṯi ŋeḏi Kweleny kweri kweni Yecu Kwruztu. 15 ṯaŋwu, lieŋgeri, eṯenji ŋwara lu teter, a miḏa ŋiɽaŋali ŋa ŋimer ŋazi ilŋiiḏini, ya runyu ri reri, ya juwab gi tɔk.
16 eḏi Kweleny kweri kweni Yecu Kwruztu ŋundu, na Allah wir Papa kweri, lamɽanyji, limenyjinḏeḏa ṯikandizalu ṯinḏi eḏi nanniḏa dɔk, na ṯəkiza kizen tizaw ṯimeca ṯi ṯeḏi ŋimɽi, 17 eḏuŋw kandazi rugwori lu ralu, na eḏuŋw zi firlazi la ki ŋɔḏɽor-na tatap ŋizaw, na ki ŋiɽaŋal-na tatap tɔk.