Wa@ḏ wǝthi Kweeleny winḏiŋw-yi ethaaɽa.
1 Limǝthgǝri liinyi lamɽa-nyji, juwaab kwir-ṯa ŋgwɔ kwir nimrǝ kwuɽǝn kwɔmǝ-ŋǝsi lɔcca, nǝ ki-lijuwaab-na kɔlɔ, nǝnyii ṯǝccici ethi ɔkkwazi ŋaaŋwɔsi fikirǝ naana kwɔsɔɔɽɔ ki-ŋaɽiny-na ŋaalɔ, ethi kithǝyini ŋaaŋwɔsi ŋiɽaŋali ŋɔ. 2 Nyii kwɔnaŋna-ŋǝsi ethi kithaayini ŋiɽaŋali ŋa ŋandisasi liɽii lirllinǝlɔ ter kerreny tuk, nǝ waamir winḏi naanɔ-gwɔ Kweeleny nǝ Kwiglǝthǝ, wa winḏǝthǝ-ŋǝsi yaavɔr yaalɔ. 3 Laazim ǝsi elŋe ŋɔ ker-kerreny ethaarɔŋw, ki-nyaamin-la kinyɔ nyǝthi kwaathan-ŋwɔ, a lizi lokwo ruwannǝlɔ kila lǝṯi kǝkkini sɔɔrɔm-gi kweeŋen, ǝrŋǝsi ǝrrǝlɔŋw kathrii, 4 ǝrŋǝsi uṯicǝlɔ ǝrŋǝsi ǝccǝŋw, “Kwǝccǝ-ŋǝsi wa@ḏa ethaaɽa-pa? Nǝ kwende? Kinaŋw tuk mǝŋwɔ papa-ŋa ai nǝtǝ kwomne tatap nannatha kwette-kwette kinaŋw tuk nigittina-gwɔ ṯurmun-lɔ kwon-kwon!” 5 Nǝr kittatha ethiseere kettice ŋir rerrem yǝy mac, ŋǝniŋw kithlǝ tuk nǝ Allah alla waamira, mindaŋ nǝ leere-ŋa wurǝyu-yi kettine. Nǝ wurǝyu kettine ŋaaw-ŋi, 6 nǝ nɔŋw ṯǝ ǝni wɔgittina ŋaaw-ŋi, nǝ ŋaaw-ŋi ṯǝ ŋǝthi kiiru kɔppa nǝr-ŋi kiirasi ṯurmunǝlɔ. 7 Laakin nǝ leere-ŋa wurǝyu-yi wɔnaanɔ kire-kirem-ŋgwɔ naani waamir-yi ṯǝ wa wette-wette wǝthi Allah, mindaŋ mɔŋw kiirathalɔ iigǝ-yi. Nǝrsi kettice laaminɔ kila linḏir-li ethi ǝccǝ lizi haakima kila liira Allah-na mindaŋ ethisi kiirasalɔ.
8 Limǝthgǝri liinyi lamɽa-nyji, ǝṯiŋi ṯɔɔthɔna ŋette ŋɔ mac! Nǝ laamin lɔtɔpɔt naanɔ-gwɔ Kweeleny lir kaka yithlǝyu alf, nǝ yithlǝ alf oro kaka laamin lɔtɔpɔt. 9 Kweeleny kwiti kwinḏi ethi ɽindaŋnalɔ mac ethisi ǝrri ŋigittathɔŋw-ŋi, kaka ṯǝ naarɔ-gwɔ lizi lokwoŋw. Laakin nɔŋwɔni kwimthicǝ-ŋǝsi ṯɔgwori, kaka niti ninaŋna-ŋgwɔ kweere ethi kiirathalɔ mac, laakin nɔŋwsi naŋni tatap ethi ɔrlacca ŋikiyaŋi ŋeeŋen ŋwɔdoŋw. 10 Laakin Laamin lǝthi Kweeleny tǝ, nɔŋweele ethiila kaka kwɔɔɽam. Nǝ ki Laamin-lǝ ṯǝ kila a leere irṯathalɔ kwuurunnǝ-gi kwɔppa kwimni, a yaŋna yǝthi ki-leere-nɔŋw uɽǝthi kithaay mindaŋ ǝri kiirathalɔ, nǝ a wurǝyu ernene kwomne-gi-na tatap kwɔnaanɔ-gwɔna. 11 Kaka ninḏi-gwɔ kwomne-ŋgwɔ tatap ethi kiirathalɔ ṯaay-thi ṯǝ kɔthɔ, e-ta ŋaaŋa linḏi ethoro lizi lirṯaŋ? Ŋɔvthanna ethi ŋimiitha ŋaalɔ rillinǝlɔ ter, nǝ ethisi rillici Allah-lɔ, 12 kaka nǝkkicǝŋǝ-gwɔ Laaminɔ kizǝn lǝthi Allah, linaŋna ethi iila fita-fittak, kila lir Laamin linḏi-li leere ethi uɽǝthi nǝ ethi kiirathalɔ tok, mindaŋ mǝ yaŋna yǝthi ki-leere-naŋw nyɔɔli kiijaŋ-ŋgi. 13 Laakin ŋiɽaŋal-ŋi ŋǝthi wa@ḏ wuuŋwun, nǝrǝni lǝkkicǝ leereya liyaŋ nǝ wurǝyuŋi wiyaŋ kizǝn winḏi lizi lirllalɔ ethi-gwɔ nanni-na.
14 Nǝrṯoroŋw limǝthgǝri liinyi lamɽa-nyji, kaka nǝkkicǝ-ŋǝsi ŋɔ kizǝn, e-ta ǝnyjǝr ŋwaaralɔ tetter mindaŋ mɔŋw kaṯṯasi ŋaaŋwɔsi laami naana liira lɔɔma-na leere, nǝ lǝthi ŋethre ŋisaaw tok. 15 Iisasar ki-ṯindinyanna naana ṯǝthi Kweeleny kwǝri, ethi ruusi fɔrsa kwisaaw kwinḏǝthǝŋw nyuŋwsi ethi-gi kilaaw, kaka-ṯǝ nɔlɔcca-ŋǝsi-gwɔ ǝŋgǝri kwamɽar kwǝni Bɔɔlɔs ṯǝthinǝ-thi yǝnǝ kitha ṯinḏǝthǝ Allah ŋunduŋw. 16 Ŋindǝr-ṯǝ ŋɔ ŋǝṯɔŋwsi andindasi ki-lijuwaab-na tatap luuŋwun mɔŋw lo ŋiɽaŋali ŋeere. Nǝ ǝṯi ŋiɽaŋal naani ŋoko ŋifirlli ki-lijuwaab-na luuŋwun, ŋiti ŋǝthicǝsi lizi ŋɔma-na mac lithii kii nǝ liti lifirlli tok mac ethisi aami uppunǝŋw, kaka-ṯǝ ŋǝṯirsi ǝrri ki Yiṯaab-na Yirllinǝlɔ ter yithaathɔ. Ŋwɔṯaŋw ǝṯir ǝvicǝ rogɽo reeŋen ṯigiirathalɔ. 17 Laakin ŋaaŋa limǝthgǝri liinyi lamɽa-nyji-tǝ, nǝsi elŋe ŋɔ kerreny tuk. Aŋricar kǝniny rogɽo raalɔ, mindaŋ meere ṯɔɔthi mac ṯakka-thi ṯaay pir ṯǝthi kila liira Allah-na, mindaŋ etheere aaralɔ tiŋgil-tiŋgil mac. 18 Laakin aarir kǝniny isṯimir lidɔŋgwɔ-ŋgwathɔ ki-ne@ma-na, nǝ ethi elŋe Kweelenyi kwǝri, nǝ Kwiglǝthǝ kwǝni Yǝcu Kwɔrɔstɔ. Ethi ŋinith nannitha naanɔ-ŋgwɔ kirem dok-dok. Amiin.
aza 3
lamin leḏi Kwruztu linḏuŋw li eḏaɽa
1 juwab ŋgwu kwiri nimra kwuɽen kwumɔ ŋazi luca, limɽi linyi, na ŋiɽaŋal ŋeḏi juwab kwuɽen orɔ ŋutuput, ŋir ŋu, eḏi gi ukwazi fikra kwalu, kwiira ŋidiny-na, kiḏeyinaŋazi gwu ŋiɽaŋali. 2 eti ṯiŋayini ŋiɽaŋali ŋandizazi liɽi lirlinelu ter leḏi kerrenyŋw, na amra weḏi Kweleny kwir Kwigileḏa wumɔŋazi yafur yuŋwun andaci. 3 ṯinayinarzi kerreny eḏaruŋw, ki lamin leḏi kwaḏanŋw er ila kla leṯizerri luŋw, ŋiɽaŋal ŋi ŋir luŋw, leṯi dirnaṯi kaduwa gi keḏi yaŋna, 4 er aruŋw: a lari ḏa kirem ŋeḏi tikitaḏa taruŋw, kwinḏi eḏila? papaŋa leri liminḏiri ŋwaru ŋweni ŋiɽany, lakin eti kwɔmne nanni kaka eti gwu nani ki lomur likitina li ṯurmun ṯayti, mindaŋ ma kirem kwumorɔ. 5 ŋandizarzi ŋu ta, ner zi ere elŋece mac eḏaruŋw, lere likitina kwizatuk ŋiɽaŋal ŋi ŋeḏi Allah, na ureyu ijinelu ŋaw-na, wudaɽmina ŋaw ŋi tɔk, 6 na ṯurmun ṯeḏi kwɔnkwɔnŋw kiraḏa lu ŋaw-na ŋir kiiru kupa. 7 lakin lere-ŋa ureyu yi weḏi kiremŋw ner nanji igəŋi lu ŋiɽaŋal ŋi ŋuŋun tɔk, mindaŋ ma lamin ila leḏi zeyria leḏi li kirazi lizi lu liti linyica Allah nana mac.
8 lakin, limɽi linyi, eṯi ṯuḏina ŋiɽaŋal ŋi ŋu ŋete mac. lamin lutuput liri kaka yiḏleyu wahid alif ki yey-na yeḏi Kweleny, na yiḏla wahid alif ner orɔ kaka lamin lutuput. 9 Kweleny kwiti kweṯi ɽindaŋnalu mac eḏizerri ŋikitaḏaŋw zi gwu eḏizerri, kaka ari gwu ṯa lizi lɔkwɔ ŋwu. lakin ŋundu ta, eṯuŋw zi indinyana nana ŋeni ŋalu, iti naŋnaŋw gwu kwere eḏi kiraḏa lu ḏuṯ, lakin eṯuŋw zi naŋni tatap eḏorlaci ŋikyaŋi ŋwudɔŋw. 10 lakin lamin leḏi Kweleny linḏi eḏila; lila nyeṯec kaka kwoɽam ta; ki lamin ṯa kla a lere ernine kwurna gi kwupa, a kwɔmne tatap lerya nana ernine igə yi wufuḏu ci-cir, a ureyu dunnaḏi kwɔmne gi-na kwuŋwun tatap.
lazim er daɽmaḏa ŋiɽaŋali ŋeri tatap kaka aɽa gwu Kweleny
11 kaka inḏi gwu kwɔmne ŋgwu eḏernine ta, ŋiti ŋofḏana daŋgal-na manya eḏirlinelu ter ŋeḏre ŋi ŋalu tatap, eḏorɔ leḏi Allah minmin, 12 nanjaŋa gwu lu, linaŋnaŋa gwu tɔk lamin eḏila leḏi Allah mindaŋ a lere ernine igə yi, a kwɔmne tatap dunnaḏi a? 13 lakin kaka kitaḏaŋw gwu, er əkizi lerya kizen liaŋ, na ureyu wiaŋ tɔk, winḏi gwu tofḏana eḏi gwu nanni-na.
14 ŋwu taŋwu, limɽi linyi, kaka nanja ŋa gwu kwɔmne lu ŋgwu ta, eti deŋtini mindaŋ muŋw kaṯazi ŋaŋwuzi ŋiɽena ŋi, lizuɽu-na cucuɽic, liti leḏi ŋikyaŋi-na ŋere mac. 15 eti ruzi ṯindinyana nana teḏi Kweleny kweri kaka ŋigileḏa, kaka lucaŋazi gwu eŋgeri kweni buuluz, kwamɽanyji, teḏina ṯi yeyna tinḏeḏer ŋunduŋwu, 16 ki juwab-na kwuŋwun tatap, na ŋiɽaŋal nani ŋɔkwɔ ki juwab-na kwuŋwun ŋiti ŋir eyin eḏizelŋe mac, nezi lizi liti leḏi yeyna mac, liti leḏicezi ŋuma tɔk mac eḏizelŋe, ner urli ŋiɽaŋali ŋuŋun, kaka errer gwu ŋiɽaŋali ŋiḏaḏu tɔk ŋuluḏina, mindaŋ eḏefica rɔgwɽɔ reŋen tikiraḏalu. 17 na ŋaŋa ta, limɽi linyi, kaka ilŋiiḏiŋazi gwu kerreny ta, aŋraḏiri beten eḏi lizi liki ere kekɽinji ŋaŋwuzi lu mac ŋiɽaŋal ŋi ŋeŋen ŋiki, mindaŋ eḏiidi. 18 lakin, eti duŋgwuŋgwaḏa ki ṯimeca-na teḏi ŋimɽi na tilŋiiḏina teḏi Kweleny kweri, kwir Kwigileḏa kweri tɔk, kweni Yecu Kwruztu, eḏi ŋiniṯ nani duŋgwun-na kirem, na ki lomur luŋwun tɔk linḏi eḏi nanniḏa dɔk dɔk. emba.