Ṯimǝccǝ ṯimǝccǝr-thi lɔgrɔstiyana lǝthi Yahuuḏiiyyǝ-ŋwɔ.
1 Ŋiti ŋir ḏɔrɔɔri mac ethisi lɔcca ŋaaŋwɔsi ŋǝthi haḏiiyyǝ ethi-yi mǝcci lizi lmllinǝlɔ ter, 2 ŋilŋithi-nyji rac ethaarɔŋw ŋaaŋa lǝmminǝ ethi mǝccǝthisi, nǝ ninyǝni kwǝllinǝ ŋiɽaŋal-ŋi ŋaalɔ, ki-lizi-nǝ lǝthi Makḏuuniiyyǝ-ŋw, nǝnyji ǝccǝŋw, “Liyǝŋgǝri lǝthi Akhaa-iyya-ŋwɔ limǝ naanalɔ cɔgwo-cɔgwop ethi mǝcci kithlǝ-lǝ kimǝ ṯamthɔ.” Mindaŋ nǝsi sɔɔrɔm kwaalɔ kwɔppa kiɽiṯi ŋunduŋwsi luuru deŋgen-na. 3 Laakin nyii-ŋgwa kwɔɔsa liyǝŋgǝri-ŋwɔsi kɔlɔ, mindaŋ mǝ ṯǝllinǝ ṯǝri ṯǝni ŋaaŋa ere oro kandisa kǝthi ruunyu dɔmɔny mac, laakin ǝroro kaka-ṯǝ ŋa ŋandisa-nyji ethaarɔŋw, ŋaaŋa kila linḏi ethi naanalɔ cɔgwo-cɔgwop haḏaaya-yi. 4 Mindaŋ mǝ lizi iila lokwo lǝthi Makḏuuniiyyǝ-ŋw etheere kaṯṯasi ŋaaŋwɔsi linaanalɔ cɔgwo-cɔgwop mac tǝ, ǝnyji ṯɔrony mithǝ ṯɔppa ṯimni, mindaŋ mǝnyjeere andasi ŋeere kwokwony ŋǝni ŋaalɔ mac, kaka nilŋithi-nyji-gwɔ rerrem ŋǝni ŋaalɔ! 5 Ŋwɔṯaŋw nǝnyjeese ŋir ḏɔrɔɔri ethi fiɽigaza liyǝŋgǝri-ŋwɔsi-lɔ kɔlɔ, ethi iŋnaca nyuŋw keereny, mindaŋ mǝr aaɽasi haḏaaya wa dɔŋw cɔgwo-cɔgwop wɔgittathiŋa-yi, niti nɔppathi-nyii kinnǝni mac. Nǝ mǝnyii ɔppatha tǝ, nyii kaṯṯasi wɔmǝ aaɽanni dɔŋw, mindaŋ ǝŋnyji ilŋithini ethaarɔŋw, ŋinaŋna-ŋǝsi ta ethisi ǝrri ŋɔ rɔgwor-ri raalɔ dɔṯṯɔk, ŋiṯi ŋǝni kazim-gana mac.
6 Kithaayinarsi ŋɔ ethaarɔŋw, ŋgwa kwǝṯisi kwee nyokwo, ǝṯɔŋwsi-tǝ, ɔni nyokwo, nǝ ŋgwa kwǝṯi kwee kwuuuu, ǝṯɔŋw-tǝ, ɔni kwuuru tok. 7 Laakin ethi kwette nyithtk kette kwɔrga kwɔnaŋnaŋw ethi kette, nǝreere ǝniŋw ethi kette kwiti kwaamina mac, alla kazim-gana mac, kaka nǝṯi-gwɔ Allah amɽi ŋgwa kwǝṯi iṯithi kwaamina. 8 Ethi Allah inḏǝthǝ ŋaaŋwɔsi kwuuru ŋgwa kwǝṯi naŋni, mindaŋ mǝthi nyaamin tatap ŋgwa tatap kwuuru kwǝṯi naŋni kwǝthi rogɽo ŋaalɔ, nǝ ethi-gi akkɔ ŋothɽor ŋisaaw tok. 9 Kaka nɔlɔɔthɔnar-gwɔ ŋaarɔŋw,
“Ǝṯi kwizi kǝnni kwittǝzir, nǝ ǝṯɔŋw inḏǝthǝ lɔwaay tok;
mindaŋ ǝṯi ŋirllalɔ ŋuuŋun nannitha dok-dok.”
10 Nǝ Allah oro wǝṯi inḏǝthǝ ŋgwa kwǝṯi kwee ŋwɔɔla, nǝ rǝghiiv tok rir ethne. Kwindǝr-ṯǝ kwɔŋǝsi inḏǝthǝ ŋwɔɔla ŋwa tatap ŋwɔṯisi naŋni, mindaŋ ŋwɔsi piŋi, nǝ ŋwɔsi ŋiiɽi riṯṯak tok, mindaŋ mǝr-ŋǝsi ǝvicǝ ṯɔɔnǝ ṯǝthi ŋirllalɔ ŋaalɔ. 11 Kwɔndǝr-ṯǝ kwinḏi-ŋǝsi ethi ruusi lɔrṯɔ, mindaŋ aami rɔgwori-na nyaamin tatap, mindaŋ mǝ luuru ǝccǝ Allah shukran haḏaaya-yi waalɔ winḏi-nyji ethisi inḏǝthǝ. 12 Ŋothɽor ŋɔ ŋǝrrǝ-ŋǝsi, ŋiti ŋǝni kwomne kwǝthi inḏǝthǝ lizi kila lirllinǝlɔ ter ṯɔɽɔk mac, laakin ethaava ṯɔrtanna ṯɔppa, ṯǝthi-thi ǝccǝ Allah shukran. 13 Nǝ ŋothɽor ŋɔ nǝrǝni ŋithǝccǝ ṯǝmminǝ ṯaalɔ, mindaŋ mǝ luuru nii Allah-na ṯiinyicǝ-thi naana ṯaalɔ ṯǝthi Inyjiil wǝthi Kwɔrɔɔtɔ, nǝ kwomne-gi ŋgwa kwinḏi-ŋǝsi ethisi inḏǝthǝ ŋunduŋwsi nǝ lithaathɔ tok. 14 Mindaŋ mǝr-ŋǝsi ǝrici kiyiiriny beṯ-beṯṯen, ŋiɽaŋal-ŋi ŋǝthi ne@ma kwɔppa kwǝthi Allah kwɔnaanɔ daŋgal-nǝ. 15 A kwir ǝccǝ Allah shukran haḏiiyyǝ-yi wuuŋwun wir ghaali wuthǝmthǝlɔ pur-pur.
aza 9
1 na eḏi zi meci kla lirlinelu ter eḏi Kwruztu-na, ŋiti ŋiri ŋiɽaŋal ŋere duŋgwinyi mac eḏi zi luca ŋaŋwuzi. 2 kaka ilŋiiḏinyji gwu rac eḏaruŋw, rugwor ralu reṯi nani cugwɔ-cugwɔp; nyi kweṯi ŋazi piŋi ki lizi-na ledi makḏunyaŋw, eti nyi aruŋw: leḏi akayaŋw limɔ kete kwɔmne lu cugwɔ-cugwɔp kiḏla kimere; na ṯifirlaza la ṯalu ṯimɔ zi ukwazi luru deŋgen-na. 3 lakin nyi ŋgwu kwuza lieŋgeriŋwuzi mindaŋ ma ṯellina ṯeri ṯeni ŋaŋa ere eni luŋw mac ki ŋiɽaŋal-na ŋu, mindaŋ ma ami kete kwɔmne lu cugwɔ-cugwɔp kaka andicenyi gwu lizi; 4 mindaŋ menyi li ila lɔkwɔ leḏi makḏunyaŋw, mer ŋazi ere inḏa limɔ kete kwɔmne lu cugwɔ-cugwɔp mac, enyji ṯurony miḏa—na ŋaŋwuzi tɔk—kaka mer ŋazi gwu kete ki rugwor-na beṯen. 5 ṯaŋwu nenyaruŋw, ŋofḏana eḏukwazi lieŋgeriŋwuzi eḏiŋnaci nyuŋwu kereny daŋgal-na, eḏogwumice haḏiya lu kerreny wukitaḏi ŋa gwu, mindaŋ muŋw ketinelu cugwɔ-cugwɔp, witi wukitinalu kazip mac, lakin haḏiya wukitinalu rugwor ri ramina.
ŋeḏi kanni kwuruuza aŋgwuru
6 ṯiŋayinar, kweṯi kwe mɔrɔṯ, ŋwuni tɔk mɔrɔṯ; na kweṯi kwe kwuru, ŋwuni tɔk kwuru. 7 kwete nyiḏak ŋwerri kaka kwukitaḏaŋw gi ki ṯugwor-na, kwiti kwini ṯugwor-na mac ya kwiti kwiṯiḏa ŋwi ŋuma ŋi-na kazip mac, kaka eṯi gwu Allah amɽi kwizi ŋgwa kweṯami iṯiḏiŋw. 8 na eṯi Allah eḏi ŋuma eḏinḏeḏa ŋaŋwuzi ṯortaḏa ndendeṯ ṯiṯemḏelu purpur, mindaŋ ma eḏi daŋgal-na ŋwamin tatap kwɔmne ndendeṯ kwinḏi eḏi biɽḏi, mindaŋ eḏi ma ogwumice kwɔmne lu tɔk kwuṯemḏelu purpur kweḏi ŋɔḏɽor tatap ŋizaw. 9 kaka luḏinar gwu, ŋaruŋw:
eṯuŋw owḏini kerge gi korana dadar, eṯuŋw inḏeṯa luwaya;
ṯofḏana ṯuŋwun ṯeṯi nanniḏa dɔk.
10 ŋgwa kweṯizinḏeḏa ŋwola eḏi zi kwe, na eḏneya wir ṯul, kwɔ ŋazi inḏeḏa ŋwola ŋwir ṯofḏana eḏi zi kwe, mindaŋ muŋw kikindeci ŋaŋwuzi kwalu kweṯuni kwir ṯofḏana. 11 Allah winḏi ŋazi eḏi ruzi lurṯu kwɔmne gi tatap, mindaŋ ma eḏi ŋuma eḏi zi gi ortaḏa lir luway haḏiya yi walu, duŋgwinyi ŋgi, a lizi eca Allah zukran. 12 kaka mezi inḏeḏa rugwor ri ramina, eṯi haḏiya eḏi ŋuma eḏi zi meci kla leni lirlinelu ter, na eṯuŋw zi kikindeci tortaḏa eḏi ṯi eca Allah zukran beṯe-beṯen. 13 mer ṯecici ŋaŋwuzi ṯimeca ṯalu ṯir haḏiya rugwor ri ramina, weni weŋen na weḏi liḏaḏu tatap tɔk, er nii Allah-na ṯinyica ṯi nana ṯalu, kaka eṯi gwu aruŋw, ḏiin ṯeḏi Kwruztu tiri rerem. 14 na er erici ŋaŋwuzi ki yiriny er orɔ zurum eḏeze ŋaŋwuzi, ŋiɽaŋal ŋi ŋeḏi ṯimeca ṯeḏi ŋimɽi ŋeḏi Allah, ṯiṯemḏelu purpur daŋgal-na. 15 er eca Allah zukran kweḏi haḏiya wuŋwun, witi weŋgir yi eḏi ŋuma eḏi ŋi andazi mac!