1 Liyǝŋgǝri liinyi lamɽa-nyji, kaka nǝthir-gwɔ wa@ḏa wɔ tatap tǝ, ǝri suuɽi rogɽo rǝri kwomne-na kwuruuŋwɔ tatap kwǝthi aŋna nǝ rogɽo tok, mindaŋ mǝ ŋirllinǝlɔ ter ŋǝri ŋir min-min iiɽi Allah-na.
Ṯaamana ṯǝthi Bɔɔlɔs.
2 Kiṯṯicǝr-nyji rɔgwori raalɔ. Kwende kweere kwɔmǝ-nyii ǝkkici pir; kwende kweere kwɔmǝ-nyii kiirasalɔ, kwende kweere kwɔmǝ-nyii aagitha kwomne kweere arraay-yi. 3 Nyii kwandica-ŋǝsi kwiti kwɔgitta-ŋǝsi kaṯṯi mac; kaka nǝccǝ-ŋǝsiŋw kerreny, ŋaaŋa lǝṯi naani ki-rɔgwor-na rǝri, kaka ǝṯir naani dɔŋw lɔtɔpɔt ŋwɔɔmɔri tatap, nɔrɔ-gwɔ ŋimiitha alla ŋiɽany. 4 Nyii kwǝṯi-ŋǝsi allatha ṯɔgwori naana tig-tig; mindaŋ ǝṯi-nyii ǝllini ki-rogɽo ŋiɽarŋal-ŋi raalɔ! Nǝ ki-ṯurvǝ-nǝ ṯǝri tatap, ǝṯinyii tǝ urǝnni-nǝ deddep ṯigandiza-thi-lɔ, nyii ŋgwɔ kwinyiŋlana beṯ-beṯṯen.
5 Nǝ kwaathan mǝnyii ɔppatha Makḏuuniiyyǝ tǝ, nǝ yaŋna yǝri ere kaṯṯɔ wǝŋ mac. Nǝnyji ṯurvǝ rikkathalɔ ǝzir naana tatap, ǝṯiny-li urrǝthi lithaathɔ, mindaŋ ǝṯi-nyii ṯeenye ki-rɔgwor-na rǝri. 6 Laakin nǝ Allah wǝṯisi kandizalɔ kila lǝthi ṯurvǝ, nɔŋw kandazi nyuŋwsilɔ Ṯiiṯus-ŋgi kwɔmǝ iila. 7 Nǝ nǝreere oro ŋǝthi kilyǝ kuuŋun kigandiza-nyji-lɔ ṯɔɽɔk mac, laakin nǝroro ŋa ŋandisa-ŋwsi ŋǝni ŋaalɔ ŋigandiza-ŋa-ŋi ŋunduŋw-lɔ. Nɔŋwɔccǝ nyuŋwsi-ŋwɔ, ŋaaŋa kila linaŋna beṯṯen etheese nyuŋwɔ, nǝ ṯɔrɔɔnyɔna ṯaalɔ tok, nǝ sɔɔrɔm kwaalɔ kwɔppa kwǝni nyii, ŋwɔṯaŋw mindaŋ nǝnyii nyeŋlena beṯṯen. 8 Nǝ mǝŋǝsi ruunyuni juwaab-gi kwiinyi tǝ, nǝ nyii tǝ, ninyeere ronyine mac kaka nuluuthu-nyji-gwɔ. Ŋimǝ-nyji elŋe rac ethaarɔŋw, juwaab-ŋgwa kwɔmǝ-ŋǝsi ruunyuni kwokwok domony. 9 Laakin nyii-tǝ, nǝnyii aamina. Nǝreere ǝniŋw ŋa ŋimǝ-ŋǝsi-ŋi ruunyuni mac, laakin nǝ ronyine ŋgwa kwaalɔ ǝni urlǝ rɔgwor-lɔ; kaka nɔrɔ-gwɔ Allah wuruunyunǝ-ŋǝsi, mindaŋ nɔŋweere ṯɔɔthi kweere daŋgal-na mac ŋiɽaŋal-ŋi ŋǝri. 10 Kaka nǝṯi-gwɔ ṯɔrɔɔnyɔna ṯǝṯi iila naanɔ-gwɔ Allah ǝni ṯurlǝ ṯɔgworlɔ etheele ki-ŋiglǝthǝ-nǝ, ṯiti ṯǝthi yee-ŋwɔ ṯɔgwor-na kwokwony mac. Laakin ṯɔrɔɔnyɔna ṯǝthi ṯurmun-nǝ tǝ, ǝṯɔŋw aava ŋiɽany. 11 Iisarṯi ṯɔrɔɔnyɔna ṯǝthi Allah ṯimǝ-ŋǝsi duŋgwǝci ethi kettice nyuŋwsi yǝy, nǝthi sɔɔrɔma kwǝthi-gi suuɽi rogɽo raalɔ, nǝthi ṯapra ŋarriny, ŋitheny, ṯamɽa ṯɔppa beṯ-beṯṯen, sɔɔrɔm kwɔppa, nǝ jiizǝ mindaŋ! Imba, ŋaaŋa limǝ suuɽi rogɽo raalɔ ki-ŋiɽaŋal-na ŋɔ tatap, liti lǝthi lɔɔma-na mac. 12 Ŋwɔṯaŋw juwaab-ŋgwa kwɔmǝ-nyii lɔɔtha, ninyeere lɔɔtha kwǝni kwizi-ŋgwa kwǝrrǝsi ŋigii mac, wala ŋgwa kwǝrricǝrsi ŋigii. Laakin nǝnyii lɔɔtha ethi ilŋithini ŋaaŋwɔsi por-por kiyǝnǝ yǝthi Allah. Ŋaaŋa lǝṯi-nyji kettice yǝy rerrem. 13 Ŋindǝr-ṯǝ ŋɔ mindaŋ nǝnyji ŋiɽaŋal ŋɔ kandisalɔ.
Nǝny-ŋeere firllanni-la ŋɔ dak mac; laakin nǝnyii nyeŋlena beṯṯen ṯinyiŋla-thina ṯǝthi Ṯiiṯus, kaka nimǝccǝŋǝ-gwɔ ŋaaŋa tatap ŋunduŋw ethaami naanɔŋw kwiira ŋitheny-na. 14 Nǝ nandica-nyji ŋunduŋw ŋǝthi ṯǝllinǝ ṯǝni ṯaalɔ, nǝnyii ṯɔrɔny ere mithǝ mac; laakin nǝ ŋiɽaŋal ŋa tatap ŋandicar-ŋǝsi nǝroro rerrem, ŋwɔṯaŋw nǝ ṯǝllinǝ ṯǝri kiyǝnǝ yǝthi Ṯiiṯus oro rerrem. 15 Ŋwɔṯaŋw nɔŋw amɽi ŋaaŋwɔsi beṯ-beṯṯen, mɔŋw kithaayini ṯinyicǝ naana ṯaalɔ tatap, mindaŋ nǝ aalanni ŋunduŋw ṯǝjlinnǝ-thi ki-rogɽo nǝ ṯiiɽǝthi-nǝ tok. 16 Nyii kwaamina beṯ-beṯṯen kaka nallathi-ŋǝsi-gwɔ ṯɔgwor naana min-min.
aza 7
1 ŋwu ṯaŋwu, limɽi linyi, kaka eḏi nyi gwu ṯikitaḏa kḏu, er zuɽi rɔgwɽɔ reri kwɔmne-na tatap kwuruŋwa kweḏi yaŋna na kweḏi rigɽim tɔk, na er orɔ lirlinelu ter minmin, liṯinya Allah.
ŋiɽaŋal ŋeṯurreḏa, na ṯifirlazala kilya gi keḏi tiiṯaz
2 kiṯicernyji rugwori ralu; kwende kwere kwumenyji əkici tay pir, kwende kwere kwumenyji kiyacalu, kwende kwere kwumenyi yaḏa kwɔmne array yi. 3 ŋandizenyji ŋu ŋiti ŋeca ŋazi ŋi loma mac. kaka andicaŋazi gwu kerreny, ŋaŋa linani ki rugwor-na reri eḏay duŋw, na eḏi miiḏi duŋw tɔk. 4 nyi kwetiŋazi kete ki ṯugwor-na beten; nyi kweṯellini ki rɔgwɽɔ rinyi beten ŋiɽaŋal ŋi ŋalu; nyi kwumureni ṯikandiza ṯi lu ṯalu; eṯinyi urenina ṯinyiŋla ṯi-na dedep ki ṯurfa-na ṯeri tatap.
5 na menyila keni makḏunya, na yaŋna yeri ere kaṯu wəŋ ḏuṯ, nenyinḏa ṯurfa ray tɔk; eṯi ŋurreḏa nani par ŋgi la, na rugwor-na reri na gwu ŋiḏeny nani. 6 lakin Allah, weṯi zi kandizelu kla leḏi ṯofi ki rugwor-na, nuŋw kandazi nyuŋwuzi lu kilya gi keḏi tiiṯaz. 7 ner ere orɔ ŋeḏi kilya kuŋun ṯuɽuk mac, lakin ṯikandiza ṯi lu tɔk ṯimɔ kandazi ŋunduŋwu lu daŋgal-na, andicaŋw gwu nyuŋwuzi ŋeḏi zurum kwalu eḏeze nyuŋwu, ŋeḏi ṯijiɽmina ṯalu na ṯamɽa ṯalu ṯeni nyi, mindaŋ nenyi nyeŋlena nyelnyel. 8 ma ŋazi gwu keni runyini juwab gi kwinyi, ṯugwor tinyi titi ṯikeṯinyi kwurɔp mac, (lakin ṯimenyi kaṯu rac kerreny), kaka ilŋiicanyji eḏaruŋw, juwab ŋgwa kwumɔ ŋazi runyini, lakin na ṯuronyina nani kwɔkwɔk domony. 9 nyi kwamina beṯen kirem, ŋiti ŋiri mac kaka ronyinaŋa gwu, lakin kaka ma gwu ronyine mindaŋ eḏurla rugwori lu; na a lijiɽmini kaka naŋnaŋazi gwu Allah, ṯaŋwu na ere ṯuzi kwere mac nyuŋwuzi li. 10 na ṯijiɽmina ṯir kaka eṯi gwu Allah naŋni, eṯuŋw afa ṯurla rugwori lu ṯeṯizi mulḏa ki ŋigileḏa-na, na eṯuŋw ere kaṯu rugwori kwurɔp mac; lakin eṯi ṯijiɽmina ṯeḏi ṯurmun domony afa ŋiɽany. 11 na izarṯi ṯaŋrina nana ṯimɔ ṯijiɽmina kḏu erri daŋgal-na, kaka eṯi gwu Allah naŋni, na zurum eḏi zuɽi rɔgwɽɔ ralu minmin, na ṯəpriza ŋarriny, na ŋiḏeny, na zurum eḏeze nyuŋwu, na ṯifirlazala tɔk, na jiiza kweḏi kwor kwiki, ki ŋiɽaŋal-na tatap kirem, a limɔ ruwezi rɔgwɽɔ lu ralu liti leḏi kaṯiya mac ki ŋiɽaŋal-na ŋu. 12 ŋimɔ ŋazi luca ner ere orɔ ŋeḏi ŋgwa kwumezerri ŋiki mac, ya ŋeḏi ŋgwa ŋimɔ zi əkizi pir tɔk mac, lakin eḏi ma ṯamɽa ṯalu nani nyi gwu ruwenizi ŋaŋwuzi lu ki yey-na yeḏi Allah. 13 ner ṯa orɔ ŋu ŋimenyji kandizelu.
nyiŋa linyeŋlena nyelnyel ṯinyiŋla ṯi-na ṯeḏi tiiṯaz, kaka ma gwu ṯugwor ṯuŋwun eni ṯimɔ biɽelu pet ŋiɽaŋal ŋi ŋalu tatap. 14 na menyi ilŋiidini ŋunduŋwu ṯellina tere tinyi daŋgal-na, nenyi ṯurony ere miḏa mac; lakin kaka ṯa ŋiɽaŋal tatap ŋimerŋazi andaci eni rerem, ṯaŋwu ṯellina ṯeri ki yey-na yeḏi tiiṯaz ṯimɔ ruwenelu tiri rerem tɔk. 15 na eṯi ṯugwor ṯuŋwun yaḏa ŋaŋwuzi muŋw gwu kikiḏayini ma inyici ŋunduŋwu nana tatap, na ma enji kiloɽu-na ŋideny ŋi, na ṯunḏuḏa ṯi tɔk. 16 nyi ŋgwu kwunyeŋlena kaka ma ŋazi gwu kete ki ṯugwor-na beṯen.