Ṯajla ṯǝthi ŋizigwunǝŋ, nǝ ŋɔma ŋǝthi Allah.
1 Allah winḏǝthǝ-nyji ŋothɽor ŋɔ ŋimɽi-ŋi ŋuuŋun ethisi ǝrri, ŋwɔṯaŋw ǝreere mɔɔli mac. 2 A kwɔmǝr ɔrlacci ŋothɽor ŋɔ tatap ŋwɔḏoŋw ŋa ŋir ŋejmeth, nǝ ŋir fǝthiyǝ, ǝṯirsi derne ethisi ǝrri arraay-yi, alla ethisi kǝgiɽinyjǝlɔ ŋiɽaŋal-ŋi ŋǝthi Allah, laakin ǝṯir naŋni ethi nanni ki-thaay-na ṯir rerrem kiyǝnǝ yǝthi Allah, nǝ ethi ruusi rɔgwori rǝri risaaw ki-fikir-nǝ kwǝthi lizi tatap. 3 Na mǝ Inyjiil wǝṯir-yi aari bǝshirǝ luccuni, nuŋwɔni wuluccinǝthisi kila lɔthɔɔthɔ. 4 Ŋwɔṯaŋw nǝreere ǝthi ṯǝmminǝ mac, kaka mǝsi-gwɔ ṯiiɽu ṯǝthi ṯurmun kɔthɔ ruusi lunduŋw ki-ŋaɽiny-na ŋeeŋen, mindaŋ etheere ese fɔɔri kwǝthi Inyjiil wǝthi ŋinith ŋǝthi Kwɔrɔstɔ kwir suurǝ kwǝthi Allah mac. 5 Kaka nǝṯiny-ŋi ere aari bǝshirǝ ŋǝthi rogɽo ŋǝri mac, laakin ǝṯinyaari bǝshirǝ kǝniny Yǝcu-ŋgi kwǝni Kwɔrɔstɔ kwir Kweeleny, rogɽo-ri rǝri lir kaka yaḏaam yaalɔ ŋiɽaŋal-ŋi ŋǝthi Yǝcu. 6 Nǝṯǝ Allah oro waarɔŋw, “Ethi fɔɔri erṯelɔ kirim-nǝ.” Nǝ nɔŋwṯoro wa wir Allah wette-wette winḏǝthǝ-nyji fɔɔri ethi erṯelɔ ki-rɔgwor-na rǝri, ethi ǝvicǝ nyuŋwsi ṯilŋiṯṯa ṯǝthi ŋinith ŋǝthi Allah, ethi-ŋi erṯelɔ kiyǝnǝ yǝthi Kwɔrɔstɔ.
7 Laakin ǝṯirǝthi ŋɔrṯɔwa ŋɔ ki-yaŋna-na yir kɔlɔɔ domony, ethisi ilŋithini ŋɔma ŋɔppa ŋinḏi naanɔ-gwɔ Allah, ŋiti ŋir rǝri mac. 8 Ǝṯi-nyii ǝnḏinḏi ki-ṯurvǝnǝ ṯirna ter-ter, laakin liti lɔgwɔrmanna-lɔ mac; ǝṯi-nyii urǝŋnǝlɔ wurǝk, laakln ǝṯinyeere alla rii-na mac; 9 ǝṯir-nyji ǝwɽi yǝy-lɔ, laakin nǝnyji-tǝ Allah aŋraci; nǝrnyji pǝthǝlɔ, laakin ninyeere kiirannalɔ mac. 10 Ǝṯi-nyii uvuni ŋiɽany rǝthi Yǝcu nyaamin tatap ki-yaŋna-na yǝri, mindaŋ mǝ ŋimiitha ŋuuŋun iijini dedder ki-yaŋna-na yǝri. 11 Anaanir tǝ kinnǝni limiithɔ nǝrǝni linanyja ŋiɽany ŋiɽaŋal-ŋi ŋǝthi Yǝcu mindaŋ mǝ ŋimiitha ŋuuŋun iijini dedder ki-yaŋna-na yǝri kiyɔ yǝṯi ernene. 12 Ŋwɔṯaŋw ǝṯi ŋiɽany akkɔ ŋothɽor dǝŋgǝr-nǝ, nǝ ŋimiitha tǝ daŋgal-na.
13 Kaka nɔlɔɔthɔnar-gwɔ ŋaarɔŋw, “Nyii kwandisa-pa kaka nǝmminǝny-gwɔ.” Nǝ ṯigɽim-thi ṯǝ kitha ṯette-ṯette ṯǝthi ṯǝmminǝ, ǝṯi-nyii andasi tok kaka nǝmminǝny-gwɔ. 14 Nyiiŋǝ lilŋithi rac etharɔŋw, Allah wa wudiiɽǝ Kweelenyi kwǝni Yǝcu ethi miithi, wǝnyji diiɽǝ Yǝcu-ŋǝli, kwǝnyji mɔltha ŋaaŋa-li ethi rilli kiyǝnǝ yuuŋwun. 15 Nǝ ŋɔ tatap nǝroro rǝthi faayitha kwaalɔ, na mǝ ne@ma kwǝthi Allah ɔppathi kwuuru-kwuuru ki-lizi-nǝ, ǝri aari shukran lɔrtathɔ ŋinithi rǝthi Allah.
Ṯinanna ethi nanni ki-ṯǝmminǝ-nǝ.
16 Ŋwɔṯaŋw ǝṯir mɔɔlɔ mac. Mǝ kinnǝni yaŋna yɔri ernene, laakin kiya yir rigɽim ininynǝ-ŋgi tǝ, ǝṯir rɔɔthatha yiyaŋ ŋwaamin tatap. 17 Nǝ ṯurvǝ kɔthɔ ṯǝnḏǝthi-nyji kire-kirem-ŋgwɔ, ṯinḏi ethi naani kwokwo cuk domony, ṯinḏi-nyji ethǝvicǝ ŋinithi ŋɔppa ŋǝṯi nannatha dok-dok, ŋithǝmthi ṯurvǝ-lǝ. 18 Kaka niti nǝṯir eccice kwomne kwiijinǝ mac, laakin ǝṯir eccice ŋgwa kwiti kwiijinǝ mac. Ŋgwa kwǝṯi iijini ǝṯɔŋw naani kwokwo cuk, laakin ŋgwa kwiti kwǝṯi iijini mac tǝ, ǝṯɔŋw nannatha dok-dok.
aza 4
ŋugul eḏi zi andaci ŋiɽaŋali ŋutuput
1 ŋwu ṯaŋwu, eḏi nyi gwu ŋɔḏɽor ŋu ŋir ŋafur, ŋimɽi ŋi ŋeḏi Allah ta, eṯi nyi ere ajili rugwori mac. 2 nyiŋa limorlaci ŋiɽaŋali ŋwudɔŋw ŋir feḏiya na ŋir ŋejmeṯ; eti nyi derne eḏizerri array yi, ya eḏi zi kekeɽinjelu ŋiɽaŋal ŋi ŋeḏi Allah, lakin eti nyi naŋni eḏiɽi rɔgwɽɔ-na reri ki rugwor-na reḏi lizi tatap ŋirlalu ŋi ŋandina porpor, ki yeyna yeḏi Allah. 3 na ma ŋiɽaŋal ŋeri ŋizaw ŋir injiil kwuɽbeni kinna, eṯuŋw zi kwuɽbenizi kla dak likiraḏa lu. 4 ki ŋiɽaŋal-na ŋeŋen, kweleny kweḏi ṯurmun kḏu nuŋw zi riimezi ŋwoɽa-na kla liti leḏi ṯəmna mac, eḏi zi ṯinyini eḏeze fori kweḏi ŋiɽaŋal ŋizaw ŋir injiil, ŋeḏi ŋiniṯ ŋeḏi Kwruztu ŋgwa kwaɽina Allah dap dap. 5 kaka eṯinyji gwu ere andazi ŋeni rɔgwɽɔ reri mac; ŋeṯinyji andazi ŋeni Yecu Kwruztu, kwir Kweleny, na nyiŋa ta, eti nyi orɔ yaḏaam yalu ŋiɽaŋal ŋi ŋeḏi Yecu. 6 Allah wiri waruŋw: eḏi fori erṯelu kirim-na; wunderṯa wumerṯelu ki rugwor-na reri eḏi zi inḏeḏa fori kweḏi ṯilŋiiḏina ṯeḏi ŋiniṯ ŋeḏi Allah kiyeyna kweḏi Kwruztu.
ṯajila ṯeḏi buuluz na ŋuma ŋeḏi Allah
7 lakin eṯi nyi eḏi ŋurṯua ŋu kwɔmne-na kwudaɽmaḏir kullu gi domony, eḏi zi baŋaci ŋeḏi ŋuma ŋiṯemḏelu purpur, ŋeḏi Allah ŋiri, ŋiti ŋiri ŋeri mac. 8 eṯi nyi eḏi ṯurfa ṯir-na ter ter, lakin eṯi nyi ere eḏi kwukwurmuḏana lu mac; na ṯureŋina, lakin eṯi nyi ere alla rugwori mac; 9 na ṯowɽina yey, lakin eṯuŋw ere ṯazi nyuŋwuzi lu mac; ipeḏir nyji gwu lu, lakin nenyere ay mac; 10 eṯinyi ufini ki yaŋna-na yeri ŋwamin tatap ŋiɽany ŋeḏi Yecu, mindaŋ eḏi ŋimiiḏa ŋeḏi Yecu ruwene lu tɔk ki yaŋna-na yeri. 11 kaka nani nyi gwu limiiḏu, eṯi nyi eni leṯi kitazazi rɔgwɽɔ reri ŋiɽany nana dɔk dɔk ŋiɽaŋal ŋi ŋeḏi Yecu, ta ma ŋimiiḏa ŋeḏi Yecu ruwene lu ki yaŋna-na yeri yinḏi eḏay. 12 ṯaŋwu eṯi ŋiɽany aki ŋɔḏɽor deŋgeri-na, lakin ŋimiiḏa ta daŋgal-na.
13 kaka eḏi nyi gwu ṯəmna ṯir kaka ṯuŋwun, ŋgwa kwuluḏizi: ŋemnenyji, nenyji ma andazi; eṯinyji ma emni nyiŋa tɔk, na eṯinyji ma andazi. 14 kaka ilŋiiḏinyji gwu eḏaruŋw, ŋgwa kwumɔdiɽi Kwelenyi kweni Yecu kwenyji diɽi tɔk Yecu ŋali, na kwenyji mulɔ ŋaŋa li ki yeyna yuŋwun. 15 kaka urir gwu tatap ŋiɽaŋal ŋi ŋeni ŋalu, mindaŋ mer oɽmaṯir luru luru ki ṯimeca-na ṯiṯemḏelu ṯeḏi ŋimɽi ŋeḏi Allah, er ma kikindezi ṯortaḏa eḏi ṯi nii Allah-na ŋiniṯ ŋi.
eḏi rari kwɔkwɔ, na ŋiniṯ ŋinḏi eḏi nanniḏa dɔk
16 ṯaŋwu eṯi nyi ere ajili rugwori mac. yaŋna yeri keni yeṯi kiraḏa lu, lakin rɔgwɽɔ reri iininy yi-na eṯir nanniḏa riaŋ ŋwamin tatap. 17 na ṯurfa kḏu ṯɔkwɽoc ṯeḏi kiremŋw ṯetinyji daɽmaci ŋiniṯi ŋini didip ŋinḏi eḏi nanniḏa dɔk, ŋiṯemḏelu purpur. 18 kaka iti icicanyi gwu mac kwɔmne kweṯijini, lakin ŋgwa kwiti kweṯijini mac; kaka eṯi gwu kwɔmne kweṯijini ernine, lakin kwɔmne kwiti kweṯijini mac, eṯuŋw nanniḏa dɔk.