Lɔwaay.
1 Ethi lɔwaay iiɽi lisayyiḏ-ŋwɔsi-nǝ leeŋen, mindaŋ mɔŋweere kweere mac kwinḏi ethi kegree yiriny yǝthi Allah, nǝ ṯa@liim ṯǝri tok. 2 Nǝ lɔwaay kila lǝthi lisǝyyiḏ-ŋwɔsi leeŋen lir lɔgrɔstiyan, laazim ǝrseere ǝrrǝlɔŋw mac, kaka nɔrɔr-gwɔ liyeŋgen leeŋen. Nǝr kǝniny ɔvthanni ethisi ǝkkici ŋothɽor ŋisaaw ŋithǝmthǝlɔ, kaka kila linḏi ethi inḏa faayitha kwǝthi ŋothɽor ŋeeŋen, nǝroro kila lǝthi ṯǝmminǝ kila lǝṯirsi amɽi.
Ṯa@liim ṯir ŋǝluŋ nǝ ŋɔrṯɔ ŋir rerrem.
Laazim aari @alliima nǝ aari bǝshirǝ tok ŋiɽaŋal-ŋi ŋɔ. 3 Mǝ kweere nyithak aari @allima ṯa@liim-thi ṯiti ṯaaɽinna ŋiɽaŋali ŋǝthi Kweeleny kwǝri kwǝni Yǝcu Kwɔrɔstɔ mac, nǝ etheere aaɽanni ṯa@liima ṯǝthi ḏiin ṯǝri mac tǝ, 4 nɔŋwɔni kwaaŋa ǝwiny-lǝ dok-dok ṯippiŋǝ-thi rogɽo, nǝ nɔŋwseere elŋe ŋeere ḏuṯ. Nɔŋwaṯhi sɔɔrɔma kwigii kwǝthi-gi ɔppɔpathalɔ, kwǝṯaava ŋurrǝthǝ ŋǝthi ŋwɔɽɔjɔ ŋweere-ŋweere, mindaŋ ǝṯi ŋiɽaŋal ŋɔ aava kee-ŋwɔ ŋiɽany, ṯundǝnnǝnǝ, yɔvɔɔlɔ, nǝ ṯurtunǝnǝ ṯigii, 5 nǝ lǝṯǝthi ṯɔppathalɔ dok-dok ṯǝthi lizi kila lǝthi ŋaɽinyi ŋeeŋen ŋiti ŋirllalɔ mac, liti lǝthisi-nǝ ŋeere ŋir rerrem kwokwony mac. Ǝṯiraarɔŋw, ḏiin ṯir ṯaay ṯǝthi-thi oro lɔrṯɔ. 6 Imba, ḏiin ṯǝṯi ruusi kwizi kwɔrṯɔ rac, mɔŋw aarɔŋw kwomne ŋgwa kwǝthi-nyii kwuuru-ṯǝŋw. 7 Aatha kwɔrɔ kweere kwɔmǝr ǝnyjǝ ki-ṯurmun-nǝ? Kwende kweere! Nǝ aatha kwɔrɔ kwǝr dimmǝ kithaay ki-ṯurmun-nǝ? Kwende kweere! 8 Ŋwɔṯaŋw, mǝrǝthi ethneya, nǝ yirethi tok tǝ, nɔŋw-ṯǝni kwuuruŋw. 9 Laakin kila lǝthi sɔɔrɔma ethoro lɔrṯɔ tǝ, ǝṯir ǝnḏi ki-ṯɔmɔmma-na, mindaŋ ǝṯisi kerlleny iithi kǝthi sɔɔrɔm kwigii beṯṯen, kwǝṯisi mɔltɔtatha kineŋge-kineŋge ethi kiirathalɔ. 10 Kaka nɔrɔ-gwɔ ṯimiidatha thi gwuruush ṯɔvɔɔ ṯǝthi ŋikiya tatap. Nǝ lokwo ǝthi sɔɔrɔma beṯṯen ethǝthi, mindaŋ nǝr ṯɔɔthi ki-ṯǝmminǝ-nǝ na nǝsi rɔgwor reeŋen kaṯṯɔ kwɔrop ṯɔrɔɔnyɔna-thi ṯittazir.
Ŋimiitha ŋǝthi ŋɔgrɔstiyan.
11 Laakin ŋa kwir kwɔr kwǝthi Allah tǝ, ǝsi ɔrlacci ŋwɔdoŋw ŋɔ tatap. A ǝllici ŋirllalɔ ŋɔma tig-tig, ethi ṯeenye Allah, ethǝthi ṯǝmminǝ, nǝ ṯamɽa, ǝnyji ŋwaaralɔ tetter, nǝ iiɽǝnni tok. 12 Ǝṯi ṯɔgthi ṯɔthɔgtha-thi ṯisaaw ṯǝthi ṯǝmminǝ; ǝginicǝ rogɽo rɔɔŋwa ŋimiitha ŋǝṯi nannatha dok-dok, ŋa ŋɔrnacar-ŋǝsi kinaŋw nɔrwǝzǝ-ŋǝsilɔ ŋisaaw ŋǝthi ṯǝmminǝ ṯɔɔŋwa kiyǝnǝ yǝthi shuhuuḏ kwittǝzir. 13 Kiyǝnǝ yǝthi Allah wǝṯi miithi kwomne tatap, nǝ kiyǝnǝ yǝthi Kwɔrɔstɔ kwǝni Yǝcu, kwɔgitta shahaaḏa kwiccaw kiyǝnǝ yǝthi Biilaaṯɔs Albɔnṯii. 14 Nyii ŋgwa kwɔɔracca-ŋa ethi mithǝ waamira wɔ wɔsɔɔɽɔ, ethi iinyici naana kwiira fǝthiyǝ-nǝ kweere mac, mindaŋ mǝ Laamin iila kila linḏi-li ethi Kweeleny kwǝri kwǝni Yǝcu Kwɔrɔstɔ ethi ruwǝnnǝlɔ. 15 Nǝ ṯurwǝnnǝlɔ ṯuuŋwun ṯinḏi ethi ruuthǝ ki-lɔɔmɔr-la kila lɔvthanna lǝlli Allah wir Mǝlik, wɔrtanna wumthi ŋeelenyi wɔtɔpɔt, wir Mǝlik kwǝthi limǝlik, nǝ Kweeleny kwǝthi leeleny-ŋa. 16 Wundǝr-ṯǝ wɔtɔpɔt wǝṯi nannatha dok-dok, wǝṯi nanni ki-fɔɔri-na kwiithɔ beṯṯen kwiti kwǝthicǝ kweere ŋɔma mac ethi dɔŋgwatha naana keṯṯok. Wala ethi kwizi kweere ǝthi ŋɔma ethi ese ŋunduŋw. Ethi ṯiiɽǝnǝ oro ṯuuŋwun, nǝ ŋɔma ŋǝṯi nannitha lur tok. Amiin.
17 Ɔracca lɔrṯɔwa lǝthi kwomne-ŋgwɔ kwǝthi ṯurmunnǝŋw etheere piŋi ṯogɽo reeŋen mac, etheere kittatha ki-ŋɔrṯɔ ŋa ŋǝṯernene mac, laakin ethi kittatha naanɔ-gwɔ Allah, wǝṯi-nyji inḏǝthǝ kwɔmne ṯaṯap eṯhi-gi ami rɔgpɔ-na rari. 18 Ɔaccasi ethoro lizi lisaaw, ethoro lɔrṯɔ ki-ŋothɽor-na ŋisaaw, ethoro lizi lǝṯi iṯithǝ-lɔ, nǝ ethi ǝmmini ethisi duŋgwǝci lithaathɔ ethi ɔɽɔmaṯṯi kwomne-na kweeŋen. 19 Nǝ ṯaay-thi ṯǝ kɔthɔ, ǝri awanni ŋɔrṯɔwa ŋinḏi ethoro ṯɔgwagiza ṯifirlli tetter ṯǝthi kwaathan-ŋwɔ. E-ta ǝri-mǝ ǝthi ŋɔma ethi ǝgini ŋimiitha, ŋir ŋimiitha ŋir rerrem.
20 Yaa Ṯiimɔɔthaaws, aŋricasi ŋa ŋǝccǝr-ŋǝ-ŋi wǝkilǝ-lǝ ethisi aŋraci. Tuccǝ kenyjera-na ŋga tuk kir-talɔŋw, nǝ ṯɔppathalɔ kitha ṯir ŋeeɽer domony ṯǝṯi lizi lokwo ǝnyjici yiriny ŋǝluŋi yǝni “Ṯilŋiṯṯana.” 21 Kaka naarir-gwɔ lokwoŋw ṯǝthi-nyii. Mindaŋ nǝr ṯuusi ṯaay ṯǝthi ṯǝmminǝ.
Ethi ne@ma kwǝthi Allah naani ŋaaŋa-li tatap.
aza 6
ŋeḏi kla leṯinani ki ŋuway-na lir yaḏaam
1 eḏi kla leṯinani ki ṯofi-na ṯeḏi ŋuway iɽi lizi-na leḏi zi; taŋwu a yiriny yeḏi Allah ere ruzine luŋw mac, na ṯaliim tuŋwun tɔk mac. 2 na kla lir luway leḏi lizi leḏi ṯəmna, eḏi zi ere erre luŋw mac kaka enir gwu lieŋgen eḏi Kwruztu-na; lakin er ṯemzi keni ŋɔḏɽor lu ŋeŋen, kaka eṯir zi ŋi meci kla leḏi ṯəmna, leṯir zi amɽi.
eṯi zi ilŋiiḏini pɔrpɔr, na eṯi zi oraci tɔk ŋiɽaŋali ŋu. 3 mezi kwizi kwere ilŋiiḏini ṯaliima ṯir ter, muŋw ere emni mac ŋiɽaŋali ŋirlalu ŋeḏi Kweleny kweri kweni Yecu Kwruztu, na ḏiin ṯeḏi Allah rerec, 4 kwunderṯa kweṯellini, kweṯi piŋi rɔgwɽɔ. kaka iti ilŋiicaŋw gwu kwɔmne kwere ezir mac; eṯuŋw amɽi eḏi zi upupuḏaci ŋiɽaŋal lu, ŋinderṯa ŋeṯukwazi lizi eḏi ke ŋiɽany, ŋeṯafa ŋirŋaza tɔk, yufuluŋi tɔk, na ṯortutinena tiki tɔk, 5 ner diɽeḏizina eḏi ŋaŋlaḏi-na, kaka iti ilŋiicazi gwu rugwor reŋeŋ ŋir rerem mac; eṯi rugwor reŋeŋ aruŋw, ŋiɽaŋal ŋeḏi Allah ŋir ṯay ṯeḏi ṯəgina. 6 eṯi ṯəgina ṯupak nani rac, nanir gwu kla leṯi ketize ŋiɽaŋali ŋeḏi Allah yey; eṯir ŋi ami nanuŋw. 7 kaka iti afar gwu kwɔmne kwere mac mer nyji gwu ilŋiiḏa ki ṯurmun-na, na er ere eḏi ŋuma tɔk mac eḏi dimi kwɔmne kwere mer ṯazi ṯurmuna lu. 8 lakin mer eḏi eḏneya na yireṯi tɔk ta, er ami nanuŋw kwɔmne gi ŋgwu. 9 lakin kla leṯorɔ zurum eḏorɔ lurṯu, er iideḏa ki ṯumɔmma-na, na ki zurum-na tɔk kwir kaka kiɽbin, kweḏi ŋiḏyaki, mindaŋ er nani domony ṯar, er kiyaḏa lu tɔk. 10 kaka ur gwu ṯimiidaḏa ṯeḏi kwuruuz ṯufu ṯeḏi ŋikya ŋir-na ter ter; na lɔkwɔ ner ṯuzi ṯəmna kaka yaḏizi gwu ŋuway ŋu, ner ṯugwini ki rugwor-na reŋen ṯuronyina ṯi-na ṯeṯi rari kaka ṯeḏi yugwi.
ṯoraca ṯeḏi buuluz eḏi ṯi meci timuṯaawuzŋw
11 lakin, ŋa, kwir kwor kweḏi Allah, arṯaḏizalu ŋu tatap; eti kwaḏiḏa ṯofḏana, na ṯikitiza ŋiɽaŋali ŋeḏi Allah yey, na ṯəmna, na ṯamɽa, na ṯukwurmɔṯana, na ṯejilina ki rɔgwɽɔ. 12 eṯi ṯugwudi ṯiṯugwuḏa tizaw ṯeḏi ṯəmna; eṯi miḏa ŋimiiḏa ŋiaŋ ŋinḏi edi nanniḏa dɔk, ŋimer ŋazi ornaci ki lomur limezi li ruwezelu pɔrpɔr ŋeḏi ṯəmna ṯɔŋwa, ki yey-na yeḏi lizi luru. 13 na kirem, ki yey-na yeḏi Allah, winḏeḏa kwɔmne tatap ŋimiiḏa, na ki yey-na yeḏi Kwruztu kweni Yecu, kwami zi ruwezeluŋw pɔrpɔr ŋundu tɔk ki yey-na yeḏi bilaaṯuz albunṯi, 14 nyi kworacaŋa eṯamnaci amra wu dɔk, ŋama-ŋamaŋ, kwuzuɽu, kwiira loma-na lere mindaŋ ma Kweleny kweri kweni Yecu Kwruztu ruwene lu. 15 ṯiruwene lu kḏu ṯinḏi eḏila ki lomur lizaw, lica Allah-na weni wortana, wir wutuput weṯi miḏa ŋelenyi, wir Melik kweḏi limelik, na Kweleny kwedi leleny; 16 kwunderṯa kwutuput kweṯeḏi ŋimiiḏa-na ŋeṯi nannida dɔk, kweṯi nanni ki fori-na kwiti kweŋgi kwizi kwere duŋgwaḏa nana mac. ŋgwa kwiri Kweleny kwiti kwumɔ kwizi kwere eze yey yi ḏuṯ, ya kwiti kwedi ŋuma eḏeze tɔk mac. eḏi ṯiniiya-na nani nanuŋw gwu, na ŋeleny ŋeṯi nanniḏa dɔk dɔk. emba.
17 eṯoraci lurṯua linani ki ṯurmun-na kḏu, eḏere piŋi rɔgwɽɔ reŋen mac, ya eḏere alliḏa ŋurṯua rugwori nana ŋeṯuɽu kitay tɔk mac, lakin er alliḏa Allah rugwori nana weṯinyji inḏeḏa kwɔmne tatap beyin eḏi gi nyeŋlena. 18 er zi erri ŋizaw, mindaŋ er zi ruzi ŋa ŋizaw ŋetir zi erri ŋurṯu ŋeŋen; ŋeni ŋofḏana deŋgen eḏi itiḏi kwɔmne la beyin, 19 mindaŋ er ta ketize rɔgwɽɔ reŋen ṯugwagiza tizaw ṯeḏi lomur kla linḏi; ŋwu ṯaŋwu, er gwu ami irli la ŋwu eḏi miḏa ŋimiiḏa ŋir ŋimiiḏa rerec.
20 timuṯaawuz, aŋricazi ŋa ŋimɔŋa zi inḏeḏa. orlaca kenjera ŋwudɔŋw kiti keṯi nii Allah-na mac, na ŋupaḏalu ŋeṯir zi eca ŋidiny, ŋu ŋiri ṯilŋiiḏina, 21 kaka mer zi gwu miḏa lɔkwɔ ta, ner ŋi əkizi ṯəmna lomori puɽcur.
eḏi ṯimeca ṯeḏi ŋimɽi ŋeḏi Allah nani ŋa gwu. emba.