Mǝs-uliiyǝ kwǝthi Ṯiimɔɔthaaws ki-lizi lǝthi ṯǝmminǝ.
1 Ǝṯeere ǝrimici kwɔɔrɔ kweere kwɔppa mac, laakin ǝṯi firllasi-lɔ kaka ṯarnyalɔ. Nǝ lɔr lokwɔɽony ǝṯisi ruusi kaka liyaŋgalɔ, 2 laaw lɔppa ǝsi ruusi kaka laanyalɔ-ŋwsi, nǝ laaw lokwɔɽony kaka liyaŋgalɔ lir laaw, ṯɔgwor-thi ṯɔsɔɔɽɔ-na cɔr-cɔric.
3 Nǝ leethel lir laaw lir leethel rerrem, ǝṯisi iiɽinǝ. 4 Nǝ kweethel kwir kwaaw mɔŋw ǝthi nyɔɔrɔ ya nyugwurnǝyin, ethir aari @allima ethelŋe ŋothɽor ŋeeŋen kerreny ŋǝthi ḏiin ethisi ǝrrici lizi lǝthi dɔɔnɔ kweeŋen, mindaŋ ǝri ɽaanyaci rǝrnyin-ŋwɔsi lǝnyin-ŋǝli kaka nǝṯi-gwɔ ŋiɽaŋal ŋɔrɔŋw ǝmi Allah-na. 5 Kweethel kwǝṯi naani kwɔtɔpɔt, kwiirǝ kizǝn-nǝ, kwɔgittathɔ naanɔ-gwɔ Allah ṯɔɽɔk, kwǝṯaari isṯimir ethaari kiyiiriny, ethi uṯici ŋunduŋw-lɔ yulŋǝ yaaŋwɔnɔ ethi mǝcci. 6 Laakin kweethel ŋgwa kwǝthi ṯamɽa-na ṯaami ṯǝthi ṯurmun, kwǝni kwɔmǝ ai kerreny tuk, a-naanɔŋw-va kǝnnǝ kwɔmiithɔ tok. 7 Ɔraccasi mindaŋ mǝrseere kaṯṯaci lɔɔma-na leere mac. 8 Laakin mǝ kweere ere mǝcci lizi luuŋwun mac lǝthi dɔɔnɔ kwuuŋwun tittir tǝ, ŋwɔni kwǝvrinnǝ ṯǝmminnǝ ṯuuŋwun, nɔŋwɔni tok kwɔgiyathalɔ beṯṯen ethi ŋgwa-la kwiti kwǝthi ṯǝmminǝ mac.
9 Ǝṯeere lo kweethela kwir kwaaw kǝshif-nǝ kǝthi leethel mac, mɔŋweere oro yithlǝyu ruɽi-ṯoɽol kinnǝ mac, ŋgwa kwaagwɔ kwɔr kwɔtɔpɔt. 10 Kwandindisar kworo ŋothɽor-ŋi ŋuuŋun ŋisaaw, kwuɽuunǝ nyɔɔrɔ nyuuŋwun ŋisanna, kwǝṯi ǝnyji liirinǝ ki-dɔɔnɔ kwuuŋwun, kwɔmǝ iiyici kila lirllinǝlɔ ter ŋwaaralɔ ŋweeŋen, kwǝṯi mǝcci lizi ki-ṯurvǝ-nǝ ṯeeŋen, kwɔmǝ kittatha rogɽo-ri ruuŋwun ethisi ǝrri-ri ŋisaaw-ŋisaaw raay tatap.
11 Laakin ǝṯi ǝmminǝ ethi lo leethela lir laaw liyaŋ kǝshif-nǝ mac; kaka mǝsi sɔɔrɔm annasi ethi aagithi tǝ, ǝṯir ɔrlacci Kwɔrɔstɔ-ŋw ŋwɔdoŋw, 12 mindaŋ ǝṯiroro kaṯṯi kaka mǝr-gwɔ kiici ŋunduŋw wa@ḏa-na wa wuɽuthur kerreny. 13 Ǝṯir aari @allima ethi ṯuusi ŋwɔɔmɔr-lɔ domony ethi rikikannalɔ ki-yiŋna-na; nǝ ŋa ŋigii beṯṯen, ǝṯir aari @allima ethi ɔŋwnɔthisi, ǝṯir-gwɔ ɔɽina mbic ŋiti ŋir ŋeeŋen mac, nǝ ǝṯirsi andasi ŋiti ŋɔvthanna ethisi andasi kworo mac. 14 Ŋwɔṯaŋw nǝnyii amɽi ethi leethel lokwɔɽony lir laaw ǝginni, ethi elŋe nyɔɔrɔ, ethi aŋiŋiraci dɔɔnɔŋw, mindaŋ ethi ṯuwǝn ṯǝri ere kaṯṯasi ṯaay mac, ethi andisasa nyuŋwsi naana, ŋiɽaŋal-ŋi ŋeere ŋigii. 15 Kaka mǝgwɔ leethel lokwo ɔṯṯasi kerreny tuk limǝ aaɽi kithaay nǝr rɔɔmi Shiiṯaana. 16 Laakin mǝ kwɔgrɔstiyan kweere kwir kwaaw, mɔŋwɔthi leethela leere ki-dɔɔnɔ kwuuŋwun tǝ, laazim ŋwɔsi aŋraci, mindaŋ etheere uvuni kǝniisǝ ṯɔɔvi ṯeere mac, laakin ethisi mǝcci kila lir leethel-na keene-keene liira kizǝn-nǝ.
Lishiyuukh lǝthi kǝniisǝ.
17 Ethi lishiyuukh kila lǝṯi akkɔ ŋothɽor tig-tig ŋisaaw kǝniisǝ-nǝ aavi ɔjra weeŋen nyaamin-na nyiɽǝn nǝ kila tittir lǝṯi akkɔ ŋothɽor tig-tig ethssri bǝshirǝ nǝ ethaari @allima tok. 18 Kaka naarɔ-gwɔ Kiṯaab Kirllinǝlɔ ter ŋwɔ: “Ǝṯeere kǝkki tithri ṯuunyu mac, kira tǝṯi ippi ŋwaana ŋwaara-ŋi”, na “Nǝr ɔvthanni ethi @aamil aavi ɔjra wuuŋwun.” 19 Ǝṯeere ǝmmini shǝkwǝ kweere kinnǝ mac kwallisar shekha naana illi mɔŋwɔthi shuhuuḏǝ-nǝ kwuɽǝn ya ṯoɽol. 20 Nǝ kila lǝṯi dirnaṯṯi ki-ŋikiya-na tǝ, ǝsi ǝrimici tig-tig kiyǝnǝ yǝthi lizi mindaŋ mǝr ṯeenye lithaathɔ.
21 Nyii kwuṯucǝ-ŋǝlɔ ṯiiɽǝ-thi-nǝ kiyǝnǝ yǝthi Allah nǝ yǝthi Kwɔrɔstɔ kwǝni Yǝcu nǝ yǝthi limeleka lirllinǝlɔ ter, ethi mithǝ ṯa@liima kɔthɔ, etheere ǝthi ṯɔṯana ṯeere mac, ethisi ǝrrici tatap ŋibɽithi-na. 22 Ǝṯeere fiɽigathi mac ethi kette rii kwizi-lǝ kweere kwinḏi ethi ǝkkici Kweelenyi ŋothɽor. Ǝṯeere oro dɔŋw kwizi-gi kweere ki-ŋikiya-na ŋuuŋun mac; ǝṯi aŋraci rogɽo rɔɔŋwa ethi naani rɔsɔɔɽɔ.
23 Ǝṯeere ii ŋaaw kwokwony ṯɔɽɔk mac, laakin ǝṯi ii tiɽicaŋi tokwo tok, ethi mǝcci ŋaaŋwɔ kimǝthi-nǝ kǝthi kaari kɔɔŋa kǝ-ṯuumi dok-dok.
24 Ŋikiya ŋǝthi lizi lokwo ŋǝṯi ijinǝlɔ por-por, ŋǝṯisi iili ki-hɔkwɔm-na; laakin ŋǝthi lithaathɔ tǝ, ǝṯir ruwǝnnǝlɔ kwaathan-gi. 25 Na nǝr-ṯǝ oroŋw tok, nǝṯi-gwɔ ŋothɽor ŋisaaw iijinǝlɔ por-por, na mǝr kinnǝni ere iijini mac tǝ, ǝṯireere ǝthi ŋɔma mac ethi tǝ luccunǝthǝ dok.
aza 5
1 etere ermici kworu kwere kwupa mac, lakin eti andicalu mamak kaka tarnyalu; na lir lɔkwɽeny eṯi zi errici kaka liaŋgalu, 2 na lir law lupa, eṯi zi ruzi kaka lanyalu ŋwuzi; na law lɔkwɽeny, eti zi ruzi kaka liaŋgalu lir law, ṯizuɽu ṯi-na cucuɽic.
nizam kweḏi leḏel kaniiza-na
3 eti nii leḏela-na lir law, kla lir leḏel rerem. 4 ma kweḏel kwere eḏi nyoru ya lukwurneyin, er deŋtini kerreny eḏelŋe loma leḏi ḏiin ṯeŋen ki ŋiaŋga-na, er ɽanyaci rernyin ŋwuzi lenyin ŋali ṯimeca ṯeŋen ṯeḏi kerrenyŋw, ŋinderṯa ŋir ŋizaw ŋamɽa zi Allah. 5 ŋgwa kwir kweḏel rerem, kweṯi nani kwutuput, kwunderṯa kweṯalliḏa Allah ṯugwori nana ṯəkiza ṯi kizen, na eṯuŋw ari ŋwal ki, kullu kullu, kaŋwun kaŋwun; 6 lakin na ŋgwa kweṯamɽi rɔgwɽɔ ruŋwun eḏi zi utezi kwɔmne nana, kweni kwayyu miiḏuŋw gwu ta kinna. 7 oracazi ŋi ŋu, mindaŋ mer zi ere ruzi kaṯi tiɽaŋal ti tere mac. 8 muŋw ere kwere eḏizaŋraci mac leni luŋwun, na leḏi duənuŋw kwuŋwun titir, nuŋw orɔ kwumefrini ṯəmna ṯuŋwun, na ŋikya ŋuŋun ṯamḏu ŋikyaŋi la ŋeḏi kla liira ṯəmna.
9 eṯere enji yiriny yeḏi kwaw kwir kweḏel ki rol-na mac, kwiti kwumorɔ yiḏleyu ruɽi-ṯɔɽɔl kinna mac; enji ŋgwa kwumɔ nani nani gwu kwulen kwutuput dak, 10 kwandindizar ŋɔḏɽor ŋi ŋuŋun ŋizaw, kwumaŋraci nyoru nyuŋwun tɔk, kwaminda lirina, na kwumɔ ii ŋwara nana ŋweḏi kla lirlinelu ter eḏi Kwruztu-na, kwumɔ zi meci leḏi ṯurfa, kwumɔ zi errici ŋizaw ki ŋiɽaŋal-na ŋuŋun tatap, 11 lakin eṯere enjici leḏela yiriny ki rol-na lir kamal kinna mac, kaka inḏi zi gwu zurum kweḏi yaŋna eḏi zi urli Kwruztuŋw nana, mindaŋ mer zi naŋni eḏagwu. 12 mindaŋ mer kaṯazi hukma, kaka mer gwu orlaci ṯikitaḏa ṯeŋen ṯeḏi kerrenyŋw ŋwudɔŋw. 13 ŋiɽaŋal ŋi ṯa ŋu eṯir orɔ limozɔ, eṯir kwukwuḏezi la kenjer gi ki duənu-na, na ṯuŋwun ṯi tɔk, na eṯir zi andazi ŋiti ŋizaw eḏi zi andazi mac. 14 ŋwu ṯaŋwu, nenyi naŋni leḏela lir law lir kamal, eḏi zi agwu, eḏelŋe nyoru, eḏaŋraci duənuŋw kweŋen, mindaŋ ma kla leḏi ṯuwənu ki rugwor-na ere eḏi ŋuma mac eḏi ruzi nyuŋwuzi luŋw. 15 kaka mer gwu ṯirenylu lɔkwɔ eḏi kwaḏiḏa zeyṯaanŋw. 16 ma kwruztyan kwere, kwir kwor ya kwir kwaw, kwedi lieŋgen lir leḏel lir law, etuŋw zi meci; eḏere urreḏa kaniiza-na mac; taŋwu eḏi zi kaniiza meci kla lir leḏel rerem.
lijowiṯ leḏi kaniiza
17 eḏi lijowit letaŋraci ŋɔḏɽor ŋeḏi kaniiza ŋama-ŋamaŋ orɔ leṯir zi kikindeci ṯiniiya-na; eṯir ṯi tamḏu letorɔ yafur eḏi zi andaci ŋeḏi injiil, na letizilŋiiḏini tɔk. 18 kaka ari gwu kiṯam kirlinelu ter, ŋwu: etere kəki tiḏri ṯunyu mac kra teṯipii ŋwana ŋwara ŋi; na ŋofḏana eḏi kwɔḏɽor afi ujra weḏi ŋɔḏɽor ŋuŋun. 19 etere miḏa ŋiɽaŋali ŋere kinna mac eḏi ruzi kwijowiṯ kweḏi kaniiza kaṯi, illi mer inḏaci lizuhuuḏa nden ya ṯɔɽɔl, liminḏa ŋiɽaŋali yey nana. 20 na kla leṯi dirnaṯi ŋikya-na ṯirṯir ermicer zi ki yey-na yeḏi tatap, mindaŋ mer tenye kla liḏaḏu tɔk. 21 nyi kwicaŋa ki yey-na yeḏi Allah, na Kwruztu kweni Yecu, na limaleyka tɔk licarzi-na, eḏi miḏi ŋiɽaŋali ŋu mindaŋ eḏere amɽi kweṯe kweḏi kaniiza beṯen eḏi kwuḏaḏu la mac, lakin eti zi errici tatap ŋibiɽḏina. 22 etere fiɽgaḏi kinna mac eḏenji kwere, kita ŋa gwu rii kindala, ya kezni mezerri ŋu na eni ŋa limoɽmati kwizi ŋali ŋgwa ki ŋikya-na ŋuŋun; eṯaŋraci rɔgwɽɔ rɔŋwa eḏi zuɽu-na cucuɽic.
23 eṯere ii ŋaw dak mac lakin eti ii nabita kwɔkwɽoc kaka dawa, eḏi meci kimeti keḏi kari kɔŋwa, na kimeti kir-na ter ter tɔk.
24 na ŋikya ŋeḏi lizi lɔkwɔ eṯir ruwene lu pɔrpɔr, ŋinderṯa ŋeṯi zi iili ki hukm-na, lakin na ŋikya ŋeḏi liḏaḏu, eṯir ijini kwaḏan kwɔkwɔ. 25 ŋwu taŋwu tɔk, na ŋa ŋizaw ŋeṯi zi lɔkwɔ erri, eṯir ruwene lu pɔrpɔr, ya mer ere ijini tuc mac, er ere eḏi ŋuma eḏi lucuni dɔk mac.