Ṯiinyi kwǝri kwǝthi-gi ṯiinyi ṯurmunǝ.
1 Kweere nyithak kwǝṯi ǝmminci Yǝcu-ŋw ethaarɔŋw kwir Kwɔrɔstɔ, kwǝni kwɔrɔ tɔr tǝthi Allah. Nǝ kweere nyithak kwǝṯi amɽi papa-ŋw, ǝṯɔŋw amɽi tɔɔrɔ tuuŋwun tok. 2 Nǝ ŋiɽaŋal-ŋi ṯǝ ŋɔ, nǝr elŋe ethaarɔŋw a kwǝṯir amɽi nyɔɔrɔ nyǝthi Allah, mǝr amɽi Allah nǝ mǝr iinyici awaamira wuuŋwun naana tok. 3 Kaka nɔrɔ-gwɔ ṯǝ ṯamɽa kɔthɔ ṯǝthi Allah, ethi mithǝ awaamira wuuŋwun. Nǝ awaamir wuuŋwun tǝ, nɔŋweere ferlle beṯṯen mac. 4 Kweere nyithak kwelŋenne ŋelŋe ŋǝthi Allah ǝṯɔŋw illazi ṯurmunǝ kii; nǝ nǝṯǝ ṯiinyi oro ŋgwɔ kwǝthi-gi illazi ṯurmunǝ kii, kwǝni ṯǝmminǝ ṯǝri. 5 Ǝyǝ kwɔrɔ kwǝṯi illazi ṯurmunǝ kii? Illi ŋgwa kwǝṯi ǝmminici Yǝcu-ŋw ethaarɔŋw kwir Tɔr tǝthi Allah.
Ethi kette shahaaḏa kwǝni Yǝcu.
6 Nǝṯǝ Yǝcu kwɔrɔstɔ oro ŋgwɔ kwinḏi ŋaaw-ŋi nǝ ŋin tok, nɔŋweere iila ŋaaw-ŋi ṯɔɽɔk mac, laakin nɔŋw iila ŋaaw-ŋi nǝ ŋin ŋi tok. 7 Nǝ Ṯigɽim oro ṯir shuhuuḏ, kaka nɔrɔ-ŋgwɔ Ṯigɽim ṯir rerrem. 8 Shuhuuḏ kwɔnaanɔ ṯoɽol, Ṯigɽim, ŋaaw, nǝ ŋin, kɔlɔ lir ṯoɽol nǝrsi ruusi ṯuunyu ṯɔtɔpɔt. 9 Mǝr ǝmmini shahaaḏa kwǝthi lizigwunǝŋ tǝ, laakin nǝtǝ shahaaḏa kwǝthi Allah ṯamtha-lɔ; kaka nɔrɔ-gwɔ shahaaḏa ŋgwɔ kwǝthi Allah kwɔgitta-ŋw kwǝni Tɔr tuuŋwun. 10 Kweere kwǝṯi ǝmminici Tɔɔrɔ tǝthi Allah, ǝṯɔŋwɔni kwǝthi shahaaḏa ki-rogɽo-na ruuŋwun. Nǝ kweere kwiti kwǝmminici Allah mac tǝ, ǝṯɔŋw ruusi ŋunduŋw kwǝluŋw, kaka niti nǝmmincǝ-ŋgwɔ shahaaḏa mac kwigitta Allah kwǝni Tɔr tuuŋwun. 11 Nǝṯǝ shahaaḏa oro ŋgwɔ kwǝniŋw. Allah winḏǝthǝ-nyji ŋimiitha ŋǝṯi nannitha dok-dok, nǝ ŋimiitha ŋɔ tǝ, nǝr nanni ki Tɔr-na tuuŋwun. 12 Ŋgwa kwǝthi Tɔɔrɔ ǝṯɔŋw-ǝthi ŋimiitha; nǝ kwiti kwǝthi Tɔɔrɔ ṯǝthi Allah mac tǝ, nɔŋweere ǝthi ŋimiitha tok mac.
Ŋimiitha ŋǝṯi nannatha dok-dok.
13 Nyii ŋgwa kwɔlɔcca-ŋǝsi kila lǝṯi ǝmminici yiriny yǝthi Tɔr tǝthi Allah, mindaŋ mǝsi elŋe ethaarɔŋw ŋaaŋa lǝthi ŋimiitha ŋǝṯi nannatha dok-dok. 14 Nǝṯǝ ŋuugul oro ŋɔ ŋǝthirsi duŋgwun-nǝ, mǝr uṯicǝlɔ kwomne-gi kweere ŋiɽaŋal-ŋi ŋǝthi ṯɔgwor ṯuuŋwun kwǝnyji tǝ niŋnaci. 15 Na mǝr elŋe ethaarɔŋw kwǝṯi-nyji niŋnaci kwomne-gi kweere nyithak kwǝṯir-gi uṯicǝlɔ, ǝri elŋe ethaarɔŋw kwɔmǝri aavi ŋgwa kwuṯucǝr-gǝlɔ. 16 Mɔŋweese kweere eŋgen kwǝrrǝ ŋikiyaŋi ŋiti ŋir ŋǝthi ŋiɽany mac, ethiŋw ǝrici kiyiiriny mindaŋ mǝ Allah inḏǝthǝ ŋimiitha ŋa ŋǝthi kila liti lǝṯi ǝrri ŋikiyaŋi ŋǝthi ŋiɽany mac. Ŋikiya ŋinaanɔ ŋǝthi ŋiɽany; ŋiti ŋandisa-nyji ŋɔ mac, mindaŋ ethi kweere ere ǝrici ŋiɽaŋali ŋɔ kiyiiriny mac. 17 Ŋiɽaŋal tatap ŋigii ŋir ŋikiya, laakin nǝ ŋikiya naani ŋette ŋiti ŋir ŋǝthi ŋiɽany mac.
18 A kwilŋithir rac ethaarɔŋw mǝ kweere elŋenne ŋelŋe ŋǝthi Allah ṯǝ, ǝṯɔŋweere ǝrri ŋikiyaŋi mac, laakin ǝṯi Tɔr tǝthi Allah aŋraci mindaŋ ǝṯi ŋgwa kwigii ere iilatha naana mac.
19 A kwilŋithir rac ethaarɔŋw, a kwirir lǝthi Allah, nǝ ṯurmun tatap tǝ, nɔŋw naani ki-rii-nǝ rǝthi ŋgwa kwigii.
20 Nǝ nǝrsi elŋe tok ethaarɔŋw Tɔr tǝthi Allah timǝ iila mindaŋ nɔŋw inḏǝthǝ nyuŋwsi ṯilŋiṯṯana ethelŋe Allah wir rerrem; na nǝr naani ki Allah-na wir rerrem, ki Tɔr-nǝ ṯuuŋwun ṯǝni Yǝcu kwɔrɔstɔ. Nǝṯǝ Allah oro wɔ wir rerrem nǝ wir ŋimiitha ŋǝṯi nannitha dok-dok. 21 Kwelle kwiinyi kwokwɔɽony, ǝṯi aŋraci rogɽo raalɔ ki-riiɽu-nǝ rir ŋidiny.
aza 5
ṯəmna ṯeḏi likwruztyan
1 kwete nyiḏak kwemnici Yecuŋw eḏaruŋw kwiri Kwruztu, eṯi kwizi ŋgwa eni tor teḏi Allah; kweṯamɽi papaŋw kwere eṯuŋw amɽi toru tuŋwun tɔk. 2 ŋwu taŋwu, mer amɽi Allah, na mer inyici amra wuŋwun nana ta, eṯir amɽi nyoru nyuŋwun tɔk. 3 kaka eḏamɽi Allah ŋeni ŋwu, eḏir miḏa amra wuŋwun; na eṯi amr wuŋwun ere orɔ ṯofi mac, 4 kaka eṯi zi gwu nyor nyeḏi Allah illazi ki ŋeḏi ṯurmun. na ṯəmna ṯeri ṯinderṯa kḏu ṯeṯizi illazi ki ŋeḏi ṯurmun. 5 eya kwiri kweṯi zi illazi ki ŋeḏi ṯurmun? ŋgwa kwemnici Yecuŋw edaruŋw, kwiri Tor teḏi Allah.
6 kwunderṯa ŋgwu kwumila ŋiɽaŋal ŋi ŋeḏi ŋaw, na ŋeḏi ŋin, kwir Yecu Kwruztu, nuŋw ere ila ŋaw ŋi dak mac, lakin ŋaw-ŋa ŋin ŋi. na Ṯigɽim ṯirlinelu ter eṯuŋw orɔ zuhuuḏ, kaka ur gwu Ṯigɽim ŋundu ŋirlalu. 7 kaka eṯir nani lir ṯɔɽɔl kilerena leṯunḏizi ŋirlalu ki, kwete kwir Papa, na kwete kwir ŋiɽaŋal ŋir yilim, na kwete kwir Ṯigɽim ṯirlinelu ter, ner orɔ lir-na ṯɔɽɔl kwutuput. 8 eṯir nani lir lizuhuuḏ lir ṯɔɽɔl, kwete kwir Ṯigɽim ṯirlinelu ter, na kwete kwir ŋaw, na kwete kwir ŋin; na eṯir kiɽmiḏi ŋiɽaŋal-na. 9 mer emni ṯunḏiza ki ṯeḏi lizigwunaŋ ta, eṯi ṯunḏiza ki ṯeḏi Allah eni ṯiṯemḏelu; na ṯunḏiza ki ṯeḏi klu lir ṯɔɽɔl eni ṯunḏiza ki ṯeḏi Allah ŋundu, unḏizaŋw zi gwu ki ŋeḏi Tor tuŋwun. 10 ŋgwa kweṯalliḏa Toru teḏi Allah ṯugwori nana ṯəmna ṯi, eṯuŋw eḏi ṯunḏiza ki kḏu ki ṯugwor-na ṯuŋwun. lakin ŋgwa kwiti kwemnica Allah ŋiɽaŋali mac, eṯuŋw ruzi ŋunduŋwu kwəluŋ, kaka iti emnica zi gwu Allah ṯunḏiza ṯuŋwun ki mac ŋeḏi Tor tuŋwun. 11 na ṯunḏiza ki orɔ kḏu, Allah wumenyji inḏeḏa ŋimiiḏa ŋiaŋ, ŋinḏi eḏi nanniḏa dɔk, na eṯi ŋimiiḏa ŋu nanni ki Tor-na tuŋwun. 12 ŋgwa kweḏi Toru-na kweḏi ŋimiiḏa-na, na ŋgwa kwiti kweḏi Toru-na teḏi Allah mac, kwiti kweḏi ŋimiiḏa-na ŋu tɔk mac.
juwab kwumɔ irmiḏiḏi
13 ŋulucaŋazi ŋu leṯalliḏa yiriny yeḏi Tor teḏi Allah rugwori nana, mindaŋ ma elŋe rac, a leḏi ŋimiiḏa-na ŋiaŋ, ŋinḏi eḏi nanniḏa dɔk. 14 a kweḏir ŋuma eḏi duŋgwaḏa Allah nana ṯubonya ṯi, ilŋiicar gwu ŋwu, mer uṯizelu kwɔmne gi kwere ṯugwor ṯi tuŋwun, etuŋw niŋnaci nyuŋwuzi. 15 na mer elŋe eḏaruŋw, kweṯinyji niŋnaci kwɔmne gi kwere kwuṯizar gi lu, er elŋe tɔk eḏaruŋw, kwumer ta afi ŋgwa kwunaŋnaḏir ŋunduŋwu. 16 muŋw eze kwere eŋgen kwakizi pir, ŋiti ŋir ŋeḏi ŋiɽany mac, eḏuŋw ŋi uṯalu, a Allah inḏeḏa ŋunduŋwu ŋimiiḏa ŋeḏi kla liti limezerri ŋiki ŋeḏi ŋiɽany mac. ŋikya ŋinani rac ŋir ŋeḏi ŋiɽany; nyi kwiti kwaruŋw mac, eḏuŋw ari ki yiriny ŋeḏi ŋu. 17 kwɔmne tatap kweṯir erri kwiti kwofḏana mac kwiri ŋikya, lakin na ŋikya nani ŋiti ŋir ŋeḏi ŋiɽany mac.
18 a kwilŋiiḏir eḏaruŋw, kwere kwumer elŋe ŋelŋe ŋi ŋeḏi Allah kwiti kweṯizerri ŋiki mac, na kra tir Tor teḏi Allah, etuŋw aŋraci; na ŋgwa kwiki, kweni ibliiz, ere eḏi ŋuma mac eḏi mummi nana.
19 a kwilŋiiḏir rac, a kwirir leḏi Allah, na ṯurmun tatap nani ki rii-na reḏi ŋgwa kwiki.
20 a kwilŋiiḏir tɔk eḏaruŋw, Tor teḏi Allah timila, timenyji inḏeḏa teḏinayeyna eḏi ṯi elŋece ŋunduŋwu kwir rerem; eṯir nanni keni duŋgwun-na kwir rerem, kaka eṯir gwu nanni eḏi Tor-na tuŋwun, teni Yecu Kwruztu, ŋgwa kwir rerem kwiri Allah, na eḏi gwu nanni duŋgwun-na eni ŋimiiḏa ŋiaŋ, ŋinḏi eḏi nanniḏa dɔk. 21 kwelle kwinyi, aŋricar rɔgwɽɔ ralu kwɔmne-na kweṯir kwɔkwocelu, kwiti kwir Allah rerem mac.