Ṯɔṯalɔ ṯǝthi ṯaaga.
1 Nǝ ŋiɽaŋal ŋa ŋuṯicǝr-nyii ŋǝlɔ ki-juwaab-na kwaalɔ. Ŋɔvthanna ethi kwɔr ere aagithi mac. 2 Laakin sǝbǝb-ŋi kwǝthi ṯɔmɔmma ṯǝthi ŋiijin tǝ, nǝr ɔvthanni ethi kwɔr ǝthi kwayɔ kwuuŋwun, nǝ a kwaaw ǝthi kwɔɔrɔ kwuuŋwun tok. 3 Ethi kwɔr ǝrrici kwayɔ kwomne kwǝthi ŋaaw ŋuuŋun, na ǝsi kwaaw ǝrrici kwɔɔrɔ ŋǝthi ŋɔr ŋuuŋun tok. 4 Kaka niti nǝthi-gwɔ kwaaw sɔlṯa kaŋna-la wuuŋwun mac, laakin nǝ kwɔlen oro; nǝrṯoroŋw tok, ǝṯi kwɔr ere ǝthi sɔlṯa kaŋna-la wuuŋwun mac, laakin nǝ kwaaw kwuuŋwun oro. 5 Ǝṯeere dirnathisina mac, illi mǝmmini ethi rilli kwokwo kinnǝni, mindaŋ mǝ kaṯṯasi lɔɔmɔri lǝthi-li aari kiyiiriny, nǝ kwaathan tǝ ǝmǝ ɔɽɔmaṯṯi kwokwony, mindaŋ mǝŋǝsi Shiiṯaan ere mɔmmi mac, meere mithǝ rɔgwori kǝzir weere mac. 6 Ŋandica-ŋǝsi ŋɔ ŋiti ŋir waamir mac, laakin nǝrǝni ŋejmeth. 7 Nyii kwǝŋgi aamina ǝŋgi lizi tatap oro kaka nyuŋwɔ. Laakin lizi lǝṯǝthi haḏiiyyǝ weeŋen leere-leere wir kaka winḏǝthǝsi Allah wirna ter-ter.
8 Ŋandica-nyji ŋɔ lɔɔrɔ-ŋwɔsi laaw-li liti laagithɔ kinnǝni mac nǝ leethel lir laaw tok, ŋisaaw ethi naani domony kaka nyuŋwɔ. 9 Laakin mǝreere ǝthi ŋɔma ethi mithǝ rɔgwori mac tǝ, ethir aagithi. Kaka nɔvthannar-gwɔ ethi aagithi ki-lɔɔbi lǝthi-li dunnuni naana sɔɔrɔm-gi.
10 Nǝ ŋǝthi lizi kila laagithɔ tǝ, nǝnyji ǝthici waamira witi wir wiinyi mac, laakin nɔŋworo wǝthi Kweeleny. Ǝṯi kwaaw ɔrlacca kwɔlen ŋwɔdoŋw mac 11 (laakin mɔŋwsi ǝrri kǝzir weere tǝ, ǝtɔŋw ǝginǝ kwokwony mac, ya ŋwɔ daɽimatha ŋiɽaŋali kwɔlen-gi, e-ta ŋwɔmǝ aaɽitha naanɔ-ŋgwɔ), nǝ a kwɔr ere ǝccǝ kwayɔ kwuuŋwun ṯolliga mac.
12 Nǝ kila lithaathɔ tǝ, nyjǝccǝŋw nyii, ŋiti ŋir ŋǝthi Kweeleny mac, mǝ kwɔgrɔstiyan kweere ǝthi kwayɔ kwiti kwǝthi ṯǝmminǝ mac, laakin mɔŋw ǝmmini ethi nanni ŋundu-gi tǝ, ŋweere ǝccǝ ṯolliga mac. 13 Nǝ mǝ kwaaw ǝthi kwɔɔra kwiti kwir kwɔgrɔstiyan mac, laakin mɔŋw ǝmmini ethi-ŋi nanni tǝ, ŋweere ǝccǝ ŋunduŋw ṯolliga mac. 14 Nǝ kwɔr kwaagithɔ kwiti kwǝthi ṯǝmminǝ mac, kwinḏi Allah ethi ǝmmini ŋiɽaŋal-ŋi ŋǝthi kwaaw kwuuŋwun kwǝthi ṯǝmminǝ, nǝ kwaaw kwiira ṯǝmminǝ a Allah ǝmmini tok ŋiɽaŋal-ŋi ŋǝthi kwɔr kwuuŋwun kwǝthi ṯǝmminǝ, nǝ mǝreere oroŋw mac tǝ, a nyɔr nyaalɔ ere suuɽunni mac. Laakin nǝrtǝ ǝni nyirllinǝlɔ ter tɔttɔr. 15 Laakin ŋgwa kwiira ṯǝmminǝ mɔŋworo kwɔnaŋna ṯifaathalɔ ta, ethir faathalɔ; mǝr ǝrrini ŋirṯaŋw tǝ, nǝ kwɔr ŋgwa kwǝthi ṯǝmminǝ, ya kwaaw ŋgwa kwǝthi ṯǝmminǝ ere kǝkkini ŋundu-ŋgi ŋgwa mac. Kaka nɔrnɔṯɔ-nyji-gwɔ Allah ethaami naanɔŋw lammithɔ. 16 Kwaaw kwaalɔ, a kwilŋithi aŋgwɔrɔ ethaarɔŋw a kwiti kwinḏi ethi kilǝthi kwulǝlɔ mac? Kwɔr kwaalɔ, a kwilŋithi aŋgwɔrɔ ethaarɔŋw a kwiti kwinḏi ethi kilǝthi kwayɔ kwɔɔŋa mac?
Ǝṯeere aaralɔ tiŋgil-tiŋgil mac ki-ṯǝmminǝ-nǝ.
17 Ethɔŋw aami eleŋw kweere nyithak ki-ŋimiitha-na ŋuuŋun ŋa ŋinḏǝthǝsi Kweeleny haḏiiyyǝ, kaka ṯǝ kinaŋw nannɔ-ŋgwɔ kinaŋw nɔrnɔṯɔ-gwɔ Allah. Gaanuun kiinyi kirṯa ŋgɔ kǝṯinyii-gi aari @allima ki-yǝniisǝ-nǝ tatap. 18 Ŋgwa kwɔnaanɔ kweere kwuuɽunnǝ kerreny tuk niti nɔrnɔṯɔ Allah kinnǝni mac-a? Ǝṯɔŋw ṯǝccicǝ ethi kwuɽubǝthǝ @alaama-lɔ mac wǝthi ṯuuɽunnǝ. Ŋŋwa kwɔnaanɔ kweere kwiti kwuuɽunnǝ mac kinaŋw mǝ Allah ɔrnɔṯa? Ǝṯɔŋw-mǝ naŋna ṯuuɽunnǝlɔ mac. 19 Kaka niti nɔrɔ-gwɔ ṯuuɽunnǝ riɽaŋal ŋeere mac, wala ṯuuɽunnǝ ṯiira ethoro ŋiɽaŋal ŋeere. Laakin ethi mithǝ Sherii@a kwǝthi Allah noŋworo kwǝwthi. 20 Ethi-ta kweere nyithak nannitha kinaŋw, kaka tǝ kinaŋw nɔrnɔṯɔ-gwɔ Allah. 21 A kwir kwɔwaay kinaŋw nɔrnɔṯɔ-ŋa Allah? Naani-ṯǝ nyithak; laakin mǝ kaṯṯasi ṯaay ṯǝthi hɔrriiyya tǝ, ǝsi kǝniny ǝrri. 22 Mǝ Kweeleny ɔrnɔṯi kwɔwaaya kweere tǝ, ǝṯɔŋworo kwizi kwɔmoro hɔrr Kweeleny-ŋgi. Nǝ ŋwɔṯaŋw tok, mǝ Kwɔrɔstɔ ɔrnɔṯi kwizi kweere kwir hɔrr tǝ, ǝtɔŋworo kwɔwaay kwuuŋwun. 23 Allah wumǝ-ŋǝsi liṯṯa yiili-yi; ŋwɔṯaŋw ǝṯeere oro lɔwaay lǝthi lizi mac. 24 Ŋwɔṯaŋw liyǝŋgǝri liinyi ŋɔvthanna ethi nannatha ki-ŋɔmath-na Allah-yi kaka ṯǝ kinaŋw nɔrnɔṯɔ-ŋgwɔ ŋaaŋwɔsi.
Ṯɔṯalɔ ṯǝthi kila liti laaŋithɔ mac, nǝ leethel tok.
25 Nǝ ŋiɽaŋal ŋǝthi kila liti laagithɔ mac tǝ; ninyjeere ǝthici waamira weere mac wǝthi Kweeleny, laakin lǝnyji inḏǝthǝ fikirǝ kwiinyi kaka kwizi kwette kwǝṯir allatha rɔgwori naana ŋimɽi-ŋi ŋǝthi Kweeleny. 26 Nyii kwaarɔŋwa, kaka a-naanɔ-gwɔ ṯurvǝ kire-kirem ŋgwɔ tǝ, nǝr ɔvthanni ethi kwizi naani ṯǝŋw domony. 27 A-ŋgwa kwaagithɔ-a? Ǝṯi-mǝ naŋna ṯaayi-lɔ ethaari ṯolliga mac. A kwiti kwaagithɔ kinnǝni mac-a? Ǝṯi-mǝ naŋna ṯaagalɔ mac. 28 Laakin mǝ aagithi tǝ, neere ǝni kwǝrrǝ ŋikiyaŋi mac, na mǝ ŋiira ŋeere ǝgini tǝ, nǝreere ǝni ŋǝrrǝ ŋikiyaŋi mac. Laakin kila laagithɔ ǝri kaṯṯasi ṯurvǝ ṯǝthi ṯurmun, laakin nyii-tǝ nǝŋǝsi naŋni ethi rucci ṯurvǝnǝ kithaay. 29 Liyǝŋgǝri liinyi, ŋiɽaŋal ŋiinyi ŋǝniŋwɔ, lɔɔmɔr limǝ aadithi keṯṯok; nǝ kirem ṯaŋw tǝ, ethi kila laagithɔ oro kaka liti laagithi mac, 30 nǝ kila lǝṯi aari, ǝri oro kaka kila liti lǝṯi aari mac, nǝ kila lǝṯi nyeŋlena, ǝroro kaka kila liti lǝṯi nyeŋlena mac, nǝ kila lǝṯi illilla ǝroro kaka kila liti lǝṯǝthi mac ŋgwa kwǝṯir liṯṯa, 31 nǝ kila lǝṯisi piŋi ŋǝthi ṯurmun kiyǝnǝ yeeŋen, ǝrisi ruusi kaka ŋiti ŋɔppa mac kiyǝnǝ yeeŋen. Kaka ninḏi-gwɔ ṯurmun kɔthɔ etheere nannatha tɔttɔṯ kwokwony mac.
32 Nyii kwɔnaŋna-ŋǝsi etheere pipinni rɔgwor-na mac. Ǝṯi kwɔr kwiti kwaagithɔ mac, ǝṯɔŋwsi kettice yǝy ŋǝthi Kweeleny, nǝ kwinḏi ethǝmi Kweelenyi-na aŋgwɔrɔ; 33 nǝ ŋgwa kwaagithɔ tǝ, ǝṯɔŋw-ŋi pinni ṯɔgwor-na ŋǝthi ṯurmun, kwinḏi ethǝ-mi kwayɔ-na kwuuŋwun aŋgwɔrɔ, 34 ǝṯɔŋw mɔmlɔttanni raay riɽǝndǝk. Nǝ kwaaw kwiti kwǝginǝ mac, ya kiŋoɽo ǝṯɔŋwsi kettice yǝy ŋǝthi Kweeleny, kwinḏi ethi rilli aŋnalɔ ter aŋgwɔrɔ ṯigɽim-thi ṯuuŋwun; laakin kwaaw kwǝginǝ tǝ, ǝṯɔŋwsi kettice yǝy ŋǝthi ṯurmun, ethǝ-mi kwɔlen-na. 35 Ŋandica-ŋǝsi ŋɔ ethoro faayitha kwaalɔ, nǝreere ǝniŋw, ethi kǝkki ŋaaŋwɔsi mac, laakin ǝsi ǝrri ŋa tatap ŋɔvthanna ŋǝmǝ-ŋǝmmǝŋ, mindaŋ mǝ ǝkkici Kweelenyi ŋothɽor ṯɔgwor-ṯhi ṯɔtɔpɔt.
36 Mǝ kwɔr kweere aarɔŋw nyii kwɔmǝ ɽindaŋnalɔ eṯhi iiɽi tiira-na tiinyi timthi-nyii nda kaka mɔŋgwɔ ṯimmayini ŋayɔ, nǝ mɔŋw ǝni kwɔmǝ dunnuni sɔɔrɔm-gi naana beṯṯen tǝ, ethɔ-ŋwsi ǝrri kaka ŋa ŋamɽa ṯɔgwor ṯuuŋwun, ethir aagithi nǝ ŋikiya ŋiti ŋir mac. 37 Laakin mǝ kwɔr ere ǝthi ŋiɽaŋali ŋeere ŋinḏi ethi kwɔrmɔṯasi ŋunduŋw mac ethisi ǝrri, nǝ mɔŋw kittatha tig-tig etheere aagithi mac, nǝ mɔŋw ǝthi ŋɔma ethi mithǝ ṯɔgwori min-min tok, nǝ mɔŋw kittatha ki-ŋaɽiny-na kerreny tuk ethisǝrri tǝ, nɔŋwɔni ŋǝrrǝ-ŋwsi ŋisaaw etheere aagwɔ tiira mac. 38 Ŋwɔṯaŋw mǝ kwɔr aagwɔ tiira tuuŋwun, nɔŋwɔni ŋǝrrǝ-ŋwsi ŋisaaw. Nǝ ŋgwa kwiti kwaagwɔ kinnǝ tiira tuuŋwun mac tǝ, nɔŋwɔni ŋǝrrǝŋwsi ŋisaaw ŋithǝmthilǝ.
39 Kwaaw kwǝṯi kǝkkini kwɔlen-ŋgi mǝtǝ kwɔlen naani kinnǝni kwɔmiithɔ. Na mǝ kwɔlen ai tǝ, nɔŋworo hɔrr ethi ǝgini kwizi-gi ŋgwa kwamɽaŋw, laakin ethiŋworo kwǝthi Kweeleny. 40 Laakin ŋiinyi tǝ, nǝr ǝniŋw, ǝŋgwɔŋw naani domony tǝ, ǝŋgwɔŋw aamina beṯṯen. Ŋindǝr-ṯǝ-ŋɔ ŋǝthi fikir kwiinyi, nyii kwaarɔŋwa nyii kwǝthi Ṯigɽimǝ-nǝ tok ṯǝthi Allah.
aza 7
ŋiɽaŋal ŋeḏi ṯaga
1 nyi kwunaŋna eḏi aalani ŋiɽaŋali ŋimernyji luca ki juwab-na kwalu, ŋofḏana eḏi kwor kwere ere dugwuɽi kwayu nana kwere mac. 2 lakin kaka ur gwu ṯumɔmma ki ŋijin, kwor kwere kweŋgeḏi kwayu kwuŋwun dak, na kwaw kwere kweŋgeḏi kwulen kwuŋwun dak. 3 kwor kweŋginḏeḏa kwayu kwuŋwun kwɔmne kweḏi ŋaw, na kwaw kweŋginḏeḏa kworu kwuŋwun kwɔmne kweḏi ŋor. 4 kaka iti ur gwu kwaw kweleny kwedi aŋna wuŋwun dak mac, kwor kwiri; na kwor tɔk eṯuŋw ere orɔ kweleny kweḏi aŋna wuŋwun dak mac, lakin kwaw kwiri. 5 eṯere dirnaḏizina wuɽe-wuɽeny mac, illi ma emni eḏi zi erri ŋu ma gwu lomur amɽiṯaḏa ŋaŋwuzi, mindaŋ ta eḏi ŋuma eḏari ki yiriny ŋamaŋ; na kwaḏan kwɔkwɔ a ma oɽmaṯi duŋw kwokwony, a ṯa zeyṯaan ere eḏi ŋuma eḏi mummi ŋaŋwuzi mac, ŋaŋa liti leṯimiḏa rugwori ralu mac. 6 nyi kwaru ŋwu, ŋizaw eḏi zi erri ŋu, lakin nenyere ellici ŋaŋwuzi amra mac. 7 nyi kweŋgamina eŋgi lizi tatap orɔ kaka nyuŋwu, lakin lizi leḏi ŋiɽaŋali ter ter ŋir haḏiya weṯi zi Allah inḏeḏa were were.
8 nyi kwece loru lir yiŋaɽu, law li lir yiŋaɽu tɔk na leḏela, ŋofḏana deŋgen-na eḏi nanni lere lere domony kaka nyuŋwu. 9 lakin mer ere eḏi ŋuma mac eḏi miḏa rugwori ta, ŋizaw deŋgen er agiḏi; ŋofḏana eḏagiḏi mindaŋ er ere dunnini zurum gi kweḏi yaŋna mac.
10 nyi kwiti kwir mac kwinḏeḏa zi kla lir limagiḏi amra wu, na Kweleny orɔ. na ŋiɽaŋal ŋuŋun orɔ ŋu, eḏi kwaw kwere ere ru nani gwu kwulen mac 11 (lakin muŋw orlaci ŋwudɔŋw, lazim eḏi nanni domony kwutuput, ya eḏuŋw aɽiḏa nani gwu kwor kwuŋwun,). na kwor ta, lazim eḏuŋw ere dirnaḏa kwayu lu kwuŋwun mac.
12 nyi kwecaŋazi liḏaḏu ŋwu, nyi kwiri, Kweleny kwiti kwiri mac ŋundu, ma ŋiaŋga ŋere eḏi kwayu kwiti kweḏi ṯəmna mac kwemni eḏi gi nanni, ŋiti ŋofḏana mac duŋgwun eḏi dirnaḏa lu; 13 na ma kwaw eḏi kworu kwiti kweḏi ṯəmna mac kwemni eḏi gi nanni, ŋiti ŋofḏana duŋgwun tɔk mac eḏi dirnaḏa lu; 14 kaka ma gwu kwor kwiira ṯəmna ami nanuŋw kwaw gi kwirlinelu ter, na kwaw kwiira ṯəmna ami nanuŋw kwor gi kwirlinelu ter. eŋgir ere orɔ ŋwu mac ta, eŋgi nyor nyalu ere zuɽini mac, lakin ner orɔ kirem nyirlinelu ter. 15 lakin ma kwor kwere, ya kwaw kwere kwiira ṯəmna, naŋna eḏi dirnaḏa kwulen lu, efrinjer ŋwele. na kwor kwir kwruztyan ya kwaw tɔk, ner ere kəkini kaka luway mac ŋiɽaŋal ŋi ŋu, kaka ornuṯinyji gwu Allah ki ŋiɽena-na. 16 kwaw kwalu, a kwilŋiiḏi aŋgwuru eḏaruŋw, nyi kweḏi ŋuma eḏi kileḏi kworu kwinyi? kwor kwalu, a kwilŋiiḏi aŋgwuru eḏaruŋw, nyi kweḏi ŋuma eḏi kileḏi kwayu kwinyi?
17 eḏi ṯa kwere nyiḏak ele ki ṯay-na ṯinḏuŋw ṯi ornuṯuŋw gwu Allah, kaka ur gwu ṯay ṯuŋwun ŋiɽaŋal ŋeḏi Kweleny. wunderṯa wu wiri amr winyi ki yaniiza-na tatap. 18 kwizi kwumɔ fa ta nani kwere kwuɽuna luḏrunya kuruu gi ki lomur limɔ li Allah ornuṯi a? eṯuŋw ere ṯeci eḏi dimi ŋwuli kiṯay mac ŋweḏi ṯuɽuna. muŋw nani kwere kwiira ṯuɽuna kḏa ki lomur limɔ li Allah ornuṯi, eḏuŋw ere naŋni ṯuɽuna kuruu gi mac. 19 kaka iti ur gwu kuruu keḏi ṯuɽuna ŋiɽaŋal ŋere mac, ya eḏere uɽuni tɔk mac; ŋiɽaŋal ŋeni ŋupak ŋir eḏinyici amra nana weḏi Allah. 20 kwere nyiḏak eḏuŋw miḏa ṯay kḏa ṯinḏuŋw ṯi ornutuŋw gwu Allah. 21 a kwiri kwuway kinaŋw ma ŋa Allah ornuṯi a? eṯere ketize ŋiɽaŋali ŋu yey mac. ma keni inḏa ṯay eḏi ru ŋuwaya, ŋofḏana daŋgal-na eḏi nanni kaka kerrenyŋw. 22 kaka eṯi gwu ŋgwa kwir kwuway ki lomur lornuṯuŋw li Kweleny, orɔ kwete kwumɔ Kweleny kedi ki ŋuway-na. na kwokwony, kwere nyiḏak kwir hurr ki lomur lornuṯuŋw li Kweleny, eṯuŋw orɔ kwuway kweḏi Kwruztu. 23 kwunderṯa kwumɔ ŋazi liṯa yili yi; eṯi lijina rɔgwɽɔ ralu mac eḏorɔ luway leḏi lizigwunaŋ. 24 ṯaŋwu, liengeri linyi, eḏi kwere nyiḏak miḏa ṯay ṯinḏuŋw ṯi ornuṯuŋw gwu Allah.
25 na ŋeḏi yiŋaɽu ta, nenyere eḏi amra weḏi Kweleny mac, lakin nyi kwiri kwete kwirlalu ŋimɽi ŋi ŋeḏi Kweleny, nenyaru ŋwu: 26 kaka inḏi gwu ṯurfa ta, ŋofḏana eḏi kwere nyiḏak nanni domony. 27 a kwukəkine kwaw gi a? etere naŋni eḏi faḏa lu mac. a kwunani domony, kwiira kwayu a? eti naŋni kwayu eḏagwu mac. 28 lakin, ma agiḏi ta, ŋiti ŋimɔ zi erri ŋiki mac; na tira tere timɔ kwor agwu, nuŋw zi ere erri ŋiki tɔk mac. lakin na kla lemnizi eḏagiḏi likaṯazi ṯurfa ritezir ṯeḏi ṯurmun kḏu ta, enyi naŋni eḏi zi ṯinyinici ŋaŋwuzi ŋu. 29 ŋeni ŋinyi, lieŋgeri, nyamin nyinḏi eḏernine; ŋwu ṯa, ma kwere eḏi kwayu, eḏuŋw orɔ kaka ŋgwa kwiti kweḏi kwayu mac, 30 na kla leḏi ŋwunda leŋgorɔ kaka kla liti leḏi zi mac. na kla leṯinyeŋlena leŋgorɔ kaka kla liti lerinyeŋlena mac; na kla leri lece rɔgwɽɔ reŋen kwɔmne, linḏi kezni eḏorɔ kaka kla liti leḏi kwɔmne kwere mac, 31 na kla leri zi ruzi ŋeḏi ṯurmun ŋupa, leŋgorɔ kaka kla leri zi ruzi ŋeḏi ṯurmun ŋɔkwɽeny. kaka inḏi gwu ṯurmun kḏu ṯilŋiiḏinyji eḏernine.
32 nyi kwunaŋnaŋazi eḏere pini rugwor-na mac ŋiɽaŋal ŋi ŋeḏi ṯurmun. kwor kwiti kwumagiḏi mac kweṯinaŋni eḏaŋraci ŋiɽaŋali ŋeḏi Kweleny eḏi ŋi əmi Kwelenyi-na; 33 lakin na kwor kwumagiḏi eṯuŋw naŋni eḏaŋraci ŋiɽaŋali ŋeḏi ṯurmun, eḏi ŋi əmi kwayu-na kwuŋwun, 34 ŋwu ṯa, na ŋiɽaŋal ŋuŋun kanni-na ŋiɽen. na kiŋaɽu tɔk, kir kwaw ya tira, eṯuŋw naŋni eḏaŋraci ŋiɽaŋali ŋeḏi Kweleny, eḏi ŋi eni kirlinelu ter kaŋna-na, na ki ṯigɽim-na ṯuŋwun tɔk; lakin na kwaw kwumer agwu, eṯuŋw naŋni eḏaŋraci ŋiɽaŋali ŋeḏi ṯurmun, eḏi ŋi əmi kworu-na kwuŋwun. 35 ŋandizanyji ŋu eḏi meci ŋaŋwuzi, ŋiti ŋiri ŋeḏi ŋi kəki ŋaŋwuzi mac; lakin eḏi ma pa erri kwɔmne tatap ŋamaŋ mindaŋ a ma ami iɽi Kwelenyi-na ṯugwor ṯi ṯutuput.
36 ma kwor kwere aruŋw, nyi kwende kwumɔ nii tira-na tinyi menyi ɽindaŋnalu eḏagwu timɔ ṯimayini ŋayu, muŋw orɔ zurum eḏuŋw agwu; ŋiɽaŋal ŋu ŋiti ŋiri ŋiki mac. 37 lakin ma kwor kwere biɽelu pet mindaŋ mer ere ruḏaḏa dururi mac, kweṯeḏi ŋuma eḏi miḏa ṯugwori ṯuŋwun na kwiti kwumɔ diɽezi ṯugwor la eḏagwu tira tuŋwuŋ mac, ŋwuzerri ŋofḏana. 38 ŋwu ṯa, na ŋgwa kwere kwumagwu tira tuŋwun kwumɔ zi erri ŋizaw; na ŋgwa kwere kwiti kwumagiḏi mac, kwumɔ zi erri ŋizaw beṯen eḏi duŋgwun la.
39 kwaw kwere kweṯikəkini kwulen gi ki ŋwomur tatap ŋwunanuŋw ŋi kwumiiḏu; mindaŋ ma kwor ay ta, eṯi kwaw orɔ hurr; eḏuŋw emnici kworu kwir ter eḏagwu, muŋw orɔ kwete eḏi Kweleny-na. 40 lakin, ki yey-na yinyi, ṯinyiŋlana ṯeḏi kwaw ṯiṯemḏelu muŋw nanni domony; nenyi aruŋw, ŋiɽaŋal ŋu ŋir ŋeḏi Ṯigɽim ṯeḏi Allah tɔk.