Yaavɔr yǝthi Kwɔrɔstɔ.
1 Laazim anyji lizi ruusi yaḏaama yǝthi Kwɔrɔstɔ, nǝ liwǝkiil lǝthi ŋejmeth ŋǝthi Allah tok. 2 Nǝ ŋa ŋinaŋnathirsi liwǝkiilǝ ethoro, nǝroro ŋǝniŋw, ethoro lirllalɔ. 3 Nǝ ŋiti ŋir ŋiɽaŋal ŋeere duŋgwiny-ŋgi mac, mǝr-nyii ǝccǝ haakima ŋaaŋa alla mahkama kwǝthi ṯurmun-nǝ, nǝ nyii wɔɽe-wɔɽeny nyeere ǝccǝ rogɽo riinyi haakima mac. 4 Ŋende ŋiccinǝny-ŋi ŋeere ŋigii ki-rogɽo-na riinyi, laakin nireere ǝniŋw nyii kwɔsɔɔɽi mac. Kweeleny kwɔrɔ kwinḏi-nyii ethi ǝccǝ haakima. 5 Ŋwɔṯaŋw ǝṯeere ǝccǝ kweere haakima mac, niti ninḏi kinnǝni lɔɔmɔr mac, nǝ niti ninḏi kinnǝni Kweeleny mac, nǝ mɔŋw iila tǝ, ŋwɔ ruwǝzǝ ŋejmethi-lɔ ŋir kirim, nǝ ŋa ŋuluccunǝ ki-rɔgwor-na rǝthi lizigwunǝŋ. E-ta ǝmǝ lizi tatap aavi ṯibɽǝthǝ yiriny naanɔ-gwɔ Allah.
6 Liyǝŋgǝri liinyi, ŋandisa-nyji ŋǝthi rogɽo riinyi nǝ ŋǝthi Abɔllɔɔs tok, mindaŋ mǝr-nyji-gwɔ iisasi, mindaŋ ethiŋeere dappila ŋeere mac ŋa ŋɔlɔɔthɔna, mindaŋ meere ṯǝmsi-lǝ kweere mac ethi kwɔthaathɔ-la. 7 Ǝyǝ kwɔrɔ kwǝthi ŋɔma ethi ṯǝmsi ŋaaŋwɔsi-la ki-lithaathɔ-la? Aatha kwɔrɔ kweere kwǝthi-ŋǝ kwiti kwaava-ŋa naanɔ-gwɔ Allah mac? Nǝ maavi tǝ, nǝ a kwotho kwǝṯi piŋi rogɽo rɔɔŋwa kaka nǝṯiŋweere oro haḏiiyyǝ mac?
8 Ŋaaŋa limǝ bee! Noro lɔrṯɔ! Noro limǝlik liira-nyji-gwɔna! Athɔrɔ ǝŋgisi kǝniny mithǝ ṯǝŋw rerrem mindaŋ ǝŋgir ɔɽɔmaṯṯi tatap ki-ŋeeleny-na. 9 Nyii kwaarɔ-ŋwɔ Allah wumǝ-nyji tǝ ruusǝlɔ-ŋw lir yaavɔr ki-lizi-nǝ, ninyoro kaka ǝṯir-nyji ǝccǝ haakima ŋiɽany-ŋi, kiyǝnǝ yǝthi ṯurmun-ŋǝ limeleka-li nǝ lizi tok. 10 Ŋiɽaŋal-ŋi ŋǝthi Kwɔrɔstɔ ninyoro yǝɽiyǝŋ, laakin ŋaaŋa tǝ, nǝthi yǝnǝ ethi Kwɔrɔstɔ-na. Nyiiŋǝ lǝni lajla, ŋaaŋa tǝ, nǝni lifirlli. Nǝrŋǝsi iiɽinǝ, laakin nyiiŋǝ tǝ, nǝrnyji ǝrrǝlɔŋw. 11 Ki-saa@-la-ṯǝ ŋgwɔ nǝ-nyji yaaŋwɔ yee ǝwthǝ-yi, ǝṯi-nyii kenne lijǝŋgwuwǝ naana, nǝ ǝṯi-nyii irǝrǝlɔ liira ǝzir-nǝ, 12 ǝṯi-nyii akkɔ ŋothɽor tig-tig ethi mǝcci rogɽo rǝri. Mǝrnyji ollo ǝṯinǝsi ɔrtatha; mǝrnyji ǝwɽi yǝy-lɔ ǝṯi-nyji indinyanni naana; 13 mǝrnyji andaci ŋigii tǝ, ǝṯiny-ŋi aŋni ŋisaaw; ninyoro kaka kwomne kwǝthi ṯurmun kwǝṯir firasi, nǝ ŋaanya tok ŋǝṯirsi kagɔṯṯɔ kthaay.
14 Ŋiti ŋɔlɔcca-ŋǝsi ŋɔ mindaŋ ethi ṯɔrony mithǝ ŋaaŋwɔsi mac, laakin ethi icci ŋaaŋwɔsi ŋejmethi kaka nyɔr nyiinyi nyǝṯi-nyji amɽi. 15 Mǝ ǝthi kinnǝni mɔ@allimima kwittǝzir kwǝṯi-ŋǝsi ǝccǝ @allima ethi Kwɔrɔstɔ-na, laakin nǝtǝ ǝthi papa-ŋwɔ kwɔtɔpɔt dak. Kaka mǝnyii-gwɔ oro ṯarnyalɔ ṯaalɔ Kwɔrɔstɔ-ŋgi kwǝni Yǝcu ŋiɽaŋal-ŋi ŋǝthi Inyjiil. 16 Ŋwɔṯaŋw ŋǝsi tuurǝccǝlɔ ethi kwakithatha laara-lɔ liinyi. 17 Nǝrṯǝ oro ŋɔ mindaŋ ŋǝsi ṯiŋacca Ṯiimɔɔthaaws-ŋwɔ, kwir tɔr tiinyi tamɽany beṯṯen ethi Kweeleny-na nǝ tirllalɔ tok. Kwɔndǝr-ṯǝ kwɔŋǝsi kikithǝyini raay riinyi ethi Kwɔrɔstɔ-na, kira rǝṯiny-ri aari @allima ki-yǝniisǝ-nǝ tatap ǝzir naana wiric. 18 Kila lokwo daŋgal-na lippiŋǝ rogɽo, lǝṯaarɔŋw ki-rɔgwor-na reeŋen, nyii kwiti kwinḏi ethiila mac ethi raaŋitha ŋaaŋwɔsi. 19 Laakin nyii-ŋgwa kwiila rac fittak, mǝnyii Kweeleny ǝmminicǝ, mindaŋ mǝnyii elŋe ŋiɽaŋali yǝy-yi yiinyi ŋɔma-ŋa ŋǝthi kila lǝṯi piŋi rogɽo, nǝreere ǝni ŋiɽaŋal ŋa ŋǝṯirsi andasi mac. 20 Kaka niti nɔrɔ-gwɔ Ŋeeleny ŋǝthi Allah kandisa domony mac, laakin nǝrǝni ŋɔma. 21 Ŋindǝr ŋǝndu ŋinaŋna-ŋǝsi? Nyii kwiila souṯ-gii, alla ṯigɽim-thi ṯǝthi ṯamɽa nǝ ŋiiɽǝnnǝ?
aza 4
lom leḏi yafur ŋodɽor ŋi ŋeḏi Allah
1 eḏi lizi ruzi nyuŋwuzi yaḏaam yeḏi Kwruztu, na liwakiil leḏi ŋiɽaŋal ŋulucina ŋeḏi Allah. 2 ŋeni ŋupa tɔk, eṯir naŋni eḏi kaṯazi liwakiila lirlalu. 3 lakin, ki yey-na yinyi ner ere orɔ ŋiɽaŋal ŋere mac eḏi ŋi ṯeci nyuŋwu, ya ki zeyria-na kwere kweḏi lizi. nenyere keni ṯeci rɔgwɽɔ rinyi tɔk mac. 4 nyi kwende kwiicinena kwɔmne gi kwere kwiki, lakin nenyere eni kwuzuɽu ki rɔgwɽɔ-na ŋiɽaŋal ŋi ŋinyi mac. ŋgwa kweṯi nyi ṯeci, na Kweleny orɔ. 5 ṯaŋwu eti zi ere ṯemizi ŋere mirec mac. tillir keni, mindaŋ ma Kweleny aɽa, kwezi ruwezelu ŋa ŋeṯi lucini kirim-na, na ŋwu tuwezi ŋejmeṯi lu ŋeḏi rugwor. mindaŋ er afi lere lere ṯiɽnena nani gwu Allah.
6 nenyjandazi ŋu tatap, lieŋgeri linyi, ŋeni nyi na abuluuz tɔk, mindaŋ a ere ṯemizi kwizi la kwere mac eḏi piŋi ki yey-na yalu, lakin eṯizerri ŋir kaka ŋuluḏir zi ŋirlinelu ter. 7 eya kwiri kweḏi ŋuma eḏalla ŋaŋwuzi-na ki liḏaḏu-na eḏaruŋw, linderṯa klu lizawi eḏi liḏaḏu la? na aḏa kwiri kweḏi ŋa kwiti kwumer ŋazi inḏeḏa mac? mindaŋ ma afi ta, a lɔḏɔ leṯellini ki rɔgwɽɔ kaka eṯi haḏiya ere orɔ mac?
8 a lim ani be pa? a lim ani orɔ lurṯu a? a limorɔ leleny liira nyji gwu-na? aḏiru, nyi kweŋgamina eŋgorɔ ŋaŋa leleny rerem, mindaŋ eŋgi nyi orɔ tɔk leleny nani ŋa gwu! 9 kaka ari nyi gwu, Allah wumenyji ruweci lir yafur yikwaḏaḏizi kiṯiɽiny kaka loru limirlici ŋiɽany cugwɔ-cugwɔp, kaka inḏir gwu leḏi ṯurmun, na limaleyka, na lir lizigwunaŋ tɔk eḏi zi icaci ciɽŋel. 10 ner nyji ruzi liḏiki kaka enir gwu nyiŋa leḏi Kwruztu, lakin na orɔ ŋaŋa lifirli ki eḏi Kwruztu-na. ner eni nyiŋa lajila, lakin na orɔ ŋaŋa lifirli teter; ner ŋazi iɽi-na, lakin ner nyji li uɽi yey la. 11 ki lomur ṯa kla mindaŋ ma kirem orɔ, eṯinyji yaŋwu ye; eṯinyji owḏa ye; eṯinyji yireṯ iiraci; eṯir nyji owɽi yey; na eṯinyi nani liira duənuŋw-na kwere tɔk. 12 eṯi nyi aki ŋɔḏɽɔr ŋifirli rii ri reri; mer nyji ɔllɔlɔ ta, eṯinyji keni ortaḏa; mer nyji owɽi yey ta, eṯinyji ṯa iɽinyani nana; 13 mer nyji inḏeḏa feḏiya ki yey-na yeḏi lizi, eṯinyji ṯa andazi ṯa ŋizaw; nenyorɔ, keni, kire-kirem ŋgwu kaka ŋanya ŋeḏi ṯurmun ŋeṯir zi kaṯu kiṯay.
ṯoraca ṯir kaka ṯeḏi papa kwete, ṯireca ṯi
14 nyiti kwulecaŋazi ŋiɽaŋali ŋu mac mindaŋ eḏi ṯurony miḏa ŋaŋwuzi kezir were; lakin eḏi keni ici ŋaŋwuzi kaka nyoru nyinyi nyamɽanyji beṯen. 15 kezni a eḏi lizi litezir leri ŋazi aŋɽaci eḏi Kwruztu-na, lakin na ere eḏi rarnyaluŋwuzi ruru mac. nyi kwiru kwir ta pa keni kwumorɔ papa kwalu eḏi Kwruztu-na kweni Yecu, ŋiɽaŋal ŋi ŋizaw ŋir injiil. 16 taŋwu nyi kwuturecaŋazelu tur eḏi kwaḏiḏa ṯay ṯinyi ŋama-ŋamaŋ. 17 ṯa ŋwu tɔk nenyi ṯiŋacaŋazi timutaawuzŋw, kwir tor tinyi tirlalu, tamɽanyi beṯen eḏi Kweleny-na; kwunderṯa kwɔŋazi kiḏeyini tay tinyi eḏi Kwruztu-na, kaka eṯinyji gwu ilŋiiḏini ezir nana tatap ki yaniiza-na tatap. 18 lɔkwɔ daŋgal-na leṯi piŋi rɔgwɽɔ reŋen, kaka iti kiḏayinar gwu mac eḏaruŋw, nyi kwinḏi eḏila nani ŋa gwu. 19 lakin nyi kwila kwaḏan kwɔkwɔ, menyi Kweleny kitica tay, enyji naŋnini rac ŋuma ŋeḏi kla leṯi piŋi rɔgwɽɔ, ŋiti ŋiri ŋiɽaŋal ŋeḏi runyu reŋen domony mac. 20 kaka eṯi gwu ŋeleny ŋeḏi Allah ere orɔ ŋiɽaŋal domony mac, eṯir keni eni ŋuma. 21 aḏa kwiru kwunaŋnaŋa? ŋofḏana duŋgwinyi eḏila nani ŋa gwu kwape tumori teḏi əpa, ya enyila tamɽa, na ŋiɽena ŋi?