Cuugwǝzi kwǝthi-gi mǝcci lizi lǝthi ṯǝmminǝ Urshaliim-na.
1 Nǝ ŋǝthi cuugwǝzi kwǝthi-gi mǝcci lizi lirllinǝlɔ ter: kaka ṯǝ ŋa ŋandica-nyji yǝniisǝ yǝthi Ghalaaṯiiyyǝ-ŋw, ŋǝsi andaci ŋaaŋwɔsi tok ethisi-ṯǝ ǝrriŋw tok. 2 Ki-laamin-la liŋna lǝthi usbɔɔ@ ethi leere-leere laalɔ avrasi kwomne kweere kǝni-ŋi ŋgwa kwǝthicǝr ŋɔma-na, mindaŋ mǝnyii iila tǝ, a ŋiɽaŋal ere naani ŋeere kwokwony mac ŋǝni cuugwǝzi. 3 Mindaŋ mǝnyii ɔppaṯha tǝ, ǝnyji ɔɔsi kila juwaab-gi limǝsi ǝmminci ethi ǝvici lizi lirllinǝlɔ ter lǝthi Urshaliim-ŋwɔ haḏiiyyǝ. 4 Mǝr-nyii ɔvthannici etheele nyii tok tǝ, ǝny-li rɔɔmɔthi.
Raay rinaŋnari Bɔɔlɔs ethiraari saafira.
5 Nyii ŋgwa kwinḏi ethi raaŋitha ŋaaŋwɔsi mǝnyii daara Makḏuuniiyyǝ-ŋgi, kaka a-naŋnany-gwɔ ethi daara kinǝŋgwu-ŋgi. 6 E-ta nyii naani kǝsini kwokwo ŋaaŋa-li, ya nyii ṯimmasi koo-ŋa kinaŋw, mindaŋ mǝr-nyii mǝcci ethi iilatha ǝzir-yi wɔnaŋnany-gwɔ ethi-gwɔ iilatha. 7 Nyiiti kwɔnaŋna-ŋǝsi etheese kwirlathila ŋwaara-ŋi ṯɔɽɔk mac; kaka naŋnany-gwɔ ethi naani kwokwo ŋaaŋa-li mǝnyii Kweeleny ǝmminci. 8 Laakin nyii kwɔnaani kɔnɔŋw Afasuus-na mindaŋ mǝ Yɔɔm Al-khamsiin iila. 9 Kaka mǝnyii-gwɔ ǝgwur kiṯṯinici wɔɔrana dar-dar wǝthi ŋothɽor, a-naani-va kinnǝni ṯuwǝn ṯuuru tok.
10 Mǝ Ṯiimɔɔthaaws iila daŋgal-ŋgi tǝ, e-ta ǝɽir aalanni tig-tig daŋgal-na, kaka nɔrɔŋgwɔ kwette kwǝṯi-ṯǝ ǝkkici Kweelenyi ŋothɽor kaka nyuŋwɔ. 11 Ŋwɔṯaŋw ǝṯi kwizi kweere ajlisa mac. Ǝɽir a mǝccǝ mindaŋ a kitta kithaay ŋwiila kwisaaw naaniny-gwɔ, kaka nǝkkicǝny-gwɔ kizǝn ethiila liyǝŋgǝr-li.
12 Nǝ ŋǝthi ǝŋgǝri kwǝri kwǝni Abɔllɔɔs tǝ, nǝnyii ɔracci beṯ-beṯṯen ethiila liyǝŋgǝr-li lithaathɔ ethi raaŋitha ŋaaŋwɔsi, laakin nǝreere oro ŋǝthi ṯɔgwor ṯuuŋwun mac ethiila kire-kirem-ŋgwɔ. Nǝ kwɔvǝtǝ iila rac mɔŋw kaṯṯisa ṯaay.
Ŋiɽaŋal ŋirimthithɔ.
13 Ǝṯi aŋranni naana, ǝnyjǝr ŋwaara-lɔ tetter ki-ṯǝmminǝ-nǝ, ǝṯoro luugwul, firllir tetter. 14 Ǝṯisi ǝrri ŋa tatap ṯamɽa-thi.
15 Ŋilŋithi-ŋǝsi ŋǝthi Isṯifaanaas-ŋǝ dɔɔnɔ-gana kwuuŋwun; kaka nɔrɔr-gwɔ limoro lɔgrɔstiyan ker-kerreny Aasiiyya-na, mindaŋ nǝr balsi rogɽo reeŋen ŋothɽor naana balac ethisi mǝcci kila lirllinǝlɔ ter. 16 Nyii kwɔɔracca-ŋǝsi ethisi kettice ŋa yǝy ŋǝthi kila lir ŋwɔɽa daŋgal-la, nǝ kila lithaathɔ lǝṯi akkɔ ŋothɽor ŋundu-ŋǝli. 17 Nyii kwaamina beṯṯen kaka mǝgwɔ Isṯifaanaas-ŋǝ Farṯuunaaṯuus-gi nǝ Akha-iikuus tok ɔppatha kila lɔmɔrthathɔ ki-ŋwɔɔbi ŋwaalɔ; 18 kaka mǝrnyii-gwɔ firlli naana, kaka-ṯǝ kinaŋw nifirllǝr-ŋǝsi naana tok. Nǝ lizi leere lir kaka-ṯǝ kɔlɔ tǝ, ǝṯisi kettice yǝy.
19 Yǝniisǝ yǝthi Aasiiyya-ŋwɔ yithiŋaca-ŋǝsi ṯaaginna. Nǝŋǝsi Ǝkillǝ-ŋǝ Biriskillǝ-gi, na nǝŋǝsi kǝniisǝ kǝṯi ɔɽɔmaṯṯi ki-dɔɔnɔ kweeŋen aganni beṯ-beṯṯen yiriny-yi yǝthi Kweeleny. 20 Liyǝŋgǝri lǝri tatap lithiŋaca-ŋǝsi ṯaaginna. Ǝṯi aginnathisi-na ruunyu-ri, ṯaaginna-thi ṯirllinǝlɔ ter.
21 Nyii kwɔrɔ kwǝni Bɔɔlɔs, kwɔlɔcca-ŋǝsi ṯaaginna kɔthɔ ṯii-thi ṯiinyi. 22 Mǝ kweere ere ǝthici Kweelenyi ṯamɽa-na mac tǝ, ethiŋw ollone! Maraan aatha, ŋǝniŋw, Kweeleny kwǝri ilamba! 23 Ethi ne@ma kwǝthi Kweeleny kwǝri kwǝni Yǝcu nanni daŋgal-na. 24 Ethi ṯamɽa ṯiinyi nanni daŋgal-na tatap Kwɔrɔstɔ-ŋgi kwǝni Yǝcu. Amiin.
aza 16
kwɔmne kwinḏeḏerzi lir luway linani urzaliim
1 na ŋeḏi kwɔmne kwir haḏiya eḏuziza lizi leni lirlinelu ter eḏi Kwruztu-na; kaka andicanyi gwu lizi leḏi galaaṯyaŋw, ezi ṯa erri ŋwu ŋaŋa tɔk. 2 ki lamin liŋna leḏi uzbuwa were were, ner ofḏani daŋgal-na eḏi lizi lere lere afrazi haḏiya kəni gi wete. weṯuŋw əgini mindaŋ menyila ta, enyjere naŋnaḏa kwokwony mac. 3 mindaŋ menyi upaḏa ta, enyjuzi kla lilucaŋazi warga weḏi zulṯa eḏi dimenni haḏiya walu, eḏi yi ele urzaliim. 4 menyji inḏa ŋizawi, enyele nyi tɔk, enyi li romḏi.
ray rinaŋna zi buuluz eḏi gwu ilaḏa, na ṯagna
5 nyi ŋgwa kwila nani ŋa gwu menyi dara makḏunya ŋgi, kaka naŋnanyi gwu eḏi dara makḏunya ŋgi, 6 na kezni nyi nani nani ŋa gwu, ya nyi ṯemzi ko-ŋa kinaŋw, mindaŋ mer nyi ṯa kete kiṯay kezir winḏi nyi gwu eḏilaḏa. 7 kaka iti naŋnanyi gwu eḏeze ŋaŋwuzi kweni kwuṯemḏi duṯuk mac; nyi kwunaŋna eḏi nani ŋwomuri ŋwɔkwɔ ŋaŋa li, menyi Kweleny emnizi. 8 lakin nyi kwunaŋna eḏi nani afazuz mindaŋ ma yom al khamziin ere, 9 kaka kiṯinicenyi gwu ogwur weḏi ŋɔḏɽor ŋupak, ner nani litezir tɔk leṯi nyi ermiḏeḏa nana.
10 na ma timuṯaawuz ila ta, amir ketize ŋirina ŋwu ŋizaw daŋgal-na, kaka enuŋw gwu kwaki ŋɔḏɽor ŋeḏi Kweleny, kaka ṯa nyuŋwu. 11 ṯaŋwu, eṯi kwizi ere kwere ajilazi ŋunduŋwu mac, lakin kitari ŋunduŋwu kiṯay kwamina eḏaɽa nani nyi gwu; kaka əkicanyi gwu kizen lieŋgeri li.
12 na ŋeḏi eŋgeri kweri kweni abuluuz, nenyi naŋna ŋunduŋwu beṯen eḏi raŋḏa ŋaŋwuzi lieŋgeri li liḏaḏu, lakin ner ere orɔ ŋeḏi ṯugwor ṯeḏi Allah mac eḏuŋwele kire-kirem, lakin ma lamin ila kla lofḏana ta, ŋwu ma ila.
13 kiɽṯir, enjer ŋwara lu teter ki ṯəmna-na ṯalu; eṯorɔ lugwul, firlir. 14 eḏi ŋa tatap ŋeṯizerri, ezerri ṯamɽa ṯi. 15 lieŋgeri linyi, a lilŋiiḏi duənuŋw kweḏi izṯifaanuz eḏaruŋw, liri nda leḏi akayaŋw eḏurla rugwori lu, na uṯuner gwu-na eḏi zi aŋraci kla leni lirlinelu ter eḏi Kwruztu-na; 16 nyi kworacaŋazi eḏi zi ketize yey ŋeḏi lizi lir kaka ṯa klu, na kla tatap leṯoɽmati ki ŋɔḏɽor-na. 17 nyi kwamina beṯen kaka mer gwu upaḏi kla leni izṯifaanuz-ŋa furṯunaaṯuz gi na akaykuz tɔk, kaka menyji gwu eze ta, eṯi nyi orɔ kaka eṯi ŋazi gwu eze tatap; 18 kaka mer gwu ketize ṯigɽima tinyi wəŋ, na ralu tɔk. eṯi ketize lizi yey lir ṯa ŋwu.
19 yaniiza yeḏi azyaŋw yagnaŋazi. akilla-ŋa brizkilla gi, na kaniiza kinani duənu deŋgen tɔk, ner ŋazi agni kaka aḏa kwere eḏi Kweleny-na. 20 lir ŋiaŋga tatap lagnaŋazi. na ŋaŋa ta agniḏizarna, ṯagna ṯi tirlinelu ter.
21 nyi kweni buuluz kwulucaŋazi ṯagna kḏu ṯii ṯi tinyi. 22 ma kwizi kwere ere eḏizi Kwelenyi ṯamɽa-na mac, eḏuŋw ɔllɔne. Kweleny kweri, ilamba! 23 eḏi ṯimeca ṯeḏi ŋimɽi ŋeḏi Kweleny kweri kweni Yecu Kwruztu nani ŋaŋa li. 24 eḏi ṯamɽa tinyi nani ŋaŋa li tatap eḏi Kwruztu-na kweni Yecu. emba.