Ṯamɽa ṯǝthi lɔgrɔstiyan.
1 Mǝnyii kinnǝni ǝthi ŋɔma ethi andasi kandisa kǝthi lizigwunǝŋ nǝ kǝthi limeleka tok, laakin minyeere ǝthi ṯamɽa-na mac tǝ, nyii-toro kaka ŋwal ŋwɔthi jeres nǝ ŋwɔthi yɔḏɔŋgwɔr tok. 2 Nǝ minyǝthi haḏiiyyǝ wǝthi Ṯigɽim ethi-yi aari bǝshirǝ; nǝ minyǝthi ṯilŋiṯṯana tatap, mindaŋ mǝnyji elŋeṯṯe-na ŋa tatap ŋuluccucinǝ; ya minyǝthi ṯǝmminǝ kitha tatap ṯǝthi-thi dɔŋgwazi yaayinɔ-lɔ, laakin minyeere ǝthi ṯamɽa mac tǝ, nyiitǝ orolɔŋw. 3 Mǝnyii kinnǝni kanni kwomne kwiinyi tatap kwǝthinyii, mindaŋ mǝnyii ṯiŋatha aŋnalɔ wiinyi ethi dɔnnasi kithaay, laakin minyeere ǝthi ṯamɽa mac tǝ, nyeere ǝgini kwomne kweere mac.
4 Ṯamɽa ṯǝṯi mithǝ ṯɔgwori, ǝṯɔŋworo kwimɽi; ṯamɽa ṯiti ṯǝṯi kee ŋiɽany mac wala ethi piŋi rogɽo; 5 ṯamɽa ṯiti ṯǝṯi rivaŋni mac, wala ethi ɔrtɔtanni kwomne naana, wala ethi urǝzi ṯɔgwori, wala ethisi immǝsi ŋigii, 6 tamɽa ṯiti ṯǝṯi aamina mac ŋiɽaŋal-ŋi ŋigii, laakin ǝṯɔŋw-ŋi aamina ŋirllalɔ. 7 Ṯamɽa ṯǝṯi indinyanni kwomne naana tatap, ǝṯɔŋwɔthi ṯǝmminǝ ṯǝthi kwomne tatap, ǝṯɔŋwɔthi ṯǝkkizǝ kizǝn ṯǝthi kwomne tatap, ǝṯɔŋw uvuni ṯɔɔvi tatap.
8 Ṯamɽa ṯiti ṯǝṯi ernene mac, ŋiɽiiya ŋǝṯi naani, laakin ǝṯir ernene; haḏaaya wǝṯi naani wir riŋla-na ter-ter, laakin ǝṯɔŋwɔni winḏi ethi rilli, ṯilŋiṯṯana ṯǝṯi naani rac, laakin aṯɔŋweele etheere kithaay. 9 Kaka niti nɔrɔ-gwɔ ṯilŋiṯṯana ṯǝri min-min mac, wala ŋiɽiiya ŋǝri ǝthoro min-min; 10 laakin mɔŋwiila ŋgwa kwir min-min tǝ, e-ta ǝmǝ ŋgwa kwiti kwir min-min mac ernene kithaay. 11 Kinaŋw nɔrɔny tɔr tokwɔɽony, ǝṯiny andasi kaka tɔɔrɔ tokwɔɽony, ǝṯinyii aari fǝkirǝ kaka tɔɔrɔ tokwɔɽony, ǝṯinyii elŋe ŋiɽaŋali kaka tɔɔrɔ tokwɔɽony; nǝ minyoro kwɔr tǝ, nǝnyji duŋgwǝci ŋǝthi ŋogoŋ kithaay. 12 Nǝ kirem-tǝ, ǝṯireese suurǝ kwɔnaanɔ kalmanḏar-na miilǝ-miilǝ, laakin kwaathan-tǝ, ǝri iisithi kiyǝnǝ ŋǝmǝ-ŋǝmmǝŋ. Nǝ kirem-tǝ, nǝnyji elŋe ŋoko domony, laakin kwaathan-yǝ, nyjelŋe min-min, kaka nilŋithiny-gwɔ Allah nyuŋwɔ min-min. 13 Ŋwɔṯaŋw, ǝṯi ṯǝmminǝ-ŋǝ ṯǝkkizǝ-thi kizǝn, nǝ ṯamɽa tok, nǝ ŋgwɔ kwir ṯoɽol ǝṯɔŋw nannatha, laakin ŋgwa kwuthǝmthisi-lǝ tataapna ṯamɽa oro.
aza 13
ṯamɽa ṯir hadiya ṯiṯemḏizelu tatap
1 menyi kinna andazi kandiza gi keḏi lizigwunaŋ na keḏi limaleyka tɔk, mindaŋ menyere eḏi ṯamɽa-na mac, nyi ta orɔ kaka jeraz kwetari ŋwal ŋwiti ŋwami ki yəni-na mac, ya yuḏuŋwur yeṯari ṯa ŋwu tɔk. 2 na menyeḏi ŋuma eḏizandaci ŋinḏedanyji Allah Ṯigɽim ṯi tirlinelu ter, mindaŋ eḏizelŋe tatap ŋir ŋejmeṯ ŋulucina, na ṯilŋiiḏina tatap, na menyeḏi ṯəmna ṯupa mindaŋ, eḏi ṯi ireḏizi yayin lu, lakin menyere eḏi ṯamɽa-na mac ta, nyi kwiti kweḏi fayḏa kwere too. 3 menyi kanni kwɔmne tatap kweḏi nyi, menyi kinna ṯiŋaḏa aŋna lu eḏi dunnazi, lakin menyere eḏi ṯamɽa-na mac, nyi ere əgini kwere ḏuṯ.
4 ṯamɽa ṯeṯi zi indinyana nana, na eṯuŋw zi meci liḏaḏu; ṯamɽa titi ṯeṯi ke ŋiɽany mac, ya eḏellini ki rɔgwɽɔ tɔk mac; 5 titi ṯeṯi piŋi rɔgwɽɔ mac, titi ṯeṯi buulini mac; titi ṯeṯi kiṯazi ŋiɽaŋali tereny gi mac; titi ṯeṯərum mac; titi ṯeṯi ŋi eḏi zi wəŋ mac. 6 ṯamɽa titi ṯeṯi nyeŋlena ŋiɽaŋal ŋi ŋiki mac, lakin eṯuŋw ŋi nyeŋlena ŋa ŋeni ŋofḏana. 7 ṯamɽa ṯeṯeḏi ŋuma eḏi rillazi ŋiɽaŋali la tatap; na ṯəmna ṯuŋwun, na ṯəkiza kizen ṯuŋwun, na ṯukwurmɔṯana ṯuŋwun, eṯuŋw ere amɽaṯi kworɔ mac.
8 ṯamɽa titi ṯeṯernine ḏuṯ. ŋɔḏɽor ŋeḏi kla leṯizandaci ŋinḏeḏa zi Allah Ṯigɽim ṯi tirlinelu ter, ŋinḏi eḏi ṯimayini; rɔgwɽɔ reḏi kla leṯortaḏa kandiza gi kiṯimḏina keḏi Ṯigɽim rinḏi eḏi nani pet, na ṯilŋiiḏina eḏernine tɔk. 9 kaka iti ur gwu ṯilŋiiḏina ṯeri minmin mac, na ŋiɽaŋal ŋeṯinyji Allah inḏeḏa Ṯigɽim ṯi eḏizandaci ner ere orɔ minmin tɔk mac. 10 lakin mer ila ŋir minmin ta, na ŋa ŋiti ŋir minmin mac er ernine. 11 kinaŋw, ur nyi kinna tor tɔkwɽeny ta, eṯi nyi andazi kaka tor tɔkwɽeny, eṯi nyi ari fikra kaka tor tɔkwɽeny, eṯi nyi icini kaka tor tɔkwɽeny, lakin menyi orɔ kwor ta, nenyi urṯunelu kwɔmne gi tatap kweḏi ŋɔgɔŋ wur. 12 kaka kirem ta, eṯir ere ami izani-na ŋwu mac, kalmanḏar-na wir miliny; lakin kwaḏan ta, er iziḏi kiyeyna tɔktɔk. na kirem ta, eṯinyjelŋe ŋɔkwɔ; lakin kwaḏan ta, enyjelŋe tatap minmin, kaka mezi gwu Allah elŋece ŋinyi minmin. 13 ṯaŋwu, ṯəmna tɔk, na ṯəkiza kizen tɔk, na ṯamɽa tɔk, ŋir ṯɔɽɔl ŋu er nanniḏa dɔk, lakin nezi ṯamɽa ṯamḏu la purpur.