aza 2
ŋeḏre ŋizaw ŋeḏi likwruztyan
1 lakin na ŋa ta, eṯizilŋiiḏini ŋa ŋofḏana ŋir ŋeḏi ṯaliim ṯizaw. 2 eṯoraci loru lupa er orɔ leleny leḏi rɔgwɽɔ reŋen, leḏi yeyna, letaŋranni nana, leḏi ṯəmna ṯir rerem, na ṯamɽa, na ṯindinyana nana ki ŋiɽaŋal-na tatap. 3 na law lupa tɔk er niini-na ŋeḏre ŋi, er ere orɔ ṯuŋwun mac, ya luway leḏi kiɽca tɔk mac; er zi ilŋiiḏini ŋeni ŋizaw, 4 eḏi ŋi baŋaci layu lir lɔgɔŋ eḏamɽi loru leŋen, nyor nyi, 5 er aŋranni ki rɔgwɽɔ, liti luri yey lu mac, etaŋraci duənuŋw, lir limɽi, leṯi niŋniḏizi lilenŋwuzi; mindaŋ a lizi ere ruzi ŋiɽaŋali luŋw mac ŋeḏi Allah. 6 turece kamal lu tay ṯi ṯa kḏu ṯete ṯete eḏaŋranni ki rɔgwɽɔ. 7 kita rɔgwɽɔ rɔŋwa ki ŋɔḏɽor-na ŋeni ŋizaw mindaŋ a ŋa gwu lizi izazi, na ki tilŋiiḏina-na ṯɔŋwa tɔk er aruŋw, kwirlalu, kweḏi yeyna, 8 kweṯandindazi ŋiɽaŋali ŋir rerem, ŋiti ŋeŋgir ŋi inḏaci loma lere mac, mindaŋ a ṯurony miḏa kwere kweṯi ŋazi ireci kereny, kaka ulezaŋw gwu tiɽaŋali tere teni tiki teḏi ri kete nyuŋwuzi kaṯi. 9 oraci yaḏaama er niŋniḏici lizi leŋen leḏi zi, eḏi zi əmi-na ŋɔḏɽor ŋi ŋeŋen tatap, liti leṯerri ŋiɽaŋali nyiḏak rugwor ri reŋen mac, 10 ya er ere orɔ limurtiny tɔk mac, eḏi baŋaci lizi ṯirlalu ṯeŋen, mindaŋ er nii ŋiɽaŋali-na ŋeḏi Allah, wir Kwigileḏa kweri, deŋgen ŋgi.
ŋɔdɔ ŋeṯi zi likwruztyan naŋna eḏi zi erri ŋizaw
11 kaka ma gwu ṯimeca ṯeḏi ŋimɽi ŋeḏi Allah ruwene lu eḏi kileḏi lizi tatap, 12 ner nyji ilŋiiḏini eḏala rugwori kwɔmne-na tatap kwiti kweṯəmi Allah-na mac, na kaduwa keḏi ṯurmun; na eḏaŋranni eḏirlalu nyeɽe nyeɽe, eḏi iŋnazi Allah kereny ki ŋimiiḏa-na kirem ki ṯurmun-na kḏu; 13 leni leṯi nanji ṯəkiza kizen lu ṯeni ṯortana, na ṯiruwene lu ṯeḏi ŋiniṯ ŋeḏi ŋgwa kwuṯemḏizila tatap ŋuma ŋi, kwir Allah, na Kwigileḏa kweri kweni Yecu Kwruztu. 14 kwunderṯa kwuṯiŋacanyji rɔgwɽɔ lu ruŋwun eḏalla nyuŋwuzi ki ŋikya-na tatap, eḏi zuɽi lizi licaŋw zi-na eḏeni luŋwun, kla limorɔ zurum eḏizerri ŋeni ŋizaw.
15 andicazi ŋiɽaŋali ŋu, ezi turece lu tur eḏizerri; ezi inḏeḏa əpa, zulṯa gi. eṯere efrici kwere mac eḏi derne eḏi zi ketice ŋɔŋa yey.
Ṯa@liim ṯǝthi ŋɔgrɔstiyan ṯir rerrem.
1 Laakin ŋa tǝ, laazim aari @allima ṯa@liim-thi, ṯibɽithir ṯa@liim-thi ṯir rerrem. 2 Ǝccǝ lɔɔrɔ lɔppa @allima ethi rillalɔ, ethǝthi rɔgwori rigɽiṯɔ, lǝthi ṯǝmminǝ ṯir rerrem, lǝthi ṯamɽa-na, nǝ lǝṯi ǝnyji ŋwaaralɔ tetter. 3 Nǝrṯoroŋw tok, ǝccǝ layɔ lɔppa @allima tok ethi nanni ŋethre ŋisaaw, ǝreere oro ṯɔŋwɔn mac, ǝreere oro lɔwaay ǝthi kiɽica mac, ǝri-ŋi aari @allima ŋisaaw, 4 ǝri ǝccǝ yirṯini @allima ethi amindindi lilen-ŋwɔsi nyɔr-nyi, 5 ethǝthi rɔgwori rigɽiṯɔ, lɔsɔɔɽɔ, ǝroro laaw lisaaw lǝṯi mithǝ dɔɔnɔŋw ŋǝmmǝŋ, lǝṯi iinyici lilen-ŋwɔsi naana, mindaŋ mɔŋweere kweere mac kwandisasa ŋiɽaŋali naana ŋǝthi Allah. 6 Ŋwɔṯaŋw tok, a ɔracci kaamali ethoro lizi lǝṯi mithǝ rogwɽo reeŋen. 7 Nǝ ki-ŋiɽaŋal-na ŋɔ tatap, laazim oro ŋa mǝthǝl kwǝthi ŋethre ŋisaaw ki-ṯa@liim-na ṯɔɔŋwa. 8 Ǝṯi andindasi ŋiɽaŋali ŋirllalɔ, ŋiti ŋinḏir-ŋǝsi ethisi locce-na mac, mindaŋ mǝ fǝthiyǝ mithǝ ṯuwǝnu ṯɔɔŋwa, kaka mǝrseere kaṯṯasi ŋeere ŋigii ethisi andisasa nyuŋwsi naana mac. 9 Ǝccǝ lɔwaaya @allima ethi iinyici lisǝyyiḏǝ naana leeŋen, ǝrsi iiŋinǝ ki-ŋiɽaŋal-na tatap, ethiseere dirnnaci mac, 10 wala ethisi nyiimǝthǝ kwɔmne kweere, nǝ ki-lɔɔbi lǝthi ŋiɽaŋal ŋɔ, laazim ǝrisi baaŋaci ethaarɔŋw lisaawi tǝ ŋwɔɔmɔri tatap, lirllalɔ tok, nǝ nǝr ɔvthanni tok, mindaŋ mǝr ǝvicǝ ṯa@llima ṯiniyǝnǝ ṯǝthi ŋiɽaŋal ŋǝthi Allah wir Kwiglǝthǝ kwǝri.
11 Kaka mǝgwɔ ne@ma kwǝthi Allah ruwǝnnǝlɔ, kwǝthi ŋiglǝthǝ ŋǝthi lizi tatap, 12 ethi ǝccǝ nyuŋwsi @allima mindaŋ ethi dirnatha ŋimiitha-lɔ ŋa ŋiti ŋir ŋǝthi Allah mac, nǝ kadɔwa kǝthi ṯurmun-nǝ tok, mindaŋ ethi nanni limthi rɔgwori, iirllalɔ, nǝ ethi nanni kinɔŋw ki-ṯurmun-nǝ ŋimiitha-ŋi ŋǝthi Allah, 13 lǝkkicǝ ṯǝkkizǝ kizǝn ṯǝri kitha ṯɔrtanna, mǝ ŋinith ruwǝnnǝlɔ ŋǝthi Allah wǝri wɔppa, nǝ Kwiglǝthǝ kwǝni Yǝcu Kwɔrɔstɔ. 14 Ŋgwa kwɔmǝ-nyji inḏǝthǝ rogɽo ruuŋwun ethalla nyuŋwsi ki-ŋikiya-na tatap, mindaŋ mɔŋwsi suuɽi luuŋwun.
15 Aari @allima ŋiɽaŋal-ŋi ŋɔ, nǝ andasi sɔlṯa-gi kwɔɔŋa ethisi firllasi-la, ǝsi kiɽacci kila lǝṯiŋǝ niŋnasi mǝsi andaci. Ǝṯi duŋgwǝcǝ kweere mac ethi ǝrri ŋaaŋwɔ-lɔŋw.