aza 19
kwor kweni zakka kwenje Yecuŋw ŋirina
1 na Yecu enḏi ariiha, nuŋw naŋni eḏi ṯamḏu. 2 na kwor nani kwete kweni zakka, kwir kweleny kweḏi lizi letallila ṯulba, kwir kwurṯu tɔk. 3 nuŋw naŋni eḏeze Yecuŋw, eḏari kwir ti aŋgwuru, nuŋw ere eḏi ŋuma mac eḏuɽi yey lizi li la, kaka ataḏir gwu nana rugwɔṯ rugwɔṯ, ublaŋw gwu lu. 4 nuŋw zi iŋnaci kereny; nuŋw dallu kwoḏa la eḏ icazalu, kaka ilaḏir gwu nana tay ṯi kḏa. 5 mindaŋ mer upaḏi kezir wa ta, na Yecu baŋḏala nuŋw eze, nuŋw eca ŋwu: zakka, dapḏalu frafra kaka naŋnanyi gwu eḏele ŋirin duŋgwɔŋa aŋwunu. 6 nuŋw dapiḏana lu frafra, nuŋw enji duənu duŋgwun, kwamina. 7 mindaŋ mer eze ner uŋwunḏizina, ner ari: kwɔḏɔ manuŋ kwumele ŋirin ki duənu kweḏi kwor kwiki tugwori. 8 na zakka diɽi la nuŋw eca ŋwu: Kweleny, izaṯi, nyi kwuɽeḏa kwɔmne-na kwinyi titir, nyinḏeḏa luwaya nuzz; mindaŋ mer nani lere liyaṯinyji kwɔmne kwere, enyjeɽici nyamin-na kwaɽnan. 9 na Yecu eca ŋwu: ŋigileḏa ŋimila aŋwunu ki duənu ŋgwu, kaka roḏu gwu zakka tor teḏi ibrahiim-ŋa tɔk. 10 kaka inḏu gwu Tor teḏi kwizigwunaŋ eḏi zi ṯa naŋni limɔ ḏuḏi, mindaŋ eḏi zi kileḏi.
ṯiŋeroŋw ṯeḏi kwor kwinḏeḏa yaḏaama yuŋwun kwuruuza eḏoraḏizina
11 mer zi niŋnaci ŋu nuŋw zi kiɽeci ŋiɽaŋali, kaka iliziŋw gwu urzaliimŋw keṯɔk nuŋw zi andaci ŋiŋerɔŋwa, kaka arinar gwu ŋu: ŋeleny ŋeḏi Allah ŋinḏini kirem. 12 ŋwu ṯaŋwu, nuŋw zi andaci nuŋw zi eca ŋwu: kwor kwete kwinḏi kuṯu tuk eḏafa zulṯa kweḏi ŋeleny, mindaŋ eḏi ma aɽa. 13 nuŋw ornuti yaḏaama yuŋwun yir wri, nuŋw zi kannaci jineya kwere kwere, nuŋw zi eca ŋwu: oraḏizar-na mindaŋ nyi ma aɽa. 14 na lizi luŋwun firazi, ner ṯiŋaci ŋiɽaŋali, ner ari, nyiŋa liti linaŋna kworu ŋgwu eḏi miḏici nyuŋwuzi ŋelenyi mac. 15 ner orɔ ṯa ŋwu, muŋw aɽi, kwumafa zulṯa kweḏi ŋeleny, nuŋw uziḏizi eḏornuṯi yaḏaama kya yiṯacaŋw zi kwuruuza, eḏi zi uṯizelu ŋiɽaŋal ŋi ŋeḏi makzap kweḏi kwuruuz ŋgwa. 16 nuŋw ila kwete ki yey-na nuŋw eca ŋwu: kweleny, jiney kwɔŋwa kwumɔ kiɽeni wri. 17 nuŋw eca ŋwu: ŋizaw. a kwiri kaḏaama kizaw. kaka eni ŋa gwu kwirlalu eḏaŋraci kwɔmne kwɔkwɽeny, er ŋa inḏeḏa zulṯa eḏorɔ kweleny kweḏi yayin wri. 18 nuŋw murḏi kwukwaḏaḏi, nuŋw eca ŋwu: jiney kwɔŋwa kwumɔ kiɽeni tuḏni. 19 nuŋw ta andaci ŋwu tɔk, nuŋw eca ŋwu: a kworɔ kweleny kweḏi yayin tuḏni. 20 nuŋw ila kwuḏaḏu, nuŋw eca ŋwu: kweleny, iza ṯi jiney kwɔŋwa, kwumenyi kəki ki minḏiil-na mindaŋ ma gwu aɽa. 21 kaka ṯinya nyi gwu yey yɔŋwa, ur ŋa gwu kwomaḏu; a kweti ta afi kwɔmne kwiti kwukita ŋa lu mac; a kweṯuni kezir wete nyiḏak witi wagwu ŋa ŋuruŋ mac. 22 nuŋw eca ŋwu: ŋiɽaŋal ŋandizaŋazi ṯunya ṯi tɔŋwa, er ta orɔ ŋi ŋa ruzi kaṯi. a kwiri kaḏaam kiki. a kwilŋiicanyi aŋgwuru eḏaru ŋwu, kwiri kwornaḏu, kweṯidimi kwɔmne kwiti kwukitaŋw lu mac; kweṯuni kezir wete nyiḏak witi waguŋw gwu ŋuruŋ mac? 23 aḏa kwiiḏi ŋa eḏinḏeḏa kwizi kwere kwuruuza kwinyi; eŋguŋw awnizi nyuŋwu eḏoraḏizina, mindaŋ aɽi nyi, eŋginyi kaṯazi, na kwɔkwɔ tɔk kwumɔ kiɽeni? 24 nuŋw zi andaci kla linanizalu, nuŋw zi eca ŋwu: dimeḏir jineya, a inḏeḏa ŋgwa kweḏi jineya wri. 25 ner eca ŋwu: kweleny, kweḏuŋw pa wri. 26 nyi kwecaŋazi ma ŋwa, mer eḏi lere kwɔmne kwere, er zi gwu kiɽeci la; mer ere eḏi kwɔmne kwere mac ta, er zi dimeḏa ŋgwa kwaruŋw gi, kweḏi nyi. 27 na ŋeḏi kla luwezenyi, laruŋw, kwiti kwunaŋnanyi eḏorɔ kweleny kweri mac, er zi miḏa, er zi ṯa eɽenye ki yey-na yinyi.
Yecu muŋw endi urzaliim kaka melik
28 muŋw zi andaci ŋu, nuŋw zi iŋnaci kereny nuŋw ṯaŋa urzaliim ŋgi. 29 mer ṯa orɔ ŋwu, muŋw ilizi beyṯfaajiŋw keṯɔk, beyṯanya gi, kayin weni zeyṯuun, nuŋw uzi limeḏgen nden, 30 nuŋw zi eca ŋwu: inḏir kiṯay, ayinu kuṯu kinanɔŋw, mindaŋ ta ma upaḏi, a kaṯazi teɽiŋgaŋi tir kamal tikəkine, titi telliḏi gwi kwizi la kwere kineni mac. kediḏir ta, a mulḏa kunuŋ. 31 ma ŋazi kwizi kwere eca ŋwu: aḏa kwiri kwerrizaŋa ŋwu? ta, eca ŋwu: tinaŋna Kweleny. 32 ner ele kiṯay, ner inḏa kaka andicaŋw zi gwu. 33 mer kediḏa teɽiŋgaŋi tir kamal, nezi lizi leḏi eca ŋwu: a lɔḏɔ likediḏi teɽiŋgaŋi? 34 ner zi eca ŋwu: tinaŋna Kweleny. 35 ner muloce Yecuŋw, ner ugwuɽaḏa teɽiŋgaŋi yireṯ la yeŋen, ner gwu allazi Yecuŋw la. 36 muŋw ri ele, mindaŋ, ner kwurbuzi yireṯi lu yeŋen ki tay la. 37 muŋw acazi urzaliimŋw, nuŋw naŋni eḏi dapi ayin yi la weni zeyṯuun, na limeḏgen tatap ŋwuduŋw ŋi-na ŋwupa ner nyeŋlena, ner ortaḏa Allah kwola gi kwupa, ŋiɽaŋal ŋi ŋeḏi yilim yupa yimerzeze. 38 ner aru ŋwu: eḏi Melik ortanni, ŋgwu kwinḏi yiriny yi yeḏi Kweleny. eḏi ŋiɽena nanni kilerena, na ŋiniṯ kindala kider. 39 na lifarzi lɔkwɔ, linani kiduŋw-na, eca ŋwu: muallim, ermica ma limaḏgalu. 40 nuŋw zi eŋnici, nuŋw zi eca ŋwu: nyi kwecaŋazi ma ŋwa, eŋgir nani klu pet, eŋgi yal upina kwola gi.
Yecu kwariḏi urzaliimŋw
41 muŋw ilizi meḏiina ketok, nuŋw izazalu, nuŋw ariḏana, 42 nuŋw ariḏa ŋwu: eŋgi zi ta elŋece ŋeḏi tay tinḏi ki ŋiɽena-na, kinna ki lomur ta klu, lakin beri, ŋimezi ṯa ṯime. 43 ŋwamin ŋwa ŋwinḏi ŋwalu, ma ŋazi ṯa ṯuwən ṯalu ecici ureyuŋi lumurmura eḏi yi oɽi kiininy, er riiḏini ŋaŋwuzi doc doc, 44 er ŋa feḏizi ezir lu faṯ faṯ, nyiɽŋelu nyi-na ndeṯ, er ere efrici kali kere eḏurgwuḏi eŋgen la mac, kaka ṯimḏiŋa gwu lomuri leḏi Allah, muŋw ilaḏa-na.
Yecu kwuzuɽe heykala weḏi Allah
45 nuŋw enḏi ki heykal-na, nuŋw zi ruwa kla tatap leṯiilila, 46 nuŋw zi eca ŋwu: ŋuluḏina ŋaruŋw, er enjici duənu kwinyi yiriny, yeni duənu kweḏi ṯara ki yiriny, lakin ŋaŋa, na ruzelu kaka kibaŋ keḏi loɽam.
47 eṯuŋw zi ilŋiiḏini ki heykal-na ŋwamin rac; na leleny leḏi yiziiz, lor li leṯizilŋiiḏini kuruu-na, na lijowiṯ leḏi lizi, ilicelu eḏ iri kiṯay. 48 ner ulezi ṯay ṯeḏi zi gwu errizaza, kaka ma gwu lizi ketize yəni tatap ciɽŋil eḏi niŋnaci.
Yǝcu-ŋǝ Zǝkkǝ-gi.
1 Nǝ Yǝcu ǝndi Ariiha, nɔŋw-ŋgi ruu-nǝ. 2 Nǝ rǝ-iis rette rǝthi ṯɔlba naani kinaŋw rǝni Zǝkkǝ, rir kwɔrṯɔ. 3 Mindaŋ nɔŋw ṯǝcci etheese Yǝcu-ŋwɔ, laakin kaka nǝni-ŋgwɔ kwɔblalɔ nɔŋweere ǝthi ŋɔma mac etheese Yǝcu-ŋwɔ sǝbǝb-gi kwǝthi dɔŋw. 4 Taŋw nɔŋw avri nɔŋw iŋnaci dɔŋw keereny-gi mindaŋ nɔŋw dallɔ kwɔɔtha-la etheese Yǝcu-ŋwɔ, kaka ninḏi-ŋgwɔ ethi ṯamthɔ ṯaay-thi kitha. 5 Mǝ Yǝcu iila kǝzir-ṯǝ wa, nɔŋw baaŋitha-la nɔŋwɔccǝ Zǝkkǝ-ŋwɔ, “Zǝkkǝ ḏappa fittak, kaka ninḏiny-gwɔ laazim ethi naani ki-dɔɔnɔ kwɔɔŋa aŋwnɔ.”
6 Nǝ Zǝkkǝ fiɽigatha nɔŋw dappatha-lɔ mindaŋ nɔŋw aalanni ṯinyiŋla-thina. 7 Mǝsi lizi kila tatap ese ŋɔmǝ ǝrrini ŋɔ, nǝr ǝrmithǝthǝnǝ nǝraarɔŋw, “Kwɔr-ŋgwɔ kwɔmeele ŋiirin ki-dɔɔnɔ kwǝthi kwɔr ŋgwa kwigii!”
8 Nǝ Zǝkkǝ diiɽǝthǝlǝ nɔŋwɔccǝ Kweelenyi-ŋwɔ, “Kweeleny, niŋnaṯi! Nyii kwinḏǝthǝ lɔwaaya kwomne kwiinyi nus, nǝ mǝnyii yatha kweere ḏaalimǝ-tǝ, nyǝɽici nyaamin-na kwaɽiŋan.” 9 Nǝ Yǝcu ǝccǝŋw, “Ŋiglǝthǝ ŋɔmǝ iila aŋwnɔ ki-dɔɔnɔ-ŋgwɔ, kaka nɔrɔ-gwɔ kwɔr-ŋgwɔ tok tɔr tǝthi Ibraahiim. 10 Kaka ninḏi-gwɔ Tɔr tǝthi Kwizigwunǝŋ ethi naŋnalɔ mindaŋ ethisi kilǝthi kila limǝ ṯɔɔthi.”
Yaḏaam yirllalɔ nǝ yiti yirllalɔ mac.
(Maṯṯa 25:14-30)11 Kinaŋw nakkica-tǝ lizi kinnǝni ŋiɽaŋali ŋɔ kizǝn, nǝ Yǝcu aari isṯimir nɔŋwsi andaci mǝthǝlǝ. E-ta nɔŋwɔni kwɔmǝ iilici Urshaliim ŋwɔ keṯṯok, mindaŋ nǝr kittatha ethaarɔŋw Ŋeeleny ŋǝthi Allah ŋɔmǝ aadithi kettok ethi ruwǝnnǝlɔ. 12 Mindaŋ nɔŋwsǝccǝŋw, “Kwɔr kwɔnaana kwette kwɔppa ŋɔɔrɔ yǝnǝ, kwinḏi etheele ki-bǝlǝḏ kwɔɔlɔna dɔddɔl ethi ruusǝ mǝlik, e-ta ǝŋgwɔŋw-mǝ aaɽitha dɔɔnɔ. 13 Nǝ niti mɔŋweele kinnǝni mac, nɔŋw ɔrnɔṯi yaḏaama yuuŋwun yir wrii nɔŋwsi inḏǝthǝ jineya wrii nɔŋwsǝccǝŋw, ‘Iisar ɔraṯisi-na ŋaajir-ŋi mindaŋ mǝnyii aaɽa’. 14 Nǝ ǝṯi lizi lǝthi bǝlǝḏ kwuuŋwun wǝsi, mindaŋ nǝr usici lizi ethi ǝccǝŋw, ‘Nyiiŋǝ liti linaŋna ethi kwɔr ŋgwɔ oro mǝlik kwǝri mac’.
15 “Mindaŋ mǝ kwɔr rɔɔtha mǝlik nɔŋwaaɽa. Nɔŋw alla waamira ethi yaḏaam iila kiyǝnǝ yuuŋwun fittak, mindaŋ etheese kwomne kwɔmǝr ǝginǝ ŋaajir-ŋi. 16 E-ta nɔŋw iila ŋga kiŋna nɔŋwɔccǝŋw, ‘Yaa Sǝyyiḏ nyii kwɔmǝ ǝginǝ jineya wrii kwɔbaalalɔ’. 17 Nɔŋwɔccǝŋw, ‘Ŋisaaw beṯṯen, a kwir khaḏaam kisaaw! Kaka nirlliŋa-gwɔlɔ kwomne-na kwokwoɽɔc-tǝ, ŋǝ inḏǝthǝ sɔlɽa ethi mithǝ muḏunǝ kwir wrii’. 18 Nɔŋw iila kir nimrǝ kwuɽǝn nɔŋwɔccǝŋw, ‘Yaa Sǝyyiḏ, nyii kwɔmǝ ǝginǝ jineya ṯɔthni jine-gi ŋgwa kwɔtɔpɔt kwinḏǝthǝ-nyii’. 19 Nɔŋwɔccǝŋw, ‘Nyii kwɔŋa inḏǝthǝ sɔlṯa ethi mithǝ muḏunǝ ṯɔthni’. 20 Nɔŋw iila kir ter kwokwony nɔŋwɔccǝŋw, ‘Yaa Sǝyyiḏ, jine kwɔɔŋa kwindǝr-ṯǝ ŋgwɔ; kwuluccǝ-nyii ki-minḏill-nǝ. 21 Ṯiinya-ŋa-gwɔ kaka nɔrŋa-gwɔ kwɔr kwɔfirlli ŋiɽaŋali. Kaka nǝṯi-gwɔ dimmi kwomne kwiti kwir kwɔɔŋa mac, nǝ ǝṯi ɔni ŋgwa kwiti kwuŋwuuthuŋǝ mac’. 22 Nɔŋwɔccǝŋw, ‘Ŋa ŋgwɔ kwir khaḏaam kigii ŋgɔ! Nyii kwɔŋǝ ǝccǝ haakima ŋiɽaŋal-ŋi ŋǝthi ṯuunyu ṯɔɔŋwa! Nelŋe rac ethaarɔŋw, nyii kwir kwɔr kwafirlli ŋiɽaŋali, kwǝṯi dimmi kwomne kwiti kwir kwiinyi mac, nǝ ǝṯi-nyii ɔni ŋgwa kwiti kwǝṯi-nyii kwee mac. 23 Imba ŋisaaw-pa rac, laakin a kwende kwɔgitta gwuruushǝ kwiinyi ki-bǝŋgi-nǝ? Mindaŋ ǝŋgi-nyii aaɽa tǝ, ǝŋgi-nyii aavi misaaga-gi’. 24 E-ta nɔŋwsǝccǝŋw kila lirlɔ kinaŋw, ‘Dimmǝthir jineya kithaay, mindaŋ inḏǝthǝ khaḏaama ŋga kǝthi jineya wrii’. 25 Laakin nǝrǝccǝŋw, ‘Yaa Sǝyyiḏ, kǝthi-pǝ jineya wrii kerreny tuk’. 26 Nɔŋwsi ǝŋnici nɔŋwsǝccǝŋw, ‘Nyii kwǝccǝ-ŋǝsi-mǝ ŋwɔ, kweere nyithak kwǝthi kwomne kweere ethir kaniny kiɽǝcci; laakin ŋgwa kwiti kwǝthi mac, nǝ mɔŋwsi kinnǝni ǝthi nyokwɽoc nyir kaka aatha kweere, ǝrisi-tǝ dimmǝthǝ kithaay. 27 Nǝ ŋǝthi kila lir ṯuwǝn ṯiinyi liti linaŋna-nyii ethoro mǝlik kweeŋen mac ṯǝ, mɔltharsi kɔnɔŋw mindaŋ ǝsi ɽeenye kiyǝnǝ yiinyi!’ ”
Yǝcu mɔŋgwɔ ǝnḏi ŋithiinyǝ-ŋi Urshaliim.
(Maṯṯa 21:1-11Mɔrgus 11:1-11Yuhanna 12:12-19)28 Mǝ Yǝcu andasi ŋiɽaŋali ŋɔ, nɔŋwsi iŋnaci keereny etheele Urshaliim. 29 Mɔŋw iilicǝ Beiṯ-faajii-ŋwɔsi Beiṯ-@aniya-gi keṯṯok, kaayin wǝni Zeiṯuun, nɔŋw ɔɔsi ṯalaamiiza ṯiɽǝn keereny-gi. 30 Nɔŋwsǝccǝŋw “Nḏir ki-lilli-na linaanica-ŋǝsi keereny-gi, mǝgwɔ ǝnḏinǝ-tǝ, a kaṯṯasi tǝɽiŋgǝŋi tir limaathar tikǝkkinǝlɔ, titi timǝr-gwɔ allɔ-la kinnǝni mac. Kǝdithǝr a mɔltha kɔnɔŋw. 31 Mǝŋǝsi kweere ǝccǝŋw, totho timǝ kǝḏu-tǝ, ǝccǝŋw, Kweeleny kworo kwɔnaŋna.”
32 Mǝr iidǝthǝ kithaay mǝreele, nǝr kaṯṯasi kwomne tatap kwirga ŋgwa kwandisa-gi Yǝcu. 33 Na mǝr kǝdu tǝɽiŋgǝŋi tɔc, nǝsi lizi lǝthi ǝccǝŋw, “Totho timǝ kǝdu?” 34 Nǝrsi ǝŋnici nǝrsǝccǝŋw, “Kweeleny kwɔrɔ kwɔnaŋna.” 35 Mindaŋ nǝr mɔltha tǝɽiŋgǝŋi nǝreele naanɔ-gwɔ Yǝcu. E-ta nǝr kwurbi yirethi yeeŋen ki-tǝɽiŋgǝ-lǝ, mindaŋ nǝr-gwɔ allasi Yǝcu-ŋwlǝ. 36 Mɔŋgwɔ dallɔ-la kwinḏi, nǝ lizi kwurbi yireth-lɔ yeeŋen ki-thaay-la.
37 Mɔŋw iilicǝ Urshaliim-ŋwɔ keṯṯok, kəzir wirri-gwɔ ṯaay nda-li Kaayin wǝni Zeiṯuun, nǝ dɔŋw tatap ləthi ṯalaamiiz ṯuuŋwun aari ibṯəḏi ethi nyeŋlena mindaŋ nər biɽəthə Allah yiriny rogɽo-ri rɔppa-rɔppa ŋiɽaŋal-ŋi ŋǝthi ŋothɽor ŋɔppa-ŋɔppa ŋimǝrsi ese. 38 Nəraarɔŋw, “Ethi Məlik ɔrtanni ŋgwa kwinḏi yiŋiny-yi yəthi Kweeleny! Ethi ṯaama naana naani ki-leere-na, a ŋinith naani kindala kider!”
39 Nə Lifirriisiiyyiin lokwo kila linaanɔ ki-lɔdɔŋw-na əccə Yəcu-ŋwɔ, “Yaa Mɔ@allim kirinyathi ṯalaamiiza ṯɔɔŋwa ethi naani tugwup!” 40 Nəsi Yəcu əŋnici nɔŋwsəccəŋw, “Nyii kwǝccǝ-ŋəsi-mə ŋwə, mər kinnə naani ŋundu-ŋə tugwup, ətə yall aari ibṯəḏi ethi kegitte ŋwəkəɽiŋi-lɔ.”
Yǝcu mɔŋgwɔ aaritha Urshaliim-ŋwɔ.
41 Mɔŋw iilicǝ mǝḏiinǝ keṯṯok, mindaŋ mɔŋw ese nɔŋw aaritha, 42 nɔŋwaarɔŋw, “Athɔrɔ ǝŋgi fǝtǝ elŋe aŋwɔnɔ kwomne kwunǝŋninnǝ kwǝthi ṯaama naana! Laakin kire-kirem-ŋgwɔ tǝ, nɔŋwɔni kwuluccunǝthi-ŋǝ kiyǝnǝ yɔɔŋwa. 43 Ŋwaamin ŋwa ŋwinḏi-ŋǝ ethiilicǝ, mindaŋ ǝŋǝ ṯuwǝn ṯɔɔŋwa rikkathalɔ rikkak lɔɽɔmɔthicǝ-ŋǝsi kwomne-lɔ kithaay, mindaŋ ǝrŋǝ riithini dɔc raay tok. 44 Liŋǝ kiirasalɔ ker-ker, mindaŋ ǝri ɽeenye lizi tatap kila linaanɔ duŋgwɔŋa-na ǝreere duŋgwǝci kaali keere mac ethi naani kǝzir wuuŋwun, kaka niti nilŋithi-ŋǝ gwɔ lɔɔmɔri mac kila limǝ-li Allah iila ethi kilǝthi ŋaaŋwɔ!”
Yǝcu mɔŋŋweele ki Heikal-na.
(Maṯṯa 21:12-17Mɔrgus 11:15-19Yuhanna 2:13-22)45 E-ta nǝ Yǝcu ele nɔŋw ǝnḏi ki Heikal-na, mindaŋ nɔŋwaari ibṯǝḏi ethi rutti raajira kithaay. 46 Nɔŋwsǝccǝŋw, “Ŋɔlɔɔthɔna-pa ŋaari-ŋi Allah-ŋwɔ, ‘Dɔɔnɔ kwiinyi kwir kwǝthi ṯaara kiyiiriny’. Laakin ŋaaŋa tǝ kwɔmǝ ruusi kaka kibaŋ kǝthi lɔɔɽam!”
47 Nǝ ǝṯi Yǝcu aari @allima ŋwaamin tatap ki Heikal-na. Mindaŋ nǝ rɔ-asa rǝthi kahana-ŋǝ mɔ@allimiin-gi kwǝthi Sherii@a nǝ rɔ-asa rǝthi lizi tok, nǝr naŋni ethi ɽeenye ŋunduŋw. 48 Laakin nǝreere kaṯṯasi ṯaay mac ethisi ǝrri, kaka naarir-gwɔ isṯimir ethi niŋnaci, nǝreere naŋni mac ethisi ŋiɽaŋal ŋeere ere ṯamthitha naana mac.