aza 14
ṯizeya ṯeḏi kwor kwofaḏi ŋaw kaŋna-na
1 lamin lete leni zabiṯ, muŋw ele ki duənu kweḏi kwufarzi kwete kwir kwijowiṯ eḏeḏne, ner gwu icaci. 2 na kwor nani kwete ki yey-na yeḏi Yecu, kwurna, kwofaḏi ŋaw kaŋna-na. 3 nezi Yecu andaci lilŋiiḏi kuruu-na, lifarzi li, nuŋw zi eca ŋwu: ŋofḏana eḏi zəwi lizi ki lamin leni zabiṯ, ya beri? 4 ner nani tugwup, nuŋw dimelu, nuŋw zəwi, nuŋw ṯiŋa, nuŋw ele. 5 nuŋw zi andaci, nuŋw zi eca ŋwu: muŋw eḏi kwere teɽiŋgaŋi, muŋw iideḏi ki ṯil-na, ya tiḏri ta, ŋwu ere allizana tuc ki lamin leni zabiṯ manya? 6 ner zi ulezi ŋeḏi gwu keɽineḏa.
ṯejilina ki rɔgwɽɔ na ŋirin ŋami
7 na Yecu icaci lirina lornuṯir zi likwukwurbina ezir lu wizaw wizaw, nuŋw zi andaci ŋiŋerɔŋwa, nuŋw zi eca ŋwu: 8 muŋw ornaci ŋaŋwuzi ṯaga, eṯere orɔ lu duṯ duṯ mac eḏi kwukwurbini ezir lu wizaw wizaw. na kwila kwete kweṯemḏiŋa la, kwornuṯir tɔk. 9 na kwor kwornuṯiŋazi kwor gi kwuḏaḏu, kwɔŋeca ŋwu: efrice kwor ŋgwu, ŋwu morḏaḏi kezir la wɔŋwa. mindaŋ ma duŋgwa kezir wir ter witi wizaw mac, a ŋa ṯurony miḏa. 10 lakin mer ŋa ornuti ta, inḏi a nanalu kezir wa wir bɔrkwɔkwony. mindaŋ ŋa ma kwor ŋgwa kaṯazi kwornuṯiŋa, kwɔŋeca ŋwu: owɽi, ṯamḏaḏa ma, a nanalu kunuŋ la. ta, a ma niini-na ki lizi-na kla liciḏiŋa li, ki yey-na keḏneya la. 11 ma kwete nyiḏak ellini ki rɔgwɽɔ ṯaŋwu, er ta ruzi kwɔkwɽeny. muŋw ṯa ejilini ki rɔgwɽɔ kwere, ŋwu ṯa orɔ kwer piŋi.
12 na Yecu andaci ŋgwa kwornuṯu, nuŋw eca ŋwu: ma errizi lirina kwɔmne kwere kwir eḏne, eṯornuṯi limaḏgalu liaŋgalu li mac, lizi li na lalu rac, na leḏi yəni lu lir lurṯu; na li ŋa ta ornuṯaḏa deŋgen tɔk, er ŋazi ṯa eɽica ŋwu tɔk. 13 ma errizi lirina kwɔmne kwere kwir eḏne, ornuṯir luwaya, yubɔrkɔni, yɔmzɔŋi, na lunduŋa tɔk. 14 ṯaŋwu, a kwortani, kaka iti eḏir gwu kla ŋuma eḏəɽici ŋaŋwu kwɔmne kwere mac; lakin, er ŋa ma əɽici ki ṯidiɽa-na ṯeḏi lofḏana.
ṯiŋerɔyw ṯeḏi azuuma weḏi ṯaga
15 muŋw neŋne kwete ŋiɽaŋali ŋu, kwiiḏinarli, nuŋw eca ŋwu: kwere kwiiḏina ki ŋeleny-na ŋeḏi Allah, ŋworɔ kwortani. 16 na Yecu eŋnici nuŋw eca ŋwu: kwor kwete kwinḏi edi ketize lete ŋirina, eḏne yi wuru. nuŋw zi ornuti litezir. 17 ma lomur ṯimayini leḏeḏne, nuŋw zi ṯiŋaci kaḏaama eḏi zi andaci eḏi zi eca ŋwu: ilar; na limɔ ŋazi əgizi ezir kwɔmne gi tatap. 18 ner memilḏi ŋiɽaŋal ŋi tatap kaka ajilar gwu-na. nuŋw eca ŋgwa kwir kwiŋna: nyi kwuliṯi ezir wete wir ṯuruny, nenyi ta pa naŋni eḏele eḏeze. eṯir nyi ṯa əkica kizen mac. 19 nuŋw eca kwir ter ŋwu: nyi kwuliṯi nyiḏri nyimulḏi-na nyiɽen nyiɽen, nyamin-na ṯuḏni, enyjele enyji ṯeca. eṯir nyi ṯa əkica kizen mac. 20 nuŋw eca kwuḏaḏu ŋwu: nyi ŋgwu kwagwu kwayu ṯayti. ŋwu ṯa, nenyi ere eḏi ŋuma mac eḏila. 21 na kaḏaam ŋga ila, nuŋw andaci kwizi ŋgwa kwəkizaŋw ŋɔḏɽor ŋiɽaŋali ŋu. nuŋw ərum, nuŋw eca kaḏaama ŋwu: inḏi frafra ki lumaɽa-na, kezir were weḏi balaḏ ŋgwu, a mulḏa luwaya, yubɔrkɔni, yɔmzɔŋi, lunduŋ li na rac. 22 na kaḏaam eca ŋwu: ŋimerrini tatap ŋir kaka ŋari ŋa ŋi, na ezir wana ta weɽne lu wuḏaḏu. 23 na kwor eca kaḏaama ŋwu: inḏi ki lizari la, ki ray la rac ezi iila ŋuma ŋi-na, mindaŋ nyji urezi duənuŋw kwinyi dedep. 24 nyi kweca ma ŋwa, kwiti kwere mac kweḏi lizi kla lornuṯinyji, kwunyeŋle kwɔmne kwere kwinyi.
ṯornuṯa edi zi duŋgweci ŋeḏi rɔgwɽɔ
25 lamin lete ma ŋwuduŋw ŋwuru kwaḏiḏa, nezi Yecu orlaḏa nana nuŋw zi eca ŋwu: 26 muŋw ila kwere nani nyi gwu, muŋw ere firaza ṯernyin ŋwuzi lenyin gi mac, kwulen tɔk, nyiɽŋeyin tɔk, lieŋgen tɔk lir lor, na lir law, na rɔgwɽɔ keni ruŋwun tɔk, ŋwu ere eni kwumaṯ kwinyi mac. 27 muŋw ere dima kwere ŋwuɽi ŋwuŋwun ŋwuɽmɔḏalu eḏi ŋi kwaḏiḏa nyuŋwu, ŋwu ere eni kwumaṯ kwinyi tɔk mac.
28 muŋw kitaḏa kwere daŋgal-na eḏaci ṯilaŋgwua ṯola la ta, ŋwu ere nanalu kerreny manya eḏi iɽeḏa kwuruuza ŋgwa kwinḏuŋw gi eḏi gi erri ŋɔḏɽor, eḏelŋece eḏari, kwubiɽdi, ya kwamɽaṯi? 29 muŋw kwurṯi ṯugwagiza, mindaŋ muŋw ere eḏi ŋuma eḏi ṯimazi ṯilaŋgwua mac, a lizi eze, er ari yima, 30 er aru ŋwu: kwor ŋgwu kwɔḏɔ kwumaci mindaŋ muŋw ulezi abarya eḏi ratazi? 31 ya ma kweleny kwere naŋni eḏele ki ṯuwən, nani gwu kweleny kwere kwir ter ta, ŋwu ere nanalu kerreny manya eḏi ṯecici ŋuma-na ŋuŋun, eḏaru ŋwu, orṯa winyi worɔ alaaf wri, na weḏi ŋgwana kwinḏi orɔ alaaf ṯuɽi. 32 ma ŋuma ŋuŋun amɽaṯi ta, ŋwu ere ṯiŋaci kafura manya, muŋw nani kinna kwuḏaḏu kezir wolu-na, eḏeca ŋwu: er ṯa orɔ kwaɽi nyiḏak a? 33 ner ṯa orɔ ŋwu, mezi kwere daŋgal-na ere duŋgweci ŋeḏi rɔgwɽɔ ruŋwun mac, ŋwu ere eni kwumaṯ kwinyi tɔk mac.
34 kwumḏa kwizaw mi, lakin ma kwumḏa ajili kworɔ ta, eṯir ma ece ḏa eḏorje kwokwony? 35 mer fa kinna naŋni eḏi ballizalu kureyu lu, ya ki luḏa la lere, ŋwu ta ere ofḏani tɔk mac; er ṯiŋalu nyiḏak. kweḏi yəni eḏi yi neŋne, eḏuŋw neŋne.
Yǝcu mɔŋgwɔ sǝwi kwɔɔrɔ kwuumǝ.
1 Laamin lette lǝthi Sǝbiṯ nǝ Yǝcu ele ki-dɔɔnɔ kwǝthi Kwɔfirriisii kwette kwir kwujǝwuṯ; nǝgwɔ lizi iili yǝy-yi birr. 2 Nǝ kwɔr kwette kwɔṯǝthi wǝŋ rii naana nǝ ŋwaara naana tok iila naanɔ-ŋwɔ Yǝcu, 3 mindaŋ nǝ Yǝcu andaci mɔ@allimiina kwǝthi Sherii@a nǝ Lifirriisiiyyiin tok, nɔŋwsǝccǝŋw, “Sherii@a kwǝri kwǝṯi ǝmmini ethi sǝwi ki-laamin-la lǝthi Sǝbiṯ-a?” 4 Laakin nǝr naani tugwup. Ŋwɔṯaŋw nɔŋw dimmǝlɔ nɔŋw sǝwi, mindaŋ nɔŋw ṯiŋatha nɔŋweele. 5 E-ta nɔŋwsǝccǝŋw, “Mɔŋwɔthi kweere daŋgal-na tɔɔrɔ alla tithri, mɔŋw iidǝthi ki-ṯill-na ki-laamin-la lǝthi Sǝbiṯ, e-ta ŋwɔ ɽindaŋnalɔ ethi alla fittak ki-laamin-la ṯǝ kila lǝthi Sǝbiṯ-ɔ?”
6 Laakin nǝreere ǝthi ŋɔma mac ethi ǝŋnici ŋiɽaŋal-ŋi ŋɔ.
Ṯǝjlinnǝ ki-rogɽo nǝ ŋiirin ŋaami.
7 Nǝ Yǝcu ese liirinǝ lokwo lukwurbunnǝ ǝzir wisaaw-wisaaw, mindaŋ nɔŋwsi andaci tatap mǝthǝlǝ-ŋgwɔ, nɔŋwsǝccǝŋw, 8 “Mǝŋǝsi kweere ɔrnaci ǝzuumǝ wǝthi ṯaaga-tǝ, ǝṯeere kwurbunni ǝzir-lɔ wisaaw-wisaaw mac. Kimanni-pa ya ǝri ɔrnɔṯa kwizi kweere kwɔthǝmthiŋǝ-lǝ, 9 mindaŋ mǝ ŋgwa kwɔrnɔṯɔ-ŋǝsi ndǝndǝk, iila kwɔŋǝ ǝccǝŋw, ‘Duŋgwǝcǝ ŋunduŋw ŋwaavi ǝzir wɔ’. E-ta ǝŋǝ ṯɔrony mithǝ, mindaŋ a-naanalɔ kǝzir wir-lɔ borkɔkony. 10 Laakin mǝrŋǝ ɔrnaci ǝzuunǝ-tǝ, nḏi ɔ-naanalɔ kǝzir wir borkɔkony, mindaŋ mǝŋǝ ŋgwa kwɔrnɔṯɔ-ŋa iila kwɔŋǝ ǝccǝŋw, ‘Ǝwɽi, dallitha kɔnɔŋw kǝzir wɔ wisaaw’. Ŋwɔṯaŋw mindaŋ mǝŋǝ ŋiɽaŋal ŋɔ ǝvicǝ ṯiiɽǝnǝ kiyǝnǝ yǝthi liirin tatap. 11 Kweere kwǝṯi ǝllini ki-rogɽo, ǝṯɔŋworo kwir kwokwɔɽony. Nǝ kweere kwǝṯi ǝjlinni ki-rogɽo ǝṯɔŋworo kwɔppa ŋɔɔrɔ.”
12 E-ta nǝ Yǝcu ǝccǝ Wɔɔrɔ kwɔgittica ǝzuumǝ-ŋwɔ, “Mǝ kette ǝzuumǝ wǝthi ghaḏa alla @asha tǝ, ǝṯeere ɔrnɔṯa limathgalɔ-ŋwɔsi liyaŋgal-li mac nǝ lǝthi ǝgwur wɔɔŋa, nǝ jiiraan kwɔɔŋa kwir lɔrṯɔ tok mac, nǝ liŋǝ kettice ŋaaŋwɔ tok ǝzuumǝ. Nǝ ṯǝrṯiib-thi ṯǝ kɔthɔ nǝni kwɔmǝ aavi ɔjra wɔɔŋa. 13 Na mǝ kette ǝzuumǝ tǝ; ǝṯi ɔmɔṯa lɔwaaya-ŋwɔsi yuborkon-yi nǝ yomsoŋ-ŋwɔsi lunduŋw-li; 14 mindaŋ mǝ ɔrtanni kaka niti nǝthir-gwɔ ŋɔma mac ethi kettice ŋaaŋwɔ ǝzuumǝ tok. Allah wɔrɔ winḏiŋǝ ethi inḏǝthǝ ɔjrɔ ki-laamin-la linḏi-li lizi lɔvthanna ethi diiɽǝ ki-ŋiɽany-na.”
Mǝthǝl kwǝthi ǝzuumǝ wɔppa.
(Maṯṯa 22:1-10)15 Mǝ kwette kwǝthi lizi kila kwɔnaanisa ṯerbeeza-lɔ neŋne ŋiɽaŋali ŋɔ, nɔŋwɔccǝ Yǝcu-ŋwɔ, “Lindǝr-mbǝ kila rerrec linḏi ethi ɔrtanni ethi naanalɔ kǝzuumǝ-nǝ ki Ŋeeleny-na nǝthi Allah!”
16 Nǝ Yǝcu ǝccǝŋw, “Kwɔr kwɔnaanɔ kwette kwɔgitta ǝzuumǝ wɔppa ŋiɽaŋali, mindaŋ nɔŋw ɔrnɔṯa lizi littǝzir. 17 Mǝ lɔɔmɔr iila lǝthi ǝzuumǝ, nɔŋw ɔɔsi khaḏaama kuuŋun ethi anḏica liirinǝ, ethisǝccǝŋw, ‘Ila-ri nǝ kwomne tatap kwɔmǝ naanalɔ cɔgwo-cɔgwop!’ 18 Laakin nǝraari ibṯǝḏi tatap ethaava ŋwɔrɔjɔ ŋweere-ŋweere ŋwɔthiinyinǝsi etheele. Nɔŋw andaci ŋgwa kwiŋna khaḏaama nɔŋwɔccǝŋw, ‘Nyii kwiliṯṯi ṯɔrɔny ṯette nǝ laazim nyeele nyiraŋitha; min fǝḏlǝk ǝṯi kittathɔ duŋgwiny-ŋgi mac’. 19 Nǝ kwɔthaathɔ aarɔŋw, ‘Nyii kwiliṯṯi jɔɔza ṯɔthni kwǝthi nyithri, nṯ nyii-ŋgwɔ kwinḏi etheele ethisi tǝccǝ, min fǝḏlǝk ǝṯi kittathɔ duŋgwiny-ŋgi mac’. 20 Nǝ kwɔthaathɔ aarɔŋw, ‘Nyii-ŋgwɔ kwaagithɔ kwiyaŋ-kwiyaŋ, nǝ sǝbǝb-gi ṯǝ ŋgwɔ nyiiti kwǝthi ŋɔma mac ethiila’. 21 Nǝ khaḏaam aaɽi nɔŋwandaci sǝyyiḏǝ kwuuŋwun ŋiɽaŋali tatap. Mindaŋ nǝ sǝyyiḏ urǝzi ṯɔgwori deddep, mindaŋ nɔŋwɔccǝ khaḏaama kuuŋun-ŋwɔ, ‘Nḏi firavra ki-lishaar-la nǝ ki-limaaɽa-na tok lǝthi mǝḏiinǝ, a mɔltha lɔwaaya-ŋwɔsi yiborkon-ŋǝli nǝ lunduŋw-ŋǝ yomsoŋ-ŋǝli’. 22 Nǝ khaḏaam ǝccǝŋw, ‘Yaa sǝyyiḏ ŋiɽaŋal-ŋa ŋǝccǝny-ŋi ŋwɔ ǝrrǝsi, ŋimǝ ǝrrinni laakin nǝtǝ ǝzir ǝɽinni ṯir-ṯir’. 23 Ṯaŋw nǝ sǝyyiḏ ǝccǝ khaḏaama-ŋwɔ, ‘Nḏi ki-lishaari-la nǝ ki-raay-la tok, mindaŋ a iilǝ lizi ŋɔmaŋi-na, mindaŋ mǝ dɔɔnɔ kwiinyi urǝnni deddep. 24 Nyii kwǝccǝ-ŋǝsi-mǝ ŋwɔ, kwiti kweere mac kwǝthi kila lɔrnɔṯɔrsi kwinḏi ethi nyeŋle ǝzuumǝ wɔ!’ ”
Aatha kwɔrɔ kwǝniŋw ethoro ṯilmiiz ṯǝthi Yǝcu.
(Maṯṯa 10:37-38)25 Laamin lette nǝ ŋwɔdɔŋw ŋwuuru ŋwɔthi lizi rɔɔmi Yǝcu-ŋw-lɔ, nɔŋw ɔrllalɔ mindaŋ nɔŋwsǝccǝŋw, 26 “Mɔŋw iila kweere naaniny-gwɔ ŋweere oro ṯilmiiz ṯiinyi mac, mɔŋw amɽi ṯǝrnyin-ŋwɔsi lǝnyin-gi beṯṯen duŋgwiny-lǝ, nǝ kwaaw kwuuŋwun nyelle-nyi, nǝ liyeŋgen lir lɔr, nǝ lir laaw, nǝ ŋimiitha ŋǝthi rogɽo ruuŋwun tok. 27 Mǝ kweere ere dimmi ŋwuuɽi ŋwuuŋwun ŋwɔɽomɔthalɔ mac ethi-ŋi kwaathitha nyuŋwɔ, ŋweere oro ṯilmiiz ṯiinyi ḏuṯ. 28 Mɔŋwaari kweere fǝkirǝ ethi acci lithmina lɔɔlala tottoc tǝ, kwǝṯi-pǝ naanalɔ kerreny etheese linḏi ethoro gwuruushǝ tha, nǝ ŋgwɔ kwuuru kwǝthi-gi ṯimmasi ŋothɽor alla bǝri. 29 Mɔŋweere ǝthi kwuuru mac tǝ, ŋweere ǝthi ŋɔma mac ethi ṯimmasi lithmina lɔɔlala mɔŋw acci ṯɔgwagiza rac; nǝ kila tatap linḏisi ethisi ese ŋǝrrinǝ, ǝri aaritha yiimǝ-nǝ kathri! 30 Mindaŋ ǝraarɔŋw, ‘Nǝ kwɔr-ŋgwɔ aari ibṯǝḏi ethi acci rac, laakin kwiti kwɔmǝthi ŋɔma mac ethi ṯimmasi ŋothɽor kworo!’ 31 Mǝ mǝlik kweere naŋni ethi ṯɔgthi mǝlik-gi kwɔthaathɔ, kwiti kwǝṯi naanalɔ ethi mɔmri ŋiɽaŋali-la kerreny mac etheese kwǝthi ŋɔma lizi-li luuŋwun lir @ashra alf, ethi ṯɔgthi mǝlik-gi kwǝthi lizi lir @ishriin alfa? 32 Mǝreere oroŋw mac tǝ, ŋwuusici mǝlik-gǝ ŋgwɔ kwɔthaathɔ yaavɔra ethi andaci ethi-gi ammithi-na a-naanɔ-ŋw-tǝ kinnǝni kinǝŋgwu tuk.” 33 Nǝsi Yǝcu ǝccǝŋw, “Ŋwɔṯaŋw kwiti kweere mac daŋgal-na kwǝthi ŋɔma ethoro ṯilmiiz ṯiinyi mɔŋweere duŋgwǝci kwomne tatap mac kwǝthiŋw.
Kwumthǝ ŋgwa kwiti kwǝthi faayitha-na mac.
(Maṯṯa 5:13Mɔrgus 9:50)34 “Kwumthǝ kwisaaw rac; laakin mɔŋw irṯasi orje-ŋwɔlɔ kwuuŋwun tǝ, ǝrmǝ ǝccǝ tha ethi ɔrje kwokwony? 35 Ŋweere ɔvthanni kwokwony mac ethi balsi ki-wurǝyu-nǝ, wala ethi ɔvthanni ethoro lur. Ŋwɔvthanni ethi balna-lɔ kinǝŋgwu tuk. Kwǝthi yǝni yǝthi-yi neŋne ethɔŋw neŋne!”