aza 2
1 ṯaŋwu nenyi irezi yey lu eḏere ila eḏi raŋḏa ŋaŋwuzi mac eḏi kiɽeci ŋaŋwuzi kwokwony ṯirara. 2 ma ŋazi gwu inḏini ṯuronyina ta, eya kwiri kwenyi inḏeḏa ṯinyiŋlana illi ŋgwa kwumenyi runyini? 3 nenyji ma luḏa kaka ṯaŋwu mindaŋ menyila enyjere inḏini ṯirara mac lizi li kla leŋgi nyi inḏeḏa ṯinyiŋlana, nenyjelŋece rac ŋeni ŋalu tatap, ṯinyiŋlana tinyi ṯorɔ ṯinyiŋlana ṯalu tatap. 4 kaka lucaŋazi gwu ṯurfa ṯi ṯupa na ṯugwor ṯi ṯirara ṯeṯec, na ŋwal ŋi ŋwitezir, ŋiti ŋiri eḏinḏini ŋaŋwuzi ṯuronyina mac, lakin eḏilŋiiḏini ŋaŋwuzi ṯamɽa ṯupa ṯiminni ṯeḏinyji ṯeni ŋaŋa.
enjeri kiloɽu-na ŋgwa kwumezerri ŋiki muŋw urla ṯugwori lu
5 lakin muŋw inḏini kwere ṯuronyina, nuŋw ere inḏini ṯeni nyi mac, lakin nuŋw eni ṯinḏinaŋw ŋaŋwuzi tatap ṯɔkwɔ— eḏere ufini ŋunduŋwu ŋiɽaŋali ŋini didip mac. 6 na ṯa jiiza andi ṯaŋwu kweḏi ŋgwa kwuhakwuma gi lizi luru; 7 ṯaŋwu, ŋofḏana eḏurla eḏi zi miɽinyacalu, na eḏi kandizelu mindaŋ ma ṯugwor ṯuŋwun ere ajili ṯuronyina ṯi. 8 ŋwu ṯaŋwu, nyi kwuturecaŋazi lu tur eḏi ruwezezi ŋunduŋwu ṯamɽa nana ṯalu. 9 ŋinderṯa ŋu ŋulucaŋazi, mindaŋ eḏi ma ṯeci ŋaŋwuzi, eḏi zi ma elŋe eḏaruŋw, a leṯinyi inyici nana kwɔmne gi tatap. 10 kwere kwumɔ zi iɽinyacalu, enyji iɽinyacalu nyi tɔk. ŋa ŋimenyji ŋi iɽinyacalu, menyji iɽinyacalu ŋere, ner orɔ ŋeni ŋalu ki yey-na yeḏi Kwruztu, 11 mindaŋ eḏi ṯinyini zeyṯaanŋw eḏəgini ŋuma deŋgeri la; kaka ilŋiicar gwu ŋiɽaŋali ŋeṯuŋw zi naŋni eḏizerri.
ṯurfa na ṯillaza ki, ŋiɽaŋal ŋi ŋizaw ŋir injiil
12 menyila ṯarwaaz eḏi zi andaci ŋiɽaŋali ŋizaw ŋeḏi Kwruztu ŋir injiil, nenyi ṯay nanji ṯifoɽu eḏi Kweleny-na; 13 lakin na ṯugwor ṯinyi ere eḏi ŋuma mac eḏi biɽeci nyuŋwu lu, kaka iti inḏa nyi gwu eŋgeriŋw kwinyi kweni tiiṯaz kinanɔŋw mac. ṯaŋwu nenyji ṯaza lu, nenyele makḏunya.
14 lakin er eca Allah zukran weṯinyji mulḏa ki ṯillaza-na ki ŋwamin tatap eḏi Kwruztu-na, na weṯi feḏi ṯilŋiiḏina ṯuŋwun nyiŋa li kezir nana tatap, kaka wəŋ wami. 15 kaka enir gwu nyiŋa wəŋ weḏi Kwruztu wamiḏi Allah, nanir gwu kla linḏi eḏi kilaw, na nanir gwu kla linḏi eḏi kiraḏa lu; 16 ŋeḏi lete, liri wəŋ weḏi ŋiɽany winḏi ŋiɽany-na, na ŋeḏi liḏaḏu liri wəŋ weḏi ŋimiiḏa winḏi eḏi ŋimiiḏa-na. eya kwiri kweḏi ŋuma oɽeny ki rɔgwɽɔ ruŋwun eḏorɔ ṯa ŋwu? 17 nyiŋa liti liri kaka kla luru mac leṯinaŋni eḏəginici rɔgwɽɔ reŋen kwɔmne kwere ŋiɽaŋal ŋi ŋeḏi Allah, lakin kaka lor liira ŋidiny-na, kaka ellinyji gwu Allah-na, eṯinyji andazi ki yey-na yeḏi Allah eḏi Kwruztu-na.
1 Ŋwɔṯaŋw nǝnyii urli fikirǝ-lɔ kwiinyi, mindaŋ etheere iila ethi kiɽǝcci ŋaaŋwɔsi ṯɔrɔɔnyɔna kwokwony mac. 2 Nǝ mǝŋǝsi ruunyini tǝ, e-ta ǝyǝ kwɔrɔ kwinḏi-nyii ethi ǝminǝ, illi ṯǝ ŋgwa kwette-kwette kwuruunyinǝ-nyii? 3 Ŋindǝr-ṯǝ ŋɔ mindaŋ nǝŋǝsi lɔcca juwaaba ŋgwa, mindaŋ etheere kaṯṯasi ṯɔrɔɔnyɔna mac, naanɔ-gwɔ kila lǝŋgi-nyii ǝminǝ. Nǝ nǝnyji elŋe rac rerrem ethaarɔŋw, mǝnyii aamina tǝ, ǝṯǝni lǝṯi aamina tatap tok. 4 Ŋwɔṯaŋw nǝŋǝsi-mǝ ǝccǝ ṯurvǝ-thi ṯɔppa, nǝ ṯɔgwor-thi ṯɔrɔɔnyɔna, nǝ ŋwal-ŋi ŋwuuru yǝy-yi, mindaŋ etheere ruunyini ŋaaŋwɔsi mac, laakin ethi kǝniny duŋgwǝci ŋaaŋwɔsi ethisi elŋe ŋǝthi ṯamɽa ṯiinyi ṯɔppa ṯǝni ŋaaŋa tatap.
Ethi iɽinyacalɔ ŋgwa kwǝrrǝsi ŋigii.
5 Laakin mɔŋw ǝnyjǝ kweere ṯɔrɔɔnyɔna tǝ, ŋweere ruunyini nyuŋwɔ ṯɔɽɔk mac, laakin nɔŋw-thi ruunyini ŋaaŋwɔsi ṯokwo tok tatap, ŋǝni ŋandisa-nyji ŋɔ mindaŋ etheere uvuni ŋunduŋw ṯɔɔvi ṯinii diddip mac. 6 Nǝṯǝ jiizǝ uruŋw ŋgwa kwǝccǝ-ŋǝ-gi ŋaaŋa luuru kwizi-ŋgwa haakima. 7 Ŋwɔṯaŋw nǝr ɔvthanni ethi iɽinyacalɔ, mindaŋ mǝ kandizalɔ tok, etheere ronyine beṯṯen mac. 8 Nǝŋǝsi tuurǝccǝlɔ mindaŋ ethi duŋgwǝci ŋunduŋw ethelŋe ṯamɽa ṯaalɔ ṯǝni ŋundu. 9 Ŋindǝr-ṯǝ ŋɔ mindaŋ nǝŋǝsi lɔcca juwaaba, ethi ṯǝcci ŋaaŋwɔsi, mindaŋ ethisi elŋe ŋǝniŋw ŋaaŋa lǝṯi iinyici ŋiɽaŋali naana tatap. 10 Kweere nyithak kwǝṯi iɽinyacalɔ, ǝnyii iɽinyacalɔ nyii tok. Mǝr naani ŋeere nyithak ŋinaŋna-nyii ethisi iɽinyacalɔ, ǝnyji ǝrri ŋiɽaŋal-ŋi ŋǝni ŋaalɔ kiyǝnǝ yǝthi Kwɔrɔstɔ. 11 Mindaŋ mǝr ṯiinyi Shiiṯaana etheere ǝthi ŋɔma dǝŋgǝr-lǝ mac, kaka nilŋicar ǝfkǝrǝ wuuŋwun.
Ṯipinnǝ ṯɔgwor-na ṯǝthi Bɔɔlɔs.
12 Mǝnyii ɔppathi Ṯarwaas ethaari bǝshirǝ Inyjiilǝ wǝthi Kwɔrɔstɔ, nǝnyii lɔbaab kiṯṯinici ethi Kweeleny-na. 13 Laakin nǝnyii pinni ṯɔgwor-na beṯṯen kaka niti mǝny-gwɔ ere kaṯṯasi ǝŋgǝriŋw kwǝri kwǝni Ṯiiṯus mac. Ŋwɔṯaŋw nǝnyii ṯayya lizi-lɔ ninyeele Makḏuuniiyyǝ.
Ṯillaza kii Kwɔrɔstɔ-ŋgi.
14 Laakin ǝri ǝccǝ Allah shukran wǝṯi-nyji inḏǝthǝ ŋɔma ŋǝthi ṯillaza kii ŋwaamin tatap ethi Kwɔrɔstɔ-na, ǝṯi-nyji Allah mǝcci ethi fǝthi ṯilŋiithinǝlɔ ṯǝthi Kwɔrɔstɔ ǝzir naana tatap kaka fithni kwaami wǝŋ. 15 A kwirir-pa nyiiŋǝ kwɔthɽɔl kwaami wǝŋ kwinḏǝthǝ Kwɔrɔstɔ Allah, kwɔvthanna ki-lizi-nǝ kila limǝ kilaaw, nǝ kila limǝ ṯɔɔthi tok. 16 Nǝ ki-lizi kila lɔthɔɔthɔ, ǝṯisi kwɔthɽɔl ŋgwɔ rɔɔthatha ŋiɽany deŋgen-na, nǝ limǝ kilaaw tǝ, nǝrsi rɔɔthatha ŋimiitha. Nǝ ǝyǝ kwɔrɔ kwǝthi ŋɔma ethi ǝrri ŋothɽor ŋɔ? 17 Nyiiŋǝ liti lir kaka kila luuru lǝṯi aari ŋaajira ŋiɽaŋal-ŋi ŋǝthi Allah mac; laakin nǝroro lizi lirllala, lɔɔsasi Allah, nǝ ǝṯir andasi Kwɔrɔstɔ-ŋgi kiyǝnǝ yǝthi Allah.