aza 12
ŋimiiḏa ŋiaŋ
1 ŋwu ta, nyi kwuturecaŋazi lu tur, lieŋgeri linyi, ŋiɽaŋal ŋi ŋeḏi ŋimɽi ŋeḏi Allah, eḏi ruzi yaŋna yalu karama kimiiḏu, kirlinelu ter, eḏi gi əmi Allah-na. ŋinderṯa ŋu ŋiri ṯikwocalu ṯeḏi rugwor. 2 eṯere kwakiḏaḏa ŋeḏre ŋeḏi kla leḏi ṯurmun mac eḏizaɽani, lakin eṯorɔ lizi liaŋ ṯireca ṯi yey lu ta, ezi ma elŋe ŋeḏi ṯugwor ṯeḏi Allah ŋa ŋeni ŋizaw, na ŋeṯəmi ŋunduŋwu-na, na ŋir minmin.
ŋeḏre ŋizaw haḏiyayi weḏi Ṯigɽim ṯirlinelu ter
3 ŋiɽaŋal ŋi ŋeḏi ṯimeca ṯeḏi ŋimɽi ṯimer nyi inḏeḏa ta, nyi ŋgwu kworacaŋazi lere nyiḏak daŋgal-na eḏere piŋi rɔgwɽɔ ralu mac eḏellini, lakin eṯi ṯeci rɔgwɽɔ ralu ŋiɽaŋal ŋi ŋeḏi ṯəmna, ṯimɔ ŋazi Allah kannaci lere lere. 4 kaka eṯi gwu kwɔmne kweḏi aŋna oɽmaṯi eḏorɔ aŋna wutuput, na eṯi kwɔmne kwuŋwun eḏi ŋɔḏɽor-na ŋir ter ter, 5 ŋwu ṯa, nyiŋa tɔk leni luru, eṯir oɽmaṯi eḏorɔ aŋna wutuput eḏi Kwruztu-na, na lere lere eṯir li kiɽmiḏi-na liḏaḏu. 6 nyiŋa, afar gwu haḏiya wir-na ter ter ŋiɽaŋal ŋi ŋeḏi ṯimeca ṯeḏi ŋimɽi ṯimer nyji inḏeḏa, er yi erri ŋama-ŋamaŋ; ma haḏiya orɔ weḏi ŋiɽya ta, er zi yi andaci ŋinḏeḏa zi Allah, ŋiɽaŋal ŋi ŋeḏi ṯəmna ṯeri; 7 ma haḏiya weri orɔ eḏi zi yi meci liḏaḏu ta, er zi yi meci; ma kwete afi haḏiya eḏi zi yi ilŋiiḏini ta, eḏuŋw zi yi ilŋiiḏini; 8 ma kwete afi haḏiya eḏi zi yi oraci ta, eḏuŋw zi yi ukwazi; ŋgwa kweṯi zi inḏeṯa ta, eḏuŋw zi ami inḏeḏaŋw ṯugwor ṯi; ŋgwa kweṯi zi mulɔtɔ liḏaḏu ta, eḏuŋw zi ecice ŋama-ŋamaŋ; ŋgwa kweṯi zi meci liḏaḏu ŋimɽi ŋi ta, eḏuŋw zi meci ṯinyiŋla ṯi-na tɔk.
nizam kweḏi ŋikwruztyan
9 eṯizamɽi liira ŋidiny-na; eṯi zi firazi ŋeni ŋiki, eṯi zi miḏa teter ŋeni ŋizaw; 10 eṯamɽaḏizina wuɽe-wuɽeny, kaka kla lir ŋiaŋga; eti zi iɽi-na liḏaḏu beten eḏi rɔgwɽɔ la ralu. 11 etere efrinji ŋimozaŋi eḏi kiici ŋaŋwuzi ŋiɽaŋali mac; eṯerṯelu fori gi kweḏi Ṯigɽim ṯirlinelu ter; eṯəkizi Kwelenyi ŋɔḏɽor. 12 eti nyeŋlena ki ṯəkiza-na talu kizen; eṯindinyani ṯurfa nana ṯir nyɔrɔ nyɔrɔ; eṯari ki yiriny dɔk dɔk. 13 eṯinḏeṯa lizi leni lirlinelu ter liira kwɔmne-na; eṯami enji lirinaŋw.
14 etizortaḏa kla leṯi ŋazi owɽi yey; eṯizortaḏa, eṯizere ɔllɔ mac. 15 eti li nyeŋlena kla leṯi nyeŋlena; eṯi li araḏizi kla leṯari ŋwunda. 16 eti kiɽmiḏi-na; etere piŋi rɔgwɽɔ mac, lakin eti li romḏi lir lɔkwɽeny; eṯere piŋi teḏinayeyna talu mac. 17 eṯi zi ere errici kwere ŋeni ŋiki mac, muŋw zi errici ŋaŋwu ŋeni ŋiki; eṯi zi ireci yey lu eḏizerri ŋizaw ki yey-na yeḏi lizi. 18 mer eni ŋɔŋa, eṯi li eḏi ŋiɽena tatap. 19 limɽi linyi, eṯere əɽiḏizi ŋwoɽa mac, lakin eṯi zi ketize ŋirŋaza ŋeḏi Allah ki rii-na; kaka luḏinar gwu, ŋaruŋw, Kweleny kwaru ŋwa: eṯi hukm orɔ winyi, nenyji ṯa əɽici kaka ṯa ŋa. 20 epa, ma yaŋwu ye kwere kwir ŋa gi ṯuwən, inḏeḏa eḏneya; ma owḏa ye ta, inḏeḏa ŋaw. mezi ṯa errizi ṯa ŋwu ta, a firṯaḏa igəŋi wir ŋwurɔ kinda la luŋwun. 21 eṯere efrinji ŋikyaŋi eḏillazi ŋaŋwu ki mac, lakin eṯi keni illazi ŋikyaŋi ki ŋizana ŋi.
Ŋimiitha ŋiyaŋ.
1 Nyii kwutuurǝccǝ-ŋǝsi-lɔ tur liyǝŋgǝri liinyi ŋimɽi-ŋi ŋǝthi Allah, ethi ruusi yaŋna yaalɔ kaka kiraama kimiithɔ, kirllinǝlɔ ter, kaṯṯi Allah ǝmmini kir ṯɔŋwɔccala ṯǝthi rɔgwor raalɔ. 2 Ǝṯeere aaɽanni ŋethre ŋǝthi ṯurmun kɔthɔ mac, ǝṯi ɔrllalɔ mindaŋ oro liyaŋ ki-ŋaɽiny-na ŋaalɔ, mindaŋ mǝsi elŋe ŋǝthi ṯɔgwor ṯǝthi Allah, ŋa ŋisaaw ŋǝmminǝ-ŋwsi nǝ ŋir min-min.
3 Ŋwɔṯaŋw nyji tuurǝccǝlɔ tatap kila linaanɔ daŋgal-na ne@ma-gi ŋgwa kwinḏǝthǝr-nyii; etheere iirǝzi yǝy-lɔ ṯiirǝzǝ-thi ṯithǝmthi-ŋǝsi-lǝ pur-pur mac, laakin ethisi iirǝzǝlɔ ŋiɽaŋal-ŋi ŋa ŋir-ga ŋimǝsi Allah kannaci leere-leere ṯǝmminǝ-thi. 4 Kaka nǝṯi-gwɔ aŋna wɔtɔpɔt ǝthi a@ḏo wuuru, nǝ ǝṯiṯǝ @ɔḏɔ wette ǝthi ŋothɽor ŋuuŋun, 5 nǝ nyiiŋǝ tok, nuurur-vǝ kinnǝni tok, nǝrtoro aŋnana wɔtɔpɔt ethi Kwɔrɔstɔ-na, nǝ nyiiŋǝ tatap nǝrɔrɔ dɔŋw lɔtɔpɔt, kaŋna-na wɔtɔpɔt. 6 Nǝ nǝrǝthi haḏaaya wirna ter-ter ŋiɽaŋal-ŋi ŋǝthi ne@ma ŋgwa kwinḏǝthǝr-nyji, ǝrgi kǝniny akkɔ ŋothɽor, mɔŋworo kwǝthi ŋiɽiiya tǝ, laazim ǝrisi ǝrri ŋir kaka ŋǝthi ṯǝmminǝ kitha ṯǝthir. 7 Mɔŋworo kwǝthi ŋothɽor tǝ, laazim ǝrisi ǝrri, mɔŋworo kwǝthi-gi aari @allima tǝ, laazim ǝri-gi aari @allima. 8 Mɔŋworo kwǝthi-gi firllasi-la lithaathɔ tǝ, laazim ǝrisi-ṯǝ ǝrri ŋirɔŋw. Kweere kwǝṯir-li kannathisi lithaathɔ kwomne-ŋgwa kwǝthiŋw, laazim ŋwɔsi ǝrri ŋɔ kwaami ṯɔgwor-na; nǝ kweere kwǝṯisi mǝcci lithaathɔ laazim ŋwɔsi inḏǝthǝ ṯɔgwor-thi ṯuuŋwun min-min, nǝ ŋgwa kwǝṯisi ǝrri ŋǝthi ŋimɽi, laazim ŋwɔsi ǝrri ṯinyiŋla-thina.
9 Ethi ṯamɽa oro rerrem ṯir min-min, ǝṯisi wǝzi ŋa ŋigii, nǝ ǝṯisi mithǝ ŋa ŋisaaw tetter. 10 Ǝṯi amɽathisi-na wɔɽe-wɔɽeny ṯamɽa-thi ṯǝthi ŋiyaŋga, nǝ ǝṯi amɽi ethisi iiɽinǝ lithaathɔ. 11 Ǝṯi rɔɔthɔ limoozo mac ki-ŋothɽor-na, lithiŋathi fɔɔri-lɔ Ṯigɽim-thi, ǝṯi ǝkkici Kweelenyi ŋothɽor. 12 Ǝṯi nyeŋlena ki-ṯǝkkizǝ-nǝ kizǝn ṯaalɔ, mithir rɔgwori ki-ṯurvǝ-nǝ, nǝ lǝṯi aari kiyiiriny dok-dok. 13 Ǝṯi mǝcci liyaŋgalɔ kila lirllinǝlɔ ter kwomne-gi ŋgwa kwǝṯisi iirǝci, ǝtisi kettice kila lithimthina ŋiirinǝ.
14 Ǝṯisi ɔrtatha kila lǝṯi-ŋǝsi ǝwɽi yǝy-lɔ. Ǝṯisi ɔrtatha nǝ ǝṯisi ere ollollo mac. 15 Ǝṯi-li nyeŋlena kila lǝṯi nyeŋlena, ǝṯi-li aari kila lǝṯi aari. 16 Ǝṯi ǝthǝthisi ŋethre ŋisaaw daŋgal-na wɔɽe-wɔɽeny; ǝṯeere piŋi rogɽo mac, laakin ǝṯi ǝjlinni ki-rogɽo. Ǝṯeere ruusi rogɽo raalɔ kaka lizi lǝthi yǝnǝ mac. 17 Ǝṯeere ǝɽǝthisi ŋwɔɽa ŋikiya-ŋi mac, kittar kǝniny ŋɔma ethisi ǝrri ŋisaaw kiyǝnǝ yǝthi lizi tatap. 18 Nǝ mǝroro mǝmkin tǝ, a ǝmmithina lizi-li tatap. 19 Limǝthgǝri lamɽa-nyji, ǝṯeere aɽinnǝthisi ŋwɔɽa rogɽo-ri raalɔ mac, laakin ǝsi aalaci ŋirŋasa rii ŋǝthi Allah; kaka nɔlɔɔthɔnar-gwɔ ŋaarɔŋw, “Kweeleny kwaarɔ-ŋwa, ṯǝɽinnǝ nda ṯiinyi ṯɔrɔ, lǝnyii ǝɽinni.” 20 Bǝri!; “Mǝ yaaŋwɔ yee ṯuwǝnu ṯɔɔŋwa tǝ, ithni; nǝ mǝ ǝwthǝ yee tǝ, ǝsi inḏǝthǝ ŋwɔsi ii; na mǝsi ǝrri ŋɔ tǝ, a ṯɔrony mithǝ ŋunduŋw tig-tig.” 21 Ǝṯi-ŋǝ ŋikiya illaza kii mac, laakin a kǝniny illazi ŋikiyaŋi kii ŋisanna-ŋi.