aza 12
Yecu ma gwu maryam oraḏa beyṯanya
1 ki ŋwamin ŋwir nyirlil, iti ṯimayina kinna mac lomur ledi kuruu keni ṯiṯamḏa ŋiɽany, iid yi, na Yecu ila beyṯanya nani gwu liazar kwumɔŋw diɽa ki ŋiɽany-na. 2 ner gwu ketize ŋirina ŋizaw; na marṯa ogwumicelu, na liazar orɔ kwete kwinḏiraḏir gi keḏneya la. 3 na maryam dimi ŋila ŋifirli yiili ŋeni nardiin, ŋir minmin, roṯla wete. nuŋw zi enji Yecuŋw ŋwara nana, nuŋw firṯizi ŋwara nana owɽu yi, na wəŋ weḏi ŋila ipelu kufu-kufuk kiininy. 4 lakin na kwete kweḏi limeḏgen, kweni yahuuza izkaryuuṯi, ŋgwa kwinḏi eḏi bɔŋwḏi, andaci nuŋw zi eca ŋwu: 5 ŋila ŋu ŋɔḏɔ ŋiti ŋiliṯir zi kwuruuza kwitezir eḏinḏeda luwaya? 6 ŋandizaŋwzi ŋu, ŋiti ŋinaŋnaŋw ŋi ŋeḏi ŋi aŋraci luwaya mac, lakin urŋw gwu keni kwoɽam kweṯapi jizlana, eṯuŋw nyimi kwɔmne kweṯir imezi. 7 nezi Yecu eca ŋwu: duŋgwecer; ŋerraŋw zi ŋu eḏorɔ ŋeḏi lamin leḏi ṯaniḏa ṯinyi. 8 luway leṯinanni ŋaŋa li dɔk dɔk, ne nyi ta, nyiti kwunanni ŋaŋa li dɔk mac.
9 na yahuuḏ elŋece litezir, ner ari, ŋgwana gwu; ner ere ilizi Yecuŋw eḏeze ŋunduŋwu ṯuɽuk mac; linaŋna eḏeze liazarŋw tɔk, kwudiɽaŋw ki ŋiɽany-na. 10 na leleny leḏi yiziiz kitaḏa eḏeɽenye liazarŋw tɔk, 11 kaka, ŋiɽaŋal ŋi ŋuŋun, na gwu yahuuḏ yuru orlaḏa Yecuŋw nana ṯəmna ṯi.
Yecu muŋw gwu enḏi urzaliim kaka melik
12 ma ŋurpu ŋgwa orɔ, na ŋwuduŋw ŋwuru ŋwumila ki iid-na, mer zi neŋne ŋinḏi ŋi Yecu eḏila urzaliim, 13 ner agri ril reḏi ḏenḏe, nerele eḏi li biɽda ki ṯay, ner ariri ŋwu: hozanna, eḏuŋw ortanni ŋgwu kwinḏi yiriny yi yeḏi Kweleny, emba, Kweleny kweḏi izrayiil. 14 na Yecu inḏa teɽiŋgaŋi tir kamal, nuŋw gwu dallu la, kaka luḏinar gwu ŋeni ŋwu:
15 eṯiṯinya mac, tira teḏi ziyuun ŋw.
izari, Kweleny kwɔŋwa ŋgwa kwinḏi
kwelliḏi ki teɽiŋga la tir kamal.
16 nezi limeḏgen ere elŋe ŋu fitak mac; lakin, mindaŋ ma Yecu niini-na ta, ner zi ma ṯiŋayini ŋu, eḏari: ŋimerzi lɔ ŋu ŋeni ŋundu, na ŋinderṯa ŋimerzi errici ŋunduŋwu. 17 na ta ŋwuduŋw ŋwunanuŋw gwu-na ki lomur limɔŋw li ornuṯi liazarŋw eḏi ruda ki ṯimamu-na, diɽaŋw gwu ŋunduŋwu ŋiɽany-na, ner ŋi unḏi ki ŋeni ŋundu. 18 ŋwu ṯaŋwu, na lizi bindiḏi ŋundu ŋali tɔk, kaka niŋnarzi gwu, ŋimɔŋwzi erri ŋu ŋir ŋilim. 19 na gwu ṯa lifarzi andiza-na, ner ari, izarṯi, a lende limofḏani ŋiɽaŋal ŋi ŋere. kwumɔ ṯurmun kwaḏiḏa ndendeṯ.
ṯuṯalu ṯeḏi umam
20 ner nani lɔkwɔ deŋgen-na lir yunaani linḏi eḏi kwocelu ki iid-na. 21 ner ila nani gwu fiilibbuz kwir kweḏi beyṯzaydaŋw kweḏi jaliilŋw, ner uṯizelu, ner eca ŋwu: kwor kwalu, nyiŋa linaŋna eḏeze Yecuŋw. 22 na fiilibbuz ila, nuŋw andaci andaraawuzŋw; na andaraawuz-ŋa ila fiilibbuz gi, ner andaci Yecuŋw. 23 nezi Yecu eŋnici, nuŋw zi eca ŋwu: lomur limila le li nii Toru-na teḏi kwizigwunaŋ. 24 nyi kwecaŋazi ma ŋwa rerem, ma lan lete ere biɽalu kureyu-na mac eḏi kiranalu, eṯuŋw ta nani lutuput ṯuɽuk; muŋw ṯa kiranalu, eṯuŋw ami riɽuŋw nyoru nyitezir. 25 muŋw amɽi kwere rɔgwɽɔ ruŋwun, eṯuŋw zi kiraza lu; na kweṯifirazi rɔgwɽɔ ruŋwun ki ṯurmun-na kḏu, kwunde kwiri kwe zi ami aŋracuŋw, mindaŋ er enḏi ki ŋimiiḏa-na ŋiaŋ ŋeṯi nanniḏa dɔk. 26 muŋw əkizi nyuŋwu kwere ŋɔḏɽor, eḏuŋw kwaḏiḏa nyuŋwu; na wenyi gwu nani, a gwu ṯa kaḏaam kinyi nani tɔk. muŋw əkizi nyuŋwu kwere ŋɔḏɽor, a Papa nii-na.
27 ne nyi apiri ṯugwori kire-kirem, ta nyi ma ari ḏa. Papa, kileḏenyi ki lomur la ṯa klu? beri. na ṯa ŋiɽaŋal orɔ ŋu ŋilaḏinyi gwu. 28 Papa, niiye keni yiriny-na yɔŋwa. na ṯɔgwɽɔ ermiḏa kilerena, nuŋw ari: yimenyji nii-na, ta enyji ma nii-na kwokwony. 29 na gwu ṯa ŋwuduŋw neŋne tɔk ŋwurillu kinaŋw, ner ari: lere liri lari-na. ner ari liḏaḏu: maleyka kwiri kwandica. 30 nezi Yecu eŋnici, nuŋw zi eca ŋwu: ṯɔgwɽɔ kḏu titi ṯinḏi ṯeni nyi mac, ṯinḏi keni ṯeni ŋaŋa. 31 er zi ketize leḏi ṯurmun kḏu hakwuma kirem; er allalu kwelenyi kweḏi ṯurmun kḏu kirem tɔk. 32 nenyi, menyi dirnini kureyu la eḏallani, enyji mulḏani nana tatap. 33 nuŋw zi andazi ŋu nda, ŋinḏuŋw ŋi eḏay, ŋɔrɔtɔ ḏa.
34 na ŋwuduŋw eŋnici, ner eca ŋwu: ŋiniŋnanyji kuruu-na ŋenu ŋwu, Kwruztu kweṯinanni dɔk, na aḏa kwiri pa, mindaŋ ari ŋa gwu, lazim eḏi Tor teḏi kwizigwunaŋ allani? eya kwiri ŋgwu kwir Tor teḏi kwizigwunaŋ? 35 nezi Yecu eca ŋwu: fori kwe gi nani-na kwɔkwɔ cukw. nani fori kinna daŋgal-na, inḏir gi, na e ŋazi ezir ere riimeḏa mac. ŋgwa kweṯele kirim-na, kwende kweṯelŋe ezir wetuŋw gwu ila. 36 nani fori kinna daŋgal-na, allaḏir fori rugwori nana, eḏi ma orɔ keni kwelle kweḏi fori.
lizi leḏi yahuḏiiyaŋw liira ṯəmna-na, na lɔkwɔ leḏi ṯəmna ŋejmeṯi
mezi Yecu andaci ŋiɽaŋali ŋu, nuŋw duŋgwa nuŋw zi lucineḏa. 37 erricaŋwzi ŋilima ŋitezir deŋgen-na, ner ta ere emni eḏalliḏa rugwori nana tɔk mac, 38 eḏi ma rataḏi ŋandizazi izaya, kwiɽi, ŋaruŋw:
Kweleny, eyaŋa liri limezemni ŋiniŋnarzi deŋgeri-na?
na eyaŋa liri limerzi ruweci loɽal lu leḏi Kweleny?
39 ner zi ṯa ere eḏi zi ŋuma mac eḏi zi emni: kaka andizazi gwu izaya kwokwony, ŋaruŋw ŋi ŋwu:
40 limɔŋw zi riimizi yey-na yeŋen, limɔŋw zi niŋneci rugwori reŋen,
mindaŋ er ere ami ezeŋw yey yi yeŋen mac,
er zi ere ami elŋeceŋw tɔk mac rugwor ri reŋen,
mindaŋ eḏi ma orla rugwori lu, enyji kileḏi.
41 ŋiɽaŋal ŋu ŋandizazi izaya, izaŋw gwu ŋiniṯi ŋuŋun, andicaŋwzi gwu ŋeni ŋundu tɔk. 42 ner ṯa alliḏa ŋunduŋwu rugwori nana luru leḏi lijowiṯ, lakin ner ere ruwene lu mac, ŋiɽaŋal ŋi ŋeḏi lifarzi, arir gwu ŋwu, mer zi andizalu pɔrpɔr, er nyji allalu ki majma-na, 43 kaka amɽar gwu eḏi zi lizigwunaŋ iɽi-na beṯen eḏi Allah la.
ŋiɽaŋal ŋimezi Yecu andazi pɔrpɔr ki lizi-na
44 na Yecu ofna ŋuma ŋi, nuŋw ari: kweṯinyi alliḏa ṯugwori nana, eṯuŋw ṯa ere alliḏa nyuŋwu ṯugwori nana mac, eṯuŋw eni kwalliḏaŋw tugwori nana kwuzanyi. 45 na kweṯinyi eze, eṯuŋw eze ŋgwa kwuzanyi. 46 nyi kwiri fori, nenyila ki ṯurmun-na mindaŋ muŋw alliḏa nyuŋwu kwere ṯugwori nana, ŋwere nani kirim-na mac. 47 muŋw neŋne kwere ŋiɽaŋali ŋinyi, muŋw zi ere miḏa mac, kwiti kwenyi hakwumi mac; kaka iti inḏi nyi gwu eḏi zi hakwumi kla leḏi ṯurmun mac, lakin keni, eḏi zi kileḏi. 48 ner nani ŋete ŋinḏi eḏi hakwumi ŋgwa kweṯi nyi derne, kwiti kweṯi miḏici nyuŋwu ŋiɽaŋali mac; ŋiɽaŋal ŋimenyjandazi, ŋinderṯa ŋinḏi eḏi hakwumi ki lamin leḏi kwaḏanŋw. 49 nenyji ere andazi zulṯa gi kwinyi mac; na ŋgwa kwuzanyi, keni Papa ŋundu, orɔ kwumenyi ellici amra ŋiɽaŋal ŋi ŋeḏi zi andazi, na ŋeḏi ŋi andazi aŋgwuru. 50 nenyi elŋece amra wuŋwun rac wiri ŋimiiḏa ŋiaŋ, ŋinḏi eḏi nanniḏa dɔk. ŋwu ṯa, ŋiɽaŋal ŋimenyji Papa andazi, ŋinderṯa ŋeṯinyjandazi.
Yǝcu mǝr-gwɔ ɔratha Beiṯ-@aniya.
(Maṯṯa 6:6-13Mɔrgus 14:3-9)1 Ki-ŋwaamin-la ŋwir nyirlil ŋwiti ŋwɔmǝ-ŋi Fis-ha iila kinnǝni mac, nǝ Yǝcu ele Beiṯ-@aniya ki-dɔɔnɔ kwǝthi Li@aazar, ŋgwa kwudiiɽǝŋw ki-ŋiɽany-na. 2 Nǝr-gwɔ manyji @asha kinanaŋw; nǝ Martha oro kwɔgmɔcalɔ, nǝ Li@aazar oro kwette kwǝthi kila linaanica Yǝcu-gi ṯerbeeza-lɔ. 3 E-ta nǝ Mǝryǝm dimmǝ roṯola fǝṯiilǝ-gi tatap kwǝthi fithni kwir ghaali, kwǝni naariḏiin kwir min-min, nɔŋw balsi Yǝcu-ŋw ŋwaara naana mindaŋ nɔŋwsi firṯici naana ǝwɽu-yi wuuŋwun. Mindaŋ nǝ wǝŋ wǝthi fithni ippǝlɔ kiininy kuvu-kuvuk. 4 Laakin nǝ Yahuuthǝ Is-khar-yɔɔṯii kwette kwǝthi ṯalaamiiz ṯuuŋwun, ŋgwa kwinḏi ethi bɔɔŋwɔthi ŋunduŋw aarɔŋw, 5 “Athɔrɔ-pa lende liliṯṯu fithni ŋgwɔ gwuruushǝ ruɽi-wrii-la ruɽi-ṯɔthni ǝŋgir kannaci lɔwaaya?” 6 Ŋandisa-ŋwsi ŋɔ nǝreere ǝniŋw kwǝṯi aŋraci lɔwaaya mac, laakin kaka nɔrɔ-ŋgwɔ kwɔɔɽam, nǝ ǝṯɔŋw appi kiisǝ kǝthi gwuruush tok, ǝṯoŋw ɔṯɔṯi ŋgwa kwǝṯir immǝsi kinaŋw-na. 7 Laakin nǝ Yǝcu aarɔŋw, “Duŋgwǝcǝr-tǝ, ŋǝrrǝ-ŋwsi ŋɔ ŋǝthi laamin lǝthi ṯaanithisa ṯiinyi. 8 Ŋaaŋa lǝṯi nanni lɔwaay-li ŋwɔɔmɔri tatap, nǝ nyii kwende kwinḏi ethi nanni ŋaaŋa-li ŋwɔɔmɔri tatap mac.”
Ŋejmeth ŋǝrrinǝ ethi ɽeenye Li@aazar-ŋwɔ.
9 Mǝ lizi littǝzir neŋne ethaarɔŋw Yǝcu ŋgwana Beiṯ-@aniya. Nǝreele kinanaŋw, nǝreere oro ŋǝthi Yǝcu ṯɔɽɔk mac, laakin etheese tok Li@aazar-ŋwɔ ŋgwa kwɔdiiɽǝŋw ki-ŋiɽany-na. 10 Ŋwɔṯaŋw nǝ rɔ-asa rǝthi kahana kette ṯǝrṯiibǝ ṯǝthi-thi ɽeenye Li@aazar-ŋwɔ tok, 11 kaka mǝsi-gwɔ Yahuuḏ yuuru ɔrlacci ŋunduŋwsi ŋwɔḏoŋw sǝbǝb-gi kwuuŋwun, nǝr ǝmminici Yǝcu-ŋw.
Yǝcu mɔŋgwɔ ǝnḏi ŋithiinyǝ-ŋi Urshaliim.
(Maṯṯa 21:1-11Mɔrgus 11:1-11Luuga 19:28-40)12 Mǝ ŋɔrpɔ-ŋgwa oro nǝ lɔdɔŋw lɔppak kila liilicǝ @iiḏǝ wǝthi Fis-ha, mǝr neŋne ethaarɔŋw Yǝcu-ŋgwa kwinḏi ethiila Urshaliim. 13 Nǝr appi rill rǝthi yaaɽi yǝthi ḏenḏe nǝr-ri ruu etheele ethi-li kadiritha kithaay, nǝr kegitte kwɔɔlalɔ nǝraarɔŋw, “Ethi Allah ɔrtanni! Ethi Allah ǝccǝ baarika ŋgwa kwinḏi yiriny-yi yǝthi Kweeleny! Ethi Allah ǝccǝ Mǝlik-gǝ baarika kwǝthi Israa-iil!” 14 Nǝ Yǝcu kaṯṯasi tǝɽiŋgǝŋi tir kaamal nɔŋw-ri allɔla; kaka-ṯǝ-ŋa ŋɔlɔɔthɔna ŋaarɔŋw, 15 “Ǝṯi ṯiinya mac ŋa kwir mǝḏiinǝ kwǝthi Sihyɔɔn-ŋwɔ; iisa-ṯi mǝlik-gǝ kwɔɔŋa ŋgwa kwinḏi, kwǝllithi ki-ṯǝɽiŋgǝ-lǝ tir kaamal!”
16 Nǝsi ṯalaamiiz ṯuuŋwun ere elŋe ŋɔ kerreny mac; laakin mǝ Yǝcu niini-nǝ rac tǝ, nǝrsi-mǝ ṯiŋaayini ŋa ŋɔlɔɔthɔna ŋǝni ŋundu, nǝ ŋimǝ ǝrrinici ŋunduŋw tok. 17 Nǝṯǝ dɔŋw oro kila linaanir Yǝcu-ŋǝli kinaŋw mǝŋw ɔrnɔṯa Li@aazar-ŋwɔ ki-thimaamɔ-na, mindaŋ nɔŋw diiɽǝ ŋundu-ŋw ki-ŋiɽany-na, nǝroro landisasi ŋa ŋǝrri-nǝ. 18 Nǝ sǝbǝb kwinḏi-gi dɔŋw ethi-li kadiritha kithaay, nɔŋworo kwiniŋnar-gi ŋilima tok ŋǝrrǝ-ŋwsi. 19 E-ta nǝ Lifirriisiiyyiin andasina nǝraarɔŋw, “Iisar-ṯi ŋaaŋa litimǝ lɔvthasi kwomne kweere mac; iisar-ṯi kwɔmǝ ṯurmun tatap kwaathitha!”
Yuunaaniiyyiin yokwo yinaŋna Yǝcu-ŋwɔ.
20 Nǝ Yuunaaniiyyiin naani yokwo tok ki-lizi-nǝ kila lithaaŋwɔ ethi kwɔccalɔ ki-@iiḏ-nǝ. 21 Nǝr iila naanɔ-gwɔ Fiilibbus kwǝthi Beiṯ-sayḏa-ŋw kwɔnaanɔ Jǝliil, nǝrǝccǝŋw, “Yaa Sǝyyiḏ nyiiŋǝ linaŋna etheese Yǝcu-ŋw.” 22 Nǝ Fiilibbus ele nɔŋw andaci Anḏraaws-ŋwɔ, nǝ Anḏraaws-ŋǝ ele Fiilibbus-gi nǝr andaci Yǝcu-ŋw. 23 Nǝsi Yǝcu ǝŋnici nɔŋwsǝccǝŋw, “Saa@ kwɔmǝ iila ethi-gi Tɔr ṯǝthi Kwizigwunǝŋ niini-nǝ. 24 Nyii kwǝccǝ-ŋǝsi-mǝ ŋwɔ rerrem, mǝ lan lette ere ɔɽi ki-wurǝyu-nǝ mac mindaŋ ethi uthǝthi ŋwɔ-tǝ nannitha lɔtɔpɔt; laakin mɔŋw uthǝthi tǝ ǝṯɔŋw riiɽi yǝy yuuru. 25 Kweere kwǝṯi amɽi ŋimiitha ŋuuŋun ǝṯɔŋwsi ṯuusi; nǝ kweere kwǝṯi firasi ŋimiitha ŋuuŋun ki-ṯurmun-nǝ kɔthɔ ŋwɔsi aŋraci ethi nanni ki-ŋimiitha-na ŋǝṯi nannitha dok-dok. 26 Kweere nyithak kwɔnaŋna ethi ǝkkici nyuŋw ŋothtɽor, laazim ŋwɔ rɔɔmi nyuŋwɔ, mindaŋ mǝ khaḏaam kiinyi naani nyii-gi kǝzir wǝṯiny-gwɔ naani. Nǝ ṯǝk mǝ kweere ǝkkici nyuŋwɔ ŋothɽor e-ta a Papa kwiinyi iiɽi ŋunduŋw-nǝ.
Yǝcu nandisa-ŋwsi ŋǝthi ŋiɽany ŋuuŋun.
27 “Ṯogwor ṯiinyi kɔthɔ ṯipinnǝnǝ, e-ta nyii kwaari-tha? Nyii kwaarɔŋw, Papa kilǝthǝ-nyii ki-saa@-la ŋgwɔ-a? Bǝri, saa@ kwundǝr-ṯa kǝniny-ŋgwɔ kwiilathiny-gwɔ 28 Papa niiyǝ kǝniny yiriny-nǝ yɔɔŋwa.” E-ta nǝ ṯogɽo ɔɽa ki-leere-na ṯaarɔŋw, “Yimǝ-ŋyji nii-nǝ, nǝ yǝnyji nii-nǝ kwokwony.” 29 Nǝ lokwo kila lirlɔ kinaŋw neŋne ṯogɽo, mindaŋ nǝraarɔŋw leere lir lɔvthɔthɔna. Nǝraarɔŋw lithaathɔŋw, “Meleka kwir kwandica.” 30 Nǝsi Yǝcu ǝŋnici nɔŋwsǝccǝŋw, “Ṯogɽo kɔthɔ ṯinḏi ṯǝni ṯaalɔ, ṯiti ṯǝni nyii mac. 31 Laamin lindǝr-ṯǝ kɔlɔ lǝthi-li ǝccǝ ṯurmunǝ haakima, nǝ kirem tǝ a kweeleny kwǝthi ṯurmun kɔthɔ kǝṯṯini par. 32 Nǝ nyii-tǝ, mǝnyii dimmini kithaay kɔnɔŋw kwurǝyu-lu, nyii mǝlthanni lizi naana tatap.” 33 Ŋandisa-ŋwsi ŋɔ ethisi baaŋaci ŋiɽany ŋɔrtɔ ṯa-tha ŋinḏiŋw-ŋi ethi ai. 34 Nǝ dɔŋw ǝŋnici nǝrǝccǝŋw, “Ŋiniŋna-nyji-pa ki Sherii@a-na ŋaarɔŋw Kwɔrɔstɔ kwinḏi ethi nannitha lur. E-ta a kwɔthɔ kwɔmaari ŋaŋw, laazim a Tɔr tǝthi Kwizigwunǝŋ dimmini kithaay? Ǝyǝ kwɔrɔ ŋgwɔ kwir Tɔr tǝthi Kwizigwunǝŋ?” 35 Nǝsi Yǝcu ǝccǝŋw, “Fɔɔri ŋgwɔ kwinḏi ethi naani kinnǝ ŋaaŋa-li kwokwo cuk, irǝrir-lɔ kǝniny kaka a-naani-gwɔ fɔɔri, mindaŋ mǝŋǝsi kirim ere ǝnḏǝthǝ mac, mɔŋw irǝri kweere kirim-nǝ ǝṯɔŋweere elŋe ǝzir wǝthi-gwɔ iilatha mac. 36 Nǝ kaka nǝthiŋǝ-gwɔ fɔɔri, a ǝmminici fɔɔri mindaŋ moro lizi lǝthi fɔɔri.”
Lizi liira ṯǝmminǝ.
Mǝ Yǝcu andasi ŋiɽaŋali ŋɔ tǝ, nɔŋwsi dungwǝci nɔŋweele nɔŋwsi luccunǝthǝ.
37 Nǝrrǝŋw-vǝ kinnǝni ŋilima ŋittǝzir deŋgen-na tok, laakin nǝr-teere ǝmmini tok mac; 38 nǝrṯoroŋw mindaŋ ethi rattathi ŋa ŋandisasi kwiɽii kwǝni Isha@ya ŋaarɔŋw,
“Kweeleny, ǝyǝ kwɔrɔ kwɔmǝsi ǝmmini ŋa ŋandisarsi?
Nǝ ǝyǝ-ŋǝ lɔrɔ limǝsi Kweeleny ruwǝcci lɔɔɽall-lɔ luuŋwun?”
39 Ŋwɔṯaŋw nǝrmeere ǝthi ŋɔma mac ethi ǝmmini kaka naarɔ-ŋwɔ Isha@ya kwokwony ŋwɔ,
40 “Limǝŋwsi ruusici yǝy yeeŋen lunduŋw,
nɔŋwsi ɔnḏici rɔgwori reeŋen,
mindaŋ mǝ yǝy yeeŋen ere iisithi mac,
nǝ ǝrseere elŋe rɔgwor-ri reeŋen mac,
mindaŋ ethi ɔrllatha nyuŋwɔ naana ethisi sǝwi.”
41 Ŋandisasi Isha@ya ŋǝ kaka niisa-ŋgwɔ ŋinithi ŋuuŋun, nɔŋwsi-mǝ andasi ŋǝni ŋundu. 42 Nǝ nǝṯǝ leeleny lǝthi Yahuuḏ luuru nǝr ǝmminici ŋunduŋw tok, laakin kaka nithiinyar-gwɔ Lifirriisiiyyiina, nǝrseere ruwǝzǝlɔ mac, mindaŋ ethiseere rutti kithaay ki-majma@-na mac. 43 Kaka nǝṯir-gwɔ amɽi ṯiiɽǝnǝ ṯǝthi lizigwunǝŋ beṯṯen ethi ṯiiɽǝnǝ ṯǝthi Allah.
Kandisa kǝthi Yǝcu kindǝr-ṯǝ kinḏi ethi ǝccǝ lizi haakima.
44 Nǝ Yǝcu ɔvɔna ŋɔmmaŋi nɔŋwaarɔŋw, “Kweere nyithak kwǝnyii ǝmminici, ŋweere ǝmminici nyuŋwɔ ṯɔɽɔk mac, laakin ŋwɔ ǝmminici ŋgwa tok kwɔɔsa-nyii. 45 Nǝ kweere kwǝnyii ese ǝṯɔŋw ese ŋgwa tok kwɔɔsa-nyii. 46 Nyii kwinḏi ki-ṯurmun-nǝ kwir kaka fɔɔri, mindaŋ mɔŋw ǝmminici nyuŋw kweere tǝ, ŋweere nanni kirim-nǝ kwokwony mac. 47 Mɔŋw neŋne kweere ŋiɽaŋali ŋiinyi mindaŋ mɔŋwseere mithǝ mac, nyeere kette kaṯṯi mac, kaka niti ninḏiny-gwɔ ethi kette ṯurmunǝ kaṯṯi mac, laakin ethi kǝniny kilǝthi ṯurmunǝ. 48 Kweere kwǝnyii dirnathalɔ nǝ mɔŋweere mithǝ ŋiɽaŋali ŋiinyi mac, nɔŋw naani kwette kwinḏi ethi kette ŋunduŋw kaṯṯi; nǝ ŋiɽaŋal ŋa ŋandisa-nyji ǝroro ŋinḏi ethi ruusi ŋunduŋw kǝṯṯi ki-laamin-la lǝthi kwaathan-ŋwɔ. 49 Kaka niti nandisa-nyji-gwɔ sɔlṯa-gi kwiinyi mac; laakin nǝ Papa oro kwɔɔsa-nyii kwinḏǝthǝ-nyii waamira, ŋindǝr ŋǝndu ŋǝthisi andasi. 50 Nǝnyii elŋe ethaarɔŋw waamir wuuŋwun wir ŋimiitha ŋǝṯi nannitha dok-dok. Ŋa ŋandisa-nyji nǝrṯoro ŋa ŋandica-nyji Papa ethisi andasi.”