aza 19
ṯillaza ki kilerena na ṯaga ṯeḏi Tirany
1 na kwaḏan ta, nenyi neŋne kwurna kwir kaka rɔgwɽɔ rupa reḏi ŋwuduŋw ŋwitezir kilerena, raruŋw:
halliluya! ŋigileḏa ŋinit ŋi na ŋuma tɔk ŋit ŋeḏi Allah weri,
2 kaka ŋa ŋeṯuŋw zi erri ŋeni ŋofḏana rerec;
nuŋw hakwumi ŋgwa kwir kwijin kwiki beten, kweṯikiici ṯurmuna ŋiɽaŋali ŋijin ŋi ŋuŋun,
nuŋw əɽici ŋunduŋwu jiiza ŋiɽaŋal ŋi ŋeḏi ŋin ŋeḏi yaḏaam yuŋwun yimay ṯii ṯi ṯuŋwun.
3 ner aruŋw kwokwony:
halliluya! kwulu kwuŋwun kwuruɽeḏa dɔk dɔk.
4 na lijowiṯ lir ṯuɽi-kwaɽŋan, na kwɔmne ŋgwa kwir kwaɽŋan kwumiiḏu, ner iidi ŋwurgwu ŋi lu, ner kwoce Allah lu, wunanalu kwurzi la kweḏi ŋeleny, laruŋw: emba! halliluya! 5 na ṯɔgwɽɔ ruḏa ṯete kwurzi-na, ṯaruŋw:
ortaḏir Allah weri, ŋaŋa tatap lir yaḏaam yuŋwun,
ŋaŋa leṯiṯenye ŋunduŋwu, lɔkwɽeny, lupa tɔk.
6 nenyi neŋne ṯɔgwɽɔ ṯete ṯir kaka ṯɔgwɽɔ ṯeḏi ŋwuduŋw ŋwitezir, na kaka ṯɔgwɽɔ ṯeḏi kiiru na kaka ṯɔgwɽɔ ṯeḏi lere muŋw ofina ŋuma ŋi, ŋuma ŋi, ṯaruŋw:
halliluya! kaka miḏa gwu Kweleny ŋelenyi, kwir Allah weri wuṯemḏizi la tatap ŋuma ŋi.
7 er amina, er nyeŋlena, er nii ŋunduŋwu-na
kaka ma gwu ṯaga ṯeḏi Tirany ila,
na kiŋaɽu kuŋwun kete rɔgwɽɔ lu ruŋwun cugwɔ-cugwɔp;
8 ner inḏeḏa ŋunduŋwu kireṯi kimri-na eḏi kenne, kifiiḏu pər pər, kuzuɽu-na cucuɽic.
kaka eni gwu kireṯ ŋgu kimri-na, ŋa ŋofḏana ŋeṯirzerri kla lirlinelu ter.
9 na maleyka eca nyuŋwu ŋwu: luḏi zi, ŋeni ŋwu: kla lornuṯir zi eḏele kazuuma-na weḏi ṯaga ṯeḏi Tirany, leni lortani, nuŋw eca nyuŋwu ŋwu: ŋiɽaŋal ŋu ŋeḏi Allah ŋiri, ŋir rerem. 10 ṯaŋwu, nenyiideḏa ŋunduŋwu ŋwuɽele-na eḏi kwoce ŋunduŋwu lu, lakin nuŋw eca nyuŋwu ŋwu: beri, ma! nyi kwiri kaḏaam keṯoɽmaṯi ŋa gi ki ŋɔḏɽor-na, na liaŋgalu li leṯi miḏa ṯunḏiza ki ṯeŋen teter ṯeḏi Yecu. kwoce Allah lu. eṯi kla leṯunḏizi Yecuŋw ki ɽe kaka liɽyaŋi.
Kwruztu muŋw illazi ṯuwənu ṯuŋwun ki
11 nenyeze lerya lidiŋelni kworɔ, na izaṯi, mɔrṯa kwete kwufiiḏu, na ŋgwa kwelliḏi gwu la kweni Kwirlalu rerec, kaka ofḏani gwu hukm wuŋwun na ṯiṯugwuḏa ṯuŋwun tɔk. 12 na yey yuŋwun orɔ kaka igə wufudu, na kindala luŋwun nuŋw eḏi nyaŋgiŋi nyuru; nuŋw eḏi yiriny yete yuluḏina, yiti yeḏicezi kwizi kwere ŋuma mac eḏizelŋe, illi ŋundu ṯuɽuk. 13 kwukinna fərṯi kwoɽana ŋin-na, ner enjici yiriny yuŋwun, yeni ŋiɽaŋal ŋeḏi Allah. 14 na orṯa weḏi kilerena, wukinna yireṯi yimri-na, yifiiḏu pər pər, yuzuɽu-nana cucuɽic, kwaḏiḏa ŋunduŋwu, welliḏi ki limɔrṯa la lifiiḏu. 15 na kalala kirana ray riɽen ruḏa kworɔ-na kwuŋwun, eḏi gi pii ŋelenyi ŋir-na ter ter, na ŋworɔ Kweleny kweŋen tumor ri tir zarṯu; ŋwu rundi nyoru nyeḏi kwaɽi kweni eynab ŋundu, na nabiṯ ŋgwu eni ŋirŋaza ŋeḏi ŋarriny ŋeḏi Allah, wuṯemḏizi la tatap ŋuma ŋi. 16 nuŋw eḏi yiriny yuluḏina kireṯi nana kuŋwun, na leɽer nana luŋwun tɔk, yeni ŋwu, Melik kweḏi limelik, na Kweleny kweḏi leleny.
ŋikirada lu ŋeḏi kla lir ṯuwən ṯeṯi Kwruztu
17 nenyeze maleyka kwete kwirlu kaŋwun, nuŋw ofina ṯɔgwɽɔ ṯi ṯupak, kwornuṯi ndowa tatap lidiɽu kilere, nuŋw zi eca ŋwu: ilar, aɽaḏi duŋw kezir weḏi azuuma wupa weḏi Allah, 18 eḏi ye yiiḏi yeḏi yaŋna yeḏi limelik, na yeḏi kla lir leleny leḏi ṯuwən, na yeḏi lor lifirli teter, na yeḏi limɔrṯa, na kla lelliḏizi gwu la, yiiḏi yeḏi lizi tatap leḏi duənuŋw mindaŋ, lir luway mindaŋ, lir hurr mindaŋ, lɔkwɽeny, lupa tɔk. 19 nenyeze kwɔmne ŋgwa kwumiiḏu kweḏi ŋerya, na limelik leḏi ṯurmun, orṯa yi weŋen lirayḏi duŋw eḏi ṯugwuḏi kwizi ŋali ŋgwa kwelliḏi ki mɔrṯa la, orṯa yi wuŋwun. 20 ner miḏa kwɔmne ŋgwa kwumiiḏu kweḏi ŋerya, na kwiɽi tɔk kwir kwəluŋ, ŋimɔŋw zi erri ki yey-na yuŋwun ŋir ŋilim, ŋeṯuŋw ŋi ṯuzi lizi kla limerzi uɽici nimra kweḏi kwɔmne ŋgwa kwumiiḏu kweḏi ŋerya, na kla limɔkwoce zura lu kwuŋwun. ner zi kaṯu nden tɔk limiiḏu, ki ṯujul-na ṯir igə wufuḏu kibriṯ gi. 21 na leɽina ner zi eɽenye kalala gi keḏi ŋgwa kwelliḏi ki mɔrṯa la, kinderṯa ŋga kiruḏi kworɔ-na kwuŋwun; na ndow tatap ner be teter yiiḏi yi yeḏi yaŋna yeŋen.
1 Nǝ kwaathan tǝ nenyii neŋne kwuurunnǝ kwir kaka kwǝthi dɔŋw lɔppa lǝthi lizi ki-leere-na laarɔŋw, “Ethi Allah ɔtanni! Ŋiglǝthǝ-ŋǝ ŋinith-ŋi nǝ ŋɔma tok nǝroro ŋǝthi Allah wǝri! 2 Kaka nǝṯi-gwɔ hɔkwɔm wuuŋwun oro rerrem nǝ wirllalɔ! E-ta nɔŋwɔccǝ kwiijinǝ haakima ŋgwa kwɔgikkiyǝ ṯurmunǝ ŋiijin-ŋi ŋuuŋun. Nǝ Allah inḏǝthǝ jiizǝ kaka niɽinyithi-ŋgwɔ yaḏaama yuuŋwun.” 3 Nǝraaɽi nǝr ɔvɔna kwokwony nǝraarɔŋw, “Ethi Allah ɔrtanni! Kwuulu kwǝthi iigǝ wuuɽǝzǝ mǝḏiinǝ kwɔppa kwǝṯi kwuɽutǝthi dok-dok!” 4 Mindaŋ nǝ lishiyuukh kila lir ṯuɽi-kwaɽiŋan ŋundu-ŋǝ haywaanaaṯ-yi wɔmiithɔ wir kwaɽiŋan, nǝr iidǝcci Allah-lɔ nǝr kwoccelɔ ŋgwa kwɔnaanalɔ kwɔrsi-la kwǝthi ŋeeleny. E-ta nǝraarɔŋw, “Aamiin, ethi Allah ɔrtanni!”
Ǝzuumǝ wǝthi ṯaaga ṯǝthi Tirany.
5 E-ta nǝ ṯogɽo ruuthǝ kwɔrsi-na kwǝthi ŋeeleny ṯaarɔŋw, “Ɔrtathir Allah wǝri, ŋaaŋa tatap lir yaaḏaam yuuŋwun, nǝ lizi tatap tok, lɔppa lokwɔɽony, ŋaaŋa kila lǝṯiiɽi ŋunduŋw-nǝ!” 6 E-ta nenyii neŋne kwuurunnǝ kwir kaka kwǝthi lɔdɔŋw, kwir kaka kwǝthi kiiru, nǝ kwir kaka kwuurunǝ kwǝthi ŋweere ŋwɔppɔthɔna. Mindaŋ nǝnyji neŋne laarɔŋw, “Ɔrtathir Allah! Kaka nɔrɔthɔ-gwɔ Kweeleny Mǝlik kwir Allah wǝri wǝthi Ŋɔma Ŋɔppa! 7 Ǝri nyeŋlena nǝ ǝri aamina tok; ǝri nii ŋunduŋw-nǝ Kaka mǝgwɔ lɔɔmɔr iila lǝthi ǝzuumǝ wǝthi ṯaaga ṯǝthi Tirany, e-ta nǝ ŋiira ŋuuŋun ǝni ŋinaana-lɔ cɔgwo-cɔgwop. 8 Nǝr inḏǝthǝ ŋiira yirethi yir kaṯṯaan yisɔɔɽɔ cɔr-cɔɽɔc yiithɔ, ethisi kenne.” (Kaṯṯaan kǝni ŋirllalɔ ŋǝthi ŋothɽor ŋǝthi lizi lǝthi Allah.)
9 E-ta nenyii meleka ǝccǝŋw, “Luuthusi ŋɔ ŋǝniŋw: Lɔrtanni kila lɔrnacarsi ǝzuumǝ wǝthi ṯaaga ṯǝthi Tirany.” E-ta nǝsi meleka kiɽǝzi nɔŋwaarɔŋw, “Ŋiɽaŋal ŋɔ ŋir rerrem ŋǝthi Allah.” 10 Ŋwɔṯaŋw mindaŋ nenyii iidicǝlɔ ŋwɔɽelle-na nenyii kwoccelɔ, laakin tǝ nɔŋwɔccǝ nyuŋwɔŋw, “Ǝṯi-nyji ǝrricǝ ŋɔ mac! Nǝ nyii kwɔrɔ khaḏaam kaka ŋaaŋwɔsi liyaŋgal-li, kila lǝṯi kette shahaaḏa kwǝni Yǝcu. Kwɔcca kǝniny Allah-lɔ!” Kaka nɔrɔ-gwɔ shahaaḏa kwǝni Yǝcu ṯigɽim ṯǝthi ŋiɽiiya.
Ŋgwa kwɔdǝllithi ki-mɔrṯa-la kwɔfiithɔ.
11 E-ta ninyeese leereya ligiṯṯinǝ, mindaŋ ninyeese mɔrṯa kwɔfiithɔ. Nǝ ŋgwa kwǝllithi-gwɔlǝ nɔŋwɔni Ŋirllalɔ nǝ Rerrem tok; nǝ ǝṯiŋw aari haakima nǝ ǝṯiŋw kette ŋǝryǝ ŋirllalɔ-ŋi. 12 Nǝ yǝy yuuŋwun aaɽanni iigǝ-ŋi wɔfɔɔdɔ, nɔŋw kenne nyaŋgiŋi kinda luuŋwun nyittǝzir, nɔŋw lothone yiriny naana yuuŋwun, laakin nǝsi kwizi ere kweere mac kwilŋithisi, illi ŋundu dak wɔɽe-wɔɽeny. 13 Nǝ kwɔɔvan-ŋgwa kwɔginnaŋw nɔŋworo ŋin ṯarr. Nǝ yiriny yuuŋwun ǝniŋw, “Ŋiɽaŋal ŋǝthi Allah.” 14 Nǝ jesh kwǝthi ki-leere-naŋw kwaathitha ŋunduŋw, liginna yirethi yisɔɔɽɔ yifiithɔ yǝthi kaṯṯaan, na lǝllithi ki-lɔmɔrṯa-la lifiithɔ. 15 Nǝ kaalala kiiranna ruuthǝ kworo-na kwuuŋwun, kinḏiŋw-ŋgi ethi ṯiinyi ŋeelenyi tatap. Mindaŋ ŋwɔsi mithǝ tɔmɔr-ri tǝthi haḏiiḏ, mindaŋ ŋwɔ tundǝthǝ kiɽicaŋi kǝzir wǝṯir-gwɔ tundǝthǝ, ŋga kir ŋirŋasa ŋǝthi Allah wǝthi Ŋɔma Ŋɔppa. 16 Nǝ yiriny lothone kwɔɔvana naana nǝ leeɽer naana luuŋwun tok yǝniŋw, “Mǝlik kwǝthi limǝlik, nǝ Kweeleny kwǝthi leeleny-ŋa.”
Kwɔrɔstɔ mɔŋgwɔ illazi haywaana kii.
17 E-ta ninyeese meleka kwirlɔ kaaŋwɔn. Nɔŋw ɔvɔna ŋɔmmaŋi ṯogɽo-thi ṯɔppa, nɔŋw ɔrnɔṯi ndǝwǝ tatap lidiiɽu ki-leere nɔŋwsǝccǝŋw, “Ilar aaɽathici ǝzuumǝ dɔŋw wɔppa wǝthi Allah! 18 Ethi yee yaŋna yǝthi limǝlik nǝ yǝthi liswaag mindaŋ, yǝthi jesh mindaŋ, yǝthi limɔrṯa mindaŋ, yǝthi kila lǝṯi-gwɔ dallɔla mindaŋ, nǝ yaŋna yǝthi lizi tatap lir lɔwaay-ŋa lizi-li lir hɔrr, nǝ lɔppa tok lokwɔɽony tok!” 19 E-ta ninyeese haywaan-ŋwɔsi limǝlik-li lǝthi ṯurmun, nǝ jesh kweeŋen laaɽathɔ dɔŋw ethi-li ṯɔgthi ŋgwa kwudǝllithi ki-mɔrṯa-la nǝ jesh-gi kwuuŋwun. 20 Nǝr mithǝ haywaana wa ŋiwaaya, ŋundu-ŋǝ kwiɽii-gi kwir kwǝluŋw kwǝrrǝ ŋilima kiyǝnǝ yuuŋwun. Nǝṯǝ ŋilim oro ŋa ŋikǝɽinyjǝŋw-ŋi lizi-lɔ kila lǝthi @alaama wǝthi haywaan, nǝ kila limǝ kwocce suurǝ-lɔ kwuuŋwun. Nǝ haywaan-ŋǝ kwiɽii-gi kwir kwǝluŋw tǝ, nǝrsi kaṯṯɔ limiithɔ ki-bɔheyra-na kwǝthi iigǝ wɔfɔɔdɔ wǝthi kibriiṯ 21 Nǝr ɽeenye jesha kweeŋen kaalala-gi kuruuthu kworo-na kwǝthi ŋgwa kwǝllithi ki-mɔrṯa-la; mindaŋ nǝ ndǝw tatap yee yaŋna yeeŋen kaka kiya yǝthicǝrsi ŋɔma-na ethisi yee.