aza 4
limuallim lir ŋidiny
1 lakin na Tigɽim tirlinelu ter aruŋw: ki ŋwomur ŋweḏi kwaḏanŋw, a lɔkwɔ orlaci ṯəmna ŋwudɔŋw eḏi zi kwaḏiḏa ŋeḏi rigɽim reṯi zi keɽinjelu, ṯilŋiiḏina ṯi ṯeḏi rigɽim riki, 2 ŋiɽaŋal ŋi ŋeḏi lor lir ləluŋ, leḏi nimra kweḏi ŋikya rugwor nana reŋen. 3 lizi klu, linderṯa leṯi zi ṯinyini eḏi agiḏi, eṯir zi ṯinyini tɔk eḏneya nana were were, wumɔ Allah kete weḏi lizi leḏi ṯəmna, lilŋiiḏi tɔk ŋiɽaŋali ŋir rerem, leḏi ŋuma eḏi yi eca zukran ṯinyiŋla ṯi-na. 4 kaka kita gwu Allah kwɔmne tatap kweni kwizaw, nuŋw ere nani kwere mac kweŋgir durni, mer afi mer gi eca Allah zukran ṯinyiŋla ṯi-na, 5 kaka enuŋw gwu kwirlinelu ter ŋiɽaŋal ŋi ŋeḏi Allah na ṯara ṯi ki yiriny.
6 ma ŋi ṯiŋayinici ŋu liaŋgalu ta, a orɔ kaḏaam kizaw keḏi Yecu Kwruztu, keṯi ɽuni rɔgwɽɔ rɔŋwa ŋiɽaŋal ŋi ŋeḏi ṯəmna, na ṯaliim ṯi tizaw ṯimɔŋa kwaḏiḏa. 7 eti zi durni ŋir ŋiŋerɔŋw lu ŋeḏi law lir yimeyaŋ, ŋiti ŋir ŋeḏi Allah mac. eti deŋṯini eḏi ferle ki ḏiin-na ṯeḏi Allah; 8 kaka enir gwu ŋeḏi ṯideŋṯina eḏi firli yaŋna ŋizaw, lakin ŋeḏi ṯideŋṯina ṯeḏi ḏiin ṯeḏi Allah, ner eni ŋiṯemḏelu kwɔmne-na tatap, kaka eḏuŋw gwu ṯikitaḏa ṯeḏi ŋimiiḏa ŋeḏi kiremŋw, na ŋimiiḏa ŋinḏi eḏila kwaḏan tɔk. 9 ŋiɽaŋal ŋu ŋiri rerem; ŋofḏana er zi miḏa ṯəmna ṯi tir minmin. 10 ŋinderṯa ŋu ŋeṯinyi ŋi akiki ŋɔḏɽor ŋwunda ŋwunda, deŋṯinenyi gwu ŋuma ŋi tatap ŋiṯemḏelu, ner nyji ruzi luŋw, kaka eḏi nyi gwu ṯəkiza kizen eḏi Allah-na wumiiḏu, wir Kwigileḏa kweḏi lizi ndendeṯ, na eti ŋigileḏa ŋuŋun ṯamḏalu purpur, ŋeḏi kla leḏi ṯəmna.
ŋeḏre ŋeḏi timuṯaawuz, na ṯilŋiiṯina ṯuŋwun
11 ezi ellici amra eḏi zi erri ŋu, na eti zi ilŋiiḏini. 12 eṯere efrici kwizi kwere eḏerrici ŋaŋwu ŋamal luŋw mac, lakin ezi baŋaci kla leḏi ṯəmna ŋiɽaŋali ŋizaw, na ŋeḏre tɔk, ŋimɽi ŋi, ṯəmna ṯi, na ṯizuɽu ṯi-na cucuɽic tɔk. 13 eti zi ortici tɔk ŋa ŋuluḏina, na eti zi andazi tɔk, na eti zi ilŋiiḏini tɔk, mindaŋ nyi ma ila. 14 eṯere kireḏi haḏiya mac wumer ŋa inḏeḏa ŋiɽaŋal ŋi ŋir ŋiɽya, ki lomur limɔ ŋa li lijowiṯ kete rii nana. 15 eti zi deŋṯini eḏizerri ṯa ŋu ŋete ŋete rɔgwɽɔ ri rɔŋwa minmin, mindaŋ ma lizi tatap eze ṯiduŋgwuŋgwaḏa ṯɔŋwa. 16 eṯaŋraci rɔgwɽɔ rɔŋwa na ṯaliima ṯɔŋwa ṯeṯi zi ilŋiiḏini; eti zi miḏa ŋa, mezi ṯa erri ŋwu, a kileḏini, na kla leṯi zi neŋne ŋɔŋa tɔk.
Mɔ@allimiin kwir lǝluŋw.
1 Ṯigɽim ṯimǝ andisalɔ por-por ethaarɔŋw, ki-ŋwɔɔmɔr-la ŋwɔthi kwaathan-ŋwɔ, a lizi lokwo ɔrlacci ṯǝmminǝ ŋwɔdoŋw; ǝrisi kettice yǝni ŋǝthi rigɽim kira rǝṯisi kǝkiɽinyjalɔ, mindaŋ ǝri kwakithatha ṯa@liima-lɔ ṯǝthi rigɽim rigii. 2 Nǝ ṯa@liim ṯɔrtɔtɔŋw, nɔŋworo ṯǝṯi kila lir lǝluŋw-nǝ dip fǝthǝlɔ, nǝ rɔgwor reeŋen tǝ, rimǝ dunnuni rimǝ ai. 3 Ǝṯir ṯiinyini lizi ethi aagithi, nǝ etheere yee ethneyǝ weere-weere mac wigitta Allah ethi yee lǝccǝ Allah shukran, lir lizi kila lǝthi ṯǝmminǝ nǝ lilŋithisi ŋir rerrem. 4 Kaka nigitta-gwɔ Allah kwomne tatap kwisaaw, nɔŋweere kweere mac kwǝthi dirnathalɔ, mɔŋw ǝvini shukran-ŋgi, 5 kaka mɔŋgwɔ rillinǝlɔ ter ŋiɽaŋal-ŋi ŋǝthi Allah nǝ ṯaara kiyiiriny.
Ǝthɔrɔ khaḏaam kisaaw agŋwɔrɔ kǝthi kwɔrɔstɔ kwǝni Yǝcu.
6 Mǝ inḏǝthǝ liyǝŋgǝri ṯa@liima kɔthɔ tǝ, oro khaḏaam kisaaw kǝthi Kwɔrɔstɔ kwǝni Yǝcu, kaka nǝṯi-gwɔ ithni rogɽo rɔɔŋwa ethneya wir ṯigɽim, wir ŋiɽaŋal ŋǝthi ṯǝmminǝ, nǝ wǝthi ṯa@liim ṯir rerrem kitha ṯǝṯi rɔɔmalɔ. 7 Ruccǝsinǝ ŋa tuk ŋir riŋeerlɔŋw-lɔ domony, nǝ ŋiti ŋir ŋǝthi Allah mac, ŋiti ŋɔvthanna ethisi andisa-lɔ mac. Ǝccǝ rogɽo rɔɔŋwa @allima ethi ṯeenye Allah. 8 Riyaaḏa rǝthi aŋna rǝthi faayitha-na rac, laakin riyaaḏa kira rǝthi ŋiɽaŋal ŋǝthi Allah tǝ, nerǝthi faayitha-na ray tatap, kaka nǝṯɔ-ŋgwɔ kittatha ŋimiitha-ŋi ŋethi kire-kirem ŋgwɔŋw alla ŋa ŋinḏi ethiila. 9 Ŋiɽaŋal ŋɔ ŋir rerrem, ethisi aavi nǝ ethisi ǝmminici tok. 10 Ŋindǝr-ṯǝ ŋɔ mindaŋ ǝṯi-nyii akikki ŋothɽor ŋwundǝ-ŋwundǝ, kaka nǝthiny-gwɔ ṯǝkkizǝ kizǝn ṯǝri, naanɔ-gwɔ Allah wɔmiithɔ wir Kwiglǝthǝ kwǝthi lizi tatap, nǝ kila rerrec lǝṯi ǝmmini.
11 Nḏǝthǝsi waamira ethisi ǝrri ŋɔ na ǝsi ǝccǝ @allima tok ṯa@liima kɔthɔ. 12 Ǝṯi duŋgwǝcǝ kweere mac ethi ǝrri ŋaamal-lɔŋw ŋɔɔŋa, laakin ɔro mǝthǝl kandisa-gi kɔɔŋa, nǝ kwǝthi lizi kila lǝthi ṯǝmminǝ, nǝ ki-ŋethre-na ŋɔɔŋa, nǝ ki-ṯammɽa-na ṯɔɔŋwa, nǝ ki-ṯǝmminǝ-nǝ ṯɔɔŋwa, nǝ ki-tɔsɔɔɽa-nǝ ṯɔɔŋwa. 13 Nǝ niti ninḏinyii kinnǝni mac, ǝɽi ǝsi dǝŋṯini ethisi ɔrtutuci lizi ŋa ŋɔlɔɔthɔna Kiṯaab-nǝ, nǝ ǝṯaari bǝshirǝ nǝ ǝṯaari @allima mindaŋ mǝnyii ɔppatha. 14 Ǝṯeere kettice haḏiiyyǝ ŋidiny mac wa winḏǝthǝr-ŋǝ kinaŋw nandisa liɽii-ŋa lishiyuukh-li kinaŋw nigittar rii reeŋen kindala lɔɔŋwa. 15 Ǝṯisi dǝŋṯini ethisi ǝrri ṯǝ ŋɔ, nǝ a kette rogɽo rɔɔŋwa tatap ki-ŋothɽor-na ŋɔ, mindaŋ mǝŋǝ lizi tatap ese kwillillathɔ keereny-gi. 16 Aŋrica rogɽo rɔɔŋwa, nǝ aŋraci ṯa@liima ṯɔɔŋwa tok. Dǝŋṯinǝ ethǝrri ŋiɽaŋali ŋɔ, na mǝsi ǝrri tǝ, a kilǝthi rogɽo rɔɔŋwa nǝ kila liŋe kettice yǝni tok.