aza 9
ṯibaŋica ṯeḏi buuluz muŋw əkici Yecuŋw Kwruztu ŋodɽor ŋimɽi ŋi
1 nyi kwiti kwiri hurr manya? nyi kwiti kwiri kafur kimɔ Yecu Kwruztu ece-na manya? nyi kwiti kwumeze Kwelenyi kweri kweni Yecu manya? ŋaŋa liti liri ŋɔḏɽor ŋinyi eḏi Kweleny-na manya? 2 menyi lizi lir ter ṯime kwir kafur kimɔ Kweleny ece-na, nenyorɔ kafur kuŋwun ki yey-na yalu ṯirṯir, kaka ur ŋa gwu, ŋaŋa, leŋgir zi elŋe ŋafura ŋi ŋinyi ŋiri eḏi Kweleny-na. 3 ṯaŋwu, na ŋiɽaŋal ŋu orɔ ŋirli nyi ŋi ki yey-na ṯirṯir yeḏi lizi kla leṯinyi ṯecici.
4 ŋiti ŋofḏana duŋgwinyi eḏeḏne, eḏi ii tɔk manya? 5 ŋiti ŋofḏana duŋgwinyi manya eḏi romḏi kwaw gi kwir kwruztyan, kaka yafura yiḏaḏu, na lieŋgen leḏi Kweleny-ŋa, na zafa tɔk a? 6 ya nyiŋa barnaaba gi dak liti leḏi zulṯa manya eḏala ŋɔḏɽor rii ŋeḏi eḏne weri? 7 orṯa wende were weṯi neŋnici rɔgwɽɔ ruŋwun kwɔmne kweḏi ṯuwən kwuruuz gi kwuŋwun? kwizi kwende kwere kweṯi kwe kwɔmne karṯiny-na, mindaŋ eḏere ye kwere mac? taɽa tende tere teṯaŋraci ŋirela mindaŋ eḏere ii ŋan ŋɔkwɔ?
8 ŋaŋa leṯi manja aruŋw, nyi kweṯandazi zulṯa gi kweḏi kwizigwunaŋ domony a? ŋiti ŋandizazi ṯa kiṯam keḏi kuruu ŋete ŋete manya? 9 aw. kaka luḏinar gwu kuruu-na keḏi muuza, ŋaruŋw: eṯere kəkici tiḏri ṯunyu mac kra teṯipii ŋwana ŋwara ŋi, eḏi zi baliza lu ŋwir yey kuwaɽa lu. anna! Allah weri keni aŋraci nyiḏri domony a? 10 ŋiti ŋandizazi Allah ŋu ŋeni ŋeri ṯuɽuk manya? ŋiɽaŋal ŋu ŋuluḏina ŋeni ŋeri, kaka ofḏanar gwu eḏi kwizi kwe təkiza ṯi kizen, na ŋgwa kweṯipii ŋwana tɔk eḏi zi afi ŋwɔkwɔ ŋweḏi ŋɔḏɽor ŋuŋun. 11 na menyi owḏini nyiŋa ŋwola ŋwizaw ki rugwor-na ralu ta, ŋiri ŋupa eḏuni kwɔmne kwɔkwɔ kwalu kweḏi yaŋna? 12 mezi kla liḏaḏu erri ŋu ŋeni ŋofḏana, nenyere orɔ nyiŋa rerec leŋgizerri tɔk manya? lakin keni nenyere ketize zulṯa ŋgwu yey mac. nyiŋa leṯindinyani ŋiɽaŋal nana ŋere nyiḏak kaka ṯinya nyi gwu eḏi rii ŋiɽaŋali ŋizaw ŋeḏi Kwruztu kereny. 13 a liti lilŋiica manya eḏaruŋw, kla letəkici heykala ŋɔḏɽor leṯi ye eḏneya weḏi heykal, na kla leṯaki ŋɔḏɽor ŋeḏi karama eṯir oɽmaṯi kwɔmne-na kweḏi karama? 14 na ŋiɽaŋal ŋi ŋete ŋete kaka ŋu, na Kweleny alla amra, waruŋw, kla leṯandindazi ŋiɽaŋali ŋizaw ŋir injiil, ŋeŋgir ŋi afi kwɔmne kwir kaka kweṯi rɔgwɽɔ reŋen naŋni.
15 lakin, nyi kwende kwumuṯalu kwɔmne gi ŋgwu lamin lere, nenyjere lɔ ŋu kirem eḏi ŋi afi kwɔmne kwere kaka ta ŋwu tɔk mac. ŋofḏana duŋgwinyi keni eḏay mindaŋ a kwizi ere kwere mac eḏi ŋuma eḏi dimeḏa nyuŋwu ṯellina ki rɔgwɽɔ kḏu. 16 kaka menyi gwu andazi ŋiɽaŋali ŋizaw ta, ŋir injiil, eṯinyere eḏi ŋuma eḏi ŋi ellini mac, kaka enir gwu lazim duŋgwinyi. na eyewey kweḏi ṯurfa ṯinyi menyere andazi ŋiɽaŋali ŋir injiil mac!
17 menyji ṯa erri ṯugwor ṯi tinyi, nyafi ujra; lakin menyjere erri ṯugwor ṯi tinyi mac ta, eṯinyjerri kaka kwuway kwuniŋneḏu kwumer ruzi wakiil. 18 mer orɔ ṯa ŋwu, na eṯinyi kinna andindazi ŋiɽaŋali ŋizaw ŋir injiil beyin, iti kitizanyi gwu zulṯa yey mac eḏi gi afi kwɔmne kwere ta, na ujra winyi wunderṯa wendu? 19 iti ur nyi gwu kwuway kweḏi kwizi kwere ḏuṯ ta, nenyi ruzi rɔgwɽɔ rinyi kwuway kweḏi lizi tatap eḏi mulḏa lizi eḏi Kwruztu-na luru luru.
zurum kweḏi buuluz eḏi mulḏa lizi eḏi Kwruztu-na
20 ki lizi-na lir yahuuḏ ta, nenyi ruzi rɔgwɽɔ rinyi yahuuḏi mindaŋ eḏi mulḏa lizi lir yahuuḏ eḏi Kwruztu-na; ki lizi-na leṯi kəkini kuruu gi ta, nenyi ruzi rɔgwɽɔ rinyi rikəkini kuruu gi tɔk, mindaŋ eḏi zi mulḏa eḏi Kwruztu-na kla leṯi kəkini kuruu gi iti ur nyi gwu kinna kweṯi kəkini kuruu gi mac. 21 na ki lizi-na kla liira kuruu-na ta, nenyji aɽani kla liira kuruu-na eḏi zi mulḏa eḏi Kwruztu-na, iti ur nyi gwu kinna kwiira kuruu-na keḏi Allah rerec mac, eni nyi gwu kwudimazi kuruu-na keḏi Kwruztu. 22 na ki lizi-na lajila ki ṯəmna nenyi ruzini kaka ŋunduŋwuzi eḏi zi mulḏa eḏi Kwruztu-na kla lajila ki ṯəmna, na ŋeḏi lizi tatap nenyorɔ kwɔmne kwete nyiḏak eḏi zi kileḏi lɔkwɔ deŋgen-na. 23 ŋeṯinyjerri ŋu tatap ŋiɽaŋal ŋi ŋizaw ŋir injiil, mindaŋ menyi afi nyi tɔk ṯortaḏa ṯeḏi injiil.
ṯaŋrina nana eḏofḏazi
24 a liti lilŋiica manya eḏaruŋw, lizi kla leṯi kalmiṯaḏi kweṯellini kwutuput eḏi zi ṯamḏu mindaŋ muŋw afi kwɔmne? afrir ŋaŋa kaka ṯaŋwu, mindaŋ ma afi tɔk. 25 na ŋgwa kweṯi kalmiṯaḏi, eṯuŋw dirnini aŋna wuŋwun kwɔmne nana kweṯejili ŋunduŋwu nana. na kla leṯizerri ŋu eṯir afi taŋgiŋi tir yəni domony yeṯernine fitak, lakin nyiŋa ta, erafi taŋgiŋi kra titi teṯernine ḏuṯ. 26 nyi tɔk, nyi kweṯafri titir; na irmiciḏi nyi gwu bunya gi ta, eṯinyi ere ermice ezir lu domony mac; 27 ṯa ŋwu, eṯi nyi ermice aŋna winyi bunya gi ŋummaŋi, eḏi ruzi kwuway kwinyi, mindaŋ menyji andindaci liḏaḏu ŋiɽaŋali ŋizaw, a Kweleny ere dirnaḏa nyuŋwu lu mac.
Hɔguuŋ wǝthi kaavɔr.
1 Nyii kwiti kwɔrɔ hɔrr mac-a? Nyii kwiti kwɔrɔ kaavɔr mac-a? Nyii kwiti kwɔmǝ ese Yǝcu-ŋw kwɔrɔ Kweeleny kwǝri mac-a? Ŋaaŋa liti lir lǝginǝ-nyji ki-ŋothɽor-na ŋǝthi Kweeleny mac-a? 2 Minyeere oro kaavɔr ki-lizi lithaathɔ mac tǝ, nǝny-ṯoro kaavɔr daŋgalɔ; ŋwɔṯaŋw noro ŋaaŋa khiṯim kǝthi ŋothɽor ŋǝthi ŋaavɔr ŋiinyi ethi Kweeleny-na. 3 Nǝ ṯɔrɔcca ki-rogɽo oro ṯiinyi kɔthɔ naanɔ-gwɔ lizi kila lǝṯi-nyii ṯǝccici. 4 Nyii kwiti kwǝthi haga ethethne, nǝ ethii tok mac-a? 5 Nyii kwiti kwǝthi haga mac ethi irǝri kwaaw-gi kwiinyi kaka yaavɔra yithaathɔ, nǝ liyǝŋgǝri ethi Kweeleny-na nǝ Bɔṯrɔs tok-a? 6 Alla nyiiŋǝ lirta Barnaaba-gi ṯɔɽɔk lɔvthanna ethethne ŋiimǝŋi ŋǝri? 7 Jesh kwundǝr kwǝndu kwǝṯi akkɔ ŋothɽor gwuruush-gi kwǝthi rogɽo ruuŋwun? Ǝyǝ kwɔrɔ kweere kwǝṯi kiithi jineeneya mindaŋ etheere yecce nyɔɔrɔ nyuuŋwun mac? Taaɽa tindǝr tǝndu teere titi tǝṯii ŋan ŋǝthi ŋirel ŋuuŋun mac?
8 Ŋandisa-nyji ŋɔ ŋisɔlṯa-ŋi ŋǝthi ŋizigwunǝŋǝ? Sherii@a kwiti ṯǝ kwandisaŋw tok mac-a? 9 Kaka nɔlɔɔthɔnar-gwɔ ki Sherii@a-na kwǝthi Muusǝ ŋaarɔŋw, “Ǝṯeere kǝkkici tithri ṯuunyu mac kira tǝṯi pii ŋwaana ŋwaara-ŋi.” E-ta ŋǝniŋw, Allah wǝṯi kettice ŋiɽaŋali yǝy ŋǝthi nyithri-a? 10 Ŋiti ŋandisa-ŋwsi ŋɔ tatap ŋǝni ŋǝri mac-a? Ŋɔlɔɔthɔna-pa ŋǝni ŋǝri; kaka nɔvthannar-gwɔ ethi kwizi kwee ṯǝkkizǝ-thi kizǝn, nǝ ŋgwa kwǝṯisi pii ǝṯɔŋwsi pii ṯǝkkizǝ-thi kizǝn tok ethaavi lɔɔɽɔŋi luuŋwun. 11 Nǝ nugwuuthi-nyji daŋgal-na ŋisaaw ŋir ṯigɽim, e-ta ŋǝni ŋifirlli beṯṯen ethɔɔni faayitha kwokwo daŋgal-na kwǝthi yaŋna? 12 Mǝ lithaathɔ ǝthi haga ethisi-gwɔ kittatha ŋɔ naaniŋa-gwɔ, e-ta nǝnyi-mǝ ere oro nyiiŋǝ rerrec lǝŋgi ǝthi haga wuṯǝmthǝlɔ-a? Laakin nǝnyji tǝ ere kettice yǝy mac ŋǝthi huguug wɔ, laakin nǝnyji kǝniny indindinyanni naana, mindaŋ etheere rii Inyjiilǝ keereny mac wǝthi Kwɔrɔstɔ. 13 Ŋiti ŋilŋica-ŋǝsi mac ethaarɔŋw kila lǝṯi akkɔ ŋothɽor ki-heikal-na lǝṯi-ṯǝ yee ethneya wǝthi heikala, nǝ kila lǝṯi akkɔ ŋothɽor ki-ŋwɔthgwun-lǝ kiraama-gi, ǝṯirani lɔɽɔmaṯṯɔ kiraama-na? 14 Nǝ nǝrṯoroŋw tok, nǝ Kweeleny alla waamira ethi kila lǝṯi aari bǝshirǝ Inyjiilǝ ethi ethne Inyjiil-yi.
15 Laakin nyii tǝ, ninyjeere kettice ŋeere yǝy mac ŋǝthi huguug wɔ, wala ethisi lɔcca ŋaaŋwɔsi ŋɔ ethi-ŋi naŋnatha ŋaaŋwɔsi kwomne kweere. Ŋɔvthanna-pa duŋgwu-nyii ethi kǝniny ai, mindaŋ mǝ kwizi ere kweere mac, ǝthi ŋɔma ethi dimmǝthǝ nyuŋwɔ ṯǝllinǝ ki-rogɽo kɔthɔ. 16 Nyii kwiti kwǝthi haga mac ethi piŋi rogɽo kaka naariny-gwɔ bǝshirǝ Inyjiilǝ. Nǝ ŋɔ tatap nǝnyii kǝkkini waamir-yi ethisi ǝrri. Ǝnnǝ ṯurvǝ ṯiinyi minyeere aari bǝshirǝ Inyjiilǝ mac! 17 Nǝ mǝnyji ǝrri ŋɔ ṯɔgwor-thi ṯiinyi tǝ, ǝnyii kittatha ethi aavi ɔjra; laakin mǝreere oro ŋǝthi ṯɔgwor ṯiinyi mac tǝ, nǝ Allah oro wuruusǝ-nyii wǝkiil wǝthi ŋothɽor ŋɔ. 18 Ɔjra wiinyi wundǝr wǝndu? Wundǝr wǝni-ŋwɔ ethaari bǝshirǝ Inyjiilǝ domony, nǝ ethiseere kettice yǝy ŋa mac ŋǝthi huguug wiinyi wǝthi ŋothɽor ŋǝthi Inyjiil-pa.
19 Nyii kwir hɔrr, ninyeere oro kwɔwaay kwǝthi kwizi kweere mac; laakin nǝnyii ruusi rogɽo riinyi kwɔwaay kwǝthi lizi tatap, mindaŋ minyǝthi ŋɔma ethisi ǝginǝ luuru. 20 Nǝ ŋǝni Yahuuḏ, nǝnyii ruusi rogɽo riinyi Yahuuḏi, mindaŋ ethi ǝginǝ Yahuuḏǝ; nǝ ki-lizi-nǝ kila likǝkkinǝ Sherii@a-gi, nǝnyii ruusi rogɽo riinyi kwɔgǝkkinǝ Sherii@a-gi, mindaŋ ethi ǝginǝ ŋunduŋwsi, niti-vǝ nɔrɔ-nyii kinnǝ kwɔgǝkkinǝ Sherii@a-gi mac. 21 Nǝ nǝrṯoroŋw tok, mǝnyii naani Umam-yi, ǝṯinyaaɽanni Umama wiira Sherii@a-na kwǝthi Yahuuḏ, mindaŋ minyǝthi ŋɔma ethi ǝginǝ Umama. Ŋiti ŋǝniŋw nyii kwǝṯi derne ethi iinyici Sherii@a naana kwǝthi Allah mac; laakin ninyǝni kwɔgǝkkinǝ sherii@a-gi kwǝthi Kwɔrɔstɔ. 22 Nǝ kila lajla ki-ṯǝmminǝ ǝṯi-nyii ajli tok, mindaŋ ethisi ǝginǝ kila lajla ki-ṯǝmminǝ-nǝ. Ŋwɔṯaŋw nǝnyii rothonne kwomne tatap, ethi ǝginǝ lizi tatap, mindaŋ ethisi fǝtǝ kilǝthi kila lokwo. 23 Ŋǝṯi-nyji ǝrri ŋɔ tatap ŋiɽaŋal-ŋi ŋǝthi Inyjiil, mindaŋ mǝnyii aavi barka tok kwuuŋwun.
24 Ŋaaŋa liti lilŋithi mac ethaarɔŋw lizi tatap lǝṯi kalmiṯathi nǝ ǝṯɔŋw ǝllini Kwɔtɔpɔt ethisi ṯamthɔ-la lithaathɔ, mindaŋ ǝṯɔŋw aavi haḏiiyyǝ? Ŋwɔṯaŋw avrir ŋaaŋa tok mindaŋ maavi haḏiiyyǝ. 25 Nǝ ŋgwa kwǝṯi kalmiṯathi ǝṯɔŋw dirnini aŋna wuuŋwun kwomne naana ŋgwa tatap kwǝṯi ǝjli ŋunduŋw. Ŋǝṯirsi ǝrri ŋɔ ethǝgini taŋgiŋi ṯidaɽiminna yǝni-yi yǝthi yaaɽi domony titi tǝṯi nannatha tɔttɔṯ mac, laakin nyiiŋǝ tǝ, ǝṯirsi ǝrri ŋǝthi taŋgi tǝṯi nannatha dok-dok. 26 Nǝrṯoro ŋɔ ŋǝṯiny-ŋi avri tittir kwicca ǝzir ŋoṯŋoṯ wa wandɔ-gwɔ ṯirgaka; ṯaŋw ǝṯinyoro kaka ŋgwa kwǝṯi irmicicithi buniyǝ-gi, kwiti kwir kaka ŋgwa kwǝṯi ermicice kɔrɔni domony mac; 27 laakin ǝṯinyii ermicice aŋna wiinyi buniyǝ-gi tig-tig ethiiɽǝsi; mindaŋ mǝnyji ǝccǝ lithaathɔ bǝshirǝ tǝ, nyeere bǝryǝnni kwaathan-gi mac.