aza 3
ŋiɽaŋal ŋinḏi eḏi rɔtɔ ḏa mer ŋazi diɽa ṯidiɽa ṯi ṯeṯi Kwruztu
1 mer ŋazi kinna diɽa ṯidiɽa ṯi ṯeḏi Kwruztu ŋundu gi, naŋnari kwɔmne ŋgwu kweṯinanni kilerena kezir weṯi gwu Kwruztu nanni, kwunanalu ki ṯii ṯeḏi mini ṯeḏi Allah. 2 kitari ṯireca ṯalu yey lu kwɔmne-na kweṯinanni kilerena; eṯere ireci kwɔmne yey lu kweḏi ṯurmun mac. 3 kaka ay ŋa gwu, na ŋimiiḏa ŋalu lucini Kwruztu gi eḏi Allah-na. 4 ma Kwruztu ruwene lu kwir ŋimiiḏa ŋeri, ta a ruwene lu ŋaŋa tɔk ŋundu ŋali ki ŋiniṯ-na.
5 ṯaŋwu, iɽinyiḏiri ki rɔgwɽɔ-na ralu kwɔmne kwir kweḏi ṯurmun, kwir ŋijin, ṯorṯuṯunana tiki, kaduwa kiki, uri yey lu, na ṯimiidaḏa ṯeḏi kwɔmne kweḏi lizi liḏaḏu—ṯinderṯa ṯir kaka ṯikwocalu ṯeḏi kwɔmne. 6 ŋiɽaŋal ŋi ŋu ezi ŋirŋaza ŋeḏi Allah ilica nyoru nyir ludurlaḏu. 7 a lidirnaṯi kerreny ki ŋiɽaŋal-na ŋu, erra ŋazi gwu. 8 lakin kirem, urṯineri ŋi lu wur kiṯay tatap daŋgal-na, ŋir ŋerya, na ŋirŋaza, na ɔɽɔm, na ṯuŋwun, na kandiza kiki ki runyu-na. 9 eṯere kəkeḏizi ŋəluŋ-na wuɽe-wuɽeny mac, kaka ma gwu urṯinelu wur rɔgwɽɔ ri ruɽun kwɔmne gi kweṯir erri, 10 na ma gwu kenne rɔgwɽɔ riaŋ, reṯi kikindeni eḏaɽani ŋgwa Kwukitazi, ki ṯilŋiiḏina ṯuŋwun. 11 ma kenne rɔgwɽɔ riaŋ a liti limorɔ-na ter ter mac lir yunaan na lir yahuuḏ, limuɽuni na liti limuɽuni mac, leni liṯimḏina na lidirnaḏiza, lir luway na lir hurr, kaka ur gwu Kwruztu minmin, nuŋw nani ki rɔgwɽɔ-na reri riaŋ.
12 ŋaŋa, a leni kla limezi Allah ecena, lirlinelu ter, lamɽaŋw zi beṯen, taŋwu kinnari ṯiyaḏiza rugwor-na, na ṯimeciḏizena tɔk, na ṯejilina ki rɔgwɽɔ, na rugwori riḏi jiɽem, na ṯindinyana ṯurfa nana tɔk; 13 na eti ummaḏizi rugwor-na wuɽe-wuɽeny, na mer gi eḏi kwere wəŋ ta, eṯir zi iɽinyaḏizi-na wuɽe-wuɽeny; kaka iɽinyacaŋazi gwu Kwruztu lu ta, eṯi zi ṯa iɽinyaca lu liḏaḏu ṯaŋwu tɔk. 14 na kiɽeciri ŋeḏre ŋu ṯamɽa, ṯinderṯa ṯeṯi miḏini tatap duŋw eḏorɔ minmin. 15 na eṯefrinji ŋiɽena ŋinḏi nani gwu Kwruztu eḏorɔ kweleny ki rugwor-na ralu. ŋinderṯa ŋornacarŋazi eḏorɔ-na aŋna-na wutuput, na eṯeca Allah zukran rugwor ri. 16 eṯefrinji ŋiɽaŋali ŋeḏi Kwruztu eḏi ruzi ŋaŋwuzi lurṯu beyin, mezi ilŋiiḏaḏizina daŋgal-na wuɽe-wuɽeny, na mezi ireci tɔk ṯeḏina ṯi yeyna tatap, na ma iɽezi Allah limazmuur li ṯortaḏa ṯi, na rilŋa ri tɔk reḏi Tigɽim, leca ŋunduŋwu zukran rugwor ri ralu. 17 na ŋete nyiḏak ŋeṯizandazi ya ŋeṯizerri, eṯizerri tatap ki yiriny-na yeḏi Kweleny kweni Yecu, leca Allah zukran wir Papa, ŋundu ŋgi.
ŋeḏre ŋeḏi lizi lir likwruztyan ki duənu-na kweŋen
18 ŋaŋa lir law, eṯi ketice lileluŋwuzi ŋiɽaŋali yey, kaka ofḏanar gwu nani gwu Kweleny. 19 ŋaŋa lir lor, eṯamɽi layu lalu, na eṯizere errici ŋeṯizi umi rugwor-na. 20 ŋaŋa lir kwelle, eṯi niŋniḏici rarnyaluŋwuzi lanyalu ŋali ŋiɽaŋal ŋi tatap kaka eṯir ŋi əmi Kwelenyi-na. 21 ŋaŋa lir papaŋa, eṯere lakazi kwelle kwalu mac mindaŋ er ajili rugwori. 22 ŋaŋa lir yaḏaam, eṯinyici lelenyi nana lalu leḏi ṯurmun kḏu ŋiɽaŋal ŋi ndendeṯ, ŋiti ŋir ŋeḏi ŋɔḏɽor ŋeḏi ŋi əmi lizi-na mac mer ŋazi izaci, lakin ŋeḏi ṯugwor ṯutuput minmin liṯinya Kwelenyi. 23 ŋete nyiḏak ŋeṯizerri, eṯizerri rugwor ri minmin, ləkiza Kwelenyi ŋɔḏɽor ŋundu, liti ləkiza lizi ŋɔḏɽor mac; 24 lilŋiiḏi rac eḏaruŋw, nyiŋa lafi ŋoru ŋir ujra weri nani gwu Kweleny. ŋaŋa klu ləkiza Kwelenyi ŋɔḏɽor, kweni Kwruztu. 25 na kweṯizerri ŋiki ŋwafi kweḏi kwɔmne kwiki kwerre ŋwi, kaka iti inḏi gwu Kweleny eḏi ruzi kwete kwecer kwupa, kwizaw eḏi kwuḏaḏu la kwecer kwɔkwɽeny.
1 Nǝ kaka mǝr-ŋǝsi diiɽǝ Kwɔrɔstɔ-ŋǝli tǝ, a-naŋni kwomne-lɔ kwǝthi ki-leere-na-ŋw, kǝzir wǝṯi-gwɔ Kwɔrɔstɔ naanalɔ ki-thii ṯǝthi mɔni ṯǝthi Allah. 2 Ǝṯi kittasi ŋaɽiny ŋaalɔ kwomne naana kwǝthi kindala-ŋw, nǝ ethiseere kittasasi kwomne naana mac kwǝthi kwurǝyulu-ŋw. 3 Kaka mǝ-gwɔ ai, mindaŋ nǝ ŋimiitha ŋaalɔ luccini Kwɔrɔstɔ-ŋgi ethi Allah-na. 4 Mǝ Kwɔrɔstɔ kwir ŋimiitha ŋǝri ruwǝnnǝlɔ tǝ, e-ta ǝmǝ ruwǝnnǝlɔ ŋaaŋa tok ŋundu-ŋǝli ki-ŋinith-nǝ.
Ŋimiitha ŋiyaŋ nǝ ŋɔɔɽɔn.
5 Ŋwɔṯaŋw, a ɽeenye sɔɔrɔma kithaay kwǝthi kwurǝyulu-ŋw, kwir ŋiijin, ṯurtunǝnǝ ṯigii, kadɔwa kigii, uri yǝy-lɔ, ṯimiidatha ṯǝthi kwomne kwǝthi lithaathɔ ṯǝṯoro kaka ṯɔgwɔccalɔ ṯǝthi kwomne. 6 Nǝ sǝbǝb-gi ṯǝ kwǝthi kwomne-ŋgwɔ, a ŋirŋasa ŋǝthi Allah iilicǝ lizi kila liti liinyicǝ ŋunduŋw naana mac. 7 Nǝṯǝ ŋimiitha ŋaalɔ oro ṯǝŋw tok kerreny, kinaŋw a-nanni-ŋa ki-sɔɔrɔm-na kwɔrtɔtɔ-ṯǝŋw, kinaŋw nikǝkkinǝ ŋimiitha ŋaalɔ tetter. 8 Laakin kǝṯirsi kithaay kire-kirem-ŋgwɔ kinǝŋgwu tuk ŋir: ŋǝryǝ, ŋirŋasa, oɽom, ṯɔŋwɔn, nǝ kandisa kǝṯi ruuthǝ kigii-kigii kworo-na. 9 Ǝṯeere kǝkkǝthisi ŋǝluŋinǝ mac wɔɽe-wɔɽeny, kaka mǝgwɔ urṯunǝlɔ wur rogɽo-ri rɔɔɽɔn nǝ ŋothɽor-ŋi ŋuuŋun, 10 mindaŋ nǝ kenne rogɽo riyaŋ, rimǝrsi ruusi riyaŋ ṯilŋiṯṯathina ethi-thi aaɽanni suurǝ kwǝthi ŋgwa kwɔgitta. 11 Ŋwɔṯaŋw nǝ ŋiɽaŋal ere naani ŋeere kwokwǝny ŋǝni Yuunaani mac, ya Yahuuḏi ya kila lǝṯi uɽunni ŋwɔthrɔnya, alla liti lǝṯi unduni mac, ya kwithimthina alla bǝrbǝri, alla kwɔwaay, ya hɔrr, laakin nǝ Kwɔrɔstɔ oro kwir min-min kwir ŋiɽaŋal tatap.
12 Nǝ ŋaaŋa kila limǝsi Allah allana nɔŋw rilli ŋaaŋwɔsi-lɔ ter, nɔŋw amɽi ŋaaŋwɔsi; ǝɽir kǝniny a kenne ṯiyathisa rɔgwor-na, ŋiiɽǝnnǝ, ṯǝjlinnǝ ki-rogɽo, ŋithiya naana, nǝ mithǝ ṯɔgwori. 13 Ǝṯisi indinyathisi-na wɔɽe-wɔɽeny, mǝ kweere ǝthici eŋgen ŋiɽaŋali ǝṯisi indinyathisi-na wɔɽe-wɔɽeny tok, kaka-ṯǝ niɽinyaca-ŋǝsi-gwɔ Kweeleny-lɔ, laazim ǝṯisi indinyathisi-na tok. 14 Nǝ ŋɔ tatap, ǝɽir kǝniny a kenne ṯamɽa, ṯǝṯi kǝkki kwomne tatap dɔŋw ŋǝmǝ-ŋǝmmǝŋ. 15 Ethi ŋiiɽǝnnǝ ŋǝthi Kwɔrɔstɔ oro kweeleny ki-rɔgwor-na raalɔ, ŋgwa kwɔrnaca-ŋǝsi Allah mindaŋ ethoro aŋna-na wɔtɔpɔt. Ǝṯi kǝniny aari shukran ki-rɔgwor-na raalɔ lac-lac. 16 Ethi ŋiɽaŋal ŋǝthi Kwɔrɔsta ɔmi ŋɔrṯɔwa ki-rɔgwor-na raalɔ. Ǝṯaari @allima-na wɔɽe-wɔɽeny nǝ ǝṯi-ŋi ɔlɔthisi-na ṯǝthinǝ-thi yǝnǝ tatap. Ǝṯi iiɽǝzi Allah mazaamiir-gi, lǝṯi biɽǝthǝ yiriny, nǝ ǝṯi kette rilŋa rǝthi Allah, lǝṯi ǝccǝ ŋunduŋw shukran rɔgwor-ri raalɔ. 17 Ŋeere nyithak ŋǝṯisi andasi alla ŋǝṯisi ǝrri, ethir ǝrrini yiriny-yi yǝthi Kweeleny kwǝni Yǝcu. Ǝṯi ǝccǝ Allah shukran wir Papa ŋundu-ŋgi.
Ŋethre ŋǝthi lɔgrɔstiyan ki-dɔɔnɔ-na kweeŋen.
18 Ŋaaŋa lir laaw, ǝṯi iinyici lilǝlɔŋwsi naana kaka nɔvthannar-gwɔ ethi Kweeleny-na. 19 Lɔr ǝṯi amɽi layɔ laalɔ, nǝ ǝṯiseere ǝrrici ŋir ḏɔr-ḏɔr mac. 20 Kwelle, ǝṯi iinyici rarnyalɔ-ŋwsi laanyalɔ-ŋǝli naana kwomne-na tatap, kaka nǝṯir-gwɔ ǝmi ŋɔ Kweeleny-na. 21 Papa-ŋa ǝṯeere lakkazi kwelle-lɔ kwaalɔ mac, mindaŋ etheere ajli rɔgwor-na mac. 22 Lɔwaay, ǝṯi iinyici lisǝyyiḏ-ŋwɔsi laalɔ naana lǝthi kwurǝyulu-ŋw kwomne-na tatap, ŋiti ŋǝniŋw etheese ŋaaŋwɔsi yǝy-yi naana mac, ŋiti ŋir ŋǝthi-ŋi ǝmi lizi-nǝ mac, laakin rɔgwor-ri min-min, lithiinya Kweelenyi. 23 Ŋette nyithak ŋǝṯisi ǝrri ǝrrǝrsi rɔgwor-ri min-min, kaka ǝṯisi ǝrrici Kweelenyi, ŋiti ŋir ŋǝthi lizi mac, 24 lilŋithi ethaarɔŋw Kweeleny kwɔŋǝsi inḏǝthǝ ŋɔɔrɔ ŋir mɔkaafa. Ŋaaŋa lǝni lǝkkicǝ Kweelenyi ŋothɽor kwǝni Kwɔrɔstɔ. 25 Nǝ ŋgwa kwǝṯisi ǝrri ŋigii tǝ, ŋwaafi jiizǝ kwǝthi ŋothɽor ŋuuŋun, kaka niti nǝṯi-gwɔ Kweeleny ṯǝmsi kwizi-lǝ kweere mac.