aza 19
bilaaṯuz, muŋw gwu ṯiŋaci yahuuḏa Yecuŋw lu
1 na ṯa bilaaṯuz ṯiŋa Yecuŋw lu, ner ipii zɔṯ gi, 2 na ezgar emme yugwia kura, kaka taŋgi teḏi ŋeleny, ner oɽaci kinda, ner oɽaci kireti kete kori tɔk. 3 eṯir ila nanuŋw gwu, eṯir eca ŋwu: a ŋgwa fa ta, Melik kweḏi yahuuḏ! ner ipii yerge yi ki yeyna tɔk.
4 na bilaaṯuz ru par kwokwony, nuŋw zi eca ŋwu: izarṯi nyi ŋgwu kwumulicaŋazi ŋunduŋwu mindaŋ ezelŋe kwiti kwinḏacanyi kaṯiya kere duŋgwun-na mac. 5 ṯaŋwu, na Yecu ru par, kwukinna taŋgiŋi teḏi yugwi kinda, nuŋw kenne kireṯi kori. nezi bilaaṯuz eca ŋwu: izarṯi, Kwor ŋgwu. 6 ma ṯa leleny leḏi yiziiz eze, laŋɽa li, ner miḏiḏi kwola ŋuma ŋi, ner eca ŋwu: ṯigreḏi, ṯigreḏi ki ŋwuɽi la ŋwuɽmɔḏalu. nezi bilaaṯuz eca ŋwu: miḏir ŋaŋa, a ṯigreḏa ki ŋwuɽi la ŋwuɽmɔḏalu, kaka iti inḏacanyi gwu kaṯiya kere mac duŋgwun-na. 7 na yahuuḏ eŋnici, ner eca ŋwu: nyiŋa ta leḏi kuruu kete, keḏi gwu iɽinyaḏa, kaka ruzaŋw gwu rɔgwɽɔ ruŋwun Tor teḏi Allah. 8 mezi bilaaṯuz neŋne ŋu, nuŋw emba ṯenye ṯeṯec, 9 nuŋw enḏi kwokwony ki muḏiriya, nuŋw eca Yecuŋw ŋwu: a kweḏi ṯakaŋw kwiri? na Yecu nani ṯirṯir. 10 na bilaaṯuz eca ŋwu: ati kwenyi andaci pa ŋiɽaŋali ŋere a? ati kwilŋiicanyi, eḏari: nyi kweḏi zulṯa eḏefrici ŋaŋwu, nenyeḏi zulṯa eḏi ṯigreḏa ŋaŋwu ki ŋwuɽi la ŋwuɽmɔḏalu a? 11 na Yecu eŋnici, nuŋw eca ŋwu: eŋgir ŋa ere inḏeḏa zulṯa kweḏi kindalaŋw mac, eŋgere eḏi zulṯa kwere duŋgwinyi la mac. ŋwu ṯaŋwu, ŋgwa kwiilenyi nani ŋa gwu, kwunderṯa kwuṯemḏiŋa la kaṯi gi. 12 na gwu ṯa bilaaṯuz naŋni eḏefrici. lakin na yahuuḏ miḏiḏi kwola eṯir eca ŋwu: ma efrici kworu ŋgwu, na a liti liri ma ŋumaḏi gezar gi mac. muŋw ruzi kwere rɔgwɽɔ ruŋwun melik, eṯuŋw upupuḏaci gezarŋw ŋiɽaŋali lu. 13 ma ṯa bilaaṯuz neŋne ŋiɽaŋali ŋu, nuŋw ruwezi Yecuŋw lu par, nuŋw nanalu kwurzi la kweḏi zeyria, kezir wudaɽmaḏir lu yal yi, wece yahuuḏ jabbaaṯa. 14 na lamin kla leḏi ogwumlu liri, eḏi ma kuruu keni ṯiṯamḏa ŋiɽany nani, na kaŋwun-na orɔ. nuŋw eca yahuuḏa ŋwu: izarṯi, Melik kwalu. 15 ner miḏiḏi kwola, ner eca ŋwu: ire kiṯay, ire kiṯay, ṯigreḏi ki ŋwuɽi la ŋwuɽmɔḏalu. nezi bilaaṯuz eca ŋwu: ŋazi fa ta eɽenyje Melik kwalu a? na leleny leḏi yiziiz eŋnici, ner eca ŋwu: nyiŋa liti leḏi melik kwere kwir ter mac. gezar kwiri ṯa dak. 16 nuŋw zi ṯa ṯiŋaca lu nyiḏak eḏi ṯigreḏa ki ŋwuɽi la ŋwuɽmɔḏalu.
Yecu, mer gwu ṯigreḏa ŋwuɽi la
ner miḏa Yecuŋw, ner gi ele kiṯay; 17 nuŋw ru, kwapina ŋwuɽi ŋwuŋwun ŋwuɽmɔḏalu eḏi ŋi ele kezir weni ezir weḏi kurkony, wece yahuuḏ, juljuṯa. 18 ner gwu ṯigreḏi ki ŋwuɽi la ŋwuɽmɔḏalu, ner li nani nden lir ter ner zi kəmi ki yəni, na Yecu nani keligeny-na. 19 na bilaaṯuz lɔ ŋiɽaŋali nuŋw zi allazi ŋwuɽi la, ŋenu ŋwu: Yecu kweḏi nazraŋw, kwir Melik kweḏi yahuuḏ. 20 na yahuuḏ yuru orti ŋiɽaŋali ŋu, kaka naniza gwu ezir wutigreḏir gwu Yecuŋw meḏiina ketok, na ŋwuli lɔḏine kandiza gi keḏi yahuuḏ, na keḏi ruumaani, na keḏi yunaani tɔk. 21 na ta leleny leḏi yiziiz yeḏi yahuuḏ andaci bilaaṯuzŋw, ner eca ŋwu: eti zi luḏi mac ŋeni, kwiri Melik kweḏi yahuuḏ, luḏi zi ŋeni: kwetari, nyi kwiri Melik kweḏi yahuuḏ. 22 nezi bilaaṯuz eŋnici, nuŋw zi eca ŋwu: ŋimenyji lɔ, er ta nani.
23 mer ṯigreḏi Yecuŋw ki ŋwuɽi la ŋwuɽmɔḏalu, na yezgar dimi yireṯi yuŋwun, ner zi uɽeḏa-na kwaɽŋan eḏi zi afi yere yere, na kwofan tɔk. na kwofan kwiti kweḏi yafa mac. 24 ner ta andazina deŋgen-na wuɽe-wuɽeny, ner gi ari: er emba ere undeḏi-na mac, er upi ŋwɔḏrɔma, er zi eze, ŋwudallu ŋweni eya. ner ṯa orɔ ŋwu, eḏi rataḏi ŋeni ŋuluḏina, ŋaruŋw:
ner kanni yireṯi-na yinyi,
ner upici kwofan kwinyi ŋwɔḏrɔma.
25 nezi ṯa ezgar erri ŋwu dap. ner rillazi ŋwuɽi kworɔ keṯɔk, ŋwunani gwu Yecu la, lenyin-ŋa eŋgen gi kwir kwaw kweni maryam, kwir kwaw kweḏi kuluuba, na maryam majdaliiya tɔk. 26 ma gwu ṯa Yecu eze lenyin, na meḏgen kwurillu keṯɔk, kwamɽaŋw, nuŋw eca lenyin ŋwu: kwaw kwalu, izaṯi, tiɽŋelu tɔŋwa tiri ṯa kru. 27 ta, nuŋw eca meḏgen ŋwu: izaṯi, lanyalu kwɔŋwa kwiri ṯa ŋgwu. na meḏgen ŋgwa mulḏani ki lomur ṯa kla tuc, nuŋw gi ele duənu duŋgwun.
28 kwaḏan ta, ilŋiica gwu Yecu kwɔmne tatap kwumɔrataḏi, nuŋw ari: owḏa wumenyi ye; mindaŋ eḏi ma ŋiɽaŋal rataḏi tatap ŋuluḏina. 29 na tonyɔ nani, turena khall-na tiketar lu kinaŋw. ner oɽazi kwɔmne-na eḏi zi gi aka, ner zi ṯiŋaḏa lufuru li kworɔ. 30 ma ṯa Yecu ii khall, nuŋw ari: ŋimɔ rataḏi. nuŋw irrazi ndalu, nuŋw ṯiŋaḏa ṯigɽima ṯuŋwun.
mer gwu ṯugwi kireji gi, na ṯaniḏa ṯuŋwun
31 na lomur klu orɔ leḏi ogwumlu, na gwu ṯa yahuuḏ ere naŋni yaŋna eḏi nani ŋwuri la ki lamin leni zabiṯ mac, kaka eni gwu lamin kla leni zabiṯ lupa. ner uṯizi bilaaṯuzŋw lu, ner eca ŋwu: eḏir zi agraḏa ŋwara, er dimi yaŋna kiṯay. 32 na ṯa yezgar ila, ner agraḏa ŋwara ŋweḏi kwete kerreny, na ŋweḏi ŋgwa kwuḏaḏu tɔk, liṯigreḏir zi li. 33 mindaŋ mer ila nani gwu Yecu, mer eze kwumay, ner ere agraḏa ŋwara mac. 34 na ṯa kwete kweḏi ezgar ṯugwi kireji gi ki ṯuɽma la, na ŋin ira tuc, ŋaw ŋi-na. 35 ŋgwa kwumeze, kwunderṯa kwumɔ ŋi unḏi ki, na ṯunḏiza ṯuŋwun ki eni rerem, ŋilŋiicaŋw zi ŋundu andizaŋwzi ŋirlalu eḏi zi emni ŋaŋa tɔk. 36 na ṯa ŋiɽaŋal orɔ ŋwu, ner rataḏi ŋuluḏina, ŋaruŋw:
kwiti kwer kiici liaŋi lere mac,
37 na ŋir ter ŋuluḏina, ŋaruŋw:
kwer ecice ŋgwa kwumer ṯugwi.
38 kwaḏan ta na yuzif kweḏi ar raamaŋw, kwirir Yecu gi ŋumaḏi ŋejmeṯi, kaka ṯinyaŋw gwu yahuuḏa, uṯizi bilaaṯuzŋw lu aŋna yi lu weḏi Yecu, eḏi dimi kiṯay. na bilaaṯuz emni. ṯaŋwu ner ila, ner dima aŋna weḏi Yecu kiṯay. 39 na nikudimuz ila tɔk, kwapa kwuḏɽula rɔṯla ruɽi-ṯɔɽɔl-wri-ṯuḏni (75), kwir murr kwulagḏina kwɔmne gi kwete kwiɽi; kwunderṯa kwumila lamin lete kerreny nani gwu Yecu kilikelu. 40 ṯaŋwu ner dimi aŋna weḏi Yecu, ner pezi yireṯi nana yimri-na, kwuḏɽul gi, kaka əḏya weḏi yahuuḏ weṯir yi aniḏizi. 41 kezir wuṯigredir gwu, na gwu jineyna nani, na ṯimamu nani ṯiaŋ ki jineyna-na, ṯiti ṯanaḏir gwu kwizi kwere kinna mac. 42 kaka nani gwu ṯimamu keṯɔk, ner ogwumlu lir yahuuḏ ŋiɽaŋal ŋi ŋeḏi zabiṯ kwinḏi eḏi nani ŋurpu ŋgwa, ner gwu aniḏa.
1 E-ta nǝ Biilaaṯɔs mɔlo Yǝcu-ŋw nǝr ippi souṯ-gi, 2 nǝ jesh ǝmme kuurǝŋi kir taŋgi tǝthi yuugwi, nǝr ɔɽacci kinda, e-ta nǝr ɔɽacci kwɔɔvana tok kwɔɔri; 3 nǝr iila naanɔ-ŋgwɔ nǝrǝccǝŋw, “Aŋgwata kwisaawa yaa mǝlik kwǝthi Yahuuḏǝ!” E-ta nǝr ippi yerge-yi.
4 Nǝ Biilaaṯɔs ruu kwokwony nɔŋwɔccǝ dɔŋw-ŋwɔ, “Iisar-ṯi ŋgwɔ kwɔŋǝsi ruccǝ kɔnɔŋw, mindaŋ mǝsi elŋe ethaarɔŋw kwiti kwɔmǝ-nyii kaṯṯica kaṯṯiya keere mac.” 5 Ŋwɔṯaŋw nǝ Yǝcu ruuthǝ par kwɔginna taŋgiŋi tǝthi yuugwi, nǝ kwɔɔvan kwɔɔri tok. Nǝsi Biilaaṯɔs ǝccǝŋw, “Iisar-mba kwɔɔrɔ! Kwɔrpa-ŋgwɔ!” 6 Mǝ rɔ-asa rǝthi kahana-ŋǝ hɔrraas-yi ese ŋunduŋw, nǝr mithithi kwɔɔla tɔc nǝraarɔŋw, “Ṯigrǝthi ki-ŋwuuɽi-lǝ! Tigrǝthi ki-ŋwuuɽi-lǝ!” Nǝsi Biilaaṯɔs ǝccǝŋw, “Multhur ŋaaŋa wɔɽeny a ṯigrǝthǝ ki-ŋwuuɽi-lǝ, kaka niti nikaṯṯica-nyii kaṯṯiya keere mac.” 7 Nǝ Yahuuḏ ǝŋnici nǝrǝccǝŋw, “Nyiiŋǝ lǝthi gaanuunǝ, nǝ gaanuun-gi-ṯǝ ŋga nǝr ɔvthannici ethi ai, kaka nɔruusǝŋw rogɽo ruuŋwun Tɔr ṯǝthi Allah.” 8 Mǝ Biilaaṯɔs neŋne ŋiɽaŋali ŋɔ, nɔŋw-mǝ kǝniny ṯeenye rerrec. 9 Nɔŋw aaɽitha ki-shaaya-la kwokwony nɔŋwɔccǝ Yǝcu-ŋw, “A kwǝthi ṯaka-ŋw kwɔrɔ?” Laakin nǝ Yǝcu ere ǝŋnici mac. 10 E-ta nǝ Biilaaṯɔs ǝccǝŋw, “Ati kwɔnaŋna-nyii ethi andaci mac-pa? Ati kwilŋithi mac ethaarɔŋw nyii kwǝthi ŋɔma ethi kǝdu ŋaaŋwɔ, nǝ ninyǝthi ŋɔma tok ethi ṯigrǝthǝ ŋaaŋwɔ ki-ŋwuuɽi-lǝ?” 11 Nǝ Yǝcu ǝŋnici nɔŋwɔccǝŋw, “Ǝŋgir-ŋǝ ere inḏǝthǝ ŋɔma kindala mac, ǝŋgeere ǝthi ŋɔma ŋeere mac duŋgwiny-lǝ. Ŋwɔṯaŋw ŋgwa kwiilǝ-nyii naaniŋǝ-gwɔ kwundǝr kwǝthi ŋikiyaŋi ŋithǝmthilǝ beṯṯen.”
12 Mǝ Biilaaṯɔs neŋne ŋiɽaŋali ŋɔ, nɔŋw naŋni ṯaay-lɔ tǝthi-thi kǝdu ŋunduŋw, laakin nǝ Yahuuḏ mithithi kwɔɔla nǝrǝccǝŋw, “Mǝ kǝdu kwɔɔrɔ-ŋgwɔ a kwiti kwirir Imbraaṯɔɔr-gi ŋɔmathi ḏuṯ; mǝ kweere ruusi rogɽo ruuŋwun mǝlik; ǝṯɔŋw rɔɔthatha Imbraaṯɔɔra ṯuwǝn naana!” 13 Mǝ Biilaaṯɔs neŋne ŋiɽaŋali ŋɔ, nɔŋw mɔltha Yǝcu-ŋw par mindaŋ nɔŋw naanalɔ kwɔrsi-la kwǝthi ŋaaḏi; kǝzir wǝni “Bɔlaaṯ” wǝnyjicǝ @ibraaniiyyiin yiiriny yǝni “Jabbaatha.” 14 Nǝ aaŋwun aadithi ethi naani kelgeny-na wǝthi laamin liŋnaca Fis-ha keereny lǝṯir-li ogwom-lɔ; nɔŋwɔccǝ Yahuuḏǝ-ŋw, “Mǝlik kwaalɔ kwirṯa ŋgwɔ!” 15 Nǝr mithithi kwɔɔla nǝraaŋɔŋw, “Iɽinyithi kithaay! Iɽinyithi kithaay! Ṯigrǝthi ki-ŋwuuɽi-lǝ ŋwɔɽɔmɔthalɔ!” Nǝsi Biilaaṯɔs uṯicǝlɔ nɔŋwsǝccǝŋw, “Ŋaaŋa linaŋna-nyii ethi ṯigrǝthǝ mǝlik-gǝ kwaalɔ ki-ŋwuuɽi-lǝ ŋwɔɽɔmɔthalɔ-a?” Nǝ rɔ-asa rǝthi kahana ǝŋnici nǝrǝccǝŋw, “Nyiiŋǝ liti lǝthi mǝlik-gǝ kweere kwir ter mac illi Imbraaṯɔɔr ṯɔɽɔk!” 16 E-ta nǝsi Biilaaṯɔs inḏǝthǝ Yǝcu-ŋw ethi Ṯigrǝthi ki-ŋwuuɽi-lǝ ŋwɔɽɔmɔthalɔ.
Yǝcu mǝr-gwɔ ɽeenye ki-ŋwuuɽi-lǝ ŋwɔɽɔmɔthalɔ.
(Maṯṯa 27:32-44Mɔrgus 15:21-32Luuga 23:26-43)17 Ŋwɔṯaŋw nǝr mɔlo Yǝcu-ŋw, mindaŋ nɔŋw ruu par kwappa ŋwuuɽi ŋwuuŋwun ŋwɔɽɔmɔthalɔ, nɔŋwŋeele kǝzir wǝni ǝzir wǝthi kɔrkɔny wǝṯi Yahuuḏ ǝccǝ Juljɔtha. 18 Nǝr ṯigrǝthǝ ki-ŋwuuɽi-la ŋwɔɽɔmɔthalɔ kinanaŋw, lɔr-li ndǝn ki-ŋuɽumǝ riɽǝndǝk, Yǝcu-tǝ nɔŋw naani kelgeny-na.
19 Nǝ Biilaaṯɔs lo yaafṯa nɔŋwsi allasila ki-ŋwuuɽi-lǝ; nɔŋw lo ŋiɽaŋali ŋǝniŋw, “Yǝcu kwǝthi Naasira-ŋw kwɔrɔ Mǝlik kwǝthi Yahuuḏ.” 20 Ǝṯi Yahuuḏ yittǝzir ɔrti yaafṯa kiya, kaka a-nanyja ǝzir wa wɔṯigrǝthir-gwɔ Yǝcu-ŋw mǝḏiinǝ-b keṯṯɔk. Nǝ yaafṯa kiya lothone @ibraaniiyya, nǝ Rɔɔmaaniiyya nǝ Yuunaaniiyya tok. 21 Nǝ rɔ-asa rǝthi kahana kǝthi Yahuuḏ ǝccǝ Biilaaṯɔs-ŋwɔ, “Ǝṯi luuthi mac, ‘Mǝlik kwǝthi Yahuuḏ’ laakin ‘Kwɔr-ŋgwɔ kwaarɔŋw, nyii kwɔrɔ Mǝlik kwǝthi Yahuuḏ’.” 22 Nǝsi Biilaaṯɔs ǝŋnici nɔŋwsǝccǝŋw, “Kaka-ṯǝ ŋa ŋuluuthu-nyji ethir-ṯǝ naanɔŋw ŋɔlɔɔthɔna.”
23 Mǝ jesh ṯigrǝthǝ Yǝcu-ŋw ki-ŋwuuɽi-lǝ ŋwɔɽɔmɔthalɔ, nǝr dimmi yirethi yuuŋwun nǝrsi kette ŋwɔdɔŋw-na kwaaɽiŋan, ethisi ɔrṯa aavi yeere-yeere; nǝ kwɔfṯaan tok. Laakin kwɔfṯaan-ŋgwa nɔŋwɔni kwɔgɽunnǝ kwiti kwǝthi yaava naana mac kindala lahaḏḏɔ kuṯṯǝlɔ cuk-cuk. 24 Nǝr andasina nǝraarɔŋw, “Ǝṯir undǝthinǝ mac, laakin ǝri kaṯṯɔ gwɔra@ ǝreese kwinḏi ethoro kwǝthi ǝyǝ.” Ŋǝrrinǝ ŋɔ mindaŋ ethi rattathi ŋǝthi Kiṯaab Kirllinǝlɔ ter ŋaarɔŋw, “Nǝr kanni yirethi yiinyi deŋgen-na, nǝr kǝṯṯici kwɔfṯaana kwiinyi gwɔra@.”
25 Nǝr-ṯǝ oro ŋɔ ŋǝrrǝsi jesh. Nǝ lǝnyin kwǝthi Yǝcu-ŋǝ rillaci ŋwuuɽi-lu ŋwɔɽɔmɔthalɔ, ŋundu-ŋǝ eŋgen-gi kwɔrɔ kwaaw kwǝni Mǝryǝm kwɔrɔ kwaaw kwǝthi Kiluuba, nǝ Mǝryǝm Majḏaliiyyǝ tok. 26 Mǝ Yǝcu ese lǝnyin nǝ ṯilmiiz ṯuuŋwun tok ṯǝṯɔŋw amɽi lirillɔ keṯṯok nɔŋwɔccǝ lǝnyin-ŋwɔ, “Lǝnyǝri iisa nǝ tiɽiŋǝlɔ tir ṯǝ kɔrɔ!” 27 E-ta nɔŋwɔccǝ ṯilmiiza-ŋwɔ, “Iisa nǝ laanyala kwir-ṯa ŋgwa!” Ŋwɔṯaŋw nǝ ṯilmiiz mɔlo ŋunduŋw ki-lɔɔmɔr-la ṯǝ kila nǝŋgeele dɔɔnɔ kwuuŋwun.
Ŋiɽany ŋǝthi Yǝcu.
(Maṯṯa 27:45-56Mɔrgus 15:33-41Luuga 23:44-49)28 Mǝsi Yǝcu elŋe ethaarɔŋw kwomne tatap kwɔmǝ raṯṯathi; nǝ ethisi rattasi kworo ŋǝthi Kiṯaab Kirllinǝlɔ ter nɔŋw aarɔŋw, “Ǝwthǝ wɔ wiithi-nyii.” 29 Nǝ kwooro naani kwette kinaŋw kwuurǝnnǝ khall-na deddep; nǝr-gwɔ ɔɽasi isfinyja-na mindaŋ nǝr ṯiŋacci lɔvɔɔrɔ-li kworo-na kwuuŋwun. 30 Mǝ Yǝcu nyeŋle khalla nɔŋwaarɔŋw, “Ŋimɔ raṯṯathi!” E-ta nɔŋw irrasi nda-lɔ mindaŋ na ṯigɽim fuuri.
Yǝcu mǝr-gwɔ tɔgwii ki-ṯuɽumǝ-lǝ.
31 Nǝ kaka nɔrɔ-gwɔ laamin kila lǝthi ogwom-lɔ, nǝ Yahuuḏ ere naŋni yaŋna yeeŋen ethi naani ki-ŋwuuɽi-lǝ mac ki-laamin-la lǝthi Sǝbiṯ kaka nirllinǝ-gwɔ-ṯǝ Sǝbiṯ-lɔ ŋgwa, nǝ Yahuuḏ uṯici Biilaaṯɔs-ŋwɔ-lɔ ethisi agratha ŋwaara, mindaŋ ethisi-mǝ dimmǝ kithaay. 32 Ŋwɔṯaŋw nǝ jesh iila nǝr agratha ŋwaara ŋwɔthi ŋgwa kwiŋna, nǝ ŋgwa kwɔthaathɔ kwɔṯigrǝthirsi-gi. 33 Laakin mǝr iila naanɔ-gwɔ Yǝcu nǝr kaṯṯasi kwɔmǝ ai kerreny tuk, mindaŋ nǝreere agratha ŋwaara ŋwuuŋwun mac. 34 Laakin nǝ kwette kwǝthi jesh ṯɔgwii tɔc ki-ṯuɽumǝ-lǝ mindaŋ nǝ ŋin iirǝ ŋaaw ŋina. 35 Ŋgwa kwiisasi ŋɔ ŋǝrrinǝ, nɔŋw-ŋi ɔnḏi kii, nǝ ṯɔnḏa ṯuuŋwun kii ǝni rerrem, nǝ nɔŋwsi elŋe tok ethaarɔŋw ŋandisa-ŋwsi ŋir rerrem, mindaŋ mǝsi ǝmmini ŋaaŋa tok 36 ŋǝrrinǝ ŋa mindaŋ mǝrǝthi yǝnǝ ŋandinna Kiṯaab-na Kirllinǝlɔ ter ŋaarɔŋw, “Kwiti kwǝri kiici liyaŋi leere mac.” 37 Nǝ Kiṯaab Kirllinǝlɔ ter andasi kwokwony nɔŋwaarɔŋw, “Kwǝri ecce tok-tok ŋgwa kwɔthɔɔgwɔr.”
Ṯaanithisa tǝthi Yǝcu.
(Maṯṯa 27:57-61Mɔrgus 15:42-47Luuga 23:50-56)38 Kwaathan tǝ nǝ Yuusuf iila kwǝthi Raama-gwɔ kwir ṯilmiiz ṯǝthi Yǝcu ŋejmethi, kaka nithiinya-ŋgwɔ Yahuuḏǝ, nɔŋw uṯici Biilɔaṯɔs-ŋwɔlɔ aŋna-yi wǝthi Yǝcu, mindaŋ nǝ Biilaaṯɔs ǝmminici ethi dimmǝ. E-ta nɔŋw iila nɔŋw dimmǝ aŋna kithaay. 39 Nǝ Niiguuḏiimuus kwinḏi naanɔ-ŋwɔ Yǝcu kerreny kilkǝlu, iila kwappa kwɔthɽɔla kwir luuɽi kwɔlagnana mɔrr-gi, kwir roṯola riilicǝ ruɽi-ṯɔthniŋw keṯṯok. 40 Nǝr iila nǝr dimmi aŋna wǝthi Yǝcu, nǝr ippǝsi kǝfǝnǝ naana kwɔthɽɔl-gi ŋiɽaŋal-ŋi ŋǝthi ǝthi wǝthi Yahuuḏ mǝr aanathisi.
41 Nǝ kǝzir wa wɔṯigrǝthir-gwɔ ki-ŋwuuɽi-lǝ ŋwuɽɔmɔthalɔ, nǝ jineene naani kwette kinaŋw, nǝ ki-jineene-na ŋgwa nǝ ṯimaamɔ naani ṯette kinaŋw ṯiyaŋ ṯiti ṯimǝr-gwɔ aanitha kweere kinnǝni mac.
42 Nǝ kaka nɔrɔ-gwɔ laamin lǝthi Yahuuḏ lǝṯir-li ogwom-lɔ, na nǝ ṯimaamɔ naananni kinaŋw-lɔ keṯṯɔk tok, nǝr-gwɔ aanitha Yǝcu-ŋw-nǝ kinaŋw.