aza 7
Yecu kwuzeye kaḏaama keḏi orṯa
1 ma Yecu ratazi keni ŋiɽaŋali tatap, ŋiniŋnazi lizi, nuŋw enḏi kafranahum. 2 na kwor nani kwete kwir rayiiz weḏi orṯa ruɽi-ṯuḏni, nuŋw eḏi kaḏaama kete kuma, kamɽaŋw beṯen, kumerrizi ŋiɽany. 3 muŋw zi neŋne ŋeḏi Yecu, nuŋw gwu uzazi lijowiṯi lir yahuuḏ, eḏuṯizelu eḏila eḏi zəwi kaḏaama kuŋwun. 4 mer ila nani gwu Yecu, ner dadaci ŋunduŋwu lu, ner eca ŋwu: kwofḏana mi eḏi zi errizi, 5 kaka amɽuŋw gwu lizi leri, nuŋw ecizi nyuŋwuzi majma. 6 ner romḏi Yecu ŋali, ner ele mindaŋ mer ilizi duənuŋw keṯɔk, nezi rayiiz weḏi orṯa uzi lɔkwɔ lirir li ŋumaḏi nanuŋw gwu, eḏeca ŋwu: Kweleny, eṯir ŋa urreḏi mac. nyi kwende kwofḏana eḏenji ŋaŋwu ki duənu kwinyi. 7 nenyi ari, nyi kwiti kowfḏana tɔk mac eḏi gwi ilaḏa. andiza ma ta domony, a ta kaḏaam kinyi zawi. 8 kaka ur nyi gwu kwete kweṯi miḏa amra weḏi kla liṯemḏinyi la, nenyi eḏi zulṯa kweḏi orṯa tɔk. menyi eca wete: inḏi, eṯuŋw ta ele. menyi ornuti wir ter, eṯuŋw ta ila. menyi eca kaḏaama kinyi ŋwu: erre zi ŋu, eṯuŋw zi ta erri. 9 mezi Yecu neŋne ŋu, nuŋw ṯibi; nuŋw orlalu nuŋw zi eca likwaḏiḏi ŋwu: nyi kwecaŋazi ma ŋwa rerem, nyi kwiti kwinḏa ṯəmna ṯere tir ŋwu ki izrayiil-na ḏut. 10 mer aɽa duənu kla luzaŋw zi, ner kaṯazi kaḏaama kimɔ zey.
Yecu kwumiiḏica kweḏela kweḏi naayiinŋw toru
11 ner ṯa orɔ ŋwu, ma ŋurpu ŋgwa orɔ, nuŋw ele kayin wete weni naayiin, ner ele limeḏgen li luru, lizi li litezir tɔk. 12 mer ilizi ayinu kworɔ keṯɔk, ner zi gwu kaṯazi lete lidirna keni kworu kwete kwayyu, kwir gi lenyin kwutuput, na lenyin roḏani kweḏel tɔk. ner oɽmaṯi lizi li litezir leḏi ayin wa. 13 ma Kweleny eze na gwu ŋimɽi yaḏa duŋgwun, nuŋw eca ŋwu: eṯaru mac. 14 muŋw duŋgwa, nuŋw mummi ŋwumbanyu, ner rilli krip lidirna, nuŋw eca kamali ŋwu: kwor kwalu, nyi kweca ŋa, diɽi. 15 nuŋw diɽeḏa la ŋgwa kwumay, nuŋw talliḏa kandiza nana. nuŋw inḏeḏa lenyin. 16 nezi ŋiḏeny ye-na tatap, ner nii Allah-na, ner ari: kwiɽi kwupa kwumenyji diɽi. na, Allah wumraŋḏa lizi luŋwun. 17 ner iṯiḏi ŋiɽaŋali la ŋeni ŋundu kezir weḏi yahuḏiiyaŋw tatap, ner ŋi rikana lu kezir wir ter tatap tɔk.
yuhanna kweni baptizt
18 nezi limeḏgen leḏi yuhanna-ŋa andaci ŋunduŋwu ŋu tatap. 19 na yuhanna ornuti limeḏgen nden, nuŋw zi uzi nani gwu Yecu eḏeca ŋwu: a kwiri ṯa ŋgwu kweŋgila, alla kwenyi əkizi kwir ter kizen? 20 ma lor ele nanuŋw gwu, ner eca ŋwu: yuhanna kweni baptizt kwir kwuzenyji, eḏeca ŋaŋwu ŋwu, a kwiri ŋgwa kweŋgila, alla kwenyi əkizi kwir ter kizen? 21 na Yecu, ki lomur ṯa kla, zəwi lizi luru luru leḏi kimeṯi-na ter ter, luma nana, na leḏi rigɽima-na riki, nuŋw efrici lunduŋa yey-na luru tɔk. 22 nezi Yecu eca ŋwu: inḏir ma, ezi andaci yuhannaŋw ŋimɔzeze, ŋimɔzineŋne tɔk; ŋeḏi lunduŋ limafri yey-na, yɔmzɔŋ yimirere lu, nyilaŋ nyimɔzuɽi nana, liriima yəni-na limami neŋne ŋwu, kla layyu limɔdiɽe lu, na eṯir andaci luwaya ŋiɽaŋali ŋizaw tɔk. 23 na ŋgwa kwiti kwinḏa kwɔmne kwere mac duŋgwinyi eḏi zi irreci kereny, kweni kwortani. 24 mindaŋ ma yafur yeḏi yuhanna aɽi, nuŋw zi andaci ŋwuduŋw ŋeḏi yuhanna; nuŋw zi eca ŋwu: aḏa kwiri kwoɽaḏi ŋa gwu kwuḏer eḏ iza? karwa kiri, kariza kurun a? 25 aḏa kwiri kwoɽaḏi ŋa gwu eḏ iza? kwor kwiri, kwukinna yireṯi yimri-na? izarti, kla leṯikenne yireṯi yimri-na, leṯami eḏneŋw dɔk dɔk, eṯir orɔ leṯinanni ki yiŋna-na yeḏi limelik. 26 na aḏa kwiri kwoɽaḏi. ŋa gwu eḏ iza? kwiɽi kwiri a? emba, ŋgwa kwuṯemḏi mi kwiɽyaŋi. 27 kaka urŋw gwu ŋgwa, ŋuluḏina ŋeni ŋundu ŋwu:
izaṯi, nyi ŋgwu kwuzizaŋa kafura kinyi kereny.
kinde kiri kɔ ŋa iŋnaci kereny eḏi daɽmaci ṯay lu.
28 nyi kwecaŋazi ma ŋwa rerem, ki lizi-na tatap lilŋiiḏizi law, nuŋw ta ere kwere deŋgen-na mac kwuṯemḏi yuhannaŋw, kweni baptizt. lakin, ŋgwa kwir kwɔkwɽeny ki ŋeleny-na ŋeḏi Allah, kwunderṯa kwuṯemḏi ŋunduŋwu.
29 mer zi neŋne ŋu, na ŋwuduŋw tatap, lizi li lɔkwɔ leṯallila ṯulba tɔk, ner ortaḏa Allah, kaka mer gwu baptazini baptizm gi kweḏi yuhanna. 30 lakin kla leni lifarzi-ŋa lor li leṯizilŋiiḏini kuruu-na limɔderne baptizm kwuŋwun, linderṯa limɔderne ṯikitaḏa ṯeḏi Allah eḏi zi errici.
31 nyi kwubiɽḏi lizi klu leḏi kiremŋw aḏa gi? 32 laɽina kwelle kwunanalu ki zuk-na, kwornuṯi limaḏi ŋiɽaŋal ŋi ŋu:
nyiŋa ləriceŋazi kuɽgu, na ere ṯiṯi mac;
na arinyi gwu ŋwunda ŋwunda, na ere ari mac.
33 kaka inḏi gwu yuhanna, eṯuŋw ere muni mac, eṯuŋw ere ii nabiṯa tɔk mac, ner aru ŋwu: kweḏi ṯigɽim-na tiki. 34 na Tor teḏi kwizigwunaŋ ila, eṯuŋw ye eḏenya, eṯuŋw ii tɔk, ner aru ŋwu: izarti kworu ŋgwu kwugiiri keḏne, kweti mi ii tɔk; kwumerli orɔ ŋumaḏi leṯallila ṯulba, leni liki rugwori tɔk. 35 lakin na ṯeḏinayeyna ṯeḏi Allah eni ṯizuɽu-na nyor nyi nyuŋwun tatap.
ṯoraḏa ṯeḏi ŋwara ŋweḏi Yecu
36 nuŋw uṯizelu kwete kweḏi lifarzi eḏi gi eḏne. muŋw enḏi ki duənu kweḏi ŋgwa kwir kwufarzi, nuŋw inḏiraḏa ezir keḏneya la. 37 nezi kwaw kwete keni kweḏi balaḏ ŋgwa, kweni kwiki ṯugwori, neŋne mer eca ŋwu: Yecu ŋgwana eḏi kwufarzi-ŋa, kwiiḏina. nuŋw afi ŋila ŋami wəŋ taɽnyu ri tete, tir kawa. 38 ta nuŋw irlaci Yecuŋw lu ki ŋwara ṯoɽu ṯi la, kwaraḏina; nuŋw bindazi ŋwal ŋwara nana, nuŋw ŋiglici ŋwara, nuŋw zi firṯaḏa owɽu yi, nuŋw enji ṯunyu ŋwara nana ta, nuŋw zi oraḏa ŋila ŋi. 39 ma kwor eze, kwir kwufarzi kwornuṯu, nuŋw arina ŋwu: eŋgi kwizimini ɽe, eŋguŋw elŋece kwayu ŋgwu rac, kwudugwuɽa nana, eŋguŋw ari, kwiri ŋwu, kaka kiiŋw gwu ṯugwori. 40 na Yecu eŋnici nuŋw eca ŋwu: zimaan, nyi ŋgwu kweḏi ŋiɽaŋali ŋete ŋeḏi zi andaci ŋaŋwu. nuŋw eca ŋwu: muallim, andizazi ma.
ṯiŋerɔŋw ṯeḏi lizi nden leḏi yəmzu
41 nuŋw eca ŋwu: kwor kwete kweḏir li nden kəmzu. ner gi eḏi kwete ariyali tuɽi-ṯuḏni, ner gi eḏi kwuḏaḏu ariyali wuɽen na keyriya. 42 mindaŋ mer ere eḏi kwɔmne kwere eḏi ruci mac, nuŋw zi efrici nden tɔk nyiḏak. andicanyi ṯi, ki lor klu lir nden, kwunde kwir kwendu kweŋgamɽi kworu beten eḏi kwuḏaḏu la? 43 na zimaan eŋnici nuŋw eca ŋwu: nyi kwari pa ŋwu, kwor kwir kwumɔŋw gi efrici kwuruuza kwuru. nuŋw eca ŋwu: a kwami ṯa andazuŋw. 44 nuŋw orlaḏa kwayu nana, nuŋw eca zimaanŋw: a ŋgwu kwiza kwayu ŋgwa a? enḏinyi gwu ki duənu duŋgwɔŋwa, nenyere inḏeḏa ŋaw ŋere ŋeḏi ŋii ŋwara too. nenyi kwaw iglici ŋwara nana ŋwal ŋi, nuŋw zi firṯizi nyuŋwu nana owɽu yi. 45 a kwende kwaginanyi ṯunyu ṯi. enḏi nyi, na ta kwaw orɔ ŋgwu kwulanḏizanyi ṯunyu ŋwara nana kwete kwete. 46 a kwende kwenjenyi ŋila kindana. nenyi kwaw ŋgwu oraci ŋwara ŋila ŋi ŋami wəŋ. 47 ŋwu ṯaŋwu, nyi kweca ŋa ŋwa, ṯamɽa ṯuŋwun ṯupa ṯimɔ ruwezi ŋiɽaŋali lu ŋu, ŋaruŋw: ŋikya ŋuŋun ŋuru ŋimɔfifrini. lakin, ŋgwa kweṯir zi fifrici ŋɔkwɽeny, eṯuŋw ta ruweci ṯamɽa lu ṯɔkwɽeny. 48 ta, nuŋw eca kwayu ŋwu: ŋikya ŋɔŋa ŋimɔfifrini. 49 ner andizana ŋwu, kla liiḏinar li, eya kwiri ṯa manuŋ kweŋgi fifri ŋikyaŋi? 50 na Yecu eca kwayu ŋwu: ṯəmna ṯɔŋwa ṯimɔŋa kileḏi; inḏi ma ta pa kwizaw.
Yǝcu mɔŋgwɔ sǝwici ḏobitha ṯir Rɔɔmaani khaḏaama kuuŋun.
(Maṯṯa 8:5-13)1 Mǝ Yǝcu ṯimmaci lizi ŋiɽaŋali tatap tǝ, nɔŋw iidǝthǝ kithaay nɔŋweele Kafranaahuum. 2 Nǝ ḏobiṯ ṯette ṯir Rɔɔmaani naani kinaŋw, ṯǝthi khaḏaama kette kamɽa-ŋwɔna kuumǝ beṯṯen, kimaadithi ethi ai. 3 Mǝ ḏobiṯ neŋne ŋiɽaŋali ŋǝni Yǝcu, nɔŋw ɔɔsi lishiyuukha lokwo lir Yahuuḏ ethi uṯicǝ ŋunduŋw-lɔ ethiila ethi sǝwici ŋunduŋw khaḏaama kuuŋun. 4 Mǝr iila naanɔ-gwɔ Yǝcu, nǝr tuurǝccǝlɔ tur, nǝr ǝccǝŋw, “Kwɔr-ŋgwɔ kwɔvthanna-mi ethi mǝcci. 5 Kaka nǝṯi-ŋgwɔ amɽi lizi lǝri, mindaŋ nɔŋw ǝccici nyuŋwsi majma@ tok.”
6 Ŋwɔṯaŋw nǝ Yǝcu ele ŋundu-ŋǝli, mindaŋ mɔŋw iilici yiŋna keṯṯok, nǝ ḏobiṯ ṯiŋatha limethgen ethi andaci ŋunduŋw ethǝccǝŋw, “Kweeleny ǝṯi biyǝ rogɽo rɔɔŋwa ṯurvǝ mac, kaka niti nɔvthannany-gwɔ mac ethi ǝnyji ŋaaŋwɔ ki-dɔɔnɔ kwiinyi, 7 wala ethi ǝni kwɔvthanna ki-rogɽo-na riinyi ethi iila naaniŋa-gwɔ. Laakin andisa-ma-tǝ kandisa domony e-ta ǝtǝ khaḏaam kiinyi saawi. 8 Nǝ nyii tok nyii kwɔnaana ki-rii-na rǝthi kila lithǝmthiny-lǝ sɔlṯa-gi, nǝ ninyǝthi jesha tok kwɔnaanɔ ki-rii-na riinyi, mǝnyii ǝccǝ kwette-ŋwɔ ‘Nḏi’, ǝṯɔŋweele! Nǝ kwɔthaathɔ mǝnyǝccǝŋw ‘Ila’, ǝṯɔŋwiila! Nǝ mǝnyii andaci kwɔwaaya kwiinyi ethisi ǝrri ŋeere ǝṯɔŋwsi-tǝ ǝrri.” 9 Nǝ Yǝcu liŋɽi mɔŋgwɔ neŋne ŋiɽaŋali ŋɔ; mindaŋ nɔŋw ɔrllalɔ nɔŋwɔccǝ dɔŋw kila likwaathathi-ŋwɔ, “Nyii kwǝccǝ-ŋǝsi-mǝ ŋwɔ, nyii kwiti kwinḏa ṯǝmminǝ ṯeere ṯirɔŋw ḏuṯ, wala kinnǝ ki Israa-iil-na!” 10 Mǝ lizi kila lɔɔsarsi aaɽitha ki-dɔɔnɔ kwǝthi ḏobiṯ tǝ, nǝr kaṯṯasi khaḏaama kuuŋun kimǝ saawi.
Yǝcu mɔŋgwɔ miithici kwayɔ kwir kweethel tiɽiŋǝyin.
11 Mǝ ŋɔrpɔ-ŋgwa oro tǝ, nǝ Yǝcu ele ki-mǝḏiinǝ-nǝ kwǝni Naayiin, nǝreele ṯalaamiiz-thi ṯuuŋwun nǝ dɔŋw lɔppa tok. 12 Nǝ mɔŋw iilici lɔbaaba keṯṯok lǝthi mǝḏiinǝ nǝr kadrithi lizi-li lappa kwɔɔrɔ kwaayɔ, kwir tɔr tɔtɔpɔt ki-lǝnyin, nǝ kwaaw rɔɔthanni kweethel tok, nǝ dɔŋw lɔppa lǝthi mǝḏiinǝ iila ŋundu-gi. 13 Mǝ Kweeleny ese ŋunduŋw, nǝ ŋimɽi yatha duŋgwun, mindaŋ nɔŋwɔccǝŋw, “Ǝṯaara mac.” 14 E-ta nɔŋw dɔŋgwatha keṯṯok, nɔŋw mɔmmi ŋwɔmbanyɔ ŋwappar-ŋi, mindaŋ nǝ kila lappa nǝr rilli. Nǝ Yǝcu ǝccǝŋw, “Taamal nyii kwǝccǝŋǝ-mǝ-ŋwɔ diiɽu!” 15 Nǝ kwɔr kwayɔ diiɽi, mindaŋ nɔŋwaari ibṯǝḏi ethi andasi, e-ta nǝ Yǝcu aɽicci taamali lǝnyin.
16 Nǝsi ŋitheny urǝnni-nǝ deddep, mindaŋ nǝr nii Allah-na. Nǝraarɔŋw, “Kwiɽii kwɔppa kwɔmǝ ruuthǝ dǝŋgǝr-nǝ! Allah wɔmǝ iila ethi kilǝthi lizi luuŋwun!” 17 Nǝ khabar kǝni Yǝcu faathitha bǝlǝḏǝ naana tatap, nǝ ǝzir wa wirikanna-lɔ tok.
Yaavɔr yɔɔsasi Yuhanna kwǝni Ma@maḏaan.
(Maṯṯa 11:12-19)18 Mǝ ṯalaamiiz ṯǝthi Yuhanna andaci ŋunduŋw ŋiɽaŋali ŋǝthi kwomne ŋgwa tatap, nɔŋw ɔrnɔṯi ṯalaamiiza ṯuuŋwun ṯiɽǝn, 19 mindaŋ nɔŋwsi ɔɔsi naanɔ-gwɔ Kweeleny ethi uṯicǝlɔ ethi ǝccǝŋw, “Ŋa kwir kwaarirgi-ŋw kwinḏi ethiila, alla kwǝnyii ǝkkici kwir ter kizǝn?”
20 Mǝr iila naanɔ-gwɔ Yǝcu, nǝrǝccǝŋw, “Yuhanna kwǝni Ma@maḏaan kwɔɔsa-nyji ethi uṯici ŋaaŋwɔ-lɔ; ŋa kwɔrɔ ŋgwa kwanḏisar-gi kwaarir-giŋw kwinḏi ethiila, alla kwǝnyii ǝkkici kwir ter kizǝn?” 21 Nǝ ki-lɔɔmɔr-la-ṯǝ kila nǝ Yǝcu sǝwi lizi littǝzir lǝthi kimǝthi kirna ter-ter, nǝ libii ṯurvǝ tok, nǝ lǝthi rigɽimǝ-nǝ rigii tok, nǝ nɔŋwsi ǝvrici yǝynǝ littǝzir lir lunduŋw. 22 Nɔŋw ǝŋnici lizi kila lɔɔsasi Yuhanna nɔŋwsǝccǝŋw, “Aaɽir naanɔ-gwɔ Yuhanna ǝsi andaci ŋa ŋiisa-ŋasi nǝ ŋimǝsi neŋne tok: lunduŋw limǝ iisithi, yomsoŋ yimǝ irǝrǝlɔ, nyiilǝŋ nyimǝ suuɽunni, liriny limǝ neŋne, laayɔ limǝrsi dindǝ ki-ŋiɽany-na, mindaŋ lɔwaay limǝrsi ǝccǝ bǝshirǝ Inyjiilǝ. 23 Kwɔrtanni ŋgwa kwiti kwir rɔgwor-na riɽǝ-riɽǝn mac duŋgwiny-ŋgi!”
24 Mǝ lizi kila lɔɔsasi Yuhanna aaɽi, nǝ Yǝcu aari ibṯǝḏi ethi andaci ŋwɔdɔŋw ŋiɽaŋali ŋǝni Yuhanna, nɔŋwsǝccǝŋw, “Kinaŋw meele naanɔ-gwɔ Yuhanna kǝzir wir sahraa, aatha kwigittathi-ŋa-gwɔ ethi iisa? Lɔvɔɔrɔŋi lilakkisa kɔrɔnlɔ-a? 25 Ŋaaŋa luruuthu ethiisa aatha? Kwɔɔrɔ kwuginna yirethi yimrina? Iisar-ṯi lizi lǝṯi kenne ŋinithi kaka-ṯaŋw, leṯaami ethneŋw dok-dok lindǝr lǝṯi nanni ki-lisiraay-la lǝthi limǝlik! 26 Andicar-nyii-ṯi aatha kwuruccǝŋǝ par ethiisa? Kwiɽii kwɔrɔ-a? Aw rerrem, laakin kwuthǝmthi-pǝ kǝniny kwiɽiiya-la beṯṯen. 27 Kaka nɔrɔ-ŋgwɔ kwette kwɔlɔɔthathir-gwɔ ŋiɽaŋali ŋǝni ŋundu ŋaarɔŋw, ‘Nyii kwɔŋǝ usici kwette kwiinyi kwɔŋa iŋnaci keereny-gi ethi kiṯṯici ŋaaŋwɔ ṯaay’.” 28 Nǝsi Yǝcu kiɽǝcci ŋiɽarali nɔŋwsǝccǝŋw, “Nyii kwǝccǝ-ŋǝsi-mǝ ŋwɔ, kwiti kweere mac ki-lizi-nǝ lilŋithisi laaw kwɔthǝmthi Yuhanna-ŋwɔla. Laakin ŋgwa kwir kwokwɔɽony ki Ŋeeleny-na ŋǝthi Allah nɔŋworo kwɔthǝmthi ŋunduŋw-lǝ.” 29 Nǝ lizi tatap kila liniŋnaca ŋunduŋw, nǝ lǝṯi allilla ṯɔlba tok nǝroro rerrem limǝsi iinyici naana ŋa ŋinaŋnasi Allah ŋirllalɔ, mindaŋ nǝsi Yuhanna ǝccǝ @ammiḏa. 30 Laakin nǝ Lifirriisiiyyiin-ŋǝ mɔ@allimiin-gi kwǝthi Sherii@a ere duŋgwǝci Yuhanna-ŋwɔ ethi ǝccǝ ŋunduŋwsi @ammiḏa mac, ŋwɔṯaŋw ṯǝrṯiib-thi-ṯǝ kɔthɔ, nǝr derne ethisi ǝrri ŋa ŋinaŋnathisi Allah ŋunduŋwsi ethisi ǝrri.
31 Nǝ Yǝcu aari isṯimir nɔŋwaarɔŋw, “Aatha kwir kwǝnyii-gi biɽithi lizi-nǝ lǝthi kirem-ŋwɔ? Laaɽinna aatha-ŋwɔ? 32 Laaɽinna nyɔɔrɔ nyǝṯi naana-lɔ ki-suug-nǝ, ǝṯi dɔŋw kila ɔrnɔṯi dɔŋw lithaaṯhɔ, ǝṯirsi ǝccǝŋw, ‘Nyiiŋǝ lǝricǝ-ŋǝsi muziiga kwǝthi @iris, laakin neere irṯi mac! Nǝrŋǝsi kettice rilŋa rǝthi ṯaanithisa laakin neere aari mac’. 33 Nǝ Yuhanna kwǝni Ma@maḏaan iila ǝtɔŋw mithǝ arminḏaani nǝ ǝṯɔŋweere ii kiɽicaŋi mac, naarɔŋw, ‘Kwǝthi shiiṯaana-na!’ 34 Nǝ Tɔr tǝthi Kwizigwunǝŋ iila, ǝṯɔŋw ethne, ǝṯɔŋw ii, naarɔŋw, ‘Iisar-ṯi kwɔɔrɔ ŋgwɔ! Kwiŋiirɔ nǝ ǝṯɔŋw ii kiɽicaŋi tok, nɔŋworo ŋɔmathi lizi-li kila lǝṯi allilla ṯɔlba, nǝ ligii rɔgwori tok!’ 35 Laakin ṯǝthinǝ yǝnǝ ṯǝthi Allah, ṯǝṯi ijini ethoro rerrem ki-lizi-nǝ kila tatap lǝṯi ǝmmini!”
Yǝcu a-naanɔ-ŋgwɔ ki-dɔɔnɔ kwǝthi Sim@aan kwir Kwɔfirriisii.
36 Nǝ Kwɔfirriisii kwette ǝccǝ Yǝcu-ŋwo ǝzuumǝ ethi ethne ŋundu-gi, mindaŋ nɔŋw ele ki-dɔɔnɔ kwuuŋwun e-ta nɔŋw naanalɔ ethi ethne. 37 Nǝ kwaaw kwette naani ki-mǝḏiinǝ-nǝ ŋgwa kwɔnannɔ ki-ŋikiya-na, nɔŋw neŋne ethaarɔŋw Yǝcu ŋgwana kwithne ki-dɔɔnɔ kwǝthi Kwɔfirriisii, ŋwɔṯaŋw nɔŋw iila kwappa fǝṯiilǝ kwuurǝnnǝ fithni-nǝ deddep kwaami wǝŋ. 38 Nɔŋw rilli Yǝcu-ŋw ṯɔɔɽɔthala, ki-ŋwaara-na ŋwuuŋwun kwaarɔ mindaŋ nɔŋw iglici ŋwaara ŋwal-ŋi. E-ta nɔŋw firṯici ŋwaara naana ǝwɽu-yi wuuŋwun, nɔŋwsi aagani ṯuunyu-thi, nɔŋwsi ǝnyji fithni naana. 39 Mǝsi Kwɔfirriisii ese ŋɔ, nɔŋwaari ki-ṯɔgwor-naŋw, “Ǝŋgi kwɔr-ŋgwɔ oro kwiɽii rerrem ǝŋgwɔŋw elŋe kwayɔ-ŋgwɔ kwudugɽuthu naana, ǝŋgwɔŋw elŋe tok ethaarɔŋw kwaaw-ŋgwɔ kwǝṯi ɔmi ki-ŋikiya-na!” 40 Nǝ Yǝcu andaci nɔŋwɔccǝŋw, “Sim@aan, nyii kwǝthi ŋiɽaŋali ŋǝtte ŋinaŋna-nyji ethisi andaci ŋaaŋwɔ.” Nɔŋwɔccǝŋw, “Epa Mɔ@allim andica-nyji-ṯi.” 41 Nǝ Yǝcu aari ibṯǝḏi nɔŋwɔccǝŋw, “Lɔr linaana ndǝn laava kǝmzu naanɔ-gwɔ kwɔr kwǝṯi inḏǝṯṯǝ lizi kǝmzu, nɔŋw aavi kwette gwuruushǝ ruɽi-ṯuɽi la ruɽi-ṯɔthni kwir fiḏḏa, nǝ kwɔthaathɔ nɔŋwaavi ruɽi-riɽǝn la wrii. 42 Nɔŋweere kweere mac kwǝthi ŋɔma ethi rucci ŋunduŋw, mindaŋ nɔŋwsi irṯaci kǝmsu-lɔ ndendeṯ. Kwundǝr kwǝndu kwinḏi ethi amɽi ŋunduŋw beṯṯen?” 43 Nǝ Sim@aan ǝŋnici nɔŋwɔccǝŋw, “Nyii kwaaripaŋw, kwundǝr-ŋgwa kwɔmǝŋw irṯaci kǝmsu-lɔ kuuru.” Nǝ Yǝcu ǝccǝŋw, “A kwɔvthasa.” 44 E-ta nɔŋw ɔrllatha kwayɔ naana mindaŋ nɔŋwɔccǝ Sim@aan-ŋwɔ, “A ŋgwa kwiisa kwayɔ ŋgwɔ-a? Kinaŋw nǝnḏiny ki-dɔɔnɔ kwɔɔŋa, ninyeere inḏǝthǝ ŋaaw ŋǝthi ŋwaara ŋwiinyi mac, laakin ŋundu-tǝ, nɔŋw iyici nyuŋwɔ ŋwaara naana ŋwal-ŋi ŋwuuŋwun, mindaŋ nɔŋwsi firṯici nyuŋwɔ naana ǝwɽu-yi wuuŋwun. 45 Kinaŋw mǝnyii iila ninyeere aaganni ṯuunyu-thi too, laakin ŋundu-tǝ, nɔŋw eere rilli mac ethi aaganni ŋwaara ŋwiinyi ṯuunyu-thi ṯuuŋwun kinaŋw mǝnyii ǝnḏǝ. 46 Ninyeere inḏǝthǝ ŋiila ethisi ǝnyji kinda liinyi mac, laakin ŋundu-ǝ, nɔŋw ǝnyjici nyuŋwɔ fithini ŋwaara naana 47 Ŋwɔṯaŋw ŋandaci, ṯamɽa ṯuuŋwun ṯɔppa ṯǝni-ŋwɔ, ŋikiya ŋuuŋun ŋittǝzir ŋimǝ fivrinici ŋunduŋw. Laakin ŋgwa kwɔfivricǝrsi ŋokɔɽoc, nɔŋwɔni kwǝthi ṯamɽaṯokwɔɽoc.” 48 Ŋwɔṯaŋw nǝ Yǝcu ǝccǝ kwayɔ-ŋw, “Ŋikiya ŋɔɔŋa ŋimǝŋǝ fivrinici kithaay.” 49 Nǝ lithaathɔ linaanisa ṯerbeesa keṯṯok, nǝr andasi-na nǝraarɔŋw, “Ǝyǝ kwɔrɔ pise-ŋgwɔ mindaŋ ǝŋgwɔŋw-mǝ fivri ŋikiyaŋi?” 50 Laakin nǝ Yǝcu ǝccǝ kwayɔ-ŋw, “Ṯǝmminǝ ṯɔɔŋwa ṯimǝŋǝ kilǝthi; nḏi kǝniny kwaami naana.”