aza 1
ṯagna
1 nyi kweni buuluz, kwir kafur Yecu Kwruztu ŋgi na Allah yi wir Papa, wumɔdiɽa ŋunduŋwu ŋiɽany-na—ŋiti ŋiri ŋeḏi lizi mac ya. eḏorɔ ŋeḏi kwizigwunaŋ tɔk mac— 2 nyiŋa, lieŋgeri li tatap linani nyi li, lagna lizi leḏi yaniiza yinani galaaṯya.
3 eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa, na Kweleny kweri kweni Yecu Kwruztu; 4 kwunderṯa kwinḏeḏenyji rɔgwɽɔ ruŋwun ki ŋwobi ŋweḏi ŋikya ŋeri eḏi kileḏi nyuŋwuzi ki ṯurmun-na kḏu tiki, ṯugwor ṯi ṯeḏi Allah weri wir Papa kweri. 5 eḏi ŋiniṯ nani nanuŋw gwu dɔk dɔk. emba.
ṯuronyina ṯeḏi buuluz ki lizi lir likwruztyan leḏi galaatyaŋw
6 nyi ŋgwu kwuliŋɽi eḏinḏa ŋaŋwuzi limorlaci ŋunduŋwu ŋwudɔŋw kwornuṯiŋazi ṯimeca ṯi ṯeḏi ŋimɽi ŋeḏi Kwruztu, eḏorlaḏa ŋiɽaŋali nana ŋeḏi injiil wir ter. 7 na ŋiɽaŋal ŋizaw ŋir injiil ere nani ŋere ŋir ter mac, lakin ner nani lɔkwɔ leṯiŋazi urreḏa-na; eṯir naŋni eḏurli injiil weḏi Kwruztu. 8 lakin, mer ŋazi andaci nyiŋa, ya maleyka kweḏi kilerena, ŋiɽaŋali ŋeni injiil wir ter ki ŋiɽaŋal la ŋa ŋandicaŋazi, eḏi ṯɔllɔḏina nani duŋgwun-na hukm yi. 9 kaka andicaŋazi gwu kerreny, ta ŋazi aɽicalu kwokwony kire-kirem ŋgwu, ma kwizi kwere andazi ŋiɽaŋali ŋeni injiil wir ter ki ŋiɽaŋal la ŋa ŋafaŋazi, a ṯɔllɔḏina nani duŋgwun-na hukm yi.
10 nyi ŋgwu kwunaŋna kire-kirem ŋgwu eḏəgini ṯiɽinana nani gwu lizi a, ya nani gwu Allah? ya nyi ŋgwu kwuṯece eḏəmi lizi-na? eŋgi nyi kinna əmi lizi-na, eŋgi nyi ere orɔ kaḏaam keḏi Kwruztu mac.
ŋiɽaŋal ŋizaw ŋir injiil weḏi buuluz ŋinḏi nani gwu Kwruztu, ŋiti ŋinḏi nani gwu lizi mac
11 ṯaŋwu, nyi kwecaŋazi ma ŋwa, lieŋgeri, ŋiɽaŋal ŋizaw ŋir injiil ŋimenyji andazi ŋiti ŋinḏi nani gwu kwizigwunaŋ mac, 12 kaka iti afanyji gwu nani gwu kwizigwunaŋ mac, ya eḏi zi kwizi kwere ilŋiiḏini nyuŋwu tɔk mac, lakin Yecu Kwruztu kwiri kwuruwecenyji lu. 13 kaka ma gwu neŋne ŋiɽaŋali ŋeḏi ŋeḏre ŋinyi ŋeḏi kerrenyŋw ki ḏiin-na ṯeḏi yahuuḏ, menyi gwu owɽi kaniiza yey keḏi Allah beṯe-beṯen, nenyi ṯeci eḏi kiyaza lu tɔk; 14 na ki ḏiin-na ṯeḏi yahuuḏ nenyji ṯamḏu luru libiɽḏinyi li leḏi lizi linyi, ur nyi gwu zurum beṯe-beṯen kweḏi əḏi weḏi papaŋa linyi. 15 lakin na Allah, wumenyi rillelu ter iti mer nyi gwu ilŋiiḏa kinna mac, ornuṯi nyuŋwu ṯimeca ṯi ṯuŋwun ṯeḏi ŋimɽi. 16 nuŋw amina eḏi ruwenici nyuŋwu Toru lu tuŋwun mindaŋ menyji andazi ki lizi-na lir umam. nenyere mumri ŋiɽaŋali la kwizi gi kwere mac, 17 nenyi ere ṯaŋi urzaliim tɔk mac nanir gwu kla lir yafur yeḏi Kwruztu kerreny duŋgwinyi la, lakin nenyi ilana kezir weni arabiya; na kwaḏan nenyi aɽiḏa dimizga.
18 nenyi nani mindaŋ ma yiḏla ere ṯɔɽɔl, nenyi ṯaŋi urzaliim eḏi raŋḏa zafaŋw, nenyi gi nani ŋwamin wri-ṯuḏni. 19 lakin nenyji ere eze lere liḏaḏu lir yafur yeḏi Kwruztu mac, iili yaguub, kwir eŋgen kweḏi Kweleny-ŋa. 20 (ŋu ŋulucaŋazi ŋiri rerem, ki yey-na yeḏi Allah nenyere kəki ŋəluŋi mac.) 21 kwaḏan kwɔkwɔ nenyele kezir weḏi zuriiyaŋw, na weḏi kiliikyaŋw tɔk. 22 ner nyi ere elŋe kiyeyna kinna mac leḏi yaniiza yeḏi Kwruztu yinani yahuḏiiya; 23 ner zi neŋne domony ŋaruŋw, ŋgwa kweṯinyji owɽi yey kerreny, ŋgwana kire-kirem kweṯandazi ŋiɽaŋali ŋeḏi ṯəmna, kḏa ṯeṯuŋw zi ṯi naŋni eḏi kirazalu. 24 ner ortaḏa Allah beṯen ŋiɽaŋal ŋi ŋeni nyi.
1 Nyii kwɔrɔ kwǝni Bɔɔlɔs kwir kaav ɔr, ŋiti ŋinḏi ŋizigwunǝŋ-ŋi mac, wala ǝthiila ṯǝrṯiib-thi ṯǝthi ŋizigwunǝŋ, laakin nǝr iila Yǝcu Kwɔrɔstɔ-ŋgi nǝ Allah-yi wir Papa, wɔmǝ diiɽǝ ŋunduŋw ki-ŋiɽany-na. 2 Liyǝŋgǝri tatap linaanɔ kinɔŋw, lɔɽɔmaṯṯiny-li tatap ki-ṯaaginna-na, ethi aaganni yǝniisǝ yǝthi Ghalaaṯiiyya-ŋw:
3 Ethi-ŋǝsi Allah wir Papa kwǝri, nǝ Kweeleny kwǝri kwǝni Yǝcu Kwɔrɔstɔ inḏǝthǝ ŋaaŋwɔsi ne@ma-ŋwɔsi ŋiiɽǝnnǝ-ŋi. 4 Yǝcu Kwɔrɔstɔ-ṯǝ ŋgwa kwɔmǝ-nyji inḏǝthǝ rogɽo ruuŋwun ki-lɔɔbi lǝthi ŋikiya ŋǝri, ethi kilǝthi nyuŋwsi ki-ṯurmun-nǝ ṯǝthi kire-kirem-ŋgwɔŋw ṯigii, kaka niinyicǝ-ŋgwɔ ŋiɽaŋali naana ŋvthi ṯɔgwor ṯǝthi Allah wǝri wir Papa kwǝri. 5 Ethi ŋinith ŋǝṯi nannatha lur nanni Allah-yi! Aamiin.
Inyjiil wir wɔtɔpɔt.
6 Nyii-ŋgwɔ kwɔliŋɽalɔ buruc ŋiɽaŋal-ŋi ŋaalɔ! Mǝgwɔ ɔrlacci ŋgwa ŋwɔdoŋw fita-fittak kwɔrnɔṯɔ-ŋǝsi ne@ma-gi kwǝthi Kwɔrɔstɔ, mindaŋ ethi mithǝ Inyjiilǝ wir ter. 7 Rerrem, Inyjiil witi weere wir ter kwokwony mac. Laakin ŋandisa-nyji ŋɔ kaka ninaanir-gwɔ lokwo lǝṯi-ŋǝsi urrǝthǝ-nǝ, mindaŋ ǝṯir ṯǝccici ethi uppi Inyjiilǝ-nǝ wǝthi Kwɔrɔstɔ. 8 Laakin mǝnyoro kinnǝ nyiiŋǝ alla meleka kwǝthi ki-leere-naŋw kwinḏi ethi ǝccǝ ŋaaŋwɔsi bǝshira Inyjiilǝ wir ter, witi wir kaka wǝccǝr-ŋǝsi-yi bǝshirǝ kerreny mac tǝ, ethɔŋw ollonne. 9 Kaka nandicar-ŋasi-gwɔ kerreny, ŋǝsi aaɽi ŋǝsi andaci kwokwony. Mǝŋǝsi kweere ǝccǝ bǝshirǝ Inyjiilǝ wir ter, ki-lɔɔbi lǝthi wa wɔmǝ aavi kerreny tuk, ethɔŋw ollonne!
10 Nyii kwǝni kwɔṯǝccicǝ ethi ǝgini ṯiiɽǝ-nǝ ṯǝthi lizii alla ṯǝthi Allah? Alla nyii-ŋgwɔ kwɔṯǝccicǝ ethi ǝmi lizi-nǝ? Mǝnyii-tǝ ǝni kwǝṯi ǝmi lizi-nǝ tǝ, e-ta nyeere oro khaḏaam kǝthi Kwɔrɔstɔ ḏuṯ.
11 Nyii kwǝccǝ-ŋǝsi-mǝ ŋwɔ liyǝŋgǝri, Inyjiil wa waariny-yi bǝshirǝ, wǝthi ŋizigwunǝŋ witi wir mac. 12 Kaka niti naavany-gwɔ naanɔ-gwɔ kwizi kweere mac, wala ethi kweere ǝccǝ nyuŋwɔ @allima. Laakin nǝ Yǝcu Kwɔrɔstɔ oro rogɽo-ri ruuŋwun kwɔrwǝccǝnylɔ.
13 Ŋimǝsi neŋne ŋǝthi ŋimiitha ŋiinyi ŋǝthi kerreny-ŋwɔ, ŋa ŋinaaniny-ŋi ki-ḏiin-nǝ ṯǝthi Yahuuḏ, ŋǝṯiny-ŋi ǝwɽi kǝniisǝ yǝy-lɔ kǝthi Allah ŋuduri-ŋuduri, ǝṯiny-gwɔ ṯǝccici ethi kiirasalɔ ker-ker. 14 Nǝ ki-ḏiin-nǝ ṯǝthi Yahuuḏ nǝnyji ṯamthɔ-la luuru liriny-li ŋɔmathi ki-lizi-nǝ liinyi, nǝ ǝṯi-nyǝthi sɔɔrɔma beṯ-beṯṯen kwǝthi ǝthi wǝthi papa-ŋa lǝri.
15 Laakin nǝ Allah alla nyuŋw-na ne@ma-gi kwuuŋwun, kinaŋw kerreny tuk, niti nilŋithir-nyii-gwɔ kinnǝni mac, nɔŋw ɔrnɔṯi nyuŋwɔ ethi ǝkkici ŋunduŋw ŋothɽor. Nǝ nɔŋw kittatha, 16 ethi ruwǝcci nyuŋwɔ Tɔɔrɔ-lɔ tuuŋwun, mindaŋ minyǝthi ŋɔma ethi-ri aari bǝshirǝ ki Umam-na. Ninyeere ele naanɔ-gwɔ kwizi kweere mac ethi ṯiɽitha ŋunduŋw. 17 Wala ethi ṯaaŋi Urshaliim ethisi iisa kila lir yaavɔr kerreny duŋgwiny-lǝ. Laakin ninyeele fittak ki-bǝlǝḏ kwǝthi Nyǝthgwu, e-ta nǝnyii-mǝ aaɽitha Ḏimashga.
18 Mǝ yithlǝ ṯoɽol ere tǝ, nǝnyii ṯaaŋi Urshaliim ethi raaŋitha Bɔṯrɔs-ŋwɔ, mindaŋ nǝny-gi naana ŋwaamin wrii-ṯɔthni. 19 Ninyeere iisa kaavɔra keere kir ter kwokwony mac illi Ya@guub ṯɔɽɔk kwir eŋgen kwǝthi Kweeleny-ŋa.
20 Ŋuluuthu-nyji ŋɔ ŋir rerrem, kiyǝnǝ yǝthi Allah ninyeere kǝkki ŋǝluŋi mac! 21 E-ta ninyeele ki-bǝlǝḏ kwǝthi Suuriiyyǝ-ŋw, nǝ kwǝthi Kiiliikiiyyǝ-ŋw tok. 22 Laakin nǝnyii-tǝ ere elŋethine ŋǝmmǝŋ kinnǝni kiyǝnǝ yǝthi yǝniisǝ yǝthi Kwɔrɔstɔ mac, yinaanɔ Yahuuḏiiyyǝ. 23 Laakin nǝrsi neŋne ṯɔɽɔk ŋǝniŋw, “Ŋgwa kwǝṯi-nyji ǝwɽi yǝy-lɔ, ŋgwana kwǝṯi aari bǝshirǝ kire-kirem-ŋgwɔ ṯǝmminǝ-thi ṯǝ kitha ṯinaŋnaŋw ethi kiirasalɔ.” 24 Mindaŋ nǝr nii Allah-na beṯṯen ŋiɽaŋal-ŋi ŋǝni ŋiinyi.