aza 1
ṯagna
1 nyi kweni buuluz, kwir kafur keḏi Kwruztu kweni Yecu, ṯugwor ṯi ṯeḏi Allah, na timuṯaawuz kwir eŋgeri kweri, 2 nyiŋa lagnaŋazi leni ŋaŋa lirlinelu ter eḏi Kwruztu-na, lir ŋiaŋga ki ṯəmna-na leḏi kuluuziŋw. eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri.
ṯortaḏa na lara ki yiriny
3 nyiŋa leṯeca Allah zukran ŋwamin tatap, wir Papa kweḏi Kweleny kweri kweni Yecu Kwruztu, mer ŋazi erici ki yiriny, 4 kaka menyji gwu neŋne ŋeḏi ṯəmna ṯalu, ṯeḏi ŋa eḏi Kwruztu-na kweni Yecu, na ŋeḏi ṯamɽa ṯalu, ṯeṯi ṯi amɽi lizi tatap lirlinelu ter eḏi Kwruztu-na. 5 ŋiɽaŋal ŋu ŋir ŋiɽen ŋinḏi nani gwu ṯəkiza ṯalu kizen ṯownicar ŋazi kilerena—ṯilŋiiḏi ŋa ma gwu ŋiɽaŋal ŋirlalu ŋir injiil ila nani ŋa gwu ṯayṯi. 6 kaka ṯaŋwu tɔk, ŋimila ki lizi-na ṯurmun nana tatap, na eṯir gwu duŋgwuŋgwaḏa, na eṯir gwu riɽi nyoru kaka daŋgal-na, ki lomur limezi li neŋne ŋeḏi ṯimeca ṯeḏi ŋimɽi ŋeḏi Allah mindaŋ mezelŋece ŋir rerem. 7 ŋinderṯa ŋilŋiiḏi ŋazi nani gwu abufraz, kweṯi nyi li oɽmaṯi ki ŋɔḏɽor-na ŋeḏi Kwruztu, kwamɽanyji-na beṯen, kwir kaḏaam kirlalu keḏi Kwruztu keni keri, 8 nuŋw orɔ kwumenyji ilŋiiḏini ŋeḏi ṯamɽa ṯalu eḏi Ṯigɽim-na tirlinelu ter.
9 ŋwu ṯaŋwu, nyiŋa tɔk menyji neŋne, eṯinyere kiraḏi mac eḏerici ŋaŋwuzi ki yiriny, eti nyi uṯizi Allah lu mindaŋ eḏi ma afi nanuŋw gwu ṯeḏinayeyna, na ṯilŋiiḏina tatap ṯeḏi Tigɽim eḏi zi ma elŋe ŋeḏi ṯugwor ṯuŋwun ŋama-ŋamaŋ; 10 mindaŋ eḏi ŋeḏre ŋalu ofḏanizi Kwelenyi eḏəmi ŋunduŋwu ŋiɽaŋal ŋi ndendeṯ, eḏami riɽi nyoruŋw ki ŋɔḏɽor-na tatap ŋizaw, mindaŋ ma ami elŋe Allah ŋwu ŋama-ŋamaŋ. 11 nyiŋa leṯi ŋazi erici ki yiriny mindaŋ eḏi ma rugwor ralu ferle teter ŋuma ŋi tatap, ŋiɽaŋal ŋi ŋeḏi ŋuma ŋiniṯ ŋi ŋuŋun ŋiṯemḏizi la, eḏi zi ŋi indinyani nana tatap ŋeṯila, na eḏi miḏa rugwori teter ṯinyiŋla ṯi-na; 12 na eḏi ma eca Papaŋw zukran kwumenyji ofḏanizi eḏoɽmaṯi duŋw ki ŋoru-na ŋeḏi kla lirlinelu ter ki fori-na. 13 kwunderṯa kwumenyjalla ki ŋuway-na ŋeḏi kirim, na kwumenyji ireḏizi ki ŋeleny-na ŋeḏi Tor tuŋwun tamɽa ŋwi beṯe-beṯen. 14 na duŋgwun-na a kweḏi ri ṯalliḏiza, tir ṯififrina ṯeḏi ŋikya ŋeri.
Kwruztu kwiri ṯaŋ, na ŋɔḏɽor ŋuŋun
15 na Kwruztu orɔ kwaɽina Allah dap dap witi weṯijini mac, nuŋw orɔ tor tir nda eḏi kwɔmne la tatap kwudaɽmina; 16 na ŋundu ŋgi na gwu kwɔmne tatap kitini, kilerena na ki ṯurmun-na tɔk, kweṯijini na kwiti kweṯijine mac, ur gwu ŋeleny, ya hakwuuma, ya kla leḏi ŋuma zulṯa gi; na kwɔmne tatap kwumɔketene ŋundu ŋgi, na kwumɔketene eḏorɔ kwuŋwun. 17 na ŋuridu, nuŋw orɔ kwunanni kerreny eḏi kwɔmne la ndendeṯ, na duŋgwun-na eti gwu kwɔmne tatap miḏini duŋw. 18 kwunderṯa kwir nda leḏi aŋna wir kaniiza, kwunde kwir kwiŋna, kwunde kwir kwiŋnicezi tatap kwumɔdiɽi ŋiɽany-na, mindaŋ eḏi ma orɔ ŋundu kwuṯemḏelu kwɔmne-na ndendeṯ. 19 na duŋgwun-na eti gwu rɔgwɽɔ reḏi Allah ami nanni-na ŋwu minmin, 20 na ŋundu ŋgi eḏi gi əmiḏi Allah-na kwɔmne gi ndendeṯ kwunani ki ṯurmun-na ya kwunani kilerena, afaŋw gwu ŋiɽena irezuŋw gwu ŋina lu ŋuŋun ki ŋwuɽi la ŋwuɽmɔḏalu.
21 na ŋaŋa, ur ŋa gwu kerreny liruca Allah-na tuk, lir ṯuwən ṯuŋwun ṯireca-na ṯalu yey lu tɔk, leṯizerri ŋeni ŋiki, 22 Allah wumɔŋazi əmiḏina kirem ŋiɽany ŋi ŋeḏi Kwruztu, aŋna yi wuŋwun wir ŋizigwunaŋ, mindaŋ eḏi kete ŋaŋwuzi ki yey-na yuŋwun lirlinelu ter, liti leḏi tiɽaŋali-na tere tiki ḏuṯ, na liti leḏi kaṯiya kere tɔk mac. 23 lakin eṯi miḏini teter ki ṯəmna-na ṯalu, lirli titir, liti lari lu tiŋgil tiŋgil mac eḏorlaci ṯəkiza kizen ŋwudɔŋw ṯeḏi injiil wa wumɔ neŋne, na wumer andazi ki lizi-na tatap likitina; na nyi, kweni buuluz, nenyorɔ kafur keḏi injiil wu.
buuluz kwoɽmaṯir Kwruztu gi ŋɔḏɽor-na
24 nenyamina eḏi rerinici ŋaŋwuzi, na kaŋna-na winyi nyi ŋgwu kwuṯimazi ṯurfa ṯeḏi Kwruztu, ŋiɽaŋal ŋi ŋeni aŋna wuŋwun wir kaniiza; 25 ŋinderṯa ŋimenyi ŋi orɔ kafur kuŋun, ŋiɽaŋal ŋi ŋeḏi ŋɔḏɽor ŋimenyji Allah inḏeḏa ŋeni ŋalu, eḏi ruwezi ŋiɽaŋali lu ŋuŋun titir; 26 ŋinderṯa ŋulucineḏizi kerreny tuk ki ŋelne-na ŋeḏi lizi luru, lakin ŋimɔ liŋeḏine kirem ki lizi-na luŋwun lirlinelu ter eḏi Kwruztu-na. 27 ner əmi Allah-na eḏizilŋiiḏini kla ŋurṯua ŋeḏi ŋiniṯ ŋir ṯaŋ, ŋir ŋupa ŋiminni ki ŋiɽaŋal-na ŋulucina, ŋinḏi eḏi ruwenizelu ki lizi-na ndendeṯ. na ŋiɽaŋal ŋulucina ŋiri ŋu, Kwruztu kwunanni ŋundu daŋgal-na lere lere. kwunderṯa kwir ṯəkiza talu kizen eḏi gi afi ŋiniṯi. 28 kwunderṯa kweṯi nyi gi andindazi; eṯi nyi gwu ireci lizi tatap, na eṯi nyi gwu ilŋiiḏini lizi tatap ṯeḏina ṯi yeyna tatap mindaŋ er ma kete lizi tatap lere lere ki yey-na yuŋwun lir minmin eḏi Kwruztu-na. 29 ŋinderṯa ŋu ŋeṯi nyi ŋi akiki ŋɔḏɽor ŋwunda ŋwunda, deŋṯinenyi gwu ŋuma ŋi tatap ŋiṯemḏelu, ŋeṯuŋw zi akiki duŋgwinyi-na.
Ṯaaginna
1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu, ṯɔgwor-thi ṯǝthi Allah, nǝ Ṯiimɔɔthaaws kwir eŋgǝri kwǝri, 2 nyiiŋǝ laaginna-ŋǝsi ŋaaŋa kila lirllinǝlɔ ter nǝ lirllalɔ ethi Kwɔrɔstɔ-na, lir ŋiyaŋga ki-ṯǝmminǝ-nǝ, ŋaaŋa lǝthi Kwuluusi-ŋw:
Ethi ne@ma nanni daŋgal-na nǝ ŋiiɽǝnnǝ rǝthi Allah wir Papa kwǝri.
Ṯaara kiyiiriny nǝ shukran.
3 Nyiiŋǝ lǝṯi ǝccǝ Allah shukran ŋwɔɔmɔri tatap, wir Papa kwǝthi Kweeleny kwǝri kwǝni Yǝcu Kwɔrɔstɔ, mǝnyii ǝrici ŋaaŋwɔsi kiyiiriny. 4 Kaka mǝnyii-gwɔ neŋne ŋiɽaŋali ŋǝthi ṯǝmminǝ ṯaalɔ ethi Kwɔrɔstɔ-na kwǝni Yǝcu, nǝ ŋǝthi ṯamɽa ṯaalɔ ṯamɽaŋa-thi lizi tatap lirllinǝlɔ ter. 5 Kinaŋw mǝ ŋiɽaŋal ŋir rerrem ŋir ŋiɽaŋal ŋǝthi Inyjiil ŋinḏi kerreny naaniŋa-gwɔ, nǝsi neŋne ŋǝthi ṯigittatha. Ŋwɔṯaŋw nǝ ṯǝmminǝ-ŋǝ ṯamɽa-thi ṯaalɔ ǝccini ki-ṯigittatha-la ṯaalɔ, kithala ṯinanyja-ŋǝsi-lɔ ki-leere-na. 6 Nǝ Inyjiil aava barka nɔŋw fǝthi ṯurmunǝ naana tatap, kaka-ṯǝ kinayw tok nǝrrinǝr daŋgal-na, ki-laamin-la-ṯǝ kila limǝ-li neŋne ne@ma kwǝthi Allah, mindaŋ nǝ elŋe ethaarɔŋw kwir rerrem. 7 Ŋǝni ŋiniŋna-ŋǝsi naani-gwɔ Abafraas kwir khaḏaam kamɽa-nyii kǝṯiny-li rɔmmɔthi. Kwir kwothɽor kwette kwirllalɔ kwǝthi kwɔrɔstɔ kwǝṯi mɔrthathi ki-lɔɔbi lǝri. 8 Kwɔmǝ-nyji andaci ŋiɽaŋali rǝthi ṯamɽa kitha ṯimǝ-ŋǝsi Ṯigɽim inḏǝthǝ.
9 Ŋwɔṯaŋw mǝnyii neŋne ŋiɽaŋali ŋɔ tǝ, ninyeere kiirathi mac ethi ǝrici ŋaaŋwɔsi kiyiiriny. Ǝṯi-nyii uṯici Allah-lɔ ethi urǝzi ŋaaŋwɔsi-na deddep ṯilŋiṯṯa-thi ṯǝthi ṯɔgwor ṯuuŋwun, nǝ ṯǝthinǝ-thi yǝnǝ tatap, nǝ elŋe-ŋgi tok kwǝthi Ṯigɽim kwǝṯɔŋw inḏǝthǝ lizi. 10 Mindaŋ maami eleŋw ki-ŋimiitha-na ŋaalɔ, kaka ŋǝṯisi Kweeleny naŋni, e-ta ethisi-mǝ ǝrri ŋwɔɔmɔri tatap ŋǝṯǝmi ŋunduŋw-nǝ. Mindaŋ mǝ ŋimiitha ŋaalɔ ǝginǝ ŋoṯhɽor ŋisaaw tatap ŋirna ter-ter, mindaŋ mǝ dɔŋgwɔ-ŋgwatha ethelŋe Allah. 11 Firllir tetter ŋɔma-ŋi tataa, nǝ ŋiɽaŋal-ŋi ŋǝthi ŋɔma ŋɔppa ŋǝthi ŋinith ŋuuŋun, ethisi indinyanni naana limthi rɔgwori ṯinyiŋla-thina. 12 Nǝ ethi ǝccǝ Papa-ŋwɔ shukran kwɔmǝ-ŋǝsi ruusi lɔvthanna ethi ɔɽɔmaṯṯi dɔŋw kwomne-na ŋgwa kwinḏi kila lirllinǝlɔ ter ethaavi ki-ŋeeleny-na ŋǝthi fɔɔri. 13 Kaka mɔŋgwɔ kilǝthi nyuŋwsi ki-ŋɔma-na ŋǝthi kirim, mindaŋ nɔŋw mɔltha nyuŋwsi lisaaw ki-ŋeeleny-na ŋǝthi Tɔr tuuŋwun tamɽaŋw. 14 Nǝ duŋgwun-nǝ tǝ, nǝr kǝdinni ṯifivrinnǝ-thi ki-ŋikiya-na ŋǝri.
Kwɔrɔstɔ kwir-ṯaŋ, nǝ aatha kwɔmǝŋw ǝrri.
15 Kwɔrɔstɔ kwir suurǝ kwǝthi Allah, witi wǝṯi iijini mac. Nɔŋworo Tɔr tir nda ethi kwomne-la tatap kwɔdaɽiminna. 16 Ŋundu-ŋgi na Allah daɽimatha kwomne tatap, ki-leere-na nǝ kwurǝyulu, kwiijinǝ nǝ kwiti kwiijinǝ mac, ɔrɔ-gwɔ ŋeeleny alla hakwɔɔma alla kila lǝthi ŋɔma sɔlṯa-gi, nǝ kwomne tatap ǝni kwɔgittina ŋundu-ŋgi ethoro kwuuŋwun. 17 Nɔŋw nanni kerreny tuk ethi kwomne-la tatap, nǝ ṯǝŋw nǝgi kwomne tatap mithinni dɔŋw. 18 Nɔŋworo nda lǝthi aŋna wir kǝniisǝ; nɔŋworo kwir kwon-kwon, kwidiiɽu ki-ŋiɽany-na ker-kerreny, mindaŋ mɔŋwɔthi ŋundu kwɔtɔpɔt ǝzirnǝ ker-kerreny kwomne-la tatap. 19 Kaka nɔrɔr-gwɔ ŋǝthi ṯɔgwor ṯǝthi Allah, nǝ Tɔr ǝthi ṯobii@a ṯir min-min ṯǝthi Allah. 20 Nǝ ŋundu-ŋgi nǝ Allah ǝmmini ethi ammithi-na ṯurmun-thi tatap. Mindaŋ nɔŋwaava ŋiiɽǝnnǝ ŋiɽany-ŋi ŋǝthi Tɔr tuuŋwun ki-ŋwuuɽi-lǝ, mindaŋ nɔŋw mɔlthanni kwomne naana tatap, kinɔŋw kwurǝyulu alla ki-leere-na.
21 Nǝ ŋaaŋa tǝ, kerreny nǝ rucci Allah-na tuk, nɔrɔ ṯuwǝn ṯuuŋwun ŋiɽaŋal-ŋi ŋa ŋigii ŋǝṯisi ǝrri, nǝ ŋǝṯi-ŋi urtutuninǝ. 22 Laakin kirem tǝ, nǝ Allah ammithina ŋaaŋa-li ŋiɽaŋal-ŋi ŋǝthi ŋiɽany ŋǝthi aŋna nǝ ŋǝthi Tɔr tuuŋwun, mindaŋ mɔŋw rilli ŋaaŋwɔsi-lɔ ter, ethi suuɽi ŋaaŋwɔsi liira lɔɔma-na kiyǝnǝ yuuŋwun. 23 Ǝnḏir-lɔ tetter ki-ṯǝmminǝ-nǝ, liti laaralɔ tiŋgil-tiŋgil mac, wala ethi ɔrlacci ṯigittatha ŋwɔḏɔŋw kitha ṯimǝ ǝginǝ ṯiniŋna-thi ṯǝthi Inyjiil. Nǝ wumǝ andanni ki-lizi-nǝ tatap ligittina kwurǝyulu. Nǝnyii-ṯoro nyii kwǝni Bɔɔlɔs kwir khaḏaam kǝthi Inyjiil wɔ.
Ŋothɽor ŋǝthi Bɔɔlɔs kǝniisǝ-nǝ.
24 Nǝ kire-kirem-ŋgwɔ tǝ, nǝnyii nyeŋlena ethi rǝrinnici ŋaaŋwɔsi, nǝ ŋiɽaŋal-ŋi ŋǝthi ṯiraara ṯǝthi aŋna wiinyi-tǝ, nyji ṯimmasi ŋa kworo ŋithathina ŋǝthi ṯurvǝ ṯǝthi Kwɔrɔstɔ, ki-lɔɔbi lǝthi aŋna wuuŋwun wir kǝniisǝ. 25 Na nǝnyii Allah ruusi khaḏaam kǝthi kǝniisǝ, nɔŋworo kwinḏǝ-thǝnyii ŋothɽor ŋɔ ethisi ǝrri ŋǝni faayitha kwaalɔ. Ŋir ŋothɽor ŋǝthi-ŋi andasi ŋiɽaŋali ŋisaaw, 26 ŋa ŋir ŋejmeth ŋuluccǝsi Ailah kithlǝ tuk, nǝ ŋwɔɔmɔri ŋwɔmǝ ṯamthɔ tok, laakin ŋimǝ-ŋwsi ruwǝccǝ lizi-lɔ lirllinǝlɔ ter. 27 Nǝroro ŋǝthi ṯɔgwor ṯǝthi Allah ethi ilŋithini lizi luuŋwun ŋejmethi, aw ŋejmethi-ŋa ŋɔrṯɔ-ŋi ŋir ŋinith ŋawicca-ŋwsi lizi tatap. E-ta nǝ ŋejmeth oro ŋɔ ŋǝniŋw: Kwɔrɔstɔ ŋgwa daŋgal-na, ŋǝniŋw ŋaaŋa linḏi ethi ɔɽɔmaṯṯi ki-thigittathisa-na ṯǝthi ŋinith ŋǝthi Allah. 28 Ŋwɔṯaŋw mindaŋ ǝṯi-nyii-mǝ ǝccǝ lizi tatap bǝshirǝ Kwɔrɔstɔ-ŋgi, ǝṯiny-ŋi ulici lizi tatap, nǝ ǝṯi-nyji ǝccǝ @allima tatap ṯǝthinǝ yǝnǝ tatap, mindaŋ ethoro tatap min-min ethi Kwɔrɔstɔ-na. 29 Nǝrṯoro ŋɔ ŋǝṯiny-ŋi bee ṯurvǝ biɽe-biɽeṯ ŋɔma-ŋi ŋuuŋun ŋǝṯi akkɔ ŋothɽor daŋgwiny-nǝ ŋɔmmaŋi.