aza 2
ṯiroca ṯeḏi buuluz ṯeḏi yafur ŋuŋun
1 kaka ilŋiiḏi ŋazi gwu, lieŋgeri, eḏaruŋw ṯiraŋḏa ṯeri daŋgal-na titi ṯiira fayḏa-na mac. 2 ner orɔ ŋimenyi gwu rərineḏa kerreny, ner nyji owɽi yey fiilibbi, kaka ilŋiiḏi ŋazi gwu rac; lakin nyiŋa limɔ firlaḏa la eḏi Allah-na weri eḏandaci ŋaŋwuzi ŋiɽaŋali ŋizaw ŋeḏi Allah ki yey-na yeḏi kla limenyji urreḏa-na beṯen. 3 na ṯoraca ṯeri titi ṯiruḏi nani gwu ŋəluŋ mac, ya nani gwu rugwor rir-na riɽen mac, nuŋw ere orɔ ṯikeɽinjelu ṯere ḏuṯ. 4 lakin kaka menyji gwu Allah ṯecici nuŋw ruzi lofḏana eḏandindaci lizi ŋiɽaŋali ŋizaw ŋir injiil, ṯaŋwu eṯinyji ma andazi, ŋiti ŋiri eḏəmi lizi-na mac lakin eḏəmi Allah-na, weṯiṯeci rugwori reri. 5 ner nyji ere inḏa mac landindiza kandiza eḏi zi iɽi-na lere, kaka ilŋiicaŋazi gwu rac, ya eḏi kwuɽbeḏa ṯigiiriŋi ṯere, kaka unḏizenyji gwu Allah ki. 6 nenyere naŋni ṯiniiya-na nani gwu lizi mac, ya daŋgal-na, ya nani gwu lir ter, eŋginyji gwu keni eḏi zi zulṯa ur nyi gwu yafur yeḏi Kwruztu; 7 lakin ner ŋazi ṯici nana jiɽe-jiɽep, kaka kwayu kweṯiɽi nyelle nyuŋwun ŋan eḏi zi ɽuni. 8 ŋwu ṯaŋwu, ur nyi gwu zurum beṯen daŋgalu, nenyere amɽi eḏinḏeḏa ŋaŋwuzi ŋiɽaŋali ŋizaw ŋeḏi Allah ṯuɽuk mac, lakin na rɔgwɽɔ reri tɔk, kaka ma gwu orɔ gaali beṯen ki yey-na yeri.
9 kiḏayinar, lieŋgeri, ŋɔḏɽor ŋeri ŋir ŋwunda ŋwunda; eṯinyaki ŋɔḏɽor rii ri yuluŋa yaŋwunu tatap, mindaŋ eḏizere inḏini ṯofi ṯere mac daŋgal-na ŋiɽaŋal ŋi ŋeri, andicar ŋazi gwu ŋiɽaŋali ŋizaw ŋeḏi Allah. 10 a liri ṯundiza ki, ŋaŋa leḏici Kwruztuŋw ṯəmna, na keni Allah tɔk, ŋeḏi ŋeḏre ŋeri daŋgal-na ŋeni ŋirlinelu ter, ŋofḏana, na ŋiti ŋeḏi loma-na lere mac. 11 kaka ilŋiicaŋazi gwu eḏaruŋw, kaka papa kwere nyor nyi nyuŋwun ta, eṯinyami ukwazi ŋaŋwuzi ŋwu lere lere, eṯinyi firlazi ŋaŋwuzi la, na eṯinyi oraci ŋaŋwuzi ɔrɔ ɔrɔ 12 eḏi ŋeḏre ŋalu ofḏani nani gwu Allah, weṯi ŋazi ornuṯi eḏenḏi ki ŋeleny-na ŋuŋun, na ki ŋiniṯ-na ŋuŋun tɔk.
ṯowɽa yey
13 nyiŋa leṯeca Allah zukran ŋwamin rac ŋiɽaŋal ŋi ŋu, kaka afa ŋa gwu ŋiɽaŋali ŋimezi neŋne nani nyi gwu, kaka ŋiɽaŋal ŋeḏi Allah ŋundu, ner ṯa orɔ ŋwu rerem, ŋiti ŋir kaka ŋeḏi lizigwunaŋ mac; ŋinderṯa ŋeṯakiki ŋɔḏɽor daŋgal-na leṯeḏi ṯəmna. 14 na ŋaŋa, lieŋgeri, a limorɔ kaka kla leḏi yaniiza yinaani yahuḏiiya, lir lizi leḏi Allah eḏi Kwruztu-na kweni Yecu; kaka ma gwu lizi lalu rərinici ŋaŋwuzi kaka reriner gwu ŋunduŋa ki rii-na reḏi yahuuḏ. 15 linderṯa liɽinyiiḏi Kwelenyi kweni Yecu na liɽyaŋi leŋen tɔk, ner nyji ruti kiṯay; eṯir ere əmi Allah-na mac, na eṯir orɔ ṯuwən ṯeḏi lizi tatap, 16 ṯinyiner nyji gwu eḏizandaci lir umam mindaŋ eŋgir ma kilaw—ṯaŋwu eṯir ma kikindezi ŋikyaŋi ŋeŋen ŋwomur tatap mindaŋ mer ureni kworɔ, lakin ŋirŋaza ŋeḏi Allah ŋimezi ilica tuc!
ṯaŋrica ṯeḏi buuluz na ṯinyiŋlana nanir gwu kla leṯorti juwaba kwuŋwun
17 nyiŋa limɔ kinneni ruci ŋaŋwuzi-na tuk ki nyamin la kinyu nyir nyɔkwɔ; nyiŋa lirucaŋazi-na aŋna yi, lakin ṯugwor ṯi ta, beri; nenyi ṯeci kaka aḏa kwere, zurum gi kwupa kwuminni, eḏi iziḏi ŋaŋa li kiyeyna titir. 18 ŋwu ṯa, nenyi ṯeci eḏila, nenyi pa, kweni buuluz, nyamin rac nyamin rac eṯinyi haŋni eḏila, lakin zeyṯaan kwumenyji ṯinyini. 19 na aḏa kwiri kwir ṯəkiza ṯeri kizen, ya ṯinyiŋlana, ya taŋgi teḏi ṯiniiya-na ṯeri ki yey-na yeḏi Kweleny kweri kweni Yecu, muŋw aɽa? ŋaŋa liti liri manya? 20 kaka ur ŋa gwu, ŋaŋa, ŋiniṯ ŋeri na ṯinyiŋlana ṯeri tɔk.
Ŋothɽor ŋǝthi Bɔɔlɔs Ṯasaaluuniiki
1 Liyǝŋgǝri, ŋilŋithi-ŋǝsi rac rogɽo-ri raalɔ ethaarɔŋw raaŋitha ŋgwa kwǝri kwɔraaŋathir-ŋǝsi-gi kwiti kwiira faayitha-na mac. 2 Ŋilŋithi-ŋǝsi rac ŋa ŋǝrrǝr nyjiŋǝ-lɔŋw, nǝ ŋulluthur-nyji-ŋi tok kinaŋw a-naani-nyii kerreny Fiilibbii niti nɔppathi-nyii kinnǝni kinaŋw naaniŋa-gwɔ mac, nǝnyji Allah wǝri inḏǝthǝ ŋuuguli ethi andaci ŋaaŋwɔsi Inyjiilǝ wǝthi Allah kiyǝnǝ yǝthi kila lir ṯuwǝn ṯǝri. 3 Kaka nǝṯi-nyji-gweere andasi ŋǝthi-ŋi ṯuusi ŋaaŋwɔsi mac, wala ethi-ŋi ruuŋwi ŋaaŋwɔsi tok mac, wala ethi-ŋi kǝɽinyji ŋaaŋwɔsi-lɔ. 4 Ki-lɔɔbi lǝthi ŋiɽaŋal ŋɔ tǝ, ǝṯinǝsi andasi nyaamin tatap ŋǝthi ṯɔgwor ṯǝthi Allah, kaka mɔŋgwɔ ruusi nyuŋwsi lɔvthanna, ethi inḏǝthǝ nyuŋwsi Inyjiilǝ, ŋwɔṯaŋw ǝṯinǝsi andasi ŋiti ŋir ŋǝthi-ŋi ǝmi lizi-nǝ mac, laakin ethǝmi Allah-na wǝṯi ṯǝccici rogwori rǝri. 5 Ŋaaaa lilŋithi rerrem kinaŋw mǝnyiila nǝrŋǝsi ere andindaci kandisa-gi ethi-gi biɽǝthǝ ŋaaŋwɔsi yiriny mac wala ethi andaci ŋaaŋwɔsi ṯaay-thi ṯǝthi lucci ṯigiiriŋi tok mac, aw Allah wirṯa wir shuhuuḏ kwǝri! 6 Wala ethi naŋninni ṯiiɽǝnǝ ṯǝthi lizi, naaniŋa-gwɔ alla naanir-gwɔ lir ter. Nǝthinyii-va kinnǝ sɔlṯa rac daŋgal-na kaka yaavɔr yǝthi Kwɔrɔstɔ. 7 Laakin nǝrŋǝsi ṯiici naana jiɽeem a-naani-nyii daŋgal-na, kaka ayyaŋwɔ kwǝṯi aŋraci nyɔɔrɔ nyuuŋwun. 8 Nǝ kaka namɽar-ŋǝsi-gwɔ beṯṯen, nǝnyii kittatha ethi inḏǝthǝ ŋaaŋwɔsi ŋimiitha ŋǝri tok, nǝ Inyjiil wǝthi Allah ere oro ṯɔɽɔk mac. Kaka ninaaniŋa-gwɔ rerrem ki-rɔŋwor-na rǝri.
9 Liyǝŋgǝri ŋaaŋa likithaayina rac rerrem ŋothɽor ŋakki-nyji nǝ ṯurvǝ ṯinḏa-nyii, ŋǝni ŋakki-nyji aŋgwɔrɔ, ŋakkinasi-pa yulŋǝ yaaŋwɔnɔ, mindaŋ etheere uvuni kweere kwaalɔ ṯɔɔvi mac, kinaŋw nǝccǝr-ŋǝsi bǝshirǝ Inyjiilǝ wǝthi Allah. 10 Ŋaaŋa lir shuhuuḏ kwǝri, nǝ Allah tok, ŋethre-ŋi ŋǝri ŋaaŋa-li kila lǝthi ṯǝmminǝ, ŋǝni ŋirllinǝlɔ ter, nǝ ŋirllalɔ ŋiti ŋǝthi lɔɔma-na leere mac. 11 Nǝsi elŋe tok, nuruuzǝr-ŋǝsi-gwɔ kaka ŋǝṯisi papa ǝrrici nyɔɔrɔ nyuuŋwun, nǝrŋǝsi ɔkkwazi tatap, nǝrŋǝsi firllasi-la tok, 12 ethi nanni ŋethre ŋɔvthanna ŋǝthi Allah, wa wɔrnaca-ŋǝsi Ŋeelenyi ŋuuŋun nǝ ŋinithi ŋuuŋun tok.
13 Nǝ sǝbǝb naani kwette tok kwǝṯiny-gi ǝccǝ Allah shukran. Kinaŋw mǝrŋǝsi ǝvicǝ ŋiɽaŋali ŋǝthi Allah, nǝsi neŋne mindaŋ nǝsi mithǝ, ŋiti ŋir kaka ŋǝthi kwizigwunǝŋ mac, laakin ŋir kaka ŋiɽaŋal ŋir rerrem ŋǝthi Allah, kaka nakkir-gwɔ ŋɔthɽor daŋgal-na kila lǝthi ṯǝmminǝ. 14 Noro ŋaaŋa liyǝŋgǝri kaka mǝthǝl kwǝthi yǝniisǝ yǝthi Allah ethi Kwɔrɔstɔ-na kwǝni Yǝcu, kiya yinaanɔ Yahuuḏiiyyǝ, kaka ninḏaŋa-gwɔ ṯurvǝ ki-rii-na rǝthi lizi laalɔ, kaka-ṯǝ kitha ṯindǝthǝsi Yahuuḏ. 15 Kila-ṯǝ kila limǝ ɽeenye Kweelenyi kwǝni Yǝcu-ŋwsi liɽii-li, mindaŋ nǝrnyji ǝwɽi yǝy-lɔ. Ǝṯireere ǝmi Allah-na mac! Ǝṯiroro ṯuwǝn ṯǝthi lizi tatap! 16 Nǝ ǝṯir kǝniny ṯǝccici ethi ṯiinyini nyuŋwsi etheere ǝccǝ Umama bǝshirǝ mac, ŋiɽaŋali ŋinḏisi ethisi ǝvicǝ ŋiglǝthǝ. Nǝ ŋiɽaŋal-ŋi-ṯǝ ŋɔ ǝṯir urǝzi ŋikiyaŋi ŋeeŋen kworo deddep. Laakin lǝzi-vǝ-tǝ hɔkwɔm wǝthi Allah ɔɽatha-na rac!
Sɔɔrɔm kwǝthi Bɔɔlɔs ethisi raŋitha kwokwony.
17 Laakin liyǝŋgǝri, kinaŋw nurucǝr-ŋǝsi-nǝ kinnǝni tok, ki-bɔmɔr-la-ṯǝ kɔlɔ lokwo yaŋna-yi domony, rɔgwor-tǝ bǝri. Nǝnyii ṯǝccici tig-tig, sɔɔrɔm-gana kwɔppa kwimni ethi isithi ŋaaŋa-li kiyǝnǝ kwokwony. 18 Nyiiŋǝ linaŋna ethi aaɽitha naaniŋa-gwɔ-Nǝnyii ṯǝcci rogɽo-ri riinyi nyaamin-na nyeere nyiɽǝn ethaaɽa, laakin nǝnyji Shiiṯaan ere kettice ṯaay mac. 19 Ǝyǝ-ŋǝ lir linḏi ethoro ṯǝkkizǝ kizǝn ṯǝri, ṯinyiŋlana ṯǝri, nǝ taŋgi tǝri ethi ǝllini ki-rogɽo kiyǝnǝ yǝthi Kweeieny kwǝri kwǝni Yǝcu mɔŋw aaɽa? Ŋaaŋa liti lir-ṯa mac-a? 20 Ŋaaŋa lir rerrem ṯǝllinǝ ki-rogɽo ṯǝri, nǝ ṯinyiŋlana ṯǝri tok!