aza 14
ṯindinyadizana nani gwu kla leṯajili ki ṯəmna-na
1 na ŋgwa kweṯajili ki ṯəmna-na, eṯi keni enji kiloɽu-na, lakin eṯere upupiḏaci ŋiɽaŋali mac. 2 kwete kweṯemni eḏaruŋw, nyi kweṯeḏi ŋuma eḏi ye eḏneya tatap. lakin ŋgwa kweṯajili ki ṯəmna-na, eṯuŋw ṯa eni kwiidi kənya domony. 3 eḏi ŋgwa kweṯi ye eḏneya tatap ere ruzi luŋw mac ŋgwa kweṯala eḏneya rii were were, na eḏi ŋgwa kweṯala eḏneya rii ere ruzi kaṯi mac ŋgwa kweṯi ye eḏneya tatap, kaka ma gwu Allah enji ŋunduŋwu kiloɽu-na. 4 a kweni ṯi eya eḏi ruzi kaḏaama kaṯi keḏi kwizi kwir ter? eṯi ŋiɽaŋal orɔ ŋeḏi kweleny kwuŋwun muŋw rilli ya muŋw ṯiŋaḏa. na ŋwurilli kaka eṯi gwu Kweleny eḏi ŋuma eḏi rillazi ŋunduŋwu la.
5 na kwete kweṯi ruzi lamin lete lizaw eḏi lamin la lir ter, na kwizi kwir ter eṯuŋw zi ruzi tatap ŋwibiɽḏina. eḏi zi kwizi kwere nyiḏak erri kaka ŋimɔ zi ṯugwor andaci ŋeni ŋofḏana. 6 ŋgwa kweṯiɽi lamin-na lete, eṯuŋw li ṯa nii Kwelenyi-na. na ŋgwa tɔk kweṯi ye, eṯuŋw yi nii Kwelenyi-na, kaka eṯuŋw yi eca Allah zukran; na ŋgwa kweṯala eḏneya rii were were ki ŋiɽaŋal ŋu, eṯuŋw ŋi nii Allah-na, na eṯuŋw yi eca Allah zukran. 7 kwizi kwiti kwere mac deŋgeri-na kweṯi miiḏi ki ŋiɽaŋal ŋeḏi rɔgwɽɔ ruŋwun dak, nuŋw ere kwere tɔk mac eḏay ki ŋiɽaŋal ŋeḏi rɔgwɽɔ ruŋwun dak. 8 mer miiḏi, eṯir miiḏi eḏi Kweleny-na; na mer ay, eṯir ṯa ay eḏi Kweleny-na; ŋwu ṯa, mer miiḏi ya mer ay, eṯir ṯa orɔ leḏi Kweleny. 9 ŋiɽaŋal ŋi ŋu, na ṯa Kwruztu ay nuŋw miiḏi kwokwony, eḏorɔ Kweleny kweḏi kla limay, na kweḏi kla limiiḏu, nden tɔk.
10 a kwɔḏɔ kwuruze aŋgalu kaṯi? ya ŋa, a kwɔḏɔ kwuruze aŋgalu luŋw? kaka inḏir gwu tatap eḏi rilli ki zeyria-na kweḏi Allah. 11 kaka luḏinar gwu, ŋaruŋw:
Kweleny kwaru ŋwa: kaka miiḏi nyi gwu, a ŋwurgwu tatap iideci nyuŋwu lu,
a riŋla tatap ortaḏa Allah.
12 ŋwu ṯa, lere lere deŋgeri-na er ŋi eŋnici Allah ŋeḏi rɔgwɽɔ reri, rere rere.
13 er ṯa ere kitaḏizi kaṯi kwokwony mac, lakin er kitaḏa eḏere ketize eŋgeriŋw kwɔmne lu kwere mac eḏi ṯugwudazi ya eḏi ṯinyini. 14 ŋeṯinyjelŋece ki ṯugwor-na tinyi, na eḏi Kweleny-na kweni Yecu tɔk, eḏaruŋw, kwɔmne kwiti kwere mac kwuruŋwa oɽeny; lakin eṯuŋw ruŋweḏa kwere muŋw aruŋw ki ṯugwor-na, kwuruŋwe. 15 ma eḏne wɔŋwa orɔ weṯi yi kiici aŋgalu ŋiɽaŋali, a kwiti kweni kwudirnaṯi ki ṯamɽa-na mac. eṯere efrinji eḏneya wɔŋwa eḏi ṯugwudazi kwere mac kwumɔ Kwruztu eyzi, mindaŋ muŋw kiraḏa lu. 16 etere efrici kwizi kwere mac eḏi zi ruzi ŋiki ŋa ŋeni ŋizaw duŋgwɔŋa. 17 kaka iti eni gwu ŋeleny ŋeḏi Allah eḏne ya kwɔmne kwere kweṯir ii mac, lakin eṯir eni ṯofḏana, na ŋiɽena, na ṯinyiŋlana eḏi Ṯigɽim-na ṯirlinelu ter. 18 ŋgwa kweṯi zi errici Kwruztuŋw ṯa ŋwu, eṯuŋw əmi Allah-na, na eṯi lizi ruzi kwizawi tɔk. 19 er naŋni ŋwamin tatap eḏi zi erri ŋeṯafa ŋiɽena, na ŋeṯi zi firlazi la lir lieŋgeri. 20 eṯere kiyazi ŋɔḏɽor lu ŋeḏi Allah mac, ŋiɽaŋal ŋi ŋeḏi eḏne. kwɔmne tatap kweni kwuzuɽu, lakin eṯir eni ŋiki mezi kwizi kwere ṯugwudazi liḏaḏu eḏiidi ŋiɽaŋal ŋi ŋeḏi eḏne wuŋwun. 21 ner eni ŋofḏana eḏere ye yiiḏi mac, ya eḏii kiɽcaŋi tɔk mac, ya eḏere erri kwɔmne kwere nyiḏak mac kweṯi ṯugwudazi aŋgalu. 22 ŋiɽaŋal ŋeḏi ṯugwor ṯɔŋwa, ṯəmna ṯi, eḏir eni ŋeni ŋɔŋa ŋa ŋeḏi Allah tɔk; ŋgwa kwiti kweḏi ŋiɽaŋali ŋere mac ki ŋeḏre-na ŋuŋun eḏi ŋi hakwumi rɔgwɽɔ ruŋwun, kweni kwortani. 23 lakin eṯi Allah ruzi kaṯi ŋgwa kweṯi ye kwir rugwor-na riɽen, kaka iti erraŋw zi gwu mac ṯəmna ṯi; kaka eṯi gwu ŋiɽaŋal tatap ŋiti ŋeṯi ruḏa ki ṯəmna-na mac eni ŋikya.
Kila lajla nǝ lifirlli.
1 Ǝṯi aalanni ŋgwa kwajla ki-ṯǝmminǝ-nǝ daŋgal-na, laakin ǝṯi-geere ɔppathalɔ ŋiɽaŋal-ŋi ŋǝthi ṯiirǝcǝ ṯuuŋwun yǝy-lɔ mac. 2 Ǝṯi kwizi kwette ǝthi ṯǝmminǝ ethi yee kwomne kwette nyithak, laakin ŋgwa kwajla ki-ṯǝmminǝ ǝṯɔŋw yee kǝnyǝ ṯɔɽɔk. 3 Ŋgwa kwǝṯi yee kwomne tatap, ŋweere ruuselɔŋw ŋgwa mac kwiti kwǝṯi ethne kaka ŋunduŋw, nǝ ŋgwa kwiti kwǝṯi yee kwomne tatap mac, ŋweere kette ŋgwa kaṯṯi mac kwǝṯi yee kwomne tatap. Kaka nǝnyjǝ-gwɔ Allah ŋunduŋw ki-lɔɔɽɔ-na. 4 Ŋa kwɔrɔ kwǝni ǝyǝ mindaŋ ethi-mǝ kette khaḏaama kaṯṯi kǝthi ŋgwa kwir ter? Sǝyyiḏ kwuuŋwun kwirta-pa wɔɽe-wɔɽeny kwinḏi ethi ruusi ŋunduŋw kwɔmǝ ɔvthasi alla kwɔmǝ bǝriyǝnni. Kwinḏi ethi ɔvthasi kaka nǝthi-gwɔ Sǝyyiḏ ŋɔma ethi ruusi ŋunduŋw kwɔvthanna.
5 Ǝṯi kwette ruusi laaminɔ lisaaw lithǝmthi ŋwaamin-la ŋwɔthaathɔ, nǝ kwɔthaathɔ ǝṯɔŋwsi biɽithinǝ tatap. Ethiŋw ǝmmini ŋgwa ethaarɔŋw ŋa ŋǝrrǝ-nyji ŋǝni-ṯǝ ŋisaaw. 6 Nǝ ŋgwa kwǝṯiiɽi laamin-na lette ethiŋw-li ṯǝ nii Kweeleny-na; nǝ ŋgwa kwǝṯi ethne, ethiŋw ethne kwiiɽǝ Kweeleny-na, kaka nǝṯɔ-ŋgwɔ accǝ Allah shukran; nǝ ŋgwa kwǝṯi derne ethi yee kwomne-lɔ tatap, ethi-ŋwsi ǝrri ŋɔ ethi-ŋi iiɽi Kweeleny-na, nǝ ǝṯɔŋw ǝccǝ Allah shukran. 7 Kwiti kweere mac dǝŋgǝr-nǝ kwǝṯi miithici rogɽo ruuŋwun, nǝ nɔŋweere kweere tok mac kwǝṯi ǝyici rogɽo ruuŋwun. 8 Mǝr miithi tǝ, nǝrǝni limiithicǝ Kweelenyi, na mǝr ai tǝ, ǝrǝni laayɔ ŋiɽaŋal-ŋi ŋǝthi Kweeleny; nǝ ŋwɔṯaŋw mǝrtǝ naani kinnǝni limiithɔ alla mǝr ai, nǝrtoro lǝthi Kweeleny ṯir-ṯir. 9 Kaka mǝgwɔ Kwɔrɔstɔ ǝi mindaŋ nɔŋw miithi kwokwony ethoro Kweeleny kwǝthi kila laayɔ nǝ limiithɔ tok.
10 A kwotho kwǝṯi kette aŋgalɔ kaṯṯi? Nǝ ŋa tok a kwotho kwǝṯi ruusi aŋgalɔ-lɔŋw? Kaka ninḏir-gwɔ tatap ethi rilli kiyǝnǝ yǝthi kwɔrsi kwǝthi hɔkwɔm wǝthi Allah; 11 kaka nɔlɔɔthɔnar-gwɔ ŋaarɔŋw,
“Kweeleny kwaarɔ-ŋwa, kaka nimiithiny-gwɔ a ŋwɔrgwɔ
tatap kwocce nyuŋw-lɔ,
nǝ a riŋla tatap ɔrtatha Allah.”
12 Ṯaŋw a leere-leere tatap dǝŋgǝr-nǝ inḏǝthǝ Allah ŋwɔɔɽɔŋi ŋwɔthi rogɽo ruuŋwun.
Ǝṯeere ṯɔgdasi aŋgalɔ mac.
13 Ŋwɔṯaŋw ǝɽir-ṯǝ ǝri rilliŋw ǝreere kittathisi kaṯṯi kwokwony mac, laakin ǝreere kittatha ethi uɽumuthici ǝŋgǝri-ŋwɔ kwomne kweere kithaay ethi ṯɔgdasi ŋunduŋw ya etheere rii ŋunduŋw keereny-gi mac ki-thaay-la ṯuuŋwun. 14 Ṯɔɽɔmaṯṯa ṯiinyii ethi Kweeleny-na kwǝni Yǝcu, ṯuduŋgwǝcǝ-nyii ethisi elŋe rerrem ethaarɔŋw, kwomne kwiti kweere mac kwǝṯi ruuŋwunni wɔɽeny, laakin mǝ kwizi kweere ǝmmini ethaarɔŋw kwomne ŋgwɔ kwǝni kwuruuŋwɔ-tǝ, na ǝṯɔŋwɔni kwuruuŋwunnicǝ ŋunduŋw. 15 Mǝ kiici aŋgalɔ ŋiɽaŋali ŋiɽaŋal-ŋi ŋǝthi kwomne ŋgwa kwiithi-ŋǝ tǝ, neere ǝni kwɔnannɔ ki-ṯamɽa-na kwokwony mac. Ŋwɔṯaŋw ǝṯeere duŋgwǝci ethneya wa mac wiithi-ŋǝ ethi kii kwizi kwɔmǝ Kwɔrɔstɔ ǝyici! 16 Ṯaŋw ǝṯiseere duŋgwǝci ŋa ŋisaaw-thi-ŋa ŋaaŋwɔ ethisi kweere ruusi ŋigii mac. 17 Kaka niti nǝni-gwɔ Ŋeeleny ŋǝthi Allah ethne-ŋa ṯiithǝ-thi mac, laakin nǝrǝni ŋirllalɔ-ŋa ŋiɽǝnnǝ-ŋi, nǝ ṯinyiŋlana ki Ṯigɽim-na Ṯirllinǝlɔ ter. 18 Ŋgwa kwǝṯisi ǝrrici Kwɔrɔstɔ-ŋwɔ ṯǝŋw, ǝṯɔŋwɔmi Allah-na, na ǝṯi lizi ǝmmini tok.
19 Ŋwɔṯaŋw laazim ǝrisi avratha kuṯṯu ŋwaamin tatap ŋa ŋǝṯi aava ŋiiɽǝnnǝ, nǝ ŋa ŋǝṯi-nyji mǝcci ethi firllasi nyuŋwsilǝ. 20 Ǝṯi kiyasa ŋothɽor-lɔ ŋǝthi Allah mac ŋiɽaŋal-ŋi ŋǝthi ethne. Kwomne tatap kwǝni kwɔsɔɔɽɔ rerrem, laakin nǝroro kaṯṯi naanɔ-gwɔ kweere nyithak ethisi ṯɔgdasi lithaathɔ kwomne-gi ŋgwa kwiithiŋw. 21 Ŋɔvthanna etheere yee yiithi mac ya etheere ii kiɽicaŋi tok mac, ya ethiseere ǝrri ŋeere mac ŋǝthi-gi ṯɔgdasi aŋgalɔ. 22 Ṯǝmminǝ kitha ṯǝthi-ŋǝ ethiŋw naani naaniŋa-gwɔ nǝ Allah tok. Kwaamina ŋgwa kwiti kwǝṯi iccini kaṯṯi-gi mac, mɔŋwsi ǝrri ŋa ŋilŋithi-ŋwsi ŋaarɔŋw-ŋi ŋisaawi! 23 Laakin mɔŋw ṯɔkwɔkwi ṯɔgwor-thalɔ ŋiɽaŋal-ŋi ŋǝthi kwomne ŋgwa kweere kwɔŋw yee tǝ, a Allah kette kaṯṯi mɔŋw yee ṯir-ṯir, kaka nǝrrǝŋwsi ŋa ŋiti ŋir ŋǝthi ṯǝmminǝ mac. Nǝ kwomne kweere nyithak kwiti kwɔrɔ kwǝthi ṯǝmminǝ-ŋǝ mac tǝ, nɔŋwɔni ŋikiya.