aza 1
ṯagna na ṯortaḏa
1 nyi, kweni buuluz, kwir kafur keḏi Kwruztu kweni Yecu ṯugwor ṯi ṯeḏi Allah, na timuṯaawuz kwir eŋgeri kweri, lagnaŋazi leḏi kaniiza keḏi Allah kinani kurinṯuuz, lizi li kla tatap leni lirlinelu ter eḏi Kwruztu-na linani ezir nana ndendeṯ weḏi akayaŋw.
2 eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri, na Kweleny kweni Yecu Kwruztu.
3 eḏi Allah ortani wir Papa kweḏi Kweleny kweri Yecu Kwruztu, wir Papa kweḏi ŋimɽi na Allah weḏi ṯikandizelu ndendeṯ. 4 wunderṯa weṯinyji kandizelu ki ṯurfa-na ṯeri tatap mindaŋ er zi ma ami kandizeluŋw kla leṯinani ki ṯurfa-na ṯere, ṯikandiza ṯi lu ṯetinyji ṯi Allah kandazi nyuŋwuzi lu tɔk. 5 kaka oɽmaṯir gwu ki ṯirara-na ṯeḏi Kwruztu ṯuru dedep, ṯaŋwu eṯir oɽmaṯi Kwruztu ŋgi ki ṯikandizelu-na ṯuru tɔk. 6 mer inḏini ṯurfa, ner orɔ ŋalu eḏeḏi ṯikandizelu na ŋigileḏa tɔk; na mer nyji kandizelu, ner orɔ ŋalu eḏeḏi ṯikandizelu kḏa ṯeṯikaṯazi ma indinyani ṯurfa nana ṯetinyi ṯi rərini nyiŋa tɔk. 7 ṯəkiza ṯeri kizen ṯeni ṯalu ṯeṯenḏelu kidir; kaka ilŋiiḏir zi gwu eḏaruŋw, kaka oɽmaṯi ŋa gwu ki ṯirara-na ṯeri, a kweroɽmaṯi tɔk ki ṯikandizelu-na ṯeri.
8 lieŋgeri, nyiŋa linaŋnaŋazi eḏizelŋe ŋeḏi ṯurfa ṯeri ṯupa ṯinḏa nyi azya; kaka eni nyi gwu timenyji niṯeḏa bɽe-bɽeṯ, mindaŋ nenyi muli ḏuṯ, nenyari, ŋimiiḏa ŋeri ŋernine tɔk. 9 nenyari ki rugwor-na reri, limenyji hakwumi hukm yi weḏi ŋiɽany; lakin ner orɔ ŋu eḏilŋiiḏini nyuŋwuzi eḏere kitaḏa ki rɔgwɽɔ reri mac, lakin eḏi keni alliḏa Allah rugwori nana weṯizi dindi layyu; 10 wunderṯa wikileḏinyji ŋiɽany kworɔ keṯɔk ŋir kaka ṯa ŋu, na wenyji kileḏi tɔk; nyiŋa limalliḏa ŋunduŋwu rugwori nana ṯəkiza ṯi kizen wenyji ṯa kileḏi kwokwony rac kwaḏan gi. 11 ŋaŋa tɔk, mecernyji ṯara ṯi ki yiriny; ŋwu ṯaŋwu, luru er eca zukran ŋiɽaŋal ŋi ŋeni ŋeri ṯortaḏa ṯi ṯimɔŋw inḏeḏa nyuŋwuzi, muŋw aŋini ṯara ki yiriny ṯuru.
ṯugwor ṯeḏi buuluz ṯiira ŋidiny-na
12 kaka urir gwu ŋu ṯellina ṯeri, ner orɔ ṯunḏiza ki ṯeḏi rugwor reri, ŋimenyi ŋi eḏi ŋeḏre ŋirlinelu ter ki ṯurmun-na, ŋiira ŋidiny-na ki yey-na yeḏi Allah, na daŋgal-na tɔk ner ṯamḏalu, ŋiti ŋir ṯeḏina ṯi yeyna ṯeḏi ṯurmun mac, lakin ṯimeca ṯi ṯeḏi ŋimɽi ŋeḏi Allah. 13 ner ŋazi ere luca kwɔmne kwere mac illi kweḏi ŋa ŋuma eḏorti, eḏelŋe tɔk; nyi kwunaŋnaŋazi eḏelŋe ŋama-ŋamaŋ, 14 kaka ilŋiiḏiŋazi gwu kwɔkwɔ kinna eḏaruŋw, ŋaŋa leḏi ŋuma eḏi piŋi rɔgwɽɔ ralu ŋiɽaŋal ŋi ŋeni ŋeri, kaka eḏi nyi gwu ŋuma eḏi piŋi rɔgwɽɔ reri ŋiɽaŋal ŋi ŋeni ŋalu ki lamin leḏi Kweleny kweni Yecu.
buuluz muŋw kiraḏi eḏi zi ele eḏi zi raŋḏa
15 kaka menyji gwu elŋece ŋu, nenyi naŋni eḏila nani ŋa gwu kerreny, ta a ma afi ṯortaḏa nyamin-na nyiɽen. 16 nenyi naŋni eḏi raŋḏa ŋaŋwuzi inḏi nyi gwu ki ṯay la eḏele makḏunya, mindaŋ menyaɽa makḏunya eḏila nani ŋa gwu kwokwony, ta enyji ma kete ki ṯay eḏele yahuḏiiya. 17 ŋimenyji urli ŋere a, ma ṯugwor tinyi kitaḏa eḏizerri ŋu? ŋeṯinyji naŋni eḏizerri kaka kwizi kwete kweḏi ṯurmun kweṯari aw, na eṯuŋw ari beri tɔk, ki lamin lutuput a? 18 kaka ur gwu Allah wirlalu, kandiza keri keṯi ŋazi gi andaci kiti kilagḏirna aw gi, na beri gi mac. 19 na Tor teḏi Allah teni Yecu Kwruztu, kwandindicar ŋazi gi daŋgal-na, nyiŋa leni zilwaanuz-ŋa timuṯaawuz gi, na nyi tɔk, nuŋw ere eni mac, aw na beri; lakin duŋgwun-na ŋwamin tatap ner eni aw. 20 kaka eti gwu ṯikitaḏa tatap ṯeḏi Allah inḏini duŋgwun-na ṯeni aw. ŋinderṯa ŋu ŋeṯir ŋi ari ŋunduŋgi: emba, eḏi ŋi nii Allah-na. 21 lakin na ṯa Allah orɔ weṯinyji firli nana ŋaŋa li eḏi Kwruztu-na, nuŋw orɔ wumenyji alla-na; 22 na wumenyji uɽici nimra kwuŋwun, na wumenyjinḏeḏa Ṯigɽima ṯuŋwun ki rugwor-na reri eḏorɔ arbun.
23 lakin nyi kwornuṯi Allah eḏi kirinyaḏa nyuŋwu ṯunḏiza ṯi ki, ner orɔ kaka iti naŋnaŋazi gwu eḏi pini rugwor-na mac nenyi ma ere ila kurinṯuuz mac. 24 ner ere orɔ ŋu mac eḏeḏi nyiŋa zulṯa ki ṯəmna-na ṯalu; nyiŋa leṯaki ŋɔḏɽor ŋaŋa li eḏi nyiŋli ŋaŋwuzi-na, kaka irli ŋa gwu titir ṯəmna ṯi ṯalu.
Ṯaaginna-ŋa ṯɔrtatha-thi.
1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu, ṯɔgwor-thi ṯǝthi Allah, nǝ Ṯiimɔɔthaaws kwir ǝŋgǝri kwǝri, lɔlɔcca-ŋǝsi lǝthi kǝniisǝ kǝthi Allah kinaanɔ Kɔɔrɔnthɔɔs, lizi-li tatap lirllinǝlɔ ter, linaanɔ Akhaa-iyya-ŋw naana tatap:
2 Ethi ne@ma nanni daŋgal-na, nǝ ŋiiɽǝnnǝ ŋinḏi naanɔ-gwɔ Allah wir Papa kwǝri, nǝ Kweeleny kwǝni Yǝcu Kwɔrɔstɔ.
3 Ethi Allah ɔrtanni wir Papa kwǝthi Kweeleny kwǝri kwǝni Yǝcu Kwɔrɔstɔ, wir Papa kwǝthi ŋimɽi, nǝ wir Allah wǝthi ṯigandizalɔ, 4 wǝṯi-nyji kandizalɔ ki-ṯurvǝ-nǝ ṯǝri tatap, mindaŋ mǝrǝthi ŋɔma ethisi kandizalɔ lithaathɔ linaanɔ ki-ṯurvǝ-nǝ ṯette nyithak, ṯikandizathi-lɔ kitha ṯigandiza-nyji-thi Allah-lɔ. 5 Kaka nɔɽɔmiaṯṯir-gwa ki-ṯiraara-na ṯuuru ṯǝthi Kwɔrɔstɔ, ŋwɔṯaŋw ǝṯir ɔɽɔmaṯṯi Kwɔrɔstɔ-ŋǝli ki-ṯigandizalɔ-na ṯuuru tok. 6 Mǝr kaṯṯasi ṯurvǝ tǝ, nǝrǝni ŋǝthi ṯigandizalɔ ṯaalɔ nǝ riglǝthǝ tok; nǝ mǝrnyji kandisalɔ tǝ, nǝrǝni ŋǝthi ṯigandizalɔ ṯaalɔ, ṯinḏǝthǝ-ŋǝsi ŋɔma ethi indinyanni ṯurvǝ naana ṯuuru, kitha-ṯǝ kitha ṯette-ṯette ṯǝṯiny-thi raari. 7 Nǝ ṯǝkkizǝ kizǝn ṯǝri ǝni ŋaaŋa ṯiti ṯǝti lakathalɔ mac; ŋilŋithi-nyji rac ethaarɔŋw, kaka nǝṯi-gwɔ ɔɽɔmaṯṯi ki-ṯiraara-na ṯǝri tǝ, a ɔɽɔmaṯṯi ki-ṯigandizalɔ-na ṯǝri tok.
8 Nyiiŋǝ linaŋna-ŋǝsi ethi kithǝyini ŋaaŋwɔsi ŋiɽaŋali ŋǝthi ṯurvǝ ṯikaṯṯisa-nyii ki-miḏiiriiyyǝ-nǝ kwǝthi Aasiiyya-ŋwɔ. Nǝ ṯurvǝ kitha ǝni ṯiniṯǝthi-nyji biɽe-biɽeṯ, mindaŋ ninyeere kittatha kwokwony mac ethi naani limiithɔ. 9 Nǝnyii iccini lir kaka ǝṯir-nyji ǝccǝ haakima ŋiɽany-ŋi; laakin nǝrǝni ŋǝrrinǝ ŋɔ mindaŋ etheere kittatha rogɽo naana rǝri mac, laakin ethi kǝniny allatha Allah rɔgwori naana wǝṯisi dindǝ kila laayɔ. 10 Windǝr-ṯǝ wiglǝthǝ-nyji ki-ŋiɽany-na ŋɔ, e-ta ŋwaaɽi ŋwɔ kilǝthi nyuŋwsi kwokwony. Ŋwɔṯaŋw nǝr kittatha naanɔ-gwɔ ŋgwa kwinḏi-nyji ethi kilǝthi kwokwony. 11 Laazim ǝrnyji mǝcci ŋaaŋa tok ṯaara-thi kiyiiriny, mindaŋ mǝ ṯaara kiyiiriny ṯuuru ṯǝni ṯǝri niŋnini, e-ta ǝnyji Allah ǝccǝ baarika; mindaŋ mǝ luuru ǝccǝ Allah shukran ŋiɽaŋal-ŋi ŋǝni ŋǝri.
Bɔɔlɔs mɔŋgwɔ urlǝ fikirǝ-lɔ kwuuŋwun.
12 Nyiiŋǝ lǝllinǝ ki-rogɽo ŋiɽaŋal-ŋi ŋǝthi shahaaḏa kwandica-nyji-gi rɔgwor rǝri, kwǝni ŋethre ŋǝri ŋirllalɔ ki-ṯurmun-nǝ nǝ ki-ŋethre-na ŋǝri ŋaaŋa-li rerrec, ŋirllalɔ-ŋi ŋiti ŋǝthi ŋidiny-nǝ mac, wala ethoro ŋǝthi ṯǝthinǝ yǝnǝ ṯǝthi ṯurmun, laakin nǝroro ne@ma-gi kwǝthi Allah. 13 Ŋɔlɔccar-ŋǝsi ŋɔ dak mindaŋ mǝthi ŋɔma ethisi ɔrti nǝ ethisi elŋe tok. Nyii kwɔgittathɔ daŋgalɔ mindaŋ mǝsi elŋe ŋǝmǝ-ŋǝmmǝŋ, 14 kaka niti nilŋithir-nyji-nǝ kinnǝni beṯṯen mac, nǝnyii kittatha mindaŋ mǝrnyji elŋena duɽull, kaka ninḏiŋǝ-gwɔ ethi ǝllini ki-rogɽo ŋiɽaŋal-ŋi ŋǝni ŋǝri, nǝ nyiiŋǝ tok ŋiɽaŋal-ŋi ŋǝni ŋaalɔ, ki Laamin lǝthi Kweeleny kwǝni Yǝcu.
15 Kaka nilŋicany-gwɔ ŋiɽaŋali ŋɔ rerrem, nǝnyii-mǝ naŋni ethiila naaniŋa-gwɔ ker-kerreny, mindaŋ ǝŋgǝthi ŋɔma ethaavi barka nyaaminna nyiɽǝn. 16 Nyii kwɔnaŋna ethiila ethi raaŋitha ŋaaŋwɔsi kwinḏi etheele Makḏuuniiyyǝ, mindaŋ ǝŋgi-nyii iila naaniŋa-gwɔ kwaaɽɔ Makḏuuniiyyǝ-ŋgi, mindaŋ ǝrnyii-mǝ kette kithaay etheele Yahuuḏiiyyǝ. 17 Nyii Wir rɔgwor-na riɽǝ-riɽǝn a-naŋna-nyji ethisi ǝrri ŋɔ-a? Ṯǝrṯiib ṯigitta-nyii ṯǝthi ŋizigwunǝŋ ṯɔrɔ-a, ethaari aw, nǝ ethaari bǝri ki-taamin tɔtɔpɔt-a? 18 Kakkaa Allah Wirllalɔ, kandisa-ŋga kandicar-ŋǝsi kiti kǝni “Aw” nǝ “Bǝri” mac. 19 Kaka nǝccǝr-ŋǝsi bǝshirǝ daŋgal-na Yǝcu Kwɔrɔstɔ-ŋgi kwir Tɔr tǝthi Allah, nyiiŋǝ Siila-gi nǝ Ṯiimɔɔthaaws, nǝ ŋiɽaŋal ŋǝri ere ǝni “Aw” nǝ “Bǝri” ki-taamin tɔtɔpɔt mac, laakin duŋgwun-nǝ nǝrtǝni “Aw” nyaamin tatap. 20 Kaka nǝṯi-gwɔ wa@ḏ tatap wǝthi Allah inḏini duŋgwun-nǝ wǝni “Aw”. Ŋindǝr-ṯǝ ŋɔ mindaŋ ǝṯir aarɔŋw, “Amiin” yiriny-yi yuuŋwun ethi-ŋi nii Allah-na. 21 Laakin nǝṯǝ Allah oro wǝṯi-nyji anyjǝlɔ kidi-kidir ŋaaŋa-li ethi Kwɔrɔstɔ-na, nɔŋw alla nyuŋwsi-nǝ; 22 nǝ nɔŋw uɽuci nyuŋwsi nimrǝ kwuuŋwun, mindaŋ nɔŋw inḏǝthǝ nyuŋwsi Ṯigɽimǝ ṯuuŋwun ṯir ǝrbuun ki-rɔŋwor-na rǝri.
23 Allah wir shuhuuḏ kwiinyi, wilŋithi ṯɔgwor ṯiinyi! Kaka niti ninaŋnany-gwɔ ethi ruunyini ŋaaŋwɔsi mac tǝ, nǝnyii-mǝ ere iila Kɔɔrɔnthɔɔs mac. 24 Nyiiŋǝ liti linaŋna ethǝthi sɔlṯa ki-ṯǝmminǝ-lǝ ṯaalɔ mac, laakin a kwǝṯir akkɔ ŋothɽor dɔŋw-li ethǝmi ŋaaŋwɔsi-na, kaka nǝṯi-gwɔ ǝnyji ŋwaara-lɔ tetter ki-ṯǝmminǝ-nǝ ṯaalɔ.