aza 8
ŋimiiḏa edi Ṯigɽim-na ṯirlinelu ter
1 ṯaŋwu, eṯi jiiza kweḏi ṯikiraḏa lu ere nani mac nanir gwu kla leṯi nani eḏi Kwruztu-na kweni Yecu. 2 kaka menyi gwu ŋiɽaŋal ŋeḏi Ṯigɽim, ŋeṯafa ŋimiiḏa eḏi Kwruztu-na kweni Yecu, alla ki ŋiɽaŋal-na ŋeḏi ŋikya ŋeṯafa ŋiɽany. 3 kaka mezi gwu Allah erri ŋa ŋiti ŋeḏizezi kuruu ŋuma mac eḏizerri, kajila ŋiɽaŋal ŋi ŋeḏi rɔgwɽɔ reḏi ŋizigwunaŋ; uzaŋw gwu Toru tuŋwun eḏorɔ karama keḏi ŋikya, ṯaɽina ṯi ṯeḏi rɔgwɽɔ reri reḏi ŋikya ta, na ma Allah ketize ŋikyaŋi ŋeḏi rɔgwɽɔ reri ruɽun jiiza kweḏi ṯikiraḏa lu. 4 ŋwu ṯa a kweḏir ŋuma eḏi zi ṯimazi kworɔ ŋa ŋofḏana ŋari ŋi kuruu, mer zi ere erri mac ŋa ŋeṯizi rɔgwɽɔ reri ruɽun naŋni, lakin merzerri ŋa ŋeṯi zi Ṯigɽim ṯirlinelu ter naŋni. 5 kla leṯizerri ŋeṯi zi rɔgwɽɔ ruɽun naŋni, leṯi ireci kwɔmne kweḏi rɔgwɽɔ ruɽun yey lu; na kla leṯizerri ŋeṯi zi Ṯigɽim ṯirlinelu ter naŋni, linderṯa leṯi ireci kwɔmne kweḏi Ṯigɽim yey lu. 6 eḏi ireci kwɔmne kweḏi rɔgwɽɔ ruɽun yey lu, ŋiɽany ŋiri; lakin eḏi ireci kwɔmne kweḏi Ṯigɽim ṯirlinelu ter yey lu, ŋimiiḏa ŋiri ŋiɽena ŋi. 7 kaka eṯi gwu ṯireca yey lu ṯeḏi rɔgwɽɔ ruɽun orɔ ṯuwən nani gwu Allah; eṯuŋw ere inyici ŋiɽaŋali nana ŋeḏi Allah mac, kaka iti eḏuŋw gwu ŋuma ḏuṯ eḏi zi inyici nana. 8 na kla leṯi gwu dirnaṯi ki ŋiɽaŋal-na ŋeḏi rɔgwɽɔ ruɽun liti leṯəmi Allah-na ḏuṯ.
9 lakin ŋiti ŋeṯi gwu dirnaṯi-na ŋeḏi rɔgwɽɔ ruɽun mac, ŋeṯi ŋa gwu dirnaṯi-na ŋeḏi Ṯigɽim, ma ŋazi gwu Ṯigɽim ṯeḏi Allah omi-na rerem. kwere nyiḏak kwiti kweḏi Tigɽima ṯeḏi Kwruztu duŋgwun-na mac, kwiti kwiri kwuŋwun mac. 10 lakin ma ŋazi gwu Kwruztu omi-na, ma yaŋna keni afa ŋiɽany ŋiɽaŋal ŋi ŋeḏi ŋikya, eṯi rigɽim ralu miiḏi ŋiɽaŋal ŋi ŋeḏi ṯofḏana ṯuŋwun. 11 ma Ṯigɽim ṯeḏi ŋgwa kwumɔ diɽa Yecuŋw ŋiɽany-na omi daŋgal-na ta, ŋgwa kwumɔ diɽa Yecuŋw kwir Kwruztu ŋiɽany-na kwinḏeḏa yaŋna yalu yeṯay ŋimiiḏa tɔk, Ṯigɽim ṯi ṯuŋwun ṯeṯomi daŋgal-na. 12 ṯaŋwu, lieŋgeri linyi, rɔgwɽɔ reri ruɽun riti reḏici nyuŋwuzi karḏa kere mac eḏi gwu dirnaṯi-na— 13 ma ṯa dirnaṯi-na ta, a lay, lakin ma eɽenye kiṯay kaduwa keḏi aŋna Ṯigɽim ṯi ṯirlinelu ter, a limiiḏi.
nyor nyeḏi Allah
14 kaka eṯi gwu kla tatap leṯi zi Ṯigɽim ṯeḏi Allah mulɔ orɔ nyor nyeḏi Allah. 15 Ṯigɽim ṯimafi titi ṯiri tigɽim ṯeḏi ŋuway mac eḏi mulṯaḏa ŋaŋwuzi kwaḏan ŋiḏeny-na, lakin ṯiri Ṯigɽim ṯeṯi ŋazi ruzi nyor, mindaŋ mer ari: Abba, Papa! 16 mer ari ṯaŋwu, eṯi Ṯigɽim ŋundu orɔ ṯeṯunḏizi rigɽima reri ki eḏi zi eca ŋwu: nyiŋa liri nyor nyeḏi Allah. 17 na mer orɔ nyor nyuŋwun, er afi ŋoru ŋeṯi zi nyor afi nani gwu ṯernyin, ŋir keni ŋeḏi Allah, er ŋi oɽmaṯi Kwruztu ŋali ŋundu, mer oɽmaṯi ki ṯirara-na ṯuŋwun mindaŋ mer afi ŋiniṯi nanuŋw gwu tɔk.
ŋiniṯ ŋinḏi eḏila
18 nyi kwaru ŋwa: ṯirara ṯeḏi kiremŋw titi ṯeḏi ŋuma eḏi biɽḏina ḏuṯ ŋiniṯ ŋi ŋinḏi eḏi ruwenici nyuŋwuzi lu. 19 kaka nanje gwu kwɔmne tatap kwukitina ṯiruwenelu ṯeḏi nyor nyeḏi Allah, ṯəkiza ṯi kizen ṯupak; 20 kaka eṯi gwu kwɔmne kwukitina digɽi, ŋiɽaŋal ŋi ŋiti ŋir ŋeŋen mac lakin ŋir ŋeḏi ŋgwa kwumezerri, ṯəkiza ṯi kizen; 21 kaka inḏi gwu kwɔmne kwukitina eḏi kedini ki ŋuway-na ŋeḏi ṯidigɽa, mindaŋ eḏafi hurriya ŋiniṯ ŋi weḏi nyor nyeḏi Allah. 22 a kwilŋiiḏir eḏaruŋw, kwɔmne tatap kwukitina kwumari kwola ŋijma ŋi duŋw li, mindaŋ kirem kwumorɔ; 23 ner ere orɔ ŋeḏi kwɔmne kwukitina ṯuɽuk mac, lakin nyiŋa tɔk, linderṯa keni limafi nyoru nyiŋna nyeḏi Ṯigɽim ṯirlinelu ter, eṯir ariḏana ki rugwor-na mindaŋ ma Allah ṯimazi ŋiɽaŋali kworɔ dap ŋeḏi nyor nyuŋwun, ṯallaḏiza ṯi ṯeḏi yaŋna yeri. 24 kaka mer gwu kilaw ki ṯəkiza-na kizen kḏu. lakin ṯəkiza kizen ṯende tiri ṯeḏi kwɔmne kweṯi ijini, kwizi kwende kwere kweṯəkizi kwɔmne kizen ma kwɔmne ŋgwa nani nanuŋw gwu? 25 lakin mer əkizi ŋgwa kizen kwiti kwumijini kinna mac, eṯir nanjelu ṯindinyana ṯi nana.
26 ŋwu ṯaŋwu tɔk, eṯinyji Ṯigɽim ṯirlinelu ter firli teter ki ṯajila-na ṯeri; kaka iti ilŋiicar gwu mac ŋiɽaŋali ŋeḏi ŋi ari ki yiriny ŋamaŋ, lakin eṯi Ṯigɽim ṯirlinelu ter orɔ ṯeṯinyji ŋi uṯizelu, tariḏa ṯi-na titi tir ṯeḏi runyu mac. 27 na ŋgwa kweṯecece rugwori-na reḏi lizi kweṯelŋece Ṯigɽima ṯirlinelu ter ṯugwori, kaka eṯi gwu Ṯigɽim roce Allah ŋiɽaŋal ŋi ŋeḏi lizi lirlinelu ter, ṯugwor ṯi ṯeḏi Allah.
28 a kwilŋiicar tɔk eḏaruŋw, ki ŋiɽaŋal-na tatap eṯi zi Allah aku ŋikiɽmiḏi-na ŋizaw ŋeḏi kla tatap leṯamɽi ŋunduŋwu, limɔŋw zi ornuṯi ṯugwor ṯi ṯuŋwun. 29 lilŋiicaŋw zi kerreny tuk nezi Allah ece-na eḏaɽani Toru tuŋwun, mindaŋ ŋworɔ Tor tir nda ki ŋiaŋga-na ŋuru. 30 na kla limɔŋw zi ece-na kerreny tuk, nuŋw zi ornuṯi tɔk; na kla limɔŋw zi ornuṯi, nuŋw zi ruzi luzuɽu-na tɔk; na kla limɔŋw zi ruzi luzuɽu-na, nuŋw zi inḏeḏa ŋiniṯi tɔk.
ṯamɽa ṯeḏi Allah
31 e ta, a kwer ari ḏa kwɔmne gi ŋgwu? ma Allah irli deŋgeri-na ta, eya kwiri kwir ṯuwən ṯeri? 32 ŋgwa kwiti kwumuḏina Tor ri tuŋwun mac, lakin nuŋw ṯiŋaci nyuŋwuzi lu tatap ta, ŋwere inḏeḏa nyuŋwuzi kwɔmne tatap beyin ŋundu gi manya? 33 eya kwiri kwe zi ruzi kaṯi limɔ zi Allah eca-na? Allah wiri weṯi zi ruzi luzuɽu-na; 34 eya kwiri kwe zi ketize jiiza kweḏi ṯikiraḏa lu? Yecu Kwruztu kwiri a? ŋgwa kwumay, kwumɔ Allah diɽa ŋiɽany-na tɔk, kweṯinanazi Allah ki ṯii ṯeḏi mini, kweṯiroce ŋunduŋwu tɔk ŋiɽaŋal ŋi ŋeri, a? 35 eya kwiri kwenyji feḏe lu ki ṯamɽa-na ṯeḏi Kwruztu? ṯurfa ṯiri, a? ya ṯuronyina? ya ṯowɽa yey? ya yaŋwu yu tɔtɔr? ya eḏi nani lufduṯu? ya kezir wir ŋiɽany? ya kalala? 36 kaka luḏinar gwu, ŋaruŋw:
eṯinyji endinye ŋiɽaŋal ŋi ŋɔŋa aŋwunu minmin;
ner aruŋw: a kwirir kaka yaŋal yeṯir zi undu kworɔ.
37 beri, ki ŋiɽaŋal-na ŋu tatap ŋeṯir zi illazi ki tuc, ŋundu ŋgi kwamɽenyji. 38 kaka eṯinyi gwu elŋece rac eḏaruŋw, ŋiɽany ŋiti ŋiri mac, ya ŋimiiḏa, ya limaleyka, ya kweleny kwere kweḏi ṯurmun, ya ŋgwa eḏerrini aŋwunu, ya kimanipa kwinḏi eḏerrini ŋurpu, ya ŋuma ŋere nyiḏak 39 ŋir ŋeḏi kilere, ya ŋeḏi kuṯeluŋw, ya kwɔmne kwere nyiḏak kwir ter kwukitina, eṯuŋw ere eḏi ŋuma mac eḏi feḏi nyuŋwuzi lu ki ṯamɽa-na ṯeḏi Allah eḏi Kwruztu-na kweni Yecu, kwir Kweleny kweri!
Ŋimiitha Ṯigɽim-thi Ṯirllinǝlɔ ter.
1 Ŋwɔṯaŋw ǝṯi hɔkwɔm ere naani kirem mac naanɔ-gwɔ kila linaanɔ ethi Kwɔrɔstɔ-na kwǝni Yǝcu. 2 Kaka mǝnyii-gwɔ Sherii@a kwǝthi Ṯigɽim ṯǝthi ŋimiitha ethi Kwɔrɔstɔ-na kwǝni Yǝcu kǝdu nyuŋw ki Sherii@a-na kwǝthi ŋikiya-ŋa ŋaɽiny-ŋi. 3 Kaka mǝsi-gwɔ Allah ǝrri ŋa ŋǝjlǝsi Sherii@a kwǝthi aŋna, mindaŋ nɔŋw ɔɔsa Tɔɔrɔ tuuŋwun wɔɽe-wɔɽeny aŋna-yi waaɽinna yaŋaa yǝri yǝthi ŋikiya, mindaŋ nɔŋw-yi ǝccǝ ŋikiyaŋi haakima. 4 Nǝsi Allah ǝrri ŋɔ mindaŋ mǝr rattathi kworo ŋa ŋirllalɔ dǝŋgǝr-nǝ ŋinaŋnathi-nyji Sherii@a, nyiiŋǝ kila liti linaanɔ ki-ŋethre-na ŋǝthi yaŋna mac, laakin ŋǝthi Ṯigɽim. 5 Kaka ŋǝṯi-gwɔ kila ŋiɽaŋal-ŋi ŋǝthi aŋna kette ŋaɽinyi ŋeeŋen kwomne-na kwǝthi aŋna; laakin kila lǝṯi nanni ŋiɽaŋal-ŋi ŋǝthi Ṯigɽim tǝ, ǝṯir kette ŋaɽinyi ŋeeŋen kwomne-na kwǝthi Ṯigɽim. 6 Nǝ ethi kittasi ŋaɽinyi aŋna naana, nǝrǝni ŋiɽaŋy, laakin ethi kittasi ŋaɽinyi Ṯigɽimǝ naana tǝ nǝrǝni ŋimiitha-ŋa ṯibrǝthǝ-thǝlɔ pǝt. 7 Kaka nɔrɔ-gwɔ ŋaɽiny-ŋa ŋǝṯi kittatha aŋna naana oro ṯuwǝn Allah-yi; ǝṯireere ǝmmini ethi iinyici Sherii@a naana kwǝthi Allah mac. Imba ŋiti-mi ŋǝthi ŋɔma ḏuṯ ethi iinyici naana; 8 nǝ kila lǝṯi nanni ŋiɽaŋal-ŋi ŋǝthi yaŋaa, liti lǝthi ŋɔma mac ethi ǝmi Allah-na.
9 Laakin ŋiti ŋinanniŋa-gwɔna ŋaaŋa ŋǝthi aŋna mac, ŋaaŋa lǝṯi nanni ki Ṯigɽim-nǝ, mǝ kǝniny Ṯigɽim ṯǝthi Allah ɔmi daŋgal-na rerrem. Kweere nyithak kwiti kwǝthi Ṯigɽimǝ-nǝ ṯǝthi Kwɔrɔstɔ mac tǝ, ŋweere oro kwǝthi Kwɔrɔstɔ ḏuṯ 10 Laakm mǝ Kwɔrɔstɔ nanni daŋgal-na tǝ, nǝ nayɔ-va yaŋaa yaalɔ kinnǝni tok sǝbǝb-gi kwǝthi ŋikiya, nǝtǝ rigɽim raalɔ nanni rimiithɔ sǝbǝb-gi kwǝthi ŋirllalɔ. 11 Mǝ Ṯigɽim ṯǝthi ŋgwa kwidiiɽǝ Yǝcu-ŋw ki-ŋiɽany-na ɔmi daŋgal-na, nǝ ŋgwa kwidiiɽǝ Kwɔrɔstɔ-ŋwɔ kwǝni Yǝcu ki-ŋiɽany-na, ŋwɔ inḏǝthǝ yaŋna yaalɔ yǝṯi ernene ŋimiitha tok Ṯigɽim-thi kitha ṯǝṯi ɔmi daŋgal-na.
12 Ŋwɔṯaŋw liyǝŋgǝri liinyi, a kwiti kwǝthir karatha keere mac, naanɔ-gwɔ rogɽo rɔɔɽɔn, nǝ ethi-gwɔ ere nanni-na ŋir kaka ŋǝthi aŋna mac, 13 na mǝ nanni ṯǝrṯiib-thi ṯǝthi yaŋna tǝ ai, laakin mǝ nanni ki Ṯigɽim-nǝ tǝ, a ɽeenye ŋothɽor ŋa ŋǝthi aŋna kithaay, e-ta ǝmǝ miithi. 14 Kaka kila tatap lǝṯisi Ṯigɽim ṯǝthi Allah mɔlotto, lir nyɔr nyǝthi Allah. 15 Kaka niti naavaŋa-gwɔ Ṯigɽimǝ ṯǝthi ŋɔwaay mac ethi iidi ethi aaɽitha ki-ŋitheny-na, laakin naavi Ṯigɽimǝ ṯǝṯi-ŋǝsi ruusi nyɔr nyǝthi Allah? Mindaŋ mǝr aarɔŋw, “Abba! Papa!” 16 Nǝṯǝ Ṯigɽim oro ŋundu wɔɽe-wɔɽeny ṯǝṯi-ŋi ɔnḏi kiyǝnǝ rigɽim-ri rǝri ethaarɔŋw a kwirir nyɔr nyǝthi Allah. 17 Nǝ mǝroro nyɔr tǝ, ǝroro nyiiŋǝ linḏi ethi mɔrthathi ki-ŋɔrṯɔ-la ŋǝthi Allah, na ǝri ɔɽɔmaṯṯi ki-ŋɔrṯɔ-la Kwɔrɔstɔ-ŋǝli, na mǝr ɔɽɔmaṯṯi Kwarasta-ŋǝli ki-ṯurvǝ-nǝ ṯuuŋwun tǝ, ǝri ɔɽɔmaṯṯi tok ki-ŋinith-nǝ ŋuuŋun.
Ŋinith ŋinḏi ethiila.
18 Ŋiisa-nyji ninyaarɔŋw, ṯurvǝ ṯǝthi kire-kirem ŋgwɔ-ŋw, ṯiti ṯinḏi ethi biɽithi-na ŋinithi-ŋi mac ŋa ŋinḏir-nyji ethi ruwǝccǝlɔ. 19 Kaka nakki-gwɔ ṯurmun kizǝn beṯ-beṯṯen ethi nyɔr nyǝthi Allah ruwǝnnǝlɔ; 20 kaka nǝccǝr-gwɔ ṯurmunǝ haakima etheere ǝthi faayitha-na kweere mac, ŋiti ŋir ŋǝthi rɔgwor reeŋen mac, laakin nǝroro ŋǝthi ṯɔgwor ṯǝthi ŋgwa kwimthi tetter. Laakin ŋɔ tatap nǝtǝ ṯǝkkizǝ kizǝn naanatha, 21 kaka ninḏi-gwɔ ṯurmun ethi kǝdinni ki-ŋɔwaay-na ŋǝthi ṯidigɽa, mindaŋ ŋwaavi ṯikǝdinnǝ ŋinith-ŋi ŋǝthi nyɔr nyǝthi Allah. 22 A kwilŋithir rac ethaarɔŋw ṯurmun tatap ṯima aari kwɔɔla ŋijma-ŋi mindaŋ kirem kwɔmoro kimaara. 23 Nǝreere oro ŋǝthi ṯurmun ṯɔɽɔk mac ṯǝṯaari, laakin nyiiŋǝ tok kila lǝthi ŋwɔɔla ŋwiŋna ŋwɔthi Ṯigɽim, nǝraari ŋɔmmaŋi ininy-ŋgǝnǝ, lakkɔ kizǝn ethi Allah ruusi nyuŋwsi nyɔr nyuuŋwun nyir nyoŋwor, mindaŋ mɔŋw kǝdu yaŋna yǝri tatap. 24 Ŋwɔṯaŋw nǝrǝni liglathɔ ki-ṯigittatha-na kɔthɔ. Nǝ ṯǝkkizǝ kizǝn kitha ṯiijinǝ ṯiti ṯir ṯǝkkizǝ kizǝn mac. Ǝya kwɔrɔ kweere kwǝṯi ǝkkici ŋgwa kizǝn kwǝṯɔŋw ese yǝy-yi? 25 Laakin mǝr-gwɔ kittatha ŋgwa kwiti kwiisar yǝy-yi naana mac tǝ, ǝṯir ǝkkici kizǝn limthi rɔgwori.
26 Nǝ ṯaay-thi ṯǝ kitha ṯette-ṯette, ǝṯi Ṯigɽim iila ethi mǝcci nyuŋwsi kila lajla, kaka niti nǝṯir-gweere aami elŋeŋw mac ethaari kiyiiriny; mindaŋ ǝṯi Ṯigɽim ŋundu rogɽo-ri ruuŋwun tuurǝcci Allah-lɔ ŋɔmmaŋi ki-lɔɔbi lǝri, ŋiɽaŋal-ŋi ŋiti ŋǝthi ŋɔma ethisi andasi mac. 27 Nǝ Allah wǝṯi eccice rɔgwor-na rǝthi lizi, ǝṯɔŋw elŋe ŋaɽinyi ŋǝthi Ṯigɽim, kaka nǝṯi-ŋi Ṯigɽim ɔṯalɔ ki-lɔɔbi lǝthi kila lirllinǝlɔ ter, ŋiɽaŋal-ŋi ŋǝthi ṯɔgwor ṯǝthi Allah. 28 A kwilŋithir-pǝ rac ethaarɔŋw, ki-ŋiɽaŋal-na tatap ǝṯi Allah akkɔ ŋothɽor ŋisanna lizi-li kila lǝṯi amɽi ŋunduŋw, kila lɔrnɔṯɔrsi ŋiɽaŋal-ŋi ŋǝthi ṯɔgwor ṯuuŋwun. 29 Kila limǝ-ŋwsi allana kerreny tuk, nɔŋwsi ruwǝzǝlɔ kǝni-gi ethaaɽanni Tɔɔrɔ ṯuuŋwun, mindaŋ mǝ Tɔr oro nda ki-lizi-nǝ luuru lir ŋiyaŋga. 30 Nǝ kila lǝllɔŋwsi-nǝ, nǝroro lɔmɔṯɔŋwsi tok; nǝ kila limǝŋw-si suuɽi nǝroro limǝŋwsi nii-nǝ.
Ṯamɽa ṯǝthi Allah ethi Kwɔrɔstɔ-na kwǝni Yǝcu.
31 E-ta aatha kwɔrɔ kwǝr andasi kwǝthi ŋiɽaŋal ŋɔ? Mǝ Allah naani nyii-ŋǝli tǝ, ǝyǝ kwɔrɔ kwinḏi ethoro ṯuwǝn ṯǝri? 32 Nǝ ŋundu ŋgwa kwiti kwɔmmɔnǝnǝ Tɔr-ri tuuŋwun wɔɽe-wɔɽeny mac, laakin nɔŋw ṯiŋacci ŋunduŋw nyuŋwsi-lɔ tatap, e-ta ŋweere inḏǝthǝ nyuŋwsi tok kwomne tatap domony ŋundu-ŋgi mac-a? 33 Ǝyǝ kwɔrɔ kwinḏi ethisi ǝccǝ ishṯǝki kila lǝllisi Allah-na? Allah wir-pa wǝṯisi suuɽi. 34 Ǝyǝ kwɔrɔ kwǝsi kette kaṯṯi? Kwɔrɔstɔ kwiti kwɔrɔ ŋgwa mac kwǝni Yǝcu kwǝsi kette kaṯṯi-a, aw ŋgwa kwaayɔ, nǝ nɔŋw diiɽǝ ki-ŋiɽany-na kwokwony, nǝ ŋgwala kwɔnaanalɔ ki-thii ṯǝthi mɔni ṯǝthi Allah, ŋgwa kwǝṯi-ŋi ɔṯalɔ tig-tig ki-lɔɔbi lǝri. 35 Ǝyǝ kwɔrɔ kwǝnyji uɽǝthǝnǝ ki-ṯamɽa-na ṯǝthi Kwɔrɔstɔ? Ṯurvǝ ṯirɔ-a? Alla ṯɔrɔɔnyɔna? Alla ṯǝwɽǝ yǝy-lɔ? Alla yaaŋwɔ? Alla ŋɔvdɔṯṯɔ? Alla ŋeere ŋir khaṯar? Alla kaalala? 36 Kaka nɔlɔɔthɔnar-gwɔ ŋaarɔŋw,
“Ŋiɽaŋal-ŋi ŋaaŋa, nǝrnyji inḏini ṯurvǝ biɽe-biɽeṯ ṯǝthi
ŋiɽany aŋwuna tugwrǝ,
nǝrnyji ruusi kaka yaaŋal yǝṯirsi undu kworo.”
37 Bǝri, kwomne-na ŋgwɔ tatap, ǝṯirsi illazi kii min-min ŋundu-ŋgi ŋgwa kwamɽa-nyji. 38 Kaka nilŋithiny-gwɔ rerrem ethaarɔŋw kwomne kwiti kweere mac kwǝnyji uɽǝthǝnǝ ṯamɽa-thi ṯǝthi Allah, ɔrɔ-gwɔ ŋiɽany alla ŋimiitha, alla limeleka, alla rɔ-asa rithaathɔ rǝthi leere, alla kwomne kwǝthi kire-kirem-ŋgwɔ, ya ŋgwa kwinḏi ethiila, alla ŋɔma, 39 alla ŋɔma ŋǝthi kindala-ŋw, wala ki-turmun-nǝ kuṯṯǝlɔ wala ethi kwomne kweere naani kwɔgittina kwǝthi ŋɔma ethi uɽǝthǝ nyuŋwsi-nǝ ki-ṯamɽa-na ṯǝthi Allah ethi Kwɔrɔstɔ-na kwǝni Yǝcu kwir Kweeleny kwǝri.