aza 3
buuluz muŋw aŋni ṯupupaḏa lu
1 aḏa kwiri kwuṯemḏizi gi yahuuḏ? ya fayḏa kwiri ṯaŋ kweḏi ṯuɽuna luḏrunya? 2 ŋeni ŋupa rac. ŋeni ŋiŋna ŋir ŋu, Allah wiica yahuuḏa-na eḏaŋraci ŋiɽaŋali tatap ŋuŋun. 3 ta a kwer ari ḏa mindaŋ ma gwu lɔkwɔ leḏi yahuuḏ ere eḏi ṯəmna mac? kaka iti urir gwu lirlalu mac, ta er irici Allah ṯirlalu ṯuŋwun tɔk a? 4 beri ma! er inḏa Allah wirlalu ma lizigwunaŋ ndendeṯ keni orɔ ləluŋ, kaka luḏinar gwu, ŋaruŋw:
er inḏa ŋaŋwu kwirlalu ki ŋiɽaŋal-na ŋɔŋa tatap,
mindaŋ ma ru lu ṯar.
5 lakin ma ŋudur ŋeri baŋaci ṯofḏana ṯeḏi Allah, a kwer ari ḏa? er ari: Allah wende wofḏana muŋw ketice nyuŋwuzi ŋirŋaza? (nyi ŋgwu kwandiza kaka lizigwunaŋ domony.) 6 beri ma! eŋgir ma orɔ ŋwu ta, eŋgi ma Allah hakwumi ṯurmuna aŋgwuru? 7 ma ŋidiny ŋinyi piŋi ŋirlalu ŋeḏi Allah ŋiniṯ ŋi, na lɔḏɔ leṯi nyi ruzi kinna kaṯi? 8 na lɔkwɔ, ner nyji andizaza nana tuŋwun ṯi ṯir ŋəluŋ, ner aruŋw nyiŋa laruŋwa: ŋofḏana eḏizerri ŋiki mindaŋ mer ruḏa ŋizaw. ŋofḏana eḏi ruzi lizi leṯizerri ŋu kaṯi hukm yi.
lizigwunaŋ leni liki ndendeṯ
9 aḏa kwiri marna? a kwirir yahuuḏ, er kilaḏa hukma eḏi liḏaḏu la? beri ma! nyi kwuruzi kerreny lizi ndendeṯ luway leḏi ŋikya, lir yahuuḏ na yunaani tɔk. 10 kaka luḏinar gwu, ŋaruŋw:
kwiti kwere mac kwofḏana. aw, kwiti kwere mac;
11 nuŋw ere kwere mac kweṯizelŋece, nuŋw ere kwere tɔk mac kweṯi naŋnini Allah.
12 limɔ ṯirenye lu tatap, ner aki ṯay pir duŋw li;
nuŋw ere kwere mac kweṯizerri ŋizaw. aw, kwiti kwere mac.
13 rugwuɽum reŋen riri kaka ṯimamu ṯifuru,
na eṯir zi kekɽinjelu riŋla ri reŋen.
ŋia ŋeḏi kimerken ŋeṯinani ki runyu-na reŋen.
14 eṯi kworɔ kweŋen urenina yufulu yi yiɽi cecer.
15 na eṯi ŋwara ŋweŋen apiralu ŋwinyaŋ eḏi zi endinye ḏor;
16 mer ele ki ṯay la ṯere nyiḏak, eṯir gwu ṯazi ṯikiraḏa lu ṯuronyina ṯi,
17 ner ere elŋece ṯay ṯeḏi ŋiɽena mac.
18 ner ere eḏizi Allah ŋiḏenya-na ki yey-na yeŋen tɔk mac.
19 a kwilŋiicar ma rac, ŋiɽaŋal tatap ŋandizazi kuruu ŋiri ŋeḏi kla leṯinani kuruu gi-na, mindaŋ ma kworɔ tatap nani dec, na ṯurmun tatap nanji hukma lu weḏi Allah. 20 kwiti kwere mac kweḏi ŋuma eḏeni kwuzuɽu-na ki yey-na yeḏi Allah mer zi aku ŋeḏi kuruu, kaka eṯi zi kuruu ilŋiiḏini ŋeḏi ŋikya.
ṯofḏana ṯəmna ṯi ṯeṯinani eḏi Kwruztu-na
21 lakin na ṯofḏana ṯimɔ ruwene lu, kḏa ṯinḏi nani gwu Allah ṯiira kuruu-na. na kuruu-ŋa liɽi li eṯir ṯi keni unḏi ki; 22 kḏa ṯir ṯofḏana tinḏi nani gwu Allah ṯəmna ṯi ṯeṯinani eḏi Yecu Kwruztu-na, ṯeḏi lizi tatap leḏi ṯəmna kḏu. 23 kaka enir gwu libiɽḏina; ner zi ṯa aki tatap pir, ner bilaṯi ŋiniṯi nana ŋeḏi Allah, 24 nuŋw zi ruzi luzuɽu-na beyin ṯimeca ṯi ṯeḏi ŋimɽi ŋuŋun, ṯalliḏiza ṯi ṯeṯi nani eḏi Kwruztu-na kweni Yecu. 25 na Allah ruwezi ŋunduŋwu lu pɔrpɔr eḏorɔ ŋgwa kwuməmiḏi lizi-na Allah yi, ŋin ŋi ŋuŋun, eḏorɔ ŋeḏi lizi ṯəmna ṯi. nezi ŋi Allah ruweci ṯofḏana lu ṯuŋwun, miḏicaŋw zi gwu ṯugwori lalu tuk ŋiɽaŋal ŋi ŋeḏi ŋikya ŋeḏi kerrenyŋw; 26 nuŋw zi ruweci kirem rɔgwɽɔ lu ruŋwun ruzuɽu-na, na eṯuŋw ŋi ruzi kwuzuɽu-na ŋgwa kweṯalliḏa Yecuŋw ṯugwori nana ṯəmna ṯi.
27 ṯaŋwu, a kwer ari ḏa ŋeḏi ṯellina ṯeri ki rɔgwɽɔ? ṯiira ezir-na. ŋiɽaŋal ŋi ŋiri ṯaŋ? ŋiri ŋeḏi ŋɔḏɽor ŋeri i? beri. ŋiri ŋeḏi ṯəmna. 28 kaka ilŋiicar gwu rac eṯi kwizi eni kwuzuɽu-na ṯəmna ṯi, muŋw zi ere aki ŋɔḏɽor ŋere mac ŋeḏi kuruu. 29 a laruŋwa, Allah wiri Allah weḏi lizi lir yahuuḏ ṯuɽuk a? witi wiri Allah weḏi kla lir umam tɔk manya? aw, wiri Allah weḏi umam tɔk, 30 urŋw gwu ṯa Allah wutuput; na winḏi eḏi zi ruzi lizuɽu-na tɔk kla leḏi ṯuɽuna ṯeḏi ŋwuḏruny ŋiɽaŋal ŋi ŋeḏi ṯəmna ṯeŋen, na kla liti leḏi ṯuɽuna mac lakin mer eḏi ṯəmna. 31 ta er ma urṯinelu kuruu gi, ŋiɽaŋal ŋi ŋeḏi ṯəmna kḏu a? beri ma! a kweṯir miḏeḏa kuruu teter.
1 E-ta nǝmǝ Yahuuḏ ṯamthɔ-la aatha-gi? Alla faayitha kwǝthi ṯuuɽunnǝ kwundǝr kwǝndu? 2 Ŋǝni ŋuuru raay tatap. Ŋiŋna nǝ Yahuuḏ oro yilŋithinǝrsi ŋiɽaŋali ŋǝthi Allah kerreny. 3 Aatha kwinḏi ethoro mǝ lokwo deŋgen-na iṯǝnninǝ? E-ta a ṯiṯǝnnǝnǝ ṯeeŋen irṯasi ŋirllalɔ ŋǝthi Allah-pa? 4 Bǝri-mǝ! Mǝ kinnǝ lizi tatap oro lǝluŋw, Allah tǝ ŋwɔ-tǝ nannatha wirllalɔ, kaka nɔlɔɔthɔnar-gwɔ ŋaarɔŋw,
“Mindaŋ mǝ ŋiɽaŋal ŋɔɔŋa oro rerrem,
nǝ laazim mǝr-ŋǝ ǝccǝ haakima tǝ, a ruu-lu ṯar-ṯṯar.”
5 Laakin mǝ ŋikiya ŋǝri aawa ŋirllalɔ ŋǝthi Allah, e-ta aatha kwɔr andasi? E-ta Allah winḏi ethoro ḏaalim mɔŋw ɔɽasa ŋirŋasa dǝŋgǝr-nǝ? Nyii ŋgwɔ kwǝni kwandisa ethi ŋizigwunǝŋǝ-ŋgi-pǝ. 6 Bǝri-mǝ! E-ta ǝŋgi-mǝ Allah ǝccǝ ṯurmunǝ haakima aŋgwɔrɔ? 7 Mǝ ŋǝluŋw ŋiinyi kikiɽǝzi ṯurwǝnnǝlɔ ṯǝthi ŋiɽaŋal ŋǝthi Allah ŋir rerrem, ŋiɽaŋal-ŋi ŋǝthi ŋinith ŋuuŋun, nǝ ŋaaŋa lotho ligitta-nyii kaṯṯi kaka kwizi kwigii? 8 E-ta ŋǝrrǝrsi ŋigii mindaŋ ethi-mǝ iila ŋisaawa? Nǝrnyji ollo lokwo ŋiɽaŋal-ŋi ŋaarir-ŋiŋw, ŋaaŋa lǝṯaarɔŋw, ethi-nyji ǝrri ŋigii mindaŋ mǝr iila ŋisaaw. Hɔkwɔm weeŋen wǝni wirllalɔ.
Kwiti kweere mac kwɔsɔɔɽɔ.
9 E-ta aatha kwɔrɔ marna? A kwuthǝmthir nyiiŋǝ lir Yahuuḏ aatha-gi? Bǝri-mǝ! Kaka mǝnyii-gwɔ aari haakima kerreny tuk naariny-gwɔŋw Yahuuḏ-ŋǝ Yuunaaniiyyiin-yi lirṯa lɔtɔpɔt lɔɽɔmaṯṯɔ tatap ki-ŋikiya-na. 10 Kaka nɔlɔɔthɔnar-gwɔ ŋaarɔŋw,
“Kwiti kweere mac kwirllalɔ, bǝri wala kwɔtɔpɔt.
11 Kwiti kweere mac kwilŋiṯṯisi-nǝ wala kweere kinnǝ ethi
naŋni Allah-lɔ.
12 Limǝ akkɔ tatap ṯaay pir, limǝ ṯɔɔthatha ki-ldɔŋw;
nɔŋweere kweere mac kwǝrrǝsi ŋisaaw, wala kinnǝni
kwɔtɔpɔt.
13 Rɔgɽɔm reeŋen rir kaka ṯimaamɔ ṯɔvɔɔɽɔ.
Ǝṯirsi kǝgɽinyjǝlɔ riŋla-ri reeŋen.
Ŋiya ŋǝthi yimǝw ŋǝṯi ruuthǝ ki-ruunyunǝ reeŋen.
14 Ǝṯi kworo kweeŋen urǝnni ṯɔllɔtha-ŋwɔ-sina ɽee-gi.
15 Ǝṯi yaaŋa yeeŋen fiɽigathici ŋwunyaŋ ethi kette ḏimmiya.
16 Ki-raay-la reeŋen ǝṯi ṯigiirathalɔ-ŋa ṯirɔnyɔna-thi naani.
17 Nǝ ṯaay ṯǝthi ṯibɽǝthǝlɔ pǝt, nǝreere elŋe ḏuṯ.
18 Wala ethi ŋitheny ŋǝthi Allah naani kiyǝnǝ yeeŋen.”
19 Nǝ kirem tǝ, nǝr elŋe ethaarɔŋw, ŋeere nyithak ŋǝṯisi Sherii@a andasi, ŋǝṯɔŋwsi andaci kila linaanɔ ki Sherii@a-na, mindaŋ mǝ ruunyu tatap naani tugwup, nǝ a ṯurmun tatap mithinni hɔkwɔm-yi wǝthi Allah. 20 Kaka niti ninḏi-gwɔ kwizigwunǝŋ kweere mac, ethi suuɽunni kiyǝnǝ yuuŋwun ŋothɽor-ŋi ŋǝthi Sherii@a, kaka nɔrɔ-gwɔ Sherii@a kwilŋithinǝ-nyji ŋkiya-ŋi.
Allah wǝṯi-nyji suuɽi aŋgwɔrɔ kiyǝnǝ yuuŋwun.
21 Nǝ laakin kirem tǝ, ŋirllalɔ ŋǝthi Allah ŋimǝ ruwǝnnǝlɔ ŋiira Sherii@a-na, nɔnḏɔ-ŋi-va kinnǝni Sherii@a-ŋǝ liɽii-li kii ŋǝni ŋuuŋun, 22 nǝtǝ ŋirllalɔ ŋǝthi Allah iila ṯǝmminǝ-thi, ethi Yǝcu Kwɔrɔstɔ-na, ŋǝthi kila tatap lǝmminici ŋunduŋw. Kaka niti ninaanɔ-gwɔ ṯiɽany mac. 23 Kaka mǝr-gwɔ ǝrri tatap ŋikiyaŋi dɔŋw-li, mindaŋ nǝr ɔblaṯi ŋinithi naana ŋǝthi Allah. 24 Limǝrsi suuɽi ne@ma-gi kwuuŋwun kwir haḏiiyyǝ, ṯallithisa-thi ethi Kwɔrɔstɔ-na kwǝni Yǝcu, 25 ŋgwa kwɔmǝ Allah kette ethoro ṯifivrinnǝ ṯǝri ŋin-ŋi ŋuuŋun ethi aavi ṯǝmminǝ-thi. Nǝsi Allah ǝrri ŋɔ ethi ruwǝzi ŋirllalɔ ŋuuŋun. Kaka nimthicǝ-ŋgwɔ nyuŋwsi ṯɔgwori lǝlu-ttuk, ŋiɽaŋal-ŋi ŋǝthi ŋikiya ŋǝri ŋǝthi kerreny ŋwɔ tuk. 26 Ki-lɔɔmɔr-la ṯǝ kɔlɔ ŋwɔ ruwǝzi ŋirllalɔ ŋuuŋun, mindaŋ ethoro kwirllalɔ, e-ta ŋwɔ suuɽi ŋgwa kwǝmminici Yǝcu-ŋw.
27 E-ta aatha kwɔrɔ kwinḏir ethi ǝllinici ki-rogɽo? Ṯende ṯǝthi faayitha-na kweere. Ṯǝthi ṯɔgwagiza-na? Nǝ ki-ṯɔgwagiza-la ṯǝthi ŋothɽor-na? Bǝri-mǝ! Laakin ki-ṯɔgwagiza-la ṯǝthi ṯǝmminǝ. 28 Kaka nilŋithiny-gwɔ ethaarɔŋw, kwizi kwǝṯi suuɽunni ṯǝmminǝ-thi, nǝreere oro ŋǝthi ŋothɽor ŋǝthi Sherii@a mac. 29 Alla Allah wir Allah wǝthi Yahuuḏ ṯɔɽɔk? Witi wir Allah wǝthi Umam tok mac-a? Epa wǝthi Umam wir-pa tok. 30 Kaka nɔrɔ-gwɔ Allah wɔtɔpɔt, ŋwɔsi suuɽi kila luuɽunnǝ ŋiɽaŋal-ŋi ŋǝthi ṯǝmminǝ ṯeeŋen, nǝ kila liti luuɽunnǝ mac ṯǝmminǝ-thi ṯeeŋen tok. 31 E-ta a kwir urṯunǝlɔ wur Sherii@a-gi ŋiɽaŋal-ŋi ŋǝthi ṯǝmminǝ kɔthɔ-a? Bǝri-mǝ! Laakin ǝri-tǝ kǝniny mithǝthǝ tetter.