aza 2
lizi lir yahuuḏ lir kaṯi tɔk
1 ŋwu ṯaŋwu, a kwiti kweḏi ŋuma mac eḏi ŋi keɽini, kwor kwalu, ŋa kweṯi ruzi kwir ter kaṯi; kaka ruzi ŋa gwu kwir ter kaṯi ta, a ŋi ruzi rɔgwɽɔ rɔŋwa kaṯi, kaka ŋa, kweṯi zi ṯeci zi, ŋeṯizerri ŋir ṯa ŋwu tɔk. 2 eṯir elŋece rac eḏaruŋw: leṯizerri ŋir ŋu leṯeḏi hukma weni wofḏana weḏi Allah. 3 a kwari ḏa, kwor kwalu, ŋa kweṯi zi ruzi kla kaṯi leṯizerri ŋu, erri ŋa zi gwu tɔk ta, a kwinḏi eḏartiḏa hukma lu weḏi Allah a? 4 a kwiti kweṯi ruzi ŋurṯua luŋw ŋeḏi ṯimeca ṯuŋwun ṯindinyacalu ṯi manya? miḏaŋw gwu ṯugwori ləlu tuk ŋiɽaŋal ŋi ŋalu. na ta ere elŋece manya ṯimeca kḏu ṯeḏi Allah eḏaruŋw, ṯinaŋna ŋwi eḏi ṯi orlica ŋaŋwu ṯugwori lu? 5 kaka dirnacaŋa gwu eḏorla ṯugwori lu ṯeni ṯimunḏi ta, a ownici rɔgwɽɔ rɔŋwa ŋirŋaza, ŋeḏi lamin leḏi ŋirŋaza linḏi li hukm weni wofḏana weḏi Allah eḏi ruwene lu. 6 kaka inḏuŋw gwu eḏizinḏeḏa lere lere kaka ŋa ŋeṯirzerri; 7 ŋwu zi inḏeḏa kla ŋimiiḏa ŋiaŋ, ŋinḏi eḏi nanniḏa dɔk, leṯinaŋnini ŋiniṯi, na ṯiniiya-na, na ŋimiiḏa ŋeṯinanniḏa dɔk ṯindinyana ṯi nana ṯeŋen ki ŋeḏre-na ŋizaw. 8 lakin kla leṯinaŋni eḏi kikindeci rɔgwɽɔ reŋen afinḏinya, na liti leṯi zi inyizi nana ŋir rerem mac, lakin eṯir inyici ŋuduri nana, linderṯa linḏuŋw zi eḏi zi inḏeḏa ŋirŋaza ŋerya ŋi. 9 kla tatap leṯizerri ŋeni ŋiki, er inḏa ṯurfa ṯupak ṯuronyina ṯi, lir yahuuḏ kerreny, mindaŋ lir yunaani tɔk, 10 lakin kla tatap leṯizerri ŋeni ŋizaw er inḏa ŋiniṯi, ṯiniiya-na ṯi, na ŋiɽena tɔk, lir yahuuḏ kerreny, mindaŋ lir yunaani tɔk. 11 kaka eni gwu lizi libiɽḏina ki yey-na yeḏi Allah.
12 lizi tatap limezerri ŋir ŋiki liti leḏi kuruu-na mac, er ṯa kiraḏa lu liti leḏi kuruu-na mac, na kla tatap limezerri ŋir ŋiki kuruu gi-na, er zi ṯa ṯecizi kuruu gi. 13 kaka iti urir gwu kla leṯi zi neŋne ŋeḏi kuruu leni lofḏana ki yey-na yeḏi Allah mac, lakin kla leṯizerri ŋeḏi kuruu, linderṯa luŋw zi ruzi lofḏana. 14 mezi lizi lir umam, liti lilŋiiḏi kuruu mac, erri ŋiɽaŋal ŋi ŋeḏi kuruu rugwor ri reŋen, mer kinna ere elŋe kuruu mac, eṯir orɔ kla leḏi kuruu kete ki rugwor-na reŋen. 15 eṯir zi ruwece lu ŋa ŋandizazi kuruu ŋimɔlɔḏine rugwor nana reŋen, mindaŋ mezi ŋi rugwor reŋen unḏizi ki tɔk, na ṯortutinena ṯeŋen ṯir-na ṯiɽen, ṯinḏi eḏi zi ruzi kaṯi, ya kezni eḏi zi ruzi lizaw, 16 ki lamin ṯa kla linḏi li Allah eḏi hakwumi ŋejmeṯi ŋeḏi lizi Yecu Kwruztu ŋgi. ŋiɽaŋal ŋu ŋiri ŋeḏi injiil weṯi nyi andazi.
17 lakin ma eni ki rɔgwɽɔ rɔŋwa yahuuḏ kwallaḏi kuruu ṯugwori nana, na kweṯellini Allah yi, 18 kwilŋiica ŋunduŋwu ṯugwori, na kweṯi ŋi amina ŋa ŋofḏana, kaka ilŋiiḏiner ŋa gwu kuruu-na; 19 na ma ari, nyi kweḏi ŋuma rac eḏi zi mulɔ lir lunduŋ, nenyorɔ fori kweḏi kla leṯinani kirim-na, 20 nyi kweḏi ŋuma tɔk eḏi zi firli ki leni liḏiki, na eḏizilŋiiḏini lir lɔkwɽeny, kaka izaŋa gwu kuruu-na ṯilŋiiḏina na ŋirlalu; 21 ŋa, kweṯi zi ma ilŋiiḏini lir ter ta, ere ilŋiiḏini rɔgwɽɔ rɔŋwa tɔk manya? ŋa, kweṯizecaŋw: eṯi nyimari mac, ta a nyimi ŋa? 22 ŋa, kweṯi zi ilŋiiḏini lir ter eḏi zi ere erri ŋir ŋijin mac ta, ezi erri ŋa tɔk ŋir ŋijin a? ŋa, kweṯuwezi kwɔmne kwudaɽmina rii ri eḏi kwoce lu ta, a kweṯi nyimeḏa bulua kweŋen kwɔmne a? 23 ŋa, kweṯellini kuruu gi, a kweṯi ruzi Allah luŋw dapi ŋa gwu kuruu gi la? 24 kaka luḏinar gwu ŋu: eṯir ruzi yiriny yeḏi Allah luŋw ki lizi-na lir umam ŋiɽaŋal ŋi ŋeni ŋalu.
25 ṯuɽuna ṯeḏi luḏruny ṯeḏi fayḏa rac ma inyici kuruu nana; lakin ma dapi kuruu gi la ta, eṯi ṯuɽuna ere eḏi fayḏa kwere mac. 26 ŋwu ṯa, ma kwere kwiti kwuɽuna luḏrunya mac miḏa amra weḏi kuruu, ŋiti ŋofḏana duŋgwun manya eḏi ruzi ŋunduŋwu kaka kwete kwumer uɽu luḏrunya? 27 ŋwu ṯa, a kla liti limerzi uɽu ŋwudrunya mac mer miḏa kuruu, er ŋazi ruzi kaṯi, ŋaŋa leḏi kuruu kimɔlɔḏine na leṯuɽuni ŋwudrunya, lakin na leṯi dapi kuruu gi la. 28 kaka iti urŋw gwu kwere yahuuḏ rerem mac kwir yahuuḏ ki yey-na yeḏi lizi domony, ya iti eni gwu ṯuɽuna ṯeḏi luḏruny rerem tɔk mac muŋw orɔ ṯeḏi aŋna par ŋgi la domony. 29 ŋgwa kwir yahuuḏ rerem kwunder ṯa kwir kwete ṯugwor ṯi, na ṯuɽuna tir rerem tɔk, eṯuŋw orɔ kaka nimra ṯugwor nana kwumɔ Ṯigɽim ṯirlinelu ter uɽu. kwunderṯa kwiti kweḏi ṯortaḏa mac ki lizi-na, lakin eṯuŋw eḏi ṯortaḏa ṯeḏi Allah.
Hɔkwɔm wǝthi Allah.
1 Ŋwɔṯaŋw kwɔr kwaalɔ, a kwiti kwǝthi lɔɽɔja leere mac lǝthi-gwɔ kǝɽinnǝthǝ mǝ kinnǝni oro kwǝndu tok, ŋa ŋgwa kwǝṯi kette kwir ter kaṯṯi. Nǝ mǝ ruusi kwir ter kaṯṯi ta, nǝni kwǝccǝ rogɽo rɔɔŋwa haakima, nǝ ŋa kwir gaaḏi ki-rogɽo rɔɔŋwa nǝsi-ṯǝ aaɽi nǝsi ǝrri-ṯǝ ŋa ŋette-ŋette. 2 A kwilŋithir-pǝ rac ethaarɔŋw Allah wǝṯisi ǝccǝ kila haakima hɔkwɔm-yi wirllalɔ kila lǝṯi ǝrri kwomne kwɔrtɔtɔŋw. 3 Kwɔr kwaalɔ a kwǝṯi mǝnyjǝ aarɔŋw kinaŋw nigitta-ŋǝsi kila kaṯṯi lǝṯisi ǝrri ŋɔrtɔŋw, laakin ǝṯisi-tǝ ǝrri ŋa rogɽo-ri rɔɔŋwa, nǝ ǝṯi kittatha ethaarɔŋw nyii kwarṯitha hɔkwɔma-lɔ wǝṯhi Allah? 4 Alla a kwǝṯi-tǝ ruusi ŋɔrṯɔwalɔ-ŋw ŋǝthi ŋimɽi ŋuuŋun, nǝ mɔmlottoŋw-lɔ kwuuŋwun tok, ṯindinyanna-thi naana ṯuuŋwun? Ŋiti ŋilŋithi-ŋǝsi mac ethaarɔŋw ŋimɽi ŋǝthi Allah ŋǝniŋw ethi mɔmluttuzi ŋaaŋwɔ-lɔ mindaŋ ethi urlǝ ṯɔgwor-lɔ-a? 5 Laakin ɔnḏi-ŋgi kwɔɔŋa ṯɔgwori, nǝ ŋɔdɔrllathɔ ŋǝthi ṯɔgwor ṯɔɔŋwa tok, nǝ attaci rogɽo rɔɔŋwa ŋirŋasa dɔŋw ŋǝthi laamin kila lǝthi ŋirŋasa, linḏi-li hɔkwɔm wirllalɔ wǝthi Allah ethi ruwǝnnǝlɔ. 6 Kaka ninḏisi-gwɔ Allah ethisi inḏǝthǝ tatap leere-leere ŋir kaka ŋa ŋǝrrǝrsi. 7 Ŋwɔsi inḏǝthǝ kila ŋimiitha ŋǝṯi nannitha dok-dok, kila lǝṯisi ǝrri ŋisaaw ṯindinyanna-thi naana ṯǝthi kila lǝṯi naŋninni ŋinithi-lɔ, ṯiiɽǝnǝ nǝ ŋimiitha ŋǝṯi nannitha dok-dok. 8 Nǝ ŋǝthi kila lǝṯi ɔrtɔtanni avindinya naana, mindaŋ nǝrseere iinyici naana mac ŋa ŋir rerrem, laakin nǝrsi iinyici naana ŋa ŋigii, mindaŋ ŋwɔsi balsa ŋirŋasa naana ŋuuŋun ŋǝryǝ-ŋi. 9 A lizigwunǝŋ tatap kaṯṯasi ṯurvǝ-ŋwɔsi ṯiraara-thi kila lǝṯisi ǝrri ŋigii, Yahuuḏ kerreny, nǝ Yuunaaniiyyiin tok. 10 Laakin ŋinith-ŋǝ ṯiiɽǝthi-nǝ nǝ ṯibɽǝthalɔ pǝt, ǝroro ŋǝthi kila tatap lǝṯisi ǝrri ŋisaaw, Yahuuḏ kerreny nǝ Yuunaaniiyyiin tok. 11 Kaka niti nǝṯi-gwɔ Allah ere ṯiɽeny lizi-nǝ mac.
12 Kila tatap lǝrrǝzi ŋigii ŋiira Sherii@a-nǝ, ǝri kiirathalɔ tok liira Sherii@a-na, nǝ kila tatap lǝrrǝzi ŋigii lǝthi Sherii@a-na, ǝrsi ǝccǝ haakima Sherii@a-gi. 13 Kaka niti nɔrɔr-gwɔ kila mac lǝṯi kettice Sherii@a yǝni lirllalɔ kiyǝnǝ yǝthi Allah, laakin nǝroro kila lǝṯisi ǝrri ŋǝthi Sherii@a linḏi ethi suuɽunni. 14 Kila lir Umam liti lǝthi Sherii@a-na mac, mǝrsi ǝrri ŋa ŋinaŋnasi Sherii@a, e-ta lǝni-pǝ lir Sherii@a ki-rogɽo-na reeŋen, niti-vǝ nǝthir kinnǝni Sherii@a-na tok mac. 15 Ŋwɔṯaŋw nǝrǝni ŋurwǝzǝr-silɔ ŋa ŋinaŋnasi Sherii@a ŋɔlɔɔthɔna ki-rigwor-na reeŋen, mindaŋ ǝṯi-ŋi rɔgwor reeŋen ɔnḏi kii, nǝ afkǝr weeŋen tok, nyaamin nyeere-nyeere ǝṯɔŋwsi kettice shǝkiyǝ, nǝ nyithaathɔ ǝṯɔŋwsi rocce. 16 Ki-laamin-la ṯǝ kila linḏi-li Allah ethi ǝccǝ ŋejmethi haakima ŋǝthi lizi Kwɔrɔstɔ-ŋgi kwǝni Yǝcu, ŋiɽaŋal-ŋi ŋǝthi Inyjiil wiinyi.
Yahuuḏ-ŋǝ Sherii@a-gi.
17 Nǝ ŋa ŋgwa kwǝṯi ruusi rogɽo rɔɔŋwa Yahuuḏ, na ǝṯi-gwo kittatha ŋa ŋǝthi Sherii@a, na ǝṯi allini ki-rogɽo rɔɔŋwa Allah-yi, 18 na ǝṯisi elŋe ŋa ŋǝthi ṯɔgwor ṯuuŋwun, ǝṯisi ǝmmini ŋa ŋɔvthanna, kaka nǝccǝr-ŋǝ-gwɔ @allima Sherii@a, 19 na mǝsi elŋe rerrem ethaarɔŋw ŋa kwir gaa-iḏ kǝthi kwunduŋ, nǝ noro fɔɔri kwǝthi kila linaanɔ kirim-nǝ, 20 na ǝṯisi tatti kila lir yǝɽiyǝŋ, nǝ noro mɔ@allim kwǝthi nyɔr, nǝ Sherii@a-gi nǝthi ṯiniŋnitha ṯir min-min ṯǝthi ṯilŋiṯṯana, nǝ ŋa ŋir rerrem tok. 21 Ŋwɔṯaŋw nǝ ŋa ŋgwa kwǝṯisi ǝccǝ @allima lir ter, e-ta ere ǝccǝ rogɽo rɔɔŋwa @allima tok mac-a? Mǝŋi aari bǝshirǝ etheere nyiimi mac, e-ta a nyiimi ŋa? 22 Nǝ ŋa ŋgwa kwǝṯi aarɔŋw ǝṯi rɔɔthɔ kwiijin mac, e-ta oro ŋa kwiijinǝ? Ŋa ŋgwa Wǝṯi firasi kwomne ŋgwa kwǝṯir kwogwɔccelɔ, e-ta a nyiimǝthǝ ŋa hayaakila? 23 Ŋa ŋgwa kwǝṯi ǝllini ki-rogɽo Sherii@a-gi, a kwiti kwǝṯi iiɽi Allah-na mac mǝ kii Sherii@a-na-pǝ? 24 Kaka nɔlɔɔthɔnar-gwɔ ŋaarɔŋw, “Yiriny yǝthi Allah yimǝ ollone ki Umam-na ŋiɽaŋal-ŋi ŋaalɔ.”
25 Ṯuuɽunnǝ ṯǝthi faayitha-na rac rerrem mǝ niŋnithici Sherii@a. Laakin mǝ kii Sherii@a-nǝ tǝ, a ṯuuɽunnǝ ṯɔɔŋwa orlle ŋweere ǝni ṯuuɽunnǝ kwokwony mac. 26 Ŋwɔṯaŋw mǝ kwizi ŋgwa kwiti kwuuɽunnǝ mac mithǝ waamira wǝthi Sherii@a tetter, e-ta ŋweere oro kaka ŋgwa kwuuɽunnǝ mac-a? 27 Nǝr-ṯǝ oroŋw tok kila liti luuɽunnǝ mac, laakin nǝr mithǝ ŋunduŋǝ Sherii@a, e-ta liti lǝŋǝsi kette kaṯṯi ŋaaŋa kila lǝthi Kiṯaab-ŋwɔsi ṯuuɽunnǝ-thi-pǝ, laakin nǝ kii ŋaaŋa Sherii@a-nǝ. 28 Yahuuḏi yiti yir Yahuuḏi parŋgala mac, wala ṯuuɽunnǝ ṯiijinǝ kaŋna. 29 Yahuuḏi yir Yahuuḏ ininyu-ŋgǝnǝ, nǝ ṯuuɽunnǝ nɔŋwɔni ṯuuɽunnǝ ṯǝthi ṯɔgwor ṯigɽim-thi, nǝreere ǝniŋw ŋwɔɔli ŋwɔthi Sherii@a mac. Kwundǝr-ṯǝ ŋgwa kwiti kwinḏi ethaavi ṯiiɽǝnǝ mac naanɔ-gwɔ lizigwunǝŋ, laakin ŋwaavi kǝniny naanɔ-gwɔ Allah.