aza 16
ṯagna
1 nyi kwinḏeḏaŋazi ŋiɽaŋali ŋizaw ŋeḏi eŋgeri kweni fiibi, kwir zamaamaza kweḏi kaniiza kinani kankiriiya, 2 mindaŋ ma ami enji kwayu ŋgwu ki loɽu-na yiriny yi yeḏi Kweleny, kaka kla leni lirlinelu ter eḏi Kwruztu-na, na eḏami meci ŋunduŋwu ki ŋiɽaŋal-na ŋere nyiḏak ŋeŋw zi naŋni nani ŋa gwu, kaka mecaŋw zi gwu luru, na nyuŋwu tɔk.
3 agnicernyi brizkilla ŋwuzi akilla gi, leṯi nyi li oɽmaṯi ki ŋɔḏɽor-na eḏi Kwruztu-na kweni Yecu, 4 limenyi li oɽmaṯi mer kinna eni ŋiɽany, nenyere orɔ nyi kwutuput mac eḏi zi eca zukran, lakin yaniiza tatap yeḏi lizi lir umam; 5 agnicernyi tɔk kaniiza kinani ki duənu kweŋen. agnicernyi abintuuzŋw, kwir kwimɽi kwinyi; kwunderṯa kwir kwiŋna kweḏi azyaŋw kwumorɔ kweḏi Kwruztu. 6 agnicernyi maryamŋw, kwumami aki ŋɔḏɽor ŋwu daŋgal-na. 7 agnicernyi anḏrunikuuz ŋwuzi yunyaaz gi, lir leḏi lizi leri na linani nyi li ki zijin-na, ner eni lizi lupa ki yafur-na, ner orɔ linani eḏi Kwruztu-na kerreny eḏi duŋgwinyi la. 8 agnicernyi ambilyaazŋw, kwir kwimɽi kwinyi eḏi Kweleny-na. 9 agnicernyi urbaanuzŋw kwumenyi li oɽmaṯi ki ŋɔḏɽor-na eḏi Kwruztu-na, na izṯaakiz tɔk, kwir kwimɽi kwinyi. 10 agnicernyi abbalizŋw kweni kwofḏana eḏi Kwruztu-na. agnicernyi kla leḏi duənuŋw kweḏi arizṯubuuluz. 11 agnicernyi hiruḏyuunŋw, kwir kweḏi lizi leri. agnicernyi kla leḏi duənuŋw kweḏi narkizuuz, leṯinani eḏi Kweleny-na. 12 agnicernyi layu kla nden, leni ṯariifena na ṯariifuza, leṯəkizi Kwelenyi ŋɔḏɽor. agnicernyi ŋgwa kweni barziiz kweṯir amɽi, kwumami aki ŋɔḏɽorŋw eḏi Kweleny-na. 13 agnicernyi rufuzŋw, kweni kwupa eḏi Kweleny-na, na lenyin tɔk kwir lenyeri. 14 agnicernyi azinkriiṯuz ŋwuzi filiikun gi, na harmaaz mindaŋ, na lieŋgeri linanir li tɔk. 15 agnicernyi filuluukuz ŋwuzi julya gi, na niryuuzŋw tɔk, na eŋgen kwir kwaw, na ulumbaazŋw, na tatap lirlinelu ter eḏi Kwruztu-na linanir li. 16 agnizar-na wuɽe-wuɽeny ṯagna ṯi ṯirlinelu ter. yaniiza tatap yeḏi Kwruztu yagnaŋazi.
17 nyi kwunaŋnaŋazi, lieŋgeri linyi, eḏizelŋece kla leṯi zi naŋni eḏi zi feḏe lu, na eḏi zi lakaci ŋiɽaŋali-na, mindaŋ eḏi ṯinyini ṯaliima ṯeṯir ŋazi ilŋiiḏini; eṯi zi rucena tuk, 18 kaka lizi ṯa klu liti leṯəkizi Kwelenyi kweri kweni Kwruztu ŋɔḏɽor mac, eṯir zi ṯa əkizi rɔgwɽɔ reŋen domony, na eṯir kekɽinji rugwori lu reḏi kla liti lifirli mac, ŋiɽaŋal ŋi ŋitezir ŋeni ŋami ŋami. 19 ŋiɽaŋal ŋeḏi ṯinyica nana ṯalu ŋimɔ faḏiḏa ezir nana. ŋwu ṯa, eṯi nyi ŋi nyeŋlena ŋeni ŋalu. lakin nyi kweṯi naŋni ŋaŋwuzi eḏeni lifirli ki ŋiɽaŋal-na ŋizaw, na eḏi zi ere ketize yey mac ŋeḏi ŋikya. 20 mezerri ta ŋwu ta, a ma Allah rutaḏa zeyṯaanŋw lu kwrɔp ŋwara ŋi ŋwalu. eḏi ṯimeca ṯeḏi ŋimɽi ŋeḏi Kweleny kweri kweni Yecu Kwruztu nani daŋgal-na.
21 timuṯaawuz, kweṯi nyi gi aki ŋɔḏɽor, kwagnaŋazi; na luukyuz-ŋa yazuun gi, na zuziibaṯruz tɔk, lir leḏi lizi leri. 22 nenyi tɔk, kweni ṯarṯiyuuz, kwulucaŋazi juwaba ŋgwu, kwagnaŋazi yiriny yi yeḏi Kweleny. 23 na gayuz kwagnaŋazi, kweṯi nyi ketize ŋirina na leḏi kaniiza tatap, araazṯuz, kwir zarraaf kweḏi meḏiina, kwagnaŋazi, na eŋgeri tɔk kwir kwor, kweni kawarṯuz. 24 eḏi ṯimeca ṯeḏi ŋimɽi ŋeḏi Kweleny kweri kweni Yecu Kwruztu nani daŋgal-na tatap. emba.
ṯortaḏa
25 eḏi Allah ortani ŋiniṯ ŋi, weṯeḏi ŋuma eḏi firlazi ŋaŋwuzi la ŋiɽaŋal ŋi ŋeḏi injiil ŋeṯinyji andazi, na ṯilŋiiḏina ṯi ṯeḏi Yecu Kwruztu, ŋiɽaŋal ŋi tɔk ŋeḏi ṯiruwenelu ṯeḏi ŋejmeṯ ŋimɔ nanniḏa yiḏleyu yuru ŋulucina; 26 ŋinderṯa ŋimerzi ruweze lu kirem ki ŋeleny-na tatap, ŋiɽaŋal ŋi ŋuluḏizi liɽi amr yi weḏi Allah, weṯimiiḏi dɔk, eḏi zi ŋi mulɔ eḏinyici ŋunduŋwu nana ṯəmna ṯi. 27 eḏi Allah, wutuput weḏi yeyna, ortani ŋiniṯ ŋi dɔk dɔk Yecu Kwruztu ŋgi! emba.
Ṯaaginna.
1 Nyii kwɔŋǝsi icci ŋejimethi ŋiɽaŋal-ŋi ŋǝthi ǝŋgǝri kwǝri kwǝni Fiibii, kwir shammaasa kwǝthi kǝniisǝ kǝthi Kankhariyǝ-ŋw. 2 Ǝnyjǝr ŋunduŋw ki-lɔɔɽɔ-na daŋgal-na yiriny-yi yǝthi Kweeleny ethoro kaka kila lirllinǝlɔ ter, e-ta a mǝcci kwomne-hi kweere nyithak kwɔŋw naŋnatha ŋaaŋwɔsi, kaka nɔrɔŋgwɔ ṯimǝccǝ ṯǝthi littazir na ṯǝthi rogɽo riinyi tok wɔɽe-wɔɽeny.
3 Aaginnicar-nyii Biriskillǝ-ŋwɔsi Akillǝ-gi lir limath liinyi ki-ŋothɽor-na ŋǝthi Kwɔrɔstɔ kwǝni Yǝcu, 4 kaka a-naŋnar-gwɔ ethi ɽeenye rogɽo reeŋen ethi kilǝthi ŋimiitha ŋiinyi, ninyeere oro nyii kwɔtɔpɔt mac kwinḏisi ethisi ǝccǝ shukran, laakin yǝniisǝ tatap yǝthi Umam tok; 5 aaginnicar-nyii kǝniisǝ kinaanɔ ki-dɔɔnɔ kweeŋen tok. Aaginnicar-nyii Abiiniṯuus-ŋwɔ kwir mǝthgǝri kwamɽa-nyii, kwir nda liŋna lǝthi Aasiiyya-ŋw kaka nǝmminicǝ-ŋgwɔ Kwɔrɔstɔ-ŋwɔ. 6 Aaginnicar-nyii Mǝryǝm-ŋwɔ ŋgwa kwakkwɔ ŋothɽor daŋgal-na tig-tig. 7 Aaginnicar-nyii Anḏrɔniikuus-ŋwɔsi Yuun-yaas-gi lir lǝthi jinis kwiinyi lɔɽɔmaṯṯiny-li ki-sijin-nǝ; lilŋithina dedder ki-yaavɔr-na nǝ nǝrǝni lǝmminicǝ Kwɔrɔstɔ-ŋw ker-kerreny duŋgwiny-lǝ. 8 Aaginnicar-nyii Ambliyaaṯuus-ŋwɔ kwir mǝthgǝri kwamɽa-nyii ethi Kweeleny-na. 9 Aaginnicar-nyii Ɔrbaanuus-ŋwɔ kwɔɽɔmaṯṯiny-li ki-ŋothɽor-na ŋǝthi Kwɔrɔstɔ, nǝ Isṯaakhiis-ŋwɔ kwǝṯi-nyii amɽi. 10 Aaginnicar-nyii Aballiis-ŋwɔ kwilŋithina kwir kiiɽi-kiiɽi ethi Kwɔrɔstɔ-na. Aaginnicar-nyji kila lǝthi dɔɔnɔ kwǝthi Arisṯuubuulus. 11 Aaginnicar-nyii Hiiruuḏiyuun-ŋwɔ kwiriny-gi jinisǝ kwɔtɔpɔt. Aaginnicar-nyji kila linaanɔ ethi Kweeleny-na, lǝthi dɔɔnɔ kwǝthi Narkiisuus.
12 Aaginnicar-nyii Ṯarfiina-ŋwɔsi Ṯarfuusa-gi, kila lǝṯi inḏa ṯurvǝ biɽe-biɽeṯ ki-ŋothɽor-na ŋǝthi Kweeleny. Ǝri-nyii aagannici Barsiis-ŋwɔ kwǝṯi-nyii amɽi, kwǝṯi akkɔ ŋothɽor tig-tig ethi Kweeleny-na. 13 Aaginnicar-nyii Ruufas-ŋwɔ ŋgwa kwilŋithina por-por ki-ŋothɽor-na ŋǝthi Kweeleny, nǝ lǝnyin tok kwir kaka lǝnyǝri-ŋw. 14 Aaginnicar-nyii Asiiniikuruṯuus-ŋwɔ, nǝ Baṯruubaas-ŋwɔ, nǝ Harmiis-ŋwɔ, nǝ liyǝŋgǝri kila linaanir-li. 15 Aaginnicar-nyii Fiilulughus-ŋwɔ, nǝ Julyǝ-ŋwɔ, nǝ Niiriiyuus-ŋwɔ, nǝ eŋgen kwir kwaaw, nǝ Ɔlumbaas-ŋwɔ, nǝ liyǝŋgǝri tatap lirllinǝlɔ ter kila linaanir-li. 16 Aaginnathisar-na wɔɽe-wɔɽeny ṯaaginna-thi ṯirllinǝlɔ ter ṯǝthi ruunyu. Yǝniisǝ yǝthi Kwɔrɔstɔ tatap yaaginna-ŋǝsi.
Ṯiccǝ ṯǝthi ŋejmeth ŋirimthithɔ.
17 Nyii kwutuurǝccǝ-ŋǝsi-lɔ tur liyǝŋgǝri liinyi, ethisi aŋraci kila lǝṯi-ŋǝsi ǝnyjici ṯundǝnnǝnǝ, nǝ ŋa ŋifirlli ŋir ṯuwǝn ṯǝthi ṯa@liim ṯǝccǝ-ŋǝsi-thi @allima; ǝṯisi ruccinǝ kinǝŋgwu tuk. 18 Nǝ lizi lirṯaŋw liti lǝṯi ǝkkici Kweelenyi kwǝri kwǝni Kwɔrɔstɔ ŋothɽor mac, laakin ǝṯir ǝkkici kadɔwa keeŋen ŋothɽor. Nǝ ŋiɽaŋal-ŋi ŋǝthi kandisa keeŋen kirna miɽeeny kaami kaka laayɔ, ǝṯirsi kǝɽinyjǝlɔ kila lajla kii. 19 Lizi tatap limǝ neŋne ŋiɽaŋali ŋǝthi ṯiinyicǝ naana ṯaalɔ, ŋwɔṯaŋw nǝnyii-mǝ nyeŋlena naani-ŋa-gwɔ. Laakin nyii kwɔnaŋna-ŋǝsi ethǝthi yǝnǝ ki-ŋiɽaŋal-na ŋisaaw, nǝ ethi suuɽunni ki-ŋiɽaŋal-na ŋigii. 20 E-ta ǝmǝ Allah wǝthi ŋiiɽǝnnǝ kwɔrom Shiiṯaana-na kwɔro-kwɔrop ki-ŋwaara-na ŋwaalɔ.
Ethi ne@ma kwǝthi Kweeleny kwǝri kwǝni Yǝcu Kwɔrɔstɔ nanni ŋaaŋa-li.
21 Ṯiimɔɔthaaws kwǝṯiny-gi akkɔ ŋothor kwaaginna-ŋǝsi; nǝ Luukiyuus-ŋǝ tok Yaasuun-gi, nǝ Suusiibaṯrus liriny-li jinisǝ kwɔtɔpɔt.
22 Nyii kwǝni Ṯarṯiiyuus kwuluuthu juwaaba-ŋgwɔ nyii kwaaginna-ŋǝsi Kweeleny-ŋgi.
23 Nǝ Ghaayuus kwǝṯiny-gwɔ nanni ŋiirinǝ, nǝ kwǝṯi mithǝ kǝniisǝ tatap ŋiirinǝ aaganni ŋaaŋwɔsi tok. Nǝŋǝsi Araasṯus aaganni kwir sɔrraaf kwǝthi mǝḏiinǝ, nǝ ǝŋgǝri kwǝri kwǝni Kawaarṯus tok. [ 24 Ethi ne@ma kwǝhi Kweeleny kwǝri kwǝni Yǝcu Kwɔrɔstɔ naani ŋaaŋa-li tatap. Amiin.]
Ṯin-yǝnǝ.
25 Ǝri nii Allah-na, wǝthi ŋɔma ethi firllasi ŋaaŋwɔ-sila ki-ṯǝmminǝ-nǝ ṯaalɔ, ŋiɽaŋal-ŋi ŋǝthi Inyjiil wǝṯiny-yi aari bǝshirǝ, wir ŋiɽaŋal ŋǝthi Yǝcu Kwɔrɔstɔ, nǝ ṯurwǝnnǝlɔ ṯǝthi ŋejmeth ŋir rerrem ŋa ŋuluccunǝ yithlǝyu yuuru yimǝ ṯamthɔ. 26 Nǝ kire-kirem-ŋgwɔ tǝ, ŋa ŋir rerrem ŋimǝ ruwǝnnǝlɔ par ŋiɽaŋal-ŋi ŋa ŋuluuthusi liɽii; nǝ waamir-yi wǝthi Allah wǝṯi nannatha dok-dok, ŋimǝsi ṯurmun tatap elŋe, mindaŋ mǝr ǝmmini tatap, na ethi enye naana tok.
27 Ethi Allah niini-nǝ wɔtɔpɔt wǝthi yǝnǝ Yǝcu-ŋgi Kwɔrɔstɔ, ethi nannatha dok-dok. Amiin.