aza 15
1 ŋofḏana deŋgeri-na leni lifirli eḏi zi meci leni lajila ki ṯəmna-na, eḏere iɽi rɔgwɽɔ-na reri mac; 2 lere lere deŋgeri-na, er zi iɽi-na liḏaḏu eḏi zi errizi ŋizaw, eḏi zi ŋi firlaci ŋeḏre la ŋeŋen. 3 kaka Kwruztu ŋundu kwende kweṯiɽi rɔgwɽɔ-na ruŋwun; lakin, kaka luḏinar gwu, ŋaruŋw: yufulu yeṯir yi ɔllɔ ŋaŋwu yimɔ iideḏa nyuŋwu nana. 4 kaka ŋa ŋuluḏina kerreny, ner zi lɔ eḏi ŋi ilŋiiḏini nyuŋwuzi, mindaŋ mer zi orti ŋeḏi ṯukwurmɔṯana ṯeḏi lizi, na ŋeḏi ṯimeca ṯimɔ zi Allah inḏeḏa ki lomur ṯa kla, er firlaḏa la eḏi kikindeci ṯəkiza ṯeri kizen kirem. 5 eḏi Allah weṯi zi meci eḏi kwurmɔṯani, na weṯi zi firlazi la tɔk, meci ŋaŋwuzi eḏi kiɽmiḏi ŋiɽaŋal-na, kaka amɽa ŋazi gwu Kwruztu kweni Yecu ṯugwor ṯi ṯutuput, 6 mindaŋ ma eḏi ŋuma eḏi nii Allah-na duŋw li, ṯɔgwɽɔ ṯi ṯutuput, wir Allah na Papa kweḏi Kweleny kweri kweni Yecu Kwruztu.
7 eṯi zi kiṯici rugwori liḏaḏu kaka kiṯicaŋazi gwu Kwruztu ṯugwori ṯuŋwun, eḏi ŋi nii Allah-na. 8 kaka andicaŋazi gwu ŋwu: Kwruztu kwumorɔ kaḏaam keḏi kla leṯi miḏa kuruu keḏi ṯuɽuna ŋwuḏɽunya eḏi zi ruwece lu ŋirlalu ŋeḏi Allah, mindaŋ eḏi miḏeḏa ṯikitaḏa la timer inḏeḏa papaŋwuzi, 9 mindaŋ ma lizi lir umam tɔk er ma nii Allah-na ŋiɽaŋal ŋi ŋeḏi ŋimɽi ŋuŋun. kaka luḏinar gwu, ŋaruŋw:
ŋwu ṯaŋwu enyortaḏa ŋaŋwu ki lizi-na lir umam,
enyi iɽezi yiriny yɔŋwa;
10 ner aruŋw tɔk:
eti nyeŋlena, ŋaŋa lir umam, lizi li luŋwun;
11 ner aruŋw tɔk:
eṯortaḏa Kwelenyi, ŋaŋa lir umam tatap,
na eḏi lizi tatap ortaḏa ŋunduŋwu;
12 na izaya aruŋw tɔk:
ṯufu ṯeḏi yazzi-ŋa tinḏi eḏila,
ŋgwa kwudiɽi eḏi miḏa ŋelenyi ŋeḏi lizi lir umam;
a kla lir umam er kete təkiza kizen duŋgwun-na.
13 eḏi Allah weḏi təkiza kizen urezi ŋaŋwuzi tinyiŋlana, na ŋiɽena təmna ṯi-na ṯalu, mindaŋ ma ṯamḏalu purpur ki ṯəkiza-na kizen ŋuma ŋi ŋeḏi Ṯigɽim ṯirlinelu ter.
buuluz muŋw dedi lizi ŋiɽaŋal ŋi ŋeḏi juwab kwuŋwun
14 nyi kwilŋiicaŋazi ki ṯugwor-na ṯinyi, lieŋgeri linyi, eḏaruŋw, ŋaŋa a limureni ŋizana ŋi, na ṯilŋiiḏina ṯi tɔk, na eṯeḏi ŋuma eḏi meciḏizina ŋiɽaŋal ŋi ŋizaw. 15 ŋimɔ ŋazi loce ŋifirli beṯen ŋɔkwɔ eḏi ŋi ṯiŋayini, kaka inḏeḏa nyi gwu Allah ṯimeca ṯeḏi ŋimɽi ŋuŋun. 16 eḏorɔ kiziiz keḏi Yecu Kwruztu nani gwu lizi lir umam, ki ŋɔḏɽor-na ŋeḏi injiil weḏi Allah. nyi kwunaŋna lizi lir umam eḏorɔ kaka karama keṯəmi Allah-na, kaka enir gwu lirlinelu ter Ṯigɽim ṯi ṯirlinelu ter. 17 ŋwu ṯa, nenyeḏi ŋuma eḏellini eḏi Kwruztu-na kweni Yecu ŋɔḏɽor ŋi ŋinyi ŋeḏi Allah. 18 nyi kwubonye eḏi zi andazi ŋeḏi kwɔmne ṯuɽuk kwumɔ Kwruztu erri duŋgwinyi ŋgi, eḏi mulḏa lizi lir umam eḏinyici ŋunduŋwu nana, ŋiɽaŋal ŋi ŋinyi na ŋɔḏɽor ŋi ŋinyi tɔk, 19 na kwɔmne gi kwir ŋilim kweṯir gi liŋɽi, ŋuma ŋi-na ŋeḏi Ṯigɽim ṯirlinelu ter. ṯaŋwu nenyi rikaḏa ezir lu tatap urzaliim ŋgi mindaŋ menyi upaḏi al yarkun, kwandiza ŋiɽaŋali ŋizaw ŋeḏi Kwruztu dap dap kezir wa tatap. 20 nyi kwiri zurum eḏefici ezir tatap ŋiɽaŋali ŋizaw ŋir injiil, iti mer gwu neŋne kinna yiriny yeḏi Kwruztu mac, kaka iti naŋna nyi gwu mac eḏaci ki ṯugwagiza la ṯeḏi kwizi kwir ter, lakin kaka luḏinar gwu, ŋaruŋw:
21 kla liti limer zi andaci ŋeni ŋundu mac, linde liri leze ŋunduŋwu,
na kla liti limɔ zi neŋne mac, linde liri le zi elŋece.
ray rinaŋna zi buuluz eḏi ri ele
22 ki ŋiɽaŋal-na ŋu eṯir nyi kireḏi ŋwamin ŋwuru eḏila nani ŋa gwu. 23 lakin kirem, kaka iti inḏa nyi gwu ezir kwokwony mac kunuŋ eḏi gwu aki ŋɔḏɽor ŋu, na kaka eṯi nyi gwu orɔ zurum yiḏleyu yuru eḏila nani ŋa gwu, 24 nyi kwaki kizen eḏi raŋḏa ŋaŋwuzi ki ṯay la menyele azbaanya, mindaŋ menyi nani ŋirin-na ŋɔkwɔ ŋami ŋaŋa li ta, er nyi ma kete ki ṯay. 25 nyi ŋgwu ṯa kwinḏi kirem urzaliim kwɔmne gi eḏi zi gi meci leni lirlinelu ter eḏi Kwruztu-na. 26 kaka amir gwu-na kla leḏi makḏunyaŋw, na leḏi akayaŋw, eḏizinḏeḏa kwɔmne kweḏi kla lir luway ki lizi-na leni lirlinelu ter urzaliim; 27 ner amina eḏizerrici ŋu, kaka eḏir gwu keni kəmzu ŋunduŋali; kaka ma gwu lizi lir umam oɽmaṯi ŋunduŋali ki ṯortaḏa-na ṯeḏi rigɽim reŋen, ŋwu ṯa, ner ofḏani deŋgen-na eḏi zi meci kwɔmne gi kweḏi yaŋna. 28 mindaŋ menyji ṯimaca ŋiɽaŋali ŋu kwɔmne gi kwumer zi uzici, e ŋazi ma ṯamḏu eḏele azbaanya. 29 na ŋilŋiicanyji rac eḏaruŋw, menyila daŋgalu ta, enyila ṯortaḏa ṯi turena dedep ṯeḏi Kwruztu.
30 nyi kworacaŋazi, lieŋgeri linyi, Kweleny ŋgi kweri kweni Yecu Kwruztu, na ṯamɽa ṯi ṯeḏi Ṯigɽim ṯirlinelu ter, eḏoɽmaṯi nyi gi teter, eḏerici nyuŋwu Allah ki yiriny, 31 mindaŋ enyji kilaḏa leḏi yahuḏiiyaŋw liti leḏi ṯəmna mac, mindaŋ tɔk eḏi ŋɔḏɽor ŋinyi ŋeḏi urzaliimŋw əmi lizi-na leni lirlinelu ter, 32 na ṯaŋwu enyila daŋgalu, menyi Allah emnici, ṯinyiŋla ṯi-na, er kaṯu wəŋ duŋw li. 33 eḏi Allah weḏi ŋiɽena nani daŋgal-na tatap. emba.
Ǝṯisi ǝminǝ lithaathɔ laakin rogɽo rɔɔŋwa tǝ bǝri.
1 Ŋɔvthanna dǝŋgǝr-nǝ nyiiŋǝ kila lifirlli ki-ṯǝmminǝ-nǝ ethi indinyanni Ṯɔɔvi naana ṯǝthi ṯajla ṯǝthi lithaathɔ; ŋiti ŋɔvthanna mac, ethǝmi rogɽo-na rǝri, 2 nǝ ethi leere-leere dǝŋgǝr-nǝ ǝmi jaara-na kwuuŋwun ŋiɽaŋal-ŋi ŋɔvthannica ŋunduŋw, mindaŋ mǝ ṯǝmminǝ ṯuuŋwun peŋe. 3 Kaka niti nǝmǝ-gwɔ Kwɔrɔstɔ rogɽo-na ruuŋwun mac; laakin kaka nɔlɔɔthɔnar-gwɔ ŋaarɔŋw, “Yɔvɔɔlɔ yǝthi kila lǝṯi-ŋǝ ollollo, yimǝ-nyii aaɽitha naana ṯiɽil.” 4 Nǝ kwomne ŋgwa tatap kwɔlɔɔthɔna ki-ŋwaamin-la ŋwɔthi kerreny-ŋwɔ, nɔŋwɔni kwɔlɔɔthɔna ethi ǝccǝ nyu-ŋwusi @allima, mindaŋ mǝrǝthi ṯǝkkizǝ kizǝn ṯindinyanna-thi naana, nǝ ṯifirlla naana tok ṯimǝ-nyji Yiṯaab Yirllinǝlɔ ter inḏǝthǝ. 5 Ethi-ŋǝsi Allah wǝthi ṯɔgwagiza ṯǝthi ṯindinyanna naana, nǝ wǝthi ṯigandizalɔ kiɽimithi ŋaaŋwɔsi-na, kaka-ṯǝ nǝccǝ-nyji-gwɔ Kwɔrɔstɔ kwǝni Yǝcu @allima, 6 mindaŋ mǝ ǝthi ŋɔma ethi nii Allah-na dɔŋw-li ṯogɽo-thi ṯɔtɔpɔt, wir Allah nǝ Papa kwǝthi Kweeleny kwǝri kwǝni Yǝcu Kwɔrɔstɔ.
Ǝthi ǝccǝ lizi lithaathɔ bǝshirǝ Inyjiilǝ.
7 Ǝṯi ǝmminǝthisi-nǝ wɔɽe-wɔɽeny kaka nǝmminǝ-ŋǝsi-gwɔ Kwɔrɔstɔ ethi nii Allah-na. 8 Nyii kwǝccǝ-ŋǝsi-mǝ ŋwɔ, Kwɔrɔstɔ kwɔmoro khaḏaam kǝthi kila lǝṯi unduni ŋwɔthrɔnya ethi baaŋaci lizi ŋirllalɔ ŋǝthi Allah, ethi ṯimmasi wa@ḏa wa kworo wandicaŋw-yi papa-ŋwsi lǝri, 9 mindaŋ mǝ Umam ǝthi ŋɔma ethi nii Allah-na ŋimɽi-ŋi ŋuuŋun. Kaka nɔlɔɔthɔnar-gwɔ ŋaarɔŋw,
“Ŋwɔṯaŋw ŋa biɽǝthǝ yiriny ki Umam-na,
nyii iiɽǝzi yiriny yɔɔŋwa.”
10 Nǝ nǝraari kwokwony-ŋwɔ,
“Nyiŋlarna ŋaaŋa lir Umam lizi-li lǝthi Allah.”
11 Nǝ kwokwony nǝraarɔŋw,
“Biɽǝthir Kweelenyi yiriny ŋaaŋa lir Umam tatap,
nǝ ethi lizi tatap iiɽi ŋunduŋw-nǝ!”
12 Naaɽi nǝ Isha@ya aarɔŋw,
“Ṯɔvɔɔ ṯǝthi Yǝssǝ ṯinḏi ethiila,
kwundǝr-ṯǝ kwudiiɽi ethi mithǝ Umama;
e-ta ǝmǝ Umam ǝthi ṯǝkkizǝ kizǝn duŋgwun-nǝ.”
13 Ethi Allah wǝthi ṯǝkkizǝ kizǝn urǝzi ŋaaŋwɔsi-na deddep ṯinyiŋla-thina nǝ ŋiiɽǝnnǝ-ŋinǝ tok ki-ṯǝmminǝ-nǝ, mindaŋ mǝ urǝnni-nǝ deddep ṯǝkkeizǝ-thi kizǝn, nǝ ŋɔma-ŋi ŋǝthi Ṯigɽim Ṯirllinǝlɔ ter, mindaŋ mǝ ǝnḏǝlɔ tetter ki-ṯǝkkizǝ-nǝ kizǝn.
14 Liyǝŋgǝri liinyi, nyii kwiliŋica-ŋǝsi rerrem ki-rogɽo-na riinyi ethaarɔŋw ŋaaŋa luurǝnnǝnǝ deddep ŋisanna-ŋi, nǝ nuurǝnninǝ deddep ṯilŋiṯṯa-thina tatap tok, nǝ nǝthi ŋɔma ethǝccǝ rogɽo raalɔ @allima wɔɽe-wɔɽeny. 15 Laakin ŋimǝ-ŋǝsi lɔcca ŋoko ŋuugul-ŋi ethi-ŋi kithǝyini ŋaaŋwɔsi, kaka ninḏǝthǝny-gwɔ Allah ne@ma, 16 ethoro khaḏaam kǝthi Kwɔrɔstɔ kwǝni Yǝcu, ethi ǝccǝ Umama bǝshirǝ Inyjiilǝ kaka kaahin, mindaŋ mǝ Umam oro kiraama ŋga kǝmminǝ Allah kirllinǝlɔ Ṯigɽim-thi Ṯirllinǝlɔ ter. 17 Ŋwɔṯaŋw, ninyǝthi sǝbǝbǝ ethi-gi ǝllini ki-rogɽo ethi Kwɔrɔstɔ-na kwǝni Yǝcu, ki-ŋothɽor-na ŋiinyi ŋǝthi Aliah. 18 Nyii kwɔbɔɔnya ethisi andasi ŋa ṯɔɽɔk ŋǝrrǝsi Kwɔrɔstɔ nyii-ŋgi, mindaŋ ethi mɔlotto Umama ethi iinyici Allah naana, kandisa-gi nǝ ŋothɽor-ŋi, 19 nǝ ŋɔma-ŋi ŋǝthi ŋilim, nǝ ŋa ŋir ŋwundǝ-ŋwundǝ, nǝ ŋɔma-ŋi, ŋǝthi Ṯigɽim Ṯirllinǝlɔ Ter tok. Ŋwɔṯaŋw ninyeele ki-thaay-la tatap min Urshaliim nǝ ǝzir wirikathalɔ tatap mindaŋ nǝnyii ɔppathi Liiriikuun nǝnyji-gwɔ andasi ŋir min-min ŋǝthi Inyjiil wǝthi Kwɔrɔstɔ. 20 Nyii kwǝthi sɔɔrɔma kwɔppa ethaari bǝshirǝ Inyjiilǝ kǝzir witi wɔmǝr-gwɔ andasi Kwɔrɔstɔ-ŋw kworo kinnǝni mac, mindaŋ etheere acci ki-ṯɔgwagiza-la ṯǝthi kwizi kweere mac,
21 kaka nɔlɔɔthɔnar-gwɔ ŋaarɔŋw,
“Kila liti landicarsi ŋundu-ŋgi ḏuṯ, ǝroro leese ŋunduŋw,
nǝ kila liti limǝsi neŋne ŋuuŋun ḏuṯ, lindǝr-ṯǝ lǝsi elŋe.”
Bɔɔlɔs anaŋna-ŋgwɔ etheele Rɔɔma.
22 Sǝbǝb kwundǝr-ṯǝ ŋgwɔ kwǝṯi-nyii rii keereny, etheere iila naaniŋa-gwɔ mac. 23 Laakin kire-kirem-ŋgwɔ tǝ, kaka niti nǝthiny-gwɔ ǝzir-nǝ ki-libǝlǝḏ-nǝ kɔlɔ mac, ethi-gwɔ akkɔ ŋothɽor, nǝ kaka mǝnyii-gwɔ akkɔ kizǝn tok yithlǝyu yuuru ethiila etheese ŋaaŋwɔsi, 24 nǝ nyii ŋgwɔ kwigittathɔ etheese ŋaaŋwɔsi ki-thaay-la ṯiinyi kwinḏi etheele Ispaaniiya, mindaŋ mǝnyii naani ŋiirinǝ ŋinyiŋla ŋaaŋa-li kwokwo, e-ta ǝrnyii-mǝ mǝcci ethi kette nyuŋw kithaay. 25 Nǝ kire-kirem-ŋgwɔ tǝ, nyii ŋgwɔ kwinḏi etheele Urshaliim kwǝppicǝsi kila lirllinǝlɔ ter kinanaŋw ṯimǝccǝ; 26 kaka mǝgwɔ Mǝkḏuuniiyyiin-ŋǝ Akha-iiyyiin-ŋǝli aamina ethi cugwǝcci lɔwaaya linaanɔ ki-lizi-nǝ lirllinǝlɔ ter lǝthi Urshaliim-ŋwɔ; 27 nǝrǝni laamina beṯṯen tok ethisi ǝrri ŋɔ, kaka nǝthir-gwɔ kǝmzu ŋundu-ŋǝli rerrem, kaka mǝgwɔ Umam iila mindaŋ mǝr ɔɽɔmaṯṯi ki-barka-na kwǝthi ŋiɽaŋal ŋǝṯhi Allah, ŋwɔṯaŋw nǝrmǝ ɔvthanni ethisi mǝcci tok barka-gi kwǝthi ṯurmun-nǝ. 28 Ŋwɔṯaŋw mǝnyji ṯimmasi ŋa rac, nǝ mǝnyji inḏǝthǝ ŋgwa kwuzugwǝzǝr rac tǝ, nyi-mǝ iila nyii ṯamthɔ daŋgal-ŋgi kwinḏi etheele Ispaaniiya; 29 nǝ nǝnyii elŋe tok ethaarɔŋw mǝnyii iila naani-ŋa-gwɔ, nyiila kwurǝnnǝnǝ deddep barka-ŋi kwǝthi Kwɔrɔstɔ. 30 Nyii ŋgwɔ kwutuurǝccǝ-ŋǝsi-lɔ tur liyǝŋgǝri Kweeleny-ŋgi kwǝri kwǝni Yǝcu Kwɔrɔstɔ, nǝ ṯamɽa-thi ṯǝthi Ṯigɽim, mindaŋ mǝ kette ŋɔma tig-tig nyii-gi ethǝrici nyuŋwɔ Allah kiyiiriny, 31 mindaŋ mǝnyji kilatha kila liti lǝthi ṯǝmminǝ mac Yahuuḏiiyyǝ-nǝ, mindaŋ mǝ kila lirllinǝlɔ ter linaanɔ Urshaliim ǝmmini ŋothɽor ŋiinyi, 32 ŋwɔṯaŋw mindaŋ mǝnyii iila ŋiɽaŋal-ŋi ŋǝthi ṯɔgwor ṯǝthi Allah naaniŋa-gwɔ ṯinyiŋla-thina mindaŋ nyii kaṯṯɔ wǝŋ wokwo naani-ŋa-gwɔ. 33 Ethi Allah wǝthi ŋiiɽǝnnǝ naani ŋaaŋa-li tatap. Amiin.