aza 13
ṯinyiza hakwuuma nana
1 eḏi lizi tatap ketize ŋiɽaŋali yey ŋeḏi hakwuuma, kaka eṯi gwu zulṯa tatap ruḏa nani gwu Allah, na kla leḏi zulṯa kirem, eṯir miḏa ŋiɽaŋal ŋi ŋeḏi Allah. 2 ŋwu ṯaŋwu, ma kwere ṯinyini zulṯa, eṯuŋw ṯinyini ŋiɽaŋali ŋimɔ zi Allah kete, mindaŋ na kla leṯi ṯinyini, er kaṯazi hukma. 3 kaka eṯir gwu ere ṯenye hakwuuma mac leṯizerri ŋeni ŋizaw; leṯizerri ŋeni ŋiki ta, linderṯa leṯi ṯenye. ma ere naŋni eḏi ṯenye ŋgwa kweḏi zulṯa mac, eṯizerri ŋeni ŋizaw, mindaŋ ta a ma əmi ŋunduŋwu-na, 4 kaka eṯuŋw gwu orɔ kaḏaam keḏi Allah eḏi meci ŋaŋwuzi. lakin mezerri ŋeni ŋiki ta, eṯi tenye, kaka eṯuŋw gwu ere api kalala kiira fayḏa mac; eṯuŋw orɔ kaḏaam keḏi Allah eḏi ketize ŋgwa ŋirŋaza ŋuŋun ŋeṯuŋw zi erri ŋeni ŋiki. 5 ŋwu ṯaŋwu, ŋofḏana eḏenye nana; ner ere orɔ ṯuɽuk mac eḏi ŋi kilaḏa ŋirŋaza ŋeḏi Allah, ner orɔ tɔk eḏi zi erri ŋizaw kaka ŋeṯi zi tugwor ṯizaw andazi. 6 ŋiɽaŋal ŋi ŋu tɔk, a leṯi kekite ṯulba, kaka eti gwu kla leḏi zulṯa orɔ yaḏaam yeḏi Allah eḏi zi aŋraci ŋu. 7 eṯi zi inḏeṯa tatap kweni kwofḏana, muŋw orɔ ṯulba ṯeḏi kwizi, eṯi zi inḏeṯa kla leṯallila ṯulba kḏu; muŋw orɔ ṯulba ṯeḏi kwɔmne kwir-na ter ter, eṯi zi inḏeṯa tɔk; mer orɔ ṯiniiya-na, na iɽi ŋgi-na tɔk, eṯi zi inḏeṯa kla leni lofḏana.
ṯamɽa ṯir kaka ṯeḏi ŋiaŋga
8 eṯi ɽanyazi kəmzu kɔŋwa tatap, illi eḏamɽaḏizina; ŋgwa kweṯizamɽi liḏaḏu nuŋw orɔ kwumɔ ṯimazi kuruu kworɔ dap. 9 na amr wu weni ŋwu: eṯere orɔ kwijin mac; eṯere eɽenye kwizi mac; eṯere nyimi mac; eṯi ŋa gwu ŋuway ere yaḏa mac; na amr were wir ter tɔk, eṯuŋw orɔ ŋiɽaŋal ŋutuput ŋeni ŋwu: eṯizamɽi liḏaḏu kaka eṯi gwu amɽi rɔgwɽɔ rɔŋwa. 10 ṯamɽa ṯiti ṯeṯi zi errici kwir ter ŋiki mac; ŋwu ṯa, eṯi ṯamɽa orɔ ṯimɔ ṯimazi kuruu kworɔ dap.
lamin leḏi Kwruztu muŋw adiḏi eḏila
11 eṯi zi ṯa erri ŋwu kaka ilŋiicaŋa gwu lomuri ṯa klu, linde liri eḏi li kiɽṯi ki ŋwaru, kaka menyji gwu ŋigileḏa nanazi keṯɔk kirem, eḏi lomur la ṯa kla emnar gwu ṯay ṯi; 12 kulu kinaŋna eḏi ṯamḏu, na lamin liaŋ adiḏi eḏila. er ṯa pa alliḏa ŋɔḏɽor lu kiṯay ŋeḏi kirim, er kenne kwɔmne kaka orṯa weḏi fori. 13 eḏi ŋeḏre ŋeri eni ŋizaw kaka kla leṯi nani kaŋwun-na, ŋiti ŋir kaka ŋeḏre ŋeḏi kla leṯele ki zifir-na eḏi ṯiṯi mindaŋ eḏurleli, eḏaḏifayini, eḏizerri ŋir ŋijin, mindaŋ eḏurreḏi, na eḏi ke ŋiɽany. 14 lakin eṯi kenne Kwelenyi kweni Yecu Kwruztu, na eṯere kiḏayinici yaŋna yalu mac eḏi zi bii kaduwa gi.
Ṯiinyicǝ hakwɔɔma naana.
1 Ethi lizi tatap iinyici lizi naana kila lǝthi sɔlṯa kwǝthi hakwɔɔma. Kaka nǝṯi-gwɔ sɔlṯa iila tatap naanɔ-gwɔ Allah, nǝ kila limthi kire-kirem-ŋgwɔ nǝ Allah oro winḏǝthǝsi. 2 Ŋwɔṯaŋw mɔŋw dirnacci kweere kila limthi sɔlṯa tǝ, nɔŋwɔni kwɔdirnathalɔ ŋgwa kwǝlli Allah-na, nɔŋwɔni kwɔvthannica hɔkwɔma. 3 Kaka niti nǝṯi-gwɔ kila lisaaw ere ṯeenye lisɔlṯaana mac, laakin nǝroro kila ligii lǝṯi ṯeenye. A kwɔnaŋna etheere ṯeenye ŋgwa kwumthi sɔlṯa mac-a? Nǝ ǝrrǝsi-mǝ ŋa ŋisaaw, mindaŋ mɔŋw aamina ŋaaŋgi, 4 kaka nɔrɔ-ŋgwɔ khaḏaam kǝthi ŋothɽor ŋǝthi Allah ŋisaaw ŋǝni ŋɔɔŋa. Laakin mǝsi ǝrri ŋigii tǝ, a ṯeenye, kaka niti nǝṯɔ-ŋgwɔ appi kaalala-lɔ domony mac; kaka nɔrɔ-ŋgwɔ khaḏaam kǝthi Allah, ǝṯɔŋwsi ǝccǝ kila haakima ŋirŋasa-ŋi ŋǝthi Allah kila lǝṯisi ǝrri ŋigii. 5 Ŋwɔṯaŋw nǝr ɔvthanni ethi iinyici sɔlṯa naana, nǝreere ǝniŋw ethi kilatha ŋirŋasa ŋǝthi Allah ṯɔɽɔk mac, laakin nǝroro ŋǝthi ṯɔgwor tok. 6 Nǝ nǝrṯoro ŋǝthi sǝbǝbǝ ŋgwɔ ethi kwette kette ṯɔlba tok, kaka nɔrɔ-gwɔ lisɔlṯaan yaḏaam yǝthi Allah, kaka nǝṯir-gwɔ ṯǝ ǝrri ŋothɽor ŋɔ. 7 Ǝṯisi inḏǝthǝ tatap ŋgwa kweeŋen kwɔnaŋnar, ɔrɔ-gwɔ ṯɔlba, ǝsi inḏǝthǝ kila lǝthi ṯɔlba ŋa, nǝ tok ṯǝthi kwomne kwaalɔ wɔɽe-wɔɽeny, ǝṯi iiɽinǝ ŋgwa kwɔvthannica ṯiiɽǝ-nǝ, nǝ ǝṯi nii-naǝ ŋgwa kwɔvthannica ṯiniyǝnǝ.
Ṯimǝccithisǝ-nǝ wɔɽe-wɔɽeny.
8 Ǝṯi-gi ǝthi kweere kǝmzu mac, illi ethi amɽathisina wɔɽe-wɔɽeny, mɔŋw amɽi kweere jaara kwuuŋwun nɔŋwɔni kwiinyicǝ Sherii@a naana. 9 Nǝ waamir wǝṯaarɔŋw, “Ǝṯeere oro kwiijin mac, eṯeere kette ḏimmi mac, ǝṯeere nyiimi mac, ǝṯi-ŋa ŋɔwaay ere yatha mac.”
Wɔ tatap nǝ wir ter tok, nɔŋw ɔɽɔmaṯṯi tatap ethi wɔ-la wǝni-ŋwɔ, “Ǝṯamɽi jaara kwɔɔŋa kaka nǝṯi-gwɔ amɽi rogɽo rɔɔŋwa.” 10 Ṯamɽa ṯiti ṯǝti ǝrrici jaara kwuuŋwun ŋiɽaŋali ŋigii mac, ŋwɔṯaŋw ǝṯi ṯamɽa ǝni ṯǝṯi ṯimmasi waamira kworo.
11 Nǝ ŋɔ tatap nǝsi elŋe ŋǝthi lɔɔmɔr kala, kaka mǝgwɔ lɔɔmɔr laalɔ ṯimmayini ethi kiɽiṯa ki-ŋwaarɔ-na. Kaka mǝnyji-gwɔ ŋiglǝthǝ naanasi keṯṯok kirem ethi kerreny-ŋwɔla kinaŋw nǝmminǝr-gwɔ. 12 Kulu kimaadithi ethi ṯamthɔ, nǝ aaŋwɔn aadithi ethi allitha. Ǝri urṯunǝlɔ ŋothɽor-ŋi ŋa wur ŋǝthi kirim, mindaŋ mǝr kenne kwomne kwǝthi fɔɔri. 13 Ǝri aami eleŋw kaka lizi lǝṯi iirǝrǝlɔ ki-fɔɔri-na kwǝthi aaŋwɔn, etheere athvayini wala ethi urlǝli mac, wala ŋeere ŋir ŋǝrṯǝmbǝl, wala ŋudur, wala ŋurrǝthǝ, wala ethi kee ŋiɽany. 14 Laakin a kenne Kweelenyi kwǝni Yǝcu Kwɔrɔstɔ-ŋw, mindaŋ ǝsi-ṯǝ rilliŋw ŋa ŋǝṯisi aŋna naŋni ethi ṯimmaci sɔɔrɔma kwuuŋwun kworo.