aza 1
ṯagna
1 nyi kweni buuluz kwulucaŋazi juwaba ŋgwu, kwir kaḏaam keḏi Yecu Kwruztu, kwornuṯi ŋwi eḏeni kafur, kimɔ ŋwi irlelu ter eḏizandaci ŋiɽaŋali ŋizaw ŋeḏi Allah. 2 na Allah kitaḏa ŋiɽaŋal ŋi ŋu kwizatuk liɽi li luŋwun, ner zi lɔ ŋeni ŋirlinelu ter. 3 ner orɔ ŋeḏi Tor tuŋwun, turuḏi ki ŋelŋe ŋeḏi dauḏ-ŋa aŋna yi wir ŋizigwunaŋ, 4 lakin na Allah ruwezi ŋunduŋwu lu kwir Tor tuŋwun Ṯigɽim ṯi ṯir ŋizana, ṯirlinelu ter, diɽaŋw gwu ŋuma ŋi ki ŋiɽany-na; kwunderṯa kweni Yecu Kwruztu, kwir Kweleny kweri. 5 na ŋundu ŋgi nenyafi ṯimeca ṯeḏi ŋimɽi ŋeḏi Allah, na ŋafura yiriny yi yuŋwun eḏi ŋi meci lizi leḏi ŋeleny tatap eḏenye nana ṯəmna ṯi, 6 na ŋaŋa tɔk deŋgen-na, leni kla limɔ zi Yecu Kwruztu ornuṯi eḏorɔ luŋwun.
7 ŋaŋa tatap linani ruumiya lamɽa zi Allah, lornuṯiŋw zi eḏeni lirlinelu ter eḏi Kwruztu-na, eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri, na Kweleny kweni Yecu Kwruztu.
buuluz muŋw naŋni eḏele ruumiya
8 nyi kweca Allah zukran kweni ŋaŋa tatap, Yecu Kwruztu ŋgi, kaka eṯir zi gwu andaci ṯurmuna nana ndendeṯ ŋeḏi ṯəmna ṯalu. 9 kaka ilŋiiḏi gwu Allah rac, weṯi nyi əkizi ŋɔḏɽor ṯigɽim ṯi tinyi ki ŋiɽaŋal-na ŋizaw ŋeni Tor tuŋwun, eṯi nyi erici ŋaŋwuzi ki yiriny dɔk dɔk; 10 na eṯi nyi tureci ŋunduŋwu lu eḏi daɽmaci nyuŋwu ṯay ṯugwor ṯi ṯuŋwun, ŋiɽaŋal ŋi ŋere nyiḏak, eḏi nyi ṯi ila nani ŋa gwu. 11 kaka ur nyi gwu zurum eḏi raŋḏa ŋaŋwuzi, eḏi kannaci ŋaŋwuzi haḏiya were weḏi Ṯigɽim ṯirlinelu ter, mindaŋ ma enji ŋwara lu teter; 12 ŋeni ŋu, er firlaḏizina, ŋaŋa tɔk nyi tɔk, ṯəmna ṯi ṯeri ter ter. 13 na lieŋgeri linyi, nyi kwunaŋnaŋazi eḏi zi elŋece ŋeni nyi, ŋinaŋna nyi ŋi nyamin nyuru eḏila nani ŋa gwu (lakin nenyere inḏa ṯay mac), eḏinḏa nyoru nyere daŋgal-na tɔk, kaka eṯi nyi gwu inḏa ki lizi-na lir umam liḏaḏu. 14 nyi kweḏi kəmzu nani gwu lizi lir yunaani, na nanir gwu lir ter tɔk; nani gwu kla leḏi yeyna na kla liti leḏi yeyna mac; 15 ŋwu ṯa, eṯi nyi nani cugwɔ-cugwɔp eḏandaci ŋaŋwuzi tɔk linani ruumiya ŋiɽaŋali ŋizaw ŋir injiil.
ŋiɽaŋal ŋir injiil ŋiri ṯaŋ
16 kaka eṯi nyi gwu ṯurony ere ye mac ŋiɽaŋal ŋi ŋir injiil, kaka urŋw gwu ŋuma ŋeḏi Allah eḏi zi ŋi kileḏi ndendeṯ leḏi ṯəmna, kla leni yahuuḏ kerreny, na kla tɔk leni yunaani. 17 kaka ki ŋiɽaŋal-na ŋu, eṯi gwu ṯofḏana ruwene lu kḏa tir haḏiya ṯinḏi nani gwu Allah ṯəmna ṯi, na eṯir afi ṯəmna ṯi; kaka ŋa ŋuluḏina ŋeni ŋu: ŋgwa kweni kwofḏana ṯəmna ṯi, kwunderṯa kwumiiḏi.
ŋudur ŋeḏi kla lir umam
18 kaka eṯi gwu ŋirŋaza ŋeḏi Allah ruḏa kilerena nani gwu ŋudur ŋeḏi kla liti leṯi ṯiŋayini Allah mac, na ŋeḏi kla leṯizerri ŋiti ŋofḏana tɔk mac, na eṯir zi ṯinyini ŋirlalu ŋiɽaŋal ŋi ŋeŋen ŋiti ŋofḏana mac. 19 kaka eṯi gwu ŋiɽaŋal ŋeni Allah ruwene lu ki lizi-na ndendeṯ, kaka mezi gwu Allah ruwece lu. 20 ki lomur likituŋw li ṯurmuna kwizatuk mindaŋ kirem kwumorɔ, eṯir eḏi ŋuma eḏelŋece kwɔmne kwuŋwun kwiti kweṯijini mac, kwir ŋuma ŋuŋun ŋeṯinanniḏa dɔk ŋilim ŋi, kwɔmne-na kwukitina; ŋwu ṯa, ner ere eḏi ŋuma mac eḏi ŋi keɽini ŋere mac. 21 kaka mer gwu keni elŋe Allah ta, ner ere nii ŋunduŋwu-na kwir Allah mac. ner ere eca ŋunduŋwu zukran tɔk mac, mindaŋ eṯi ṯortutinena ṯeŋen ere eḏi fayḏa-na kwere mac, na rugwor reŋen, iti eḏir gwu yeyna mac, orɔ kirim. 22 arir gwu ŋwu: nyiŋa lifirli ki, ner eni liḏiki, 23 ner upi ŋiniṯi-na ŋeḏi Allah, weṯinariniḏa dɔk, kwɔmne gi kwudaɽmaḏar rii ri edaɽani lizigwunaŋi leṯay, ya ndowa, ya kwɔmne kweḏi yaɽi-na, ya ŋgwa kweṯele yari yelu.
24 ŋwu ṯaŋwu, kaka ur gwu rugwor reŋen zurum kwiki, nezi Allah ala rii eḏi nani ki ŋikya-na, mindaŋ ner errizeza yaŋna yeŋen luŋw, 25 kaka uper gwu ŋiɽaŋal-na ŋir rerem ŋeni Allah ŋiɽaŋal ŋi ŋir ŋəluŋ, ner kwɔkwoce kwɔmne lu kwudaɽmina, ki lobi leḏi ŋgwa kwukita kwɔmne tatap, kweni Kwortana dɔk dɔk. emba.
26 ŋwu ṯaŋwu, nezi Allah ala rii eḏi nani kaduwa-na keŋen kiki tga-tga. na law leŋen, ner zi duŋgweci ŋeḏi law ki yaŋna-na yeŋen ner zi erri ŋiti ŋir ŋeḏi law mac, 27 na lor leŋen tɔk, ner zi duŋgweci ŋeḏi lor-ŋa law li, ner dunnini zurum gi kwiki beṯen eḏi naŋnaḏizina lir lor; nezi lor erreḏizina ŋikyaḏa lu cil lor li, ner inḏa jiiza ki rɔgwɽɔ-na reŋen kwubiɽḏi ŋiɽaŋali-na ŋakir zi ŋi pir.
28 ṯaŋwu, kaka iti naŋnar gwu eḏelŋe Allah mac, nezi Allah ala rii eḏi naŋni ṯortutinena ṯiki, eḏizerri ŋeni ŋiki tɔk. 29 ner ureni rugwor-na ŋikya ŋi lu ŋete nyiḏak, ŋudur, ŋuway yaḏa, ɔɽɔm, ŋeṯir ŋi ke ŋiɽany, ṯortutinena eḏi kete ḏimya, ŋerya, ṯikeɽinjelu, ŋudurlaḏu, ŋiɽaŋal ŋeṯir zi ŋi bɔŋwuḏi, 30 ṯuŋwun, ŋikya ŋeṯi zi Allah uwezi, ŋeṯir zi ŋi erri luŋw, ṯellineḏa nana, ṯolaḏiza, ṯiṯiŋayina ṯeḏi ŋikya eḏizerri, na ŋiti ŋeṯir ŋi ketize ŋiɽaŋali yey mac ŋeḏi rernyin-ŋa lenyin ŋali, 31 liḏiki, leṯi kirazi ṯikitaḏa ṯeŋen, liti leḏi ṯamɽa-na mac, liti leṯi zi eḏi zi ŋimɽya-na tɔk mac. 32 eṯir elŋece rac hukma wofḏana weḏi Allah eḏaruŋw: kla leṯizerri ŋir ṯa ŋu leŋgay, lakin eṯir zi ere erri ŋunduŋa tuɽuk mac, eṯir zi keni emicina kla leṯizerri.
1 Nyii kwɔro kwǝni Bɔɔlɔs kwɔlɔcca-ŋǝsi, kwir khaḏaam kǝthi Yǝcu Kwɔrɔstɔ, kwɔrnɔṯɔ-nyii ethoro kaavɔr. Lǝlliny-nǝ ethaari bǝshirǝ Inyjiilǝ wǝthi Allah, 2 wɔgittathɔŋw-yi kwuzǝttuk, ki-riŋla-la rǝthi liɽii luuŋwun, nǝ ki Yiṯaab-na Yirllinǝlɔ ter, 3 Inyjiil wa wǝni Tɔr tuuŋwun turuuthu ki-ṯɔvɔɔ-na ṯǝthi Ḏaawḏ ŋiɽaŋal-ŋi ŋǝthi aŋna. 4 Nɔŋworo Tɔr tǝthi Allah ŋɔma-ŋi ŋǝthi Ṯigɽim ṯǝthi ŋirllinǝlɔ ter, ṯidiiɽǝ-thi ṯuuŋwun ki-ŋiɽany-na ŋǝthi, Yǝcu Kwɔrɔstɔ kwir Kweeleny kwǝri. 5 Nǝr aavi ne@ma ŋundu-ŋgi, nǝ ŋaavɔr tok, ethi mɔlotto lizi lǝthi ǝzir tatap, ethi ǝmmini nǝ ethi enye naana, ŋiɽaŋali-ŋi ŋǝthi yiriny yuuŋwun. 6 Nǝṯǝ oro ŋaaŋa rogɽo-ri raalɔ lɔrnɔṯɔrsi ethoro lǝthi Yǝcu Kwɔrɔstɔ.
7 Ŋaaŋa kila tatap lǝṯisi Allah amɽi linaanɔ Rɔɔma, lǝnyjicǝrsi yiriny yǝni lirllinǝlɔ ter: nyii ŋgwa kwithiŋaca-ŋǝsi ne@ma nǝ ṯaaginna ṯinḏi naanɔ-gwɔ Allah wir Papa kwǝri nǝ Kweeleny kwǝni Yǝcu Kwɔrɔstɔ.
Sɔɔrɔm kwǝthi Bɔɔlɔs etheele ethi raaŋitha Rɔɔma-ŋwɔ.
8 Nyii kwǝccǝ Allah wiinyi shukran ker-kerreny Yǝcu Kwɔrɔstɔ-ŋgi ŋiɽaŋal-ŋi ŋǝni ŋaaŋa tatap kaka mǝgwɔ ṯurmun tatap neŋne ŋiɽaŋali ŋǝthi ṯǝmminǝ ṯaalɔ. 9 Allah wir shuhuuḏ kwiinyi wa wǝṯi-nyii ǝkkici ŋothɽor ṯigɽim-thi ṯiinyi ṯǝbshiir-thi ṯǝthi Inyjiil wǝṯhi Tɔr tuuŋwun. Nyii kwiti kwǝṯi kiirathi mac ethi ɔrti ŋaaŋwɔsi kworo nyaamin tatap ki-thaara-na ṯiinyi kiyiiriny. 10 Ǝṯiny-gwɔ ɔṯalɔ kithaara-na kiyiiriny mindaŋ mǝroro ŋǝthi ṯɔgwor ṯǝthi Allah nyii-ŋgi ethiila naani-ŋa-gwɔ. 11 Kaka nǝthiny-gwɔ sɔɔrɔma beṯṯen etheese ŋaaŋwɔsi, mindaŋ mǝŋǝsi inḏǝthǝ haḏaaya wokwo wǝthi Ṯigɽim Ṯirllinǝlɔ ter, mindaŋ ethi firllasi ŋaaŋwɔ-sila. 12 Ŋǝniŋw, ethi firllathisila ṯǝmminǝ-thi wɔɽe-wɔɽeny, kitha taalɔ nǝ ṯiinyi tok. 13 Nyii kwɔnaŋna-ŋǝsi liyǝŋgǝri ethisi elŋe ŋǝniŋw, nyii kwǝṯi naŋni dok-dok ethiila naaniŋa-gwɔ, laakin ǝṯi-nyii ǝni kwumthinǝ ethiila, mindaŋ ethisi ǝginǝ lokwo daŋgal-na, kaka-ṯǝ nǝginǝ-nyji-gwɔ lokwo lǝthi Umam tok. 14 Nyii kwǝthi kǝmzu Yuunaaniiyyiin-yi nǝ baraabara tok, nǝ ki-lizi lǝthi yǝnǝ nǝ lir yǝɽiyǝŋ domony tok. 15 Ŋwɔṯaŋw nǝnyii naŋni beṯṯen tok ethi ǝccǝ ŋaaŋwɔsi bǝshirǝ Inyjiilǝ ŋaaŋa kila linaanɔ Rɔɔma.
Ŋɔma ŋǝthi Inyjiil.
16 Ṯɔrɔny ṯiti ṯǝṯi-nyii yee-na mac ṯǝni Inyjiil; wir ŋɔma ŋǝthi Allah ŋǝthi ŋiglǝthǝ ŋǝthi kila tatap lǝthi ṯǝmminǝ, ki Yahuuḏ kerreny nǝ Yuunaaniiyyiin tok. 17 Duŋgwun-ŋgi nǝ ŋirllalɔ ŋǝthi Allah ruwǝnnǝlɔ ethoro ŋǝthi ṯǝmminǝ ṯir min-min kaka nɔlɔɔthɔnar-gwɔ ŋaarɔŋw, “Kwirllalɔ kwǝṯ miithi ṯǝmminǝ-thi.”
Ŋirŋasa ŋǝthi Allah.
18 Kaka nǝṯi-gwɔ ŋirŋasa ŋǝthi Allah ruuthǝ ki-leere-na ǝṯir rɔɔthatha lizi naana ṯuwǝn kila lǝṯoro ḏiḏ Allah, nǝ ŋikiyaŋi naana tok ŋǝthi lizi kila lǝṯisi kwuɽubǝthǝlɔ ŋa ŋir rerrem ŋikiya-ŋi ŋeeŋen. 19 Nǝ kaka ŋa ŋǝŋgirsi ǝthici ŋɔma-na ethisi elŋe ŋǝni Allah, nǝsi Allah ruwǝzǝlɔ por-por, kaka nibaaŋicasi-gwɔ Allah-lɔ por-por. 20 Kinaŋw tuk nigittina-gwɔ ṯurmun-lɔ kwon-kwon, nǝ ŋa ŋǝni ŋuuŋun ŋiti ŋǝṯi iijini mac, ŋir ŋɔma ŋuuŋun ŋǝṯi nannatha dok-dok, nǝ ŋɔrɔŋ-ŋi Allah tok nǝr iijinǝlɔ por-por kwomne-na ŋgwɔ kwɔgittina. Ŋwɔṯaŋw nǝreere ǝthi lɔɽɔjɔ leere mac lǝthi-li ŋgwa kǝɽinnǝthǝ 21 Nilŋithir-vǝ kinnǝni Allah tok, nǝrteere iiɽinǝ ḏuṯ ethi Allah-ŋaŋgi, ya ethi ǝccǝ ŋunduŋw shukran, laakin nǝ fikir kweeŋen ere ǝthi faayitha kweere mac, nǝ ŋaɽiny ŋeeŋen ere ǝthi faayitha tok mac, nǝr urǝnni kirim-nǝ deddep. 22 Ǝṯir ruusi rogɽo reeŋen lizi lǝthi yǝnǝ, laakin nǝroro yǝɽiyǝŋ, 23 nǝr uppi ŋinithi-nǝ ŋǝthi Allah wǝṯi nannatha dok-dok suurǝ-gi kwaaɽinna kwizigwunǝŋi kwaṯi ernene, ya ndǝwǝ ya haywaan, ya ŋgwa kwǝṯeele yaari-yalɔ tok.
24 Ŋwɔṯaŋw nǝsi Allah aalatha rii kadɔwa-na kǝthi rɔgwor reeŋen, nǝ ki-ŋiɽigin-nǝ ethi-ŋi ǝwɽi yaŋna yeeŋen yǝy deŋgen-na wɔɽe-wɔɽeny. 25 Kaka mǝrsi-gwɔ uppunǝ ŋir rerrem ŋǝni Allah nǝluŋw-ŋi, mindaŋ nǝr kwoccelɔ ŋgwa kwɔgitta Allah, na nǝr ǝkkici ŋothɽor tok ki-lɔɔbi lǝthi ŋgwa kwɔgitta ṯurmunǝ, ŋgwa kwǝṯi ɔrtanni dok-dok. Amiin.
26 Ŋwɔṯaŋw nǝsi Allah aalatha rii kadɔwa-na kigii-na ṯiga-ṯiga. Nǝsi laaw leeŋen uppunǝ ŋǝthi ŋaaw, nǝrsi ǝrri ŋiti ŋir ŋǝthi ŋaaw mac. 27 Nǝ lɔr tok, nǝrsi duŋgwǝci ŋa ŋǝthisi ǝrrici layɔ, mindaŋ nǝr dunnuni naana kadɔwa-gi deŋgen-na. Ǝṯisi lɔr ǝrri ŋir @eeb-na tubuɽ-tubuɽ, mindaŋ nǝr aavi jiizǝ kwɔvthannicasi kwǝthi ŋikiya ŋeeŋen.
28 Nǝ ṯǝŋw nidirnar-gwɔ ethi elŋe Allah, nǝsi Allah aalatha rii ethi nannatha ki-ŋaɽiny-na ŋeeŋen ŋigii, ethisi mɔmlotto ethisi ǝrri ŋir @eeb. 29 Nǝr-ŋi urǝnni-nǝ deddep ŋa tatap ŋir ŋikiya ŋirna ter-ter; ŋisǝrmuuṯ, ŋikiya, ṯimiidatha, ŋudur, na nǝr-ŋi urǝnni-nǝ deddep kee-ŋgi ŋiɽany, dimmi, ŋaasim, ṯikǝɽinyjǝlɔ, nǝ lir ṯɔŋwɔn ṯarr, 30 lǝṯi kikkiyathina ethi wǝthisinǝ, lir ṯuwǝn ṯǝthi Allah, lǝṯi ɔllɔthi, lǝṯi piŋi rogɽo reeŋen, ǝṯir ṯoo ŋikiyaŋi, ǝṯireere iinyici rǝrnyin-ŋwɔsi naana mac, 31 lir yǝɽiyǝŋ, liira ṯǝmminǝ, wala ethǝthi timɽiyǝ tokwo kaamin-gi. 32 Nǝ nilŋithir-sivǝ kinnǝni tok ki Sherii@a-nǝ kwǝthi Allah kwaarɔŋw, kila lǝṯisi ǝrri ŋir kaka-ṯǝ ŋɔ lɔvthannica ŋiɽany. Ǝṯir-seere ǝrri ŋɔ dak mac, laakin ǝṯir-li aamina kila lǝṯisi ǝrri-ri.