aza 8
kwurna kweḏi libruz dufokwɽeny
1 na ma Tirany kii ŋwuli ŋweḏi kaṯim kir nimra dufɔkwɽeny, na kizen ayḏalu kilerena ciɽŋil kaka nuzz zaa. 2 nenyeze limaleyka dufɔkwɽeny leṯirilli ki yey-na yeḏi Allah, ner zi inḏeḏa libruza dufɔkwɽeny. 3 na maleyka ila kwir ter nuŋw rillaci ŋweḏgwuna lu, kwapa taɽnyu tir ḏahab, ner inḏeḏa kwuḏɽula kwitezir, eḏi kete duŋw taraḏi ki yiriny ṯeḏi lizi tatap lirlinelu ter eḏi Kwruztu-na ŋweḏgwun la ŋwir ḏahab, ŋwunani ki yey-na yeḏi kwurzi kweḏi ŋeleny; 4 na kwulu kweḏi kwuḏɽul dallu nani gwu ṯara ki yiriny ṯeḏi lizi lirlinelu ter, ki rii-na reḏi maleyka kwirlaca Allah lu. 5 mindaŋ na maleyka dimi taɽnyu nuŋw urezi igəŋi-na weḏi ŋweḏgwun, nuŋw kaṯa puc kureyu lu; mindaŋ na lere arina, nuŋw upuḏina mindaŋ na rimen iiḏi keny keny, na ureyu rigini.
6 na limaleyka lir dufɔkwɽeny, kla lapa libruza lir dufɔkwɽeny tɔk, ner rilli cugwɔ-cugwɔp eḏi zi əri.
7 na maleyka, kwir nimra kwete, əri bruza kwuŋwun, na ŋworum-ŋa igə yi ŋwulagḏina ŋin ŋi, ner iida kureyu lu; na ureyu dunnaḏi kiḏriḏa kete keḏi ṯɔɽɔl, na yaɽi kiḏriḏa kete keḏi ṯɔɽɔl tɔk, na karwa tatap kigla dunnaḏa lu dar.
8 na maleyka, kwir nimra kwuɽen, əri bruza kwuŋwun, na kwɔmne kwete kwir kaka ayin wupa dinḏeḏi igəŋi nana nyɔr nyər, nuŋw keṯini ki ṯujul-na; 9 na ṯujul yiḏriḏa ṯɔɽɔl na kiḏriḏa kete orɔ ŋin; na kwɔmne kwumiiḏu yiḏriḏa ṯɔɽɔl nuŋw ay kiḏriḏa kete; na lifaluuka yiḏriḏa ṯɔɽɔl, nuŋw kiraḏa lu kete.
10 na maleyka, kwir nimra ṯɔɽɔl, əri bruza kwuŋwun, na ṯorum ṯete ṯupa iida kilerena, nuŋw ṯiŋa fori lu kaka lɔmba, na yufurṯa yupa yeṯeḏi ŋaw dɔk dɔk yiḏriḏa ṯɔɽɔl na gwu ṯorum iideḏa la kete; nuŋw iideḏa ki le-la leṯirteḏi ŋaw dɔk. 11 na yiriny yeḏi ṯorum kḏa eni kwɔmne kwiɽi, na ŋaw yiḏriḏa ṯɔɽɔl nuŋw ɽe kete cercer, mindaŋ ma lizi ay litezir ŋiɽaŋal ŋi ŋeḏi ŋaw ŋimɔ ɽe.
12 na maleyka, kwir nimra kwaɽŋan, əri bruza kwuŋwun, na aŋwun yiḏriḏa ṯɔɽɔl nuŋw pini kete, na owa pini ṯaŋwu kete tɔk, na rorum kete tɔk, mindaŋ ma fori kweŋen yiḏriḏa ṯɔɽɔl nuŋw orɔ kete kirim, na fori kweḏi kaŋwuna yiḏriḏa ṯɔɽɔl na kete nuŋwere ṯiŋanalu mac, na kulu tɔk ṯaŋwu.
13 nenyi dimi yey nenyeze, nenyi neŋne lufurṯaŋi lidiɽi ki lere lari ṯɔgwɽɔ ṯi ṯupa, ŋwu: eyewey, eyewey, eyewey kweḏi kla leṯi nani ki ṯurmun-na, ŋiɽaŋal ŋi ŋeḏi libruz liḏaḏu, linḏi zi limaleyka ṯɔɽɔl eḏi zi əri kirem!
Khaaṯim kir nimrǝ dɔvokwɔɽony.
1 Mǝ Tirany kiṯṯi khaaṯima kir nimrǝ dɔvokwɔɽony, nǝ kizǝn ayithalɔ ki-leere-na ciɽiŋill, kaka nus saa@ min-min. 2 E-ta ninyeese limeleka dɔvokwɔɽony lirlɔ kiyǝnǝ yǝthi Allah, mindaŋ nǝrsi inḏǝthǝ yibooɽonya dɔvokwɔɽony. 3 Nǝ meleka iila kwɔthaathɔ nɔŋw rilli kiyǝnǝ yǝthi ŋwɔthgwun taɽinyɔ-ri tir ḏahab; nǝr inḏǝthǝ kwɔthɽɔla kwittǝzir ethi kiɽǝzǝsi ṯaara kiiriny naana ṯǝthi lizi lǝthi Allah, ethi kette ki-ŋwɔthgwun-lǝ ŋwir ḏahab, ŋwɔnaanɔ kiyǝnǝ yǝthi kwɔrsi kwǝthi ŋeeleny. 4 Nǝ kwuulu kwǝthi kwɔthɽɔl dallitha leereya ṯaara-thi kiyiiriny ṯǝthi lizi lǝthi Allah, ṯuruuthu ki-rii-na rǝthi meleka-ŋgwa kwirlɔ kiyǝnǝ yǝthi Allah. 5 E-ta nǝ meleka dimmǝ taɽinyɔ mindaŋ nɔŋw urǝzi iigǝ-ŋi-nǝ deddep wǝthi ŋwɔthgwun, mindaŋ nɔŋw-mǝ kaṯṯa ki-ṯurmun-nǝ. E-ta nǝ kwuurunnǝ kettene kwɔppa, nǝ ŋweere ɔppɔthina, nǝ rimen iithithi kǝkǝny-kǝkǝny, mindaŋ nǝ wurǝyu riiginni.
Limeleka mǝr-gwɔ ǝrii yibooɽonya yeeŋen.
6 Ŋwɔṯaŋw mindaŋ nǝ limeleka lir dɔvokwɔɽony lɔppa yibooɽonya dɔvokwɔɽony, nǝr naani cɔgwo-cɔgwop ethisi ǝrii.
7 Nǝ meleka kwir nimrǝ kwette ǝrii kibooɽonya kuuŋun, mindaŋ nǝ ŋwɔɔrɔm-ŋa iigǝ-yi ŋwɔlagthina ŋin-ŋi iidǝthǝ ki-ṯurmun-lǝ. Mindaŋ nǝ ṯurmun dɔnnathi kithritha kette kǝthi ṯoɽol, mindaŋ nǝ yaaɽi dɔnnathi kithritha kette kǝthi ṯoɽol, mindaŋ nǝ karaaw tatap kiglǝ uɽǝthi kithaay wǝr.
8 Nǝ meleka kwir nimrǝ kwuɽǝn ǝrii kibooɽonya kuuŋun. Mindaŋ nǝ kwomne kwette kwir kaka aayin wɔppa wufɔɔdɔ iigǝŋi, nɔŋw kǝṯṯini ki-bahar-na, 9 mindaŋ nǝ kithrith kette kǝthi bahar kir ṯoɽol reethe nɔŋworo ŋin, nǝ kithrith kette kǝthi ṯoɽol kǝthi kwomne kwɔmiithɔ kwǝthi bahar-na ai, mindaŋ nǝ kithrith kette kǝthi ṯoɽol kiirathalɔ kǝthi limɔrkǝb.
10 E-ta nǝ meleka kwir nimrǝ ṯoɽol ǝrii kibooɽonya kuuŋun. Mindaŋ nǝ ṯɔɔrɔm ṯɔppa iidǝ ki-leere-na, ṯɔfɔɔdɔ kaka iigǝ nɔŋw iidǝthǝ kithrith-la kette kǝthi ṯoɽol kǝthi libahar lokwɔɽony, nǝ ki-ruwǝ-lǝ rǝthi ŋaaw tok. 11 Nǝ yiriny yǝthi ṯɔɔrɔm ǝniŋw, “ɽee cer-cer”. Nǝ kithrith kette kǝthi ṯoɽol kǝthi ŋaaw orlle nǝr ɽee cer-cer, mindaŋ mǝ lizi ii ŋaaw nǝr ai littǝzir, kaka mǝr-gwɔ orlle mǝr-gwɔ ɽee cer-cer.
12 E-ta nǝ meleka kwir nimrǝ kwaɽiŋan ǝrii kibooɽonya kuuŋun. Mindaŋ nǝ kithrith kette kǝthi ṯoɽol kǝthi aaŋwɔn pinni, nǝ ŋga kette kǝthi ṯoɽol kǝthi ǝwǝ pinni, nǝ ŋga kette kǝthi ṯoɽol kǝthi rɔɔrɔm pinni tok, mindaŋ nǝ fɔɔri kweeŋen kwǝthi yithrith yeeŋen yir ṯoɽol irṯasi erṯeŋw-lɔ kweeŋen; mindaŋ nǝ fɔɔri ere naani mac ki-lɔɔmɔr-la lǝthi kithrith kir ṯoɽol kǝthi kaaŋwɔn-naŋw, nǝ ki-lɔɔmɔr-la lǝthi kithrith kir ṯoɽol kǝthi kilkǝluŋw tok.
13 Ṯaŋw mǝny dimmi yǝy tǝ, nenyii neŋne ṯogɽo ṯɔppa ṯǝthi lifirṯaŋ lidiiɽu ki-leere puc-puc laarɔŋw, “Ǝyǝwǝy ǝnnǝ ṯurvǝ, ǝyǝwǝy ǝnnǝ ṯurvǝ, ayaway anna ṯurvǝ ṯǝthi kila linannɔ ki-ṯurmun-na, mǝ ṯogɽo ṯǝthi yibooɽony iila, kiya yinḏisi ethisi limeleka ǝrii kila lir ṯoɽol!”