aza 5
Tirany teḏi Allah liza yuhanna kilerena
1 nenyi izaci ki ṯii ṯeḏi mini ṯeḏi ŋgwa kwunanalu kwurzi la kweḏi ŋeleny, kiṯami kuluḏina iininy yi-na, na par ŋgi la tɔk, kari akṯima yaṯim yi dufɔkwɽeny. 2 nenyeze maleyka kwete kwufirli teter kwofi-na ŋuma ŋi, kwaruŋw: eya kwiri kwofḏana eḏi kiti kiṯami, na eḏi kiici yaṯima ŋwuli ŋweŋen? 3 nuŋw ere kwere mac kilerena, ya ki ṯurmun-na, ya kureyu-na kuṯelu kweḏi ŋuma eḏi kiti kiṯami ya eḏece-na. 4 nenyi ari ŋwal ki beṯen kaka iti nanuŋw gwu kwere mac kweḏi ŋuma eḏi kiti kiṯami ya eḏece-na. 5 nuŋw eca nyuŋwu kwete kweḏi lijowiṯ ŋwu: eṯari mac. izaṯi, zundaŋ kweḏi gabiila keḏi yahuuḏ, kwumɔruḏa ṯufu eḏi dauḏŋa, kwumillazi ki, ŋwuṯa nuŋw eḏi ŋuma eḏi kiṯi kiṯami, na eḏi kii ŋwuli ŋweḏi yaṯim yir dufɔkwɽeny.
6 na ki ŋwobi-na ŋweḏi kwurzi-ŋa kwɔmne gi ŋgwa kwumiiḏu kwir kwaɽŋan, na ki lijowiṯ-na keligeny-na, nenyeze Tiranyu tirlu, tir kaka tirany tete timer eɽenye, teḏi ril dufɔkwɽeny na yey dufɔkwɽeny, yir rigɽim dufɔkwɽeny reḏi Allah, rimɔŋw zi uzi ṯurmun nana tatap. 7 nuŋw ele, nuŋw dimi kiṯami kinani ki ṯii ṯeḏi mini ṯeḏi ŋgwa kwunanalu kwurzi la. 8 mindaŋ muŋw dimi kiṯami, na kwɔmne kwumiiḏu kwir kwaɽŋan, na lijowiṯ lir ṯuɽi-kwaɽŋan iideci Tiranyu lu tuɽbuk lapa lumbəra, na nyaɽinyu nyir ḏahab nyurene kwuḏɽula-na dedep, nyir ṯara ki yiriny ṯeḏi lizi lirlinelu ter eḏi Kwruztu-na; 9 ner ketice ṯilŋa ṯiaŋ, ner aruŋw:
a kwiri kwofḏana eḏi dimi kiṯami na eḏi kii ŋwuli ŋweḏi yaṯim yuŋwun,
kaka mer ŋa gwu eɽenye, na ellici Allah lizigwunaŋi ŋin ŋi ŋɔŋa,
leḏi yabiila yir-na ter ter, na kandiza kir-na ter ter,
na lizi lir-na ter ter, na ŋeleny ŋir-na ter ter tɔk;
10 nezi ruzi ŋeleny na yiziiz yeḏi Allah weri, er miḏa ŋelenyi ki ṯurmun-na.
11 mindaŋ nenyeze, nenyi neŋne rɔgwɽɔ reḏi limaleyka litezir lirikaḏi kwurzi lu, kwɔmne gi ŋgwa kwumiiḏu, na lijowiṯ li tɔk, na ŋwuɽu ŋweŋen uri beṯen ruɽi-ŋa ruɽi-ŋa riminni, 12 laruŋw ṯɔgwɽɔ ṯi ṯupa: Tirany timer eɽenye tinderṯa tofḏana eḏafi zulṯa, na ŋurṯua, na ṯeḏinayeyna, na ŋuma, na ṯiniiya-na, na ŋiniṯi, na ṯortaḏa! 13 nenyi neŋne kwɔmne tatap kwumiiḏu kilerena, na kweḏi ṯurmun, na kweḏi kureyu-na kuṯelu, na kwunani ki rujul-na, na ŋgwa tatap kwunani gwu-na, kwaruŋw: eḏi ṯortaḏa, na ṯiniiya-na, na ŋiniṯ, na ŋuma tɔk nanniḏa dɔk dɔk, nanuŋw gwu ŋgwa kweṯi nanni kwurzi la kweḏi ŋeleny, na nani gwu Tirany tɔk. 14 na kwɔmne ŋgwa kwumiiḏu kwir kwaɽŋan, aruŋw: emba! na lijowiṯ lir ṯuɽi-kwaɽŋan iidicelu ner kwocelu.
Tiṯaab-ŋa tirany-ri.
1 Ninyeese tiṯaabi ki-thii ṯǝthi mɔni, ṯǝthi ŋgwa kwɔnaanalɔ kwɔrsi-la kwǝthi ŋeeleny, tɔlɔɔthɔna iininynǝ-ŋgi nǝ parŋgala-ŋgi tok, mindaŋ nǝr khaṯimi yaaṯim-yi dɔvokwɔɽony. 2 E-ta ninyeese meleka kwǝthi ŋɔma beṯṯen, nɔŋw andasi ṯogɽo-thi ṯɔppak nɔŋwaarɔŋw, “Ǝyǝ kwɔrɔ kwɔvthanna ethi kii yaaṯima mindaŋ ethi kiṯṯi tiṯaabi?” 3 Laakin nɔŋweere naani kweere mac ki-leere-na alla kwurǝyulu alla ki-ṯurmun-nǝ kuṯṯǝlɔ kwǝthi ŋɔma ethi kiṯṯi tiṯaabi kɔrɔ, wala etheese iininyǝnǝ. 4 Mindaŋ nenyii aari tig-tig kaka niti ninaanɔ-gwɔ kweere mac kwɔvthanna ethi kiṯṯi tiṯaabi wala etheese iininyǝnǝ. 5 E-ta nenyii shekh kwette kwǝthi lishiyuukh kila ǝccǝŋw, “Ǝṯaarɔ mac. Iisaṯi! Sɔndaŋa kwǝthi gǝbiilǝ kǝthi Yahuuthǝ, kwir Ṯɔvɔɔ ṯǝthi Ḏaawḏ-ŋǝ, kwɔmǝ ǝgini ŋillaza kii, nǝ nɔŋwɔthi ŋɔma ethi kii yaaṯima yir dɔvokwɔɽony mindaŋ ŋwɔ kiṯṯii tiṯaabi tok.”
6 E-ta nenyii ese Tiranyɔ tirlɔ kelgeny-na kǝthi kwɔrsi kwǝthi ŋeeleny, nǝ kǝthi haywaanaaṯ wumiithɔ wir kwaɽiŋan nǝ kǝthi lishiyuukh, tir kaka tuuɽunnǝ kworo. Tǝthi rill dɔvokwɔɽony, nǝ yǝy dɔvokwɔɽony yir rigɽim rǝthi Allah, rɔɔsasi Allah ṯurmunǝ naana tatap. 7 E-ta nǝ Tirany ele nɔŋw dimmǝ tiṯaabi ki-thii-na ṯǝthi mɔni ṯǝthi ŋgwa kwɔnaanalɔ kwɔrsi-la kwǝthi ŋeeleny. 8 Nǝ mɔŋw dimmǝ tiṯaabi tǝ, nǝ haywaanaaṯ wumiithɔ wir kwaɽiŋan, nǝ lishiyuukh lir ṯuɽi kwaɽiŋan iidi kiyǝnǝ yǝthi Tirany, lappa lumbǝrǝ nǝ nyaɽinyɔ nyǝthi ḏahab nyuurǝnnǝ kwɔthɽɔla-na deddep, kwir ṯaara kiyiiriny ṯǝthi lizi lǝthi Allah. 9 E-ta nǝr kette ṯilŋa ṯiyaŋ laarɔŋw,
“Ŋa kwir kwɔvthanna ethi dimmi tiṯaabi mindaŋ ethi kiṯṯi
yaaṯima yuuŋwun,
kaka niɽinyithir-ŋǝ-gwɔ,
ŋiɽany-ŋi ŋɔɔŋa ŋir kiraama
mindaŋ nǝ licca Allah lizi lǝthi yǝbiilǝ tatap,
nǝ kandisa tatap mindaŋ, nǝ lizi tatap mindaŋ, nǝ ṯurmun
tatap tok.
10 Limǝsi ruusi muluuk nǝ kahana ethi ǝkkici Allah wǝri
ŋothɽor,
mindaŋ ǝri mithǝ ŋeelenyi kwurǝyulu.”
11 E-ta mǝnyii ese kwokwony nenyii neŋne rogɽo ruuru rǝthi limeleka lir aalaaf nǝ milaayiin! Lirikkathɔ kwɔrsiya-lɔ kwǝthi ŋeeleny, nǝ haywaanaaṯ wumiithɔ wir kwaɽiŋan nǝ lishiyuukh tok, 12 nǝr kette ṯilŋa ṯogɽo-thi ṯɔppak laarɔŋw,
“Tirany kira tiɽinyithir tindǝr-ṯǝ tɔvthanna tɔc,
ethaavi ŋɔma, ŋɔrṯɔwa, ṯǝthinǝ yǝnǝ,
ṯifirlla naana, ṯiiɽǝnǝ, nǝ ŋinith-ŋǝ ṯibɽǝthǝ-thi yiriny!”
13 E-ta nenyii neŋne kwomne tatap kwɔgittina ki-leere-na, kwurǝyu-lu, ki-ṯurmun-nǝ kuṯṯǝlɔ, ki-bahar-na, nǝ kwomne tatap kwɔmiithɔ kwɔnaanɔ ki-ṯurmun-nǝ, nǝr kette ṯilŋa nǝraarɔŋw,
“Ethi ŋgwa kwɔnaanalɔ kwɔrsi-la kwǝthi ŋeeleny nǝ
Tirany tok,
biɽǝnni yiriny ṯiiɽǝthi-nǝ,
nǝ ŋinith-ŋǝ ŋɔma-ŋi ǝri nannatha dok-dok!”
14 Nǝ haywaanaaṯ wumiithɔ wir kwaɽiŋan aarɔŋw, “Amiin”, mindaŋ nǝ lishiyuukh iidi kwurǝyulu nǝr kwoccelɔ.