aza 4
kilerena
1 ma ŋiɽaŋal ŋu ere, nenyi baŋala nenyeze ogwur wukiṯina kilerena, na ṯɔgwɽɔ kḏa ṯimenyi neŋne kerreny ṯir kaka bruz, nuŋw andaci nyuŋwu, nuŋw aru ŋwu: dalliḏe kunuŋ, ŋa baŋaci kwɔmne kwinḏi eḏerrini kwaḏan gi. 2 kinaŋw ṯa nenyi Ṯigɽim tirlinelu ter mulɔ tuc, na izaṯi, na kwurzi kweḏi ŋeleny nani kilerena, nuŋw nani kwete kwurzi la. 3 na ŋgwa kwunana gwu lu, nuŋw ijini kaka kali kete kir gaali keṯari nana deŋgel deŋgel fori gi, na kaka kete kir ter kori kaka ŋin; na ṯululu rikaḏa kwurzi lu, nuŋw igli cikcik, kaka karwa muŋw alliḏa ṯay ṯi. 4 na lurzi leḏi ŋeleny nani ṯuɽi-kwaɽŋan, lirikaḏi kwurzi lu kwunani keligeny-na, na gwu lijowiṯ lir ṯuɽi-kwaɽŋan nani la, likinna yireṯi yifiiḏu pərpər, na ŋwoɽa la ŋweŋen ner kenne nyaŋgiŋi nyir ḏahab. 5 na nani gwu kwurzi kweḏi ŋeleny eṯi rimen iidi kec kec, na kwurna kweḏi lere muŋw ofi-na. na ki yey-na yeḏi kwurzi eti gwu nyuɽi nani dufɔkwɽeny nyir igə wir ŋwɔmba, nyir rigɽim dufɔkwɽeny reḏi Allah; 6 na ki yey-na yeḏi kwurzi eti gwu ṯujul nani ṯir kaka ṯujul ṯir gizaaza, ṯijinana der der.
na kwɔmne kwumiiḏu kwir kwaɽŋan rikaḏa kwurzi lu kweḏi ŋeleny, kwurena yey nana dedep kereny kwaḏan tɔk. 7 ŋgwa kwiŋna kwaɽina zundaŋa, na ŋgwa kwir nimra kwuɽen kwaɽina ŋiḏri, na ŋgwa kwir nimra ṯɔɽɔl kwir kiyeyna kaka kwizigwunaŋ, na ŋgwa kwir nimra kwaɽŋan nuŋw aɽani lufurṯaŋi lidiɽi kilere. 8 na ŋgwa tatap kwir kwaɽŋan kwumiiḏu ner eḏi yufu nyirlil nyirlil yurene yey nana par ŋgi la, kiininy ŋgi-na tɔk. eṯir kekite ṯilŋ a kḏu kulu kulu kaŋwun kaŋwun, eṯir aruŋw:
kwirlinelu ter, kwirlinelu ter, kwirlinelu ter,
kwiri Kweleny kweni Allah, kwuṯemḏizi la tatap ŋuma ŋi,
kwunani kerreny, na kwunani kirem, na kwinḏi eḏila!
9 mindaŋ ma kwɔmne ŋgwa kwumiiḏu nii Allah-na, na mer iɽi-na mer eca ŋgwa kwunanalu kwurzi la zukran, kweṯi miiḏi dɔk dɔk, 10 eṯi lijowiṯ kla lir ṯuɽi-kwaɽŋan iidicelu ŋgwa kwunanalu kwurzi la, eḏi kwoce ŋunduŋwu lu kweṯi miiḏi dɔk dɔk; eṯir kaṯu nyaŋgiŋi nyeŋen ki yey-na yeḏi kwurzi, likita rilŋa, laruŋw:
11 ŋa kwir Kweleny kweri, na Allah weri tɔk,
a kwofḏana eḏafi ŋiniṯi, na ṯiniiya-na, na ŋuma tɔk,
kaka ur ŋa gwu kwukita kwɔmne tatap,
na eṯuŋw nani kwukitina ṯugwor ṯi ṯɔŋwa.
Ṯɔgwɔccalɔ ki-leere-na.
1 Kwaathan tǝ ninyeese lɔbaaba ligiṯṯinǝ ki-leere-na! Nǝnyii ṯogɽo kitha ṯǝthi kerreny-ŋwɔ ṯiŋna ṯandica-nyii kitha ṯaaɽinna kibooɽonya, nɔŋwaarɔŋw, “Dallitha kɔnɔŋw, mindaŋ ŋǝsi baaŋaci ŋa ŋinḏi laazim ethi ǝrrini kwaathan-gi.” 2 Ŋwɔṯaŋw tɔc nenyii-gwɔ Ṯigɽim ɔɽina mbic. Ninyeese kwɔrsiya kwǝthi ŋeeleny ki-leere-na kwɔnaanɔ-ŋwɔ kwizi-lɔ kwette! 3 Naŋwaaɽanni yaali yǝni alyaashib, @agiig wɔɔri, nǝ ṯɔɔlɔlɔ rikkatha kwɔrsiya-lɔ kwǝthi ŋeeleny, kwir ŋeele ŋuuŋun kaka ŋǝthi zumurruḏ. 4 Naaɽi nǝ lɔrsi lǝthi ŋeeleny naani kinaŋw lir ṯuɽi-kwaɽiŋan, lirikkathɔ kwɔrsiya-lɔ kwǝthi ŋeeleny, nǝgwɔ lishiyuukh lir ṯuɽi-kwaɽiŋan naani-la liginna lɔɔvana lifiithɔ nǝ nyaŋgiŋi ŋwɔɽa nyǝthi ḏahab. 5 Nǝgwɔ fɔɔri kwǝthi rimen rǝthi ŋweere ŋwiithɔ tututhǝ-nǝ, nǝ kwuurunnǝ ɔppɔthina kwǝthi ŋweere tok. Nǝ fɔɔri naani kinaŋw dɔvokwɔɽony kwǝthi iigǝ kiyǝnǝ yǝthi kwɔrsi kwir rigɽim dɔvokwɔɽony rǝthi Allah. 6 Nǝ kiyǝnǝ yǝthi kwɔrsi nǝ kwomne naani kwette kwir kaka bahar kwir gizaaza, kwɔsɔɔɽɔ cɔr-cɔɽic, kwir kaka bɔllɔɔr.
Nǝ haywaanaaṯ wɔmiithɔ naani kwaɽiŋan wirikkathi kwɔrsiya-lɔ kwǝthi ŋeeleny kwuurǝnnǝ yǝy naana deddep ṯɔgwor-thina nǝ ṯɔɽɔthala tok. 7 Nɔŋwaaɽanni wiŋna sɔndaŋa; wir nimrǝ kwuɽǝn nɔŋwaaɽanni tithri; wir nimrǝ ṯoɽol nɔŋworo kiyǝnǝ kaka kwizigwunǝŋ; nǝ wir nimrǝ kwaɽiŋan nɔŋwaaɽanni lifirṯaŋi lidiiɽu ki-leere. 8 Nǝ haywaanaaṯ wa wumiithɔ wir kwaɽiŋan ǝthi weere-weere deŋgen-na yɔvɔɔ nyirlil-nyirlil, yuurǝnnǝ yǝy-nǝ deddep iininy-ŋgǝnǝ nǝ parŋgala tok. Ǝṯireere uɽǝthi mac ethi kette rilŋa, kaaŋwɔn-kaaŋwɔn kulu-kulu, laarɔŋw,
“Kwirllinǝlɔ ter, kwirllinǝlɔ ter, kwirllinǝlɔ ter, Kweeleny
kwir-ṯa kwir Allah wǝthi Ŋɔma Ŋɔppa,
wɔnannɔ kerreny tuk, nǝ wɔ wɔnaanɔ kire-kirem-ŋgwɔ, nǝ winḏi ethiila.”
9 Na mǝ haywaanaaṯ wumiithɔ nii-nǝ, na mǝr iiɽinǝ mindaŋ mǝrǝccǝ ŋgwa shukran kwɔnaanalɔ kwɔrsi-la kwǝthi ŋeeleny, ŋgwa kwǝṯi nannatha dok-dok, 10 nǝ lishiyuukh kila lir ṯuɽi kwaɽiŋan iidi kiyǝnǝ yǝthi ŋgwa kwɔnaanalɔ kwɔrsi-la kwǝthi ŋeeleny, mindaŋ nǝr kwoccelɔ ŋgwa kwǝṯi miithatha dok-dok. Nǝr kagiṯṯɔ nyaŋgiŋi nyeeŋen kiyǝnǝ yǝthi kwɔrsi kwǝthi ŋeeleny laarɔŋw,
11 “Ŋa kwir kwɔvthanna kwir Kweeleny kwǝri nǝ Allah tok!
Ŋa kwir kwɔvthanna ethaavi ŋinithi-ŋwsi, ṯiiɽǝ-thi-nǝ nǝ
ŋɔma tok.
Kaka nigittaŋa-gwɔ kwomne tatap, nɔŋw inḏini ṯɔgwor-thi
ṯɔɔŋwa, nǝ ŋimiitha tok.”