aza 21
lere liaŋ na ureyu wiaŋ
1 nenyeze leryaŋwuzi liaŋ ureyu yi wiaŋ; kaka ma gwu lere leḏi kerrenyŋw na ureyu weḏi kerrenyŋw ernine, na rujul tatap ernine tɔk. 2 nenyeze meḏiina kwirlinelu ter, kweni urzaliim kwiaŋ, kwoɽu kilerena nani gwu Allah, kwudaɽmina kaka kiŋaɽu kɔgwuɽacar kworu nana kwuŋwun kweḏi ṯaga; 3 nenyi neŋne ṯɔgwɽɔ ṯupa ṯuruḏi nani gwu kwurzi kweḏi ŋeleny, ṯaruŋw: izaṯi, duənu kweḏi Allah kweṯinanni nani gwu lizigwunaŋ. ŋwu nanni deŋgen-na, er orɔ ŋunduŋa lizi luŋwun, a Allah nanni wuɽe-wuɽeny ŋundu ŋali, ŋworɔ Allah weŋen. 4 ŋwu zi firṯaḏa ŋwal ŋwere ŋwere ki yey yeŋen, a ŋiɽany ere nani kwokwony ḏuṯ, a ŋwunda ere nani tɔk mac ŋwal ŋi ṯirara ṯi, kaka ma gwu kwɔmne kweḏi kerrenyŋw ernine wac.
5 na ŋgwa kwunanalu kwurzi la kweḏi ŋeleny aruŋw: izaṯi, nyi ŋgwu kwudaɽmaḏi kwɔmne tatap eḏorɔ kwiaŋ. nuŋw eca nyuŋwu ŋwu: luḏi zi, kaka ur gwu ŋiɽaŋal ŋu ŋirlalu rerec. 6 nuŋw eca nyuŋwu ŋwu: ŋimɔrataḏi. nyi kwiri kweni alfa na omega, yinderṯa yeni kwɔnkwɔn na kwaḏan. kwenyinḏeḏa kwere kwiiḏowḏa ŋaw beyin, ŋeḏi kwe kwetirteḏa ŋaw ŋetizinḏeḏa ŋimiiḏa. 7 kwere kwillazi ki, kwunderṯa kwenyinḏeḏa ŋoru ŋu, enyorɔ Allah wuŋwun, ŋworɔ tor tinyi. 8 na kla leṯaɽiḏa kwaḏan gi liṯinya mindaŋ, kla liti leḏi ṯəmna-na mac mindaŋ, kla lir ludur mindaŋ, kla leṯikete ḏimya mindaŋ, lijin mindaŋ, luzur mindaŋ, na kla leṯikwoce kwɔmne lu kwere kwiti kwir Allah wumiiḏu mac, na tatap lir ləluŋ tɔk, er inḏa ŋoru ŋeŋen ki ṯujul-na ṯir igə na kibriṯ; ṯinderṯa ṯir ŋiɽany ŋir nimra kwuɽen.
urzaliim kwiaŋ kweḏi kilerena
9 mindaŋ ŋuŋw ila kwete kweḏi limaleyka, kla lir dufɔkwɽeny limapi nyiṯraŋi dufɔkwɽeny, nyurena jiiza gi dufɔkwɽeny kweḏi kwaḏanŋw, nenyi gi andazi, nuŋw aruŋw: ilamba, e ŋa baŋaci kiŋaɽua, kir kwaw kweḏi Tirany. 10 nuŋw mulɔ nyuŋwu ŋuma ŋi ŋeḏi Ṯigɽim tirlinelu ter, nuŋw allazi nyuŋwu kayin la wupa wuminni wolala totoc, nuŋw baŋaci nyuŋwu meḏiina kwirlinelu ter kwir urzaliim, kwoɽu kilerena nani gwu Allah, 11 kweḏi ŋiniṯi ŋeḏi Allah, firyar gi kwari nana ŋidi, kaka kal kete kir gaali, keṯari deŋgel deŋgel fori gi, kaka gizaaza kuzuɽu. 12 nuŋw eḏi karṯinya kir ṯilaŋgwu ṯupak, ṯolala totoc ṯeḏi yogwur wri-kwuɽen, na ki yogwur na limaleyka nani wri-kwuɽen, na kezir weḏi yogwur na yiriny lɔḏine yir yiriny yeḏi yabiila wri-kwuɽen yeḏi nyor nyeḏi izrayiil; 13 ezir yi weṯi gwu aŋwun dalliḏa nuŋw eḏi yogwur ṯɔɽɔl, na zumaal ŋgi yogwur ṯɔɽɔl, na januub ŋgi yogwur ṯɔɽɔl, na ezir yi weṯi gwu aŋwun oɽi yogwur ṯɔɽɔl. 14 na ṯilaŋgwu kḏa ṯir karṯiny keḏi meḏiina nuŋw eḏi rugwagiza wri-kwuɽen, reḏi yiriny la yeḏi yafur yir wri-kwuɽen yeḏi Tirany.
15 na ŋgwa kwandizanyi gi kwapa tumor ki ṯii-na tir ḏahab, eḏi ri ṯeci meḏiina na yogwur yuŋwun, na ṯilaŋgwua tɔk ṯirikaḏa lu ki ray rir kwaɽŋan. 16 na ray kwaɽŋan reḏi ṯilaŋgwu ṯeḏi meḏiina biɽḏi-na titir; nuŋw ṯeci meḏiina tumor ri, na ola kwuŋwun na olala kwuŋwun na orana kwuŋwun biɽḏi-na, nuŋw eni kwupak kwuminni. 17 nuŋw ṯeci ṯilaŋgwua ṯirikaḏa lu tɔk, nuŋw orɔ kaka ṯii ṯeḏi kwizigwunaŋ ruɽi-dufɔkwɽeny-kwaɽŋan, nuŋw ṯa orɔ ṯeḏi maleyka tɔk. 18 na ṯilaŋgwu kḏa nuŋw owcini yal yi yir gaali yeṯari nana fori gi, na meḏiina ta, nuŋw orɔ ḏahab ṯar, nuŋw ṯiŋaḏa fori lu kaka gizaaza kizuɽu. 19 na rugwaziza reḏi ṯilaŋgwu ṯirikaḏi meḏiina lu ridaɽmina nana yal yi yizaw; kiŋna nuŋw ari nana deŋgel deŋgel fori gi; na kir nimra kwuɽen nuŋw orɔ kaka lere leṯijini kaŋwuna; na kir nimra ṯɔɽɔl nuŋw orɔ yey-na ṯirlaŋ; na kir nimra kwaɽŋan nuŋw igli cikcik; 20 na kir nimra ṯuḏni nuŋw fiiḏi nuŋw ori iininy yi-na; na kir nimra nyirlil nuŋw ori celcel kaka ŋin; na kir nimra dufɔkwɽeny nuŋw igli yey-na ciŋ; na kir nimra dufɔkwupa nuŋw orɔ yey-na ṯiginy; na kir nimra kwuniṯri eṯuŋw ṯiŋaḏa fori lu kaka ḏahab; na kir nimra wri nuŋw igli yey-na ciŋ ḏahab ṯi; na kir nimra wri-kwete nuŋw ijini kaka lere leḏi ŋwebleṯi nana ŋwufiiḏu; na kir nimra wri-kwuɽen nuŋw ori yey-na ɽiyer. 21 na ki yogwur wri-kwuɽen yeḏi ṯilaŋgwu ṯirikaḏi meḏiina lu, na gwu yal nani yicaw wri-kwuɽen yifiiḏu nana kaka ŋan, ner eni lulu, na lutuput biɽḏi ogwur, na lizari leḏi meḏiina lidaɽmaḏir zi ḏahab ṯi ṯar, ṯijinena der der kaka gizaaza.
22 nenyere eze heykala were mac ki meḏiina-na, kaka ur gwu Kweleny kwir Allah wuṯemḏizi la tatap ŋuma ŋi, na Tirany tɔk, heykal wuŋwun. 23 na meḏiina ŋgwa nuŋw ere naŋni aŋwun ḏut, ya owa, eḏi ṯiŋaci fori lu, kaka ur gwu ŋiniṯ ŋeḏi Allah fori, na Tirany ta, nuŋw orɔ lɔmba luŋwun. 24 na fori gi kwuŋwun, a gwu ŋeleny ŋir-na ter ter ireri-na; na limelik leḏi ṯurmun, er gwu epici ŋiniṯi ŋeŋen; 25 na eṯi yogwur ere leŋḏeni lamin lere mac, na gwu kilikelu ere nani ḏuṯ; 26 na ki meḏiina-na er elici ŋiniṯi na ṯiniiya-na ṯeḏi ŋeleny ŋir-na ter ter. 27 lakin a gwu kwɔmne kwere kwiki ere enḏi-na ḏuṯ, ya kwizi kwere kweṯizerri ŋir ŋudur, ya kwir kwəluŋ, illi kla limɔlɔḏine yiriny kiṯam-na keḏi Tirany, keḏi yiriny-na yeḏi kla leḏi ŋimiiḏa.
Leere liyaŋ nǝ ṯurmun ṯiyaŋ.
1 E-ta ninyeese leereya liyǝŋ nǝ ṯurmunǝ ṯiyaŋ tok. Nǝ leere lǝthi kerreny-ŋwɔ nǝ ṯurmun ṯǝthi kerreny-ŋwɔ irṯathalɔ, mindaŋ nǝ bahar ere iijini fuuthilu kwokwony mac. 2 Mindaŋ ninyeese Mǝḏiinǝ Kwirllinǝlɔ ter, kwǝni Urshaliim kwiyaŋ kwɔɔɽɔ ki-leere-na naanɔ-gwɔ Allah, kwɔdaɽiminna naana, nǝ kwɔnaanalɔ cɔgwo-cɔgwop kaka ŋiira ŋɔgɽanna naana ŋǝkkicǝ kwɔlen kizǝn. 3 Nǝnyii neŋne ṯogɽo ṯɔppa ṯuruuthu naanɔ-gwɔ kwɔrsi kwǝthi ŋeeleny ṯandisa ṯaarɔŋw, “Iisaṯi dɔɔnɔŋw kwǝthi Allah kwɔmǝ naani ki-lizi-na. Ŋwɔṯaŋw ŋwɔ nanni ŋundu-ŋǝli mindaŋ ǝroro lizi luuŋwun. Nǝ a Allah nanni rogɽo-ri ruuŋwun ŋundu-ŋǝli, mindaŋ ŋworo Allah weeŋen. 4 Ŋwɔsi firṯatha ŋwal kii tatap ki-yǝy-nǝ yeeŋen. E-ta a ŋiɽany ere naani kwokwony mac, nǝ a ṯɔrɔɔnyɔna-ŋa ŋwal-ŋi nǝ ŋijma ǝreere naani kwokwony mac. Kaka mǝgwɔ kwomne tatap kwɔɔɽɔn irṯathalɔ kithaay.”
5 E-ta nǝ ŋgwa kwɔnaanalɔ kwɔrsi-la kwǝthi ŋeeleny aarɔŋw, “Nyii kwɔmǝ daɽimatha kwomne tatap mindaŋ kwɔmoro kwiyaŋ!” Nɔŋwaaɽi kwokwony nɔŋwaarɔŋw, “Luuthusi ŋɔ, kaka nɔrɔ-gwɔ ŋiɽaŋal ŋɔ rerrem, mindaŋ nǝrǝthi ŋɔma ethisi allatha ṯɔgwori naana.” 6 E-ta nɔŋwɔccǝ nyuŋw-ŋwɔ, “Ŋimǝ rattathi! Nyii kwɔrɔ kwir nda nǝ kwɔrɔ yuṯṯu, nǝ ninyoro kwiŋna nǝ kwirimthithɔ. Mǝ ǝwthǝ yee kweere tǝ, nyii inḏǝthǝ ŋaaw ethisii-lɔ domony ŋǝthi ṯuwǝ ṯǝthi ŋaaw ŋimiithɔ. 7 Kweere kwillasi kii ta, nyinḏatha ŋɔɔrɔ ŋɔ: mindɔŋ nyoro Allah wuuŋwun, nǝ ŋundu tǝ ŋworo tɔr tiinyi. 8 Laakin kila lir nḏeny mindaŋ, liira ṯǝmminǝ mindaŋ, ludur mindaŋ, lǝṯi kette ḏimmiya mindaŋ, liijin mindaŋ, nǝ lozŋor mindaŋ, kila lǝṯi kwogwɔcce kwomne-lɔ mindaŋ, lɔluŋw tɔtap mindaŋ, e-ta a azir weeŋen oro bɔheyra kwǝṯi fɔɔdi iigǝŋi nǝ kibriiṯ tok, kwir ŋiɽany ŋir nimrǝ kwuɽǝn.”
Urshaliim kwiyaŋ.
9 Ŋwɔṯaŋw mindaŋ nǝ meleka kwette iila kwǝthi kila lir dɔvokwɔɽony, kwappa looro dɔvokwɔɽony luurǝnnǝ jiizǝ-nǝ deddep kwir dɔvokwɔɽony kwirimthithɔ, nɔŋwiila naaniny-gwɔ nɔŋwaarɔŋw, “Ǝthi-ŋǝ baaŋaci Ŋiira ŋir kwaaw kwǝthi Tirany.” 10 Nɔŋw dimmi nyuŋwɔ Ṯigɽim-thi mindaŋ nɔŋw iili nyuŋwɔ kaayin-la wɔppa wɔɔlala tottoc, e-ta nɔŋw baaŋaci nyuŋwɔ mǝḏiinǝ kwirllinǝlɔ ter kwǝni Urshaliim kwɔɔɽɔ ki-leere naanɔ-ŋwɔ Allah, 11 kwɔthiŋathi fɔɔri-lɔ kwǝthi ŋinith ŋǝthi Allah. Mindaŋ nǝ mǝḏiinǝ erṯelɔ kaka yaali yir ghaali, yaaɽinna yǝshibǝ, nǝ yisɔɔɽɔ cɔr-cɔɽic yaaɽinna bǝlwǝrǝ. 12 Nɔŋwɔthi heyṯa wɔppa wɔɔlala tottoc, wǝthi ŋwɔbaaba wrii-kwuɽǝn, ŋwɔṯisi limeleka lir wrii-kwuɽǝn kagirni. Nǝ yiriny lothone ki-ŋwɔbaab yǝthi yǝbiilǝ yǝthi nyɔr nyǝthi Israa-iil yir wrii-kwuɽǝn. 13 Ǝṯi ṯuɽumǝ ṯette ǝthi ŋwɔbaaba ṯoɽol: sherig ṯoɽol, jǝnuub ṯoɽol, shimaal ṯoɽol, nǝ gharib ṯoɽol. 14 Nǝ heyṯa wǝthi mǝḏiinǝ ǝni wǝccinǝ ki-rɔgwagiza la rir wrii-kwuɽǝn rǝthi yall, nǝ yiriny lothone yǝthi yaavɔr yǝthi Tirany ki-rigwagiza-la reere-reere.
15 Nǝ meleka ŋgwa kwandica-nyii ǝthi tɔmɔr tir ḏahab tǝthi-ri ṯǝccici mǝḏiinǝ, nǝ ŋwɔbaab ŋa ŋweṯe-ŋi ŋwuuŋwun. 16 Mǝḏiinǝ tǝ, nɔŋworo mɔrǝba@ oroŋgina, nǝ oleŋgi tok. Nǝ meleka ṯǝccici mǝḏiinǝ tɔmɔr-ri tuuŋwun: nǝ ole kwuuŋwun oro alf khumsu miiyyǝ miil kwɔbɽithɔna tittir oleŋgina, oroŋgina, nǝ oleŋgila tok. 17 E-ta nǝ meleka ṯǝccici heyṯaya wǝthi mǝḏiinǝ mindaŋ nɔŋw kaṯṯasi wir miiyyǝ arba@ wa arba@iin ḏɔraa@ ṯǝthi kwizigwunǝŋ, kaka-ṯǝ kitha ṯiṯǝccǝ-thi meleka. 18 Nǝ heyṯa ǝni wǝccinǝ yǝshib-yi, nǝ mǝḏiinǝ tǝ nɔŋw daɽimanni ḏahab-thi ṯir min-min, ǝṯi mǝḏiinǝ iijini-nǝ dar-dar kaka gizaaza. 19 Nǝ ṯɔgwagiza ṯǝthi yall ṯǝthi heyṯa wǝthi mǝḏiinǝ, ɔgɽanni ŋaamal-ŋi ŋir yall yisaaw yirna ter-ter. Nǝ ṯɔgwagiza ṯǝthi yall ṯir nimrǝ kwette, oro ṯǝthi yǝshib, nǝ ṯir nimrǝ kwuɽǝn oro yaaŋuuṯ yir ǝzrǝg, nǝ ṯir nimrǝ ṯoɽol oro @agiig wɔfiithɔ, nǝ ṯir nimrǝ kwaɽiŋan oro zumurruḏ. 20 Nǝ ṯir nimrǝ ṯɔthni oro @agiig, nǝ ṯir nimrǝ nyirlil oro @agiig wɔɔri, nǝ ṯir nimrǝ dɔvokwɔɽony oro zabarjaḏ, nǝ ṯir nimrǝ dɔvokwɔppa oro jaza@, nǝ ṯir nimrǝ kwunǝṯurri oro yaaguuṯ asfar, nǝ ṯir nimrǝ wrii oro @agiig wiglǝ, nǝ ṯir nimrǝ wrii-kwette oro fǝyruuz, nǝ ṯir nimrǝ wrii-kwuɽǝn oro jamashith. 21 Nǝ ŋwɔbaab ŋwir wrii-kwuɽǝn nǝroro ŋwir lu-u-lu-u lir wrii kwuɽǝn, nǝ ŋwɔbaab ŋweere-ŋweere daɽimanni lu-u-lu-ǝ-li leere-leere. Nǝ shaari kwǝthi mǝḏiinǝ oro ḏahab ṯir min-min, ṯiijinǝ-nǝ dar-dar kaka gizaaza.
22 Ŋwɔṯaŋw ninyeere ese heikala weere mac ki-mǝḏiinǝ-nǝ, kaka nɔrɔ-gwɔ Kweeleny heikal wuuŋwun, kwir Allah wǝthi Ŋɔma Ŋɔppa, nǝ Tirany tok. 23 Nǝ mǝḏiinǝ ere naŋni aaŋwɔna wala ǝwǝ ethi irṯacalɔ fɔɔri-gi mac, kaka nɔrɔ-gwɔ ŋinith ŋǝthi Allah ɔfɔri kwuuŋwun, nǝ lombo luuŋwun nɔŋworo Tirany. 24 Mindaŋ a lizi lǝthi ṯurmun tatap ele fɔɔri-gi kwuuŋwun, nǝ a limǝlik lǝthi ṯurmun tatap ǝri ǝvicǝ ŋunḏuŋw ŋɔrṯɔwa ŋeeŋen. 25 E-ta a ŋwɔbaab ŋwɔthi mǝḏiinǝ naani ŋwɔgiṯṯinǝ kaaŋwɔn-kaaŋwɔn; ǝreere lǝŋthǝnni ḏuṯ, kaka niti ninḏi-gwɔ kulu ethi naani kinanaŋw mac. 26 Ǝri ǝvicǝ mǝḏiinǝ ŋinithi-ŋwsi ṯiiɽǝ-thi-nǝ ṯǝthi ŋeeleny tatap. 27 Laakin ŋeere ŋir ŋiɽigin areere andi ki-mǝḏiinǝ-nǝ mac, wala kweere kwǝṯisi ǝrri ŋir ŋiɽigin, nǝ ŋir ŋǝluŋw tok, illi kila dak lɔlɔɔthɔna kiṯaab-na kǝthi ŋimiitha kǝthi Tirany.