aza 2
juwab kweḏi kaniiza kinani afazuz
1 lucazi maleyka kweḏi kaniiza kinani afazuz, ŋwu: ŋiɽaŋal ŋu ŋir ŋandizazi ŋgwa kwapa rorumi dufɔkwɽeny ki ṯii-na ṯuŋwun ṯeḏi mini, ŋgwa kweṯi irerelu tɔk keligeny-na keḏi kwɔmne dufɔkwɽeny kweḏi ŋwɔmba kwir ḏahab.
2 nyi kwilŋiiḏi ŋɔḏɽor ŋɔŋa ŋifirli, na ṯurfa ṯɔŋwa, na ṯukwurmɔṯana ṯɔŋwa, ṯindinyana ṯi nana, na ere eḏi ŋuma eḏizemni mac kla liki, nezi ṯeci kla laruŋw liri yafur, ner ere orɔ yafur mac, nezi kaṯazi liri ləluŋ. 3 nenyelŋece ŋaŋwu kwukwurmɔṯana ṯindinyana ṯi nana, kwenjice ṯurfa ṯugwori ŋiɽaŋal ŋi ŋeni ŋinyi, na ere ajili mac. 4 lakin nenyji eḏi ŋete ŋifirli ŋaŋwu nana. a kwumɔ duŋgweci ṯamɽa ṯɔŋwa ṯeḏi kerrenyŋw. 5 kiḏayina ṯi eḏari, a kwiidi ṯacaŋ tuk, na urla ṯugwori lu, mindaŋ aɽaḏa ŋɔḏɽor kinda ŋɔŋa ŋeḏi kerrenyŋw. mezi ere erri ŋwu mac, nyi kwila nani ŋa gwu, enyi efri lɔmba kiṯay kezir wuŋwun, ma ere urla ṯugwori lu mac. 6 lakin ŋezi eḏi ŋu, a kweṯi firazi ŋɔḏɽor ŋeḏi lizi leni linigilawi ŋeṯinyji firazi tɔk. 7 ŋgwa kweḏi kəni, eḏuŋw zi gi neŋne ŋa ŋandicazi Ṯigɽim tirlinelu ter yaniiza, ŋgwa kweṯillazi ki, kwunderṯa kwenyinḏeda zulṯa eḏi ye kwaɽi kweṯizinḏeḏa ŋimiiḏa, kweṯinani ki jineyna-na keligeny-na kweḏi Allah.
juwab kweḏi kaniiza kinani zimirna
8 lucazi maleyka kweḏi kaniiza kinani zimirna, ŋwu: ŋiɽaŋal ŋu ŋiri ŋandizazi ŋgwa kweni kwiŋna na kwukwaḏaḏi tɔk, ŋgwa kwayyu kerreny nuŋw miiḏi kwokwony.
9 nyi kwilŋiiḏi ṯurfa ṯɔŋwa na ŋuway ŋɔŋa tɔk (lakin na orɔ kwurṯu rac), nenyelŋe yufuluŋi yeḏi kla leṯaruŋw: nyiŋa liri yahuuḏ, ner ere orɔ yahuuḏ mac, lakin ner orɔ majma kweḏi zeyṯaan. 10 eti ṯinya mac ŋa ŋinḏi ŋa gwu eḏi rerini. izarṯi, ibliiz wa winḏi eḏi zi kaṯu lɔkwɔ daŋgal-na ki zijin-na, mindaŋ eḏi mummini, a eḏi ṯurfa ŋwamin wri. miḏir ṯəmna mindaŋ mer orɔ kinna ŋiɽany, na nyi kwɔ ŋa inḏeḏa taŋgiŋi teḏi ŋimiiḏa. 11 ŋgwa kweḏi kəni, eḏuŋw zi gi neŋne ŋa ŋandicazi Ṯigɽim tirlinelu ter yaniiza, ŋgwa kweṯillazi ki kwunderṯa kwiti kwurerini mac ki ŋiɽany-na ŋir nimra kwuɽen.
juwab kweḏi kaniiza kinani bargamuz
12 lucazi maleyka kweḏi kaniiza kinani bargamuz, ŋwu: ŋiɽaŋal ŋu ŋiri ŋandizazi ŋgwa kweḏi kalala kirana ray riɽen.
13 nyi kwilŋiiḏi ezir wunani ŋa gwu, kezir wunani gwu kwurzi kweḏi ŋeleny ŋeḏi zeyṯaan, na ta miḏeḏa yiriny yinyi teter, na ere nyindini ṯəmna ṯɔŋwa mac ṯeni nyi, ki ŋwamin la kinna ŋwumer ŋi eɽenye arṯibazŋw daŋgal-na, kezir weṯi gwu zeyṯaan nani. arṯibaz kwiri zuhuuḏ kwinyi, kweṯi miḏa ṯəmna ṯeni nyi. 14 lakin nenyjeḏi ŋɔkwɔ ŋaŋwu nana; leḏi ŋazi lɔkwɔ leṯi miḏa ṯaliima ṯeḏi balaam, ŋgwa kwilŋiiḏina kwelenyi kweni balag eḏi ṯugwudazi kwelle kweḏi izrayiil eḏi iidi, iiḏir gwu yiiḏi yeḏi kwɔmne kweṯir undici libayila kworɔ, na eḏizerri ŋir ŋijin tɔk. 15 ṯaŋwu, leḏi ŋazi lɔkwɔ tɔk leṯi miḏa ṯaliima ṯeḏi linigilawi. 16 urla ṯugwori lu. mezi ere erri ŋu ṯa, enyila fitak nani ŋa gwu enyi li ṯugwuḏi kalala gi kiruḏi kworɔ-na kwinyi. 17 ŋgwa kweḏi kəni, eḏuŋw zi gi neŋne ŋa ŋandicazi Ṯigɽim tirlinelu ter yaniiza, ŋgwa kweṯillazi ki, kwunderṯa kwenyinḏeḏa ŋuma eḏi ye eḏneya weni manna wulucina, kwenyinḏeḏa tɔk kali kete kifiiḏu, kuluḏine yiriny nana yiaŋ, yiti yilŋiiḏi zi kwere mac, illi ŋgwa kwafazi.
juwab kweḏi kaniiza kinani ṯiyaṯra
18 lucazi kaniiza kinani ṯiyaṯra, ŋwu: ŋiɽaŋal ŋu ŋiri ŋandizazi Tor teḏi Allah, teḏi yey yir kaka igə wufudu, na ŋwara ŋwuŋwun aɽani zarṯu kwir zurman, kweṯari kam kam.
19 nyi kwilŋiiḏi ŋɔḏɽor ŋɔŋa, na ṯamɽa ṯɔŋwa, na ṯəmna ṯɔŋwa, na ŋa ŋeṯizerri, na ṯukwurmɔṯana ṯɔŋwa ṯindinyana ṯi nana. nyi kwilŋiiḏi ŋɔḏɽor ŋeḏi kiremŋw ŋiṯemḏi zi ŋeḏi kerrenyŋw la. 20 lakin ŋeḏinyji ŋu ŋaŋwu nana, efricaŋa gwu kwayu kweni izabil, ŋgwa kweṯari: nyi kwiri kwiɽi, mindaŋ eṯuŋw ilŋiiḏini yaḏaama yinyi na eṯuŋw zi ukwazi eḏizerri ŋir ŋijin, na eḏi ye yiiḏi yeḏi kwɔmne kweṯir undici libayila kworɔ. 21 nenyinḏeḏa lomuri eḏi li urla ṯugwori lu, lakin eṯuŋw derne eḏurla ṯugwori lu. 22 izaṯi, kwenyi inḏirəlu kwaŋgiraŋ la kimeṯ gi, na kla leṯir zi li erri ŋir ŋijin, lenyji kaṯu ki ṯurfa-na tir nyɔrɔ nyɔrɔ, mer ere orlaci ŋikyaŋi ŋwudɔŋw mac ŋeṯuŋw zi erri; 23 na nyor nyuŋwun nyenyjipii ŋiɽany ŋi, mindaŋ a ŋi yaniiza elŋece tatap eḏari: kwunde kwiri kweṯi ecice ṯurtutinana, na rugwori-na tɔk, mindaŋ ma ŋazi kannaci tatap lere lere kwɔmne kweḏi ŋɔḏɽor ŋalu. 24 lakin nyi kweca ŋazi ŋwu, ŋaŋa liḏaḏu linani ṯiyaṯra, kla tatap liti leṯi miḏa ṯaliima kḏu mac, na liti lilŋiiḏi mac ŋiɽaŋali ŋeṯir ŋi aruŋw, ŋinani ki ṯugwor-na lac ṯeḏi zeyṯaan: nyi kwiti kwɔ ŋa allaci ṯofi ṯere mac ṯir ter; 25 miḏeḏir zi ṯa ŋa ŋeḏi ŋazi, mindaŋ menyila. 26 ŋgwa kweṯillazi kii na kweṯaminaci ŋɔḏɽor ŋinyi mindaŋ ma ŋwamin irmiḏiḏi, kwunderṯa kwenyinḏeḏa zulṯa kweḏi ŋeleny ŋir-na ter ter, 27 kaka afa nyi gwu nyi tɔk zulṯa nani gwu Papa kwinyi; mindaŋ ŋworɔ kweleny kweŋen tumor ri tir zarṯu, na er ke kaka eṯi gwu ŋwii ŋweḏi kullu ke wac. 28 na kwenyinḏeḏa ṯorumi ṯeḏi ezir yi. 29 ŋgwa kweḏi kəni, eḏuŋw zi gi neŋne ŋa ŋandicazi Ṯigɽim tirlinelu ter yaniiza.
Juwaab kwɔlɔccar kǝniisǝ kǝthi Afasuus-ŋwɔ.
1 “Lɔccasi meleka kwǝthi kǝniisǝ kǝthi Afasuus-ŋwɔ: “Ŋiɽaŋal ŋa ŋindǝr-ṯǝ ŋǝthi ŋgwa kwimthi rɔɔrɔmi dɔvokwɔɽony ki-thii-na ṯuuŋwun ṯǝthi mɔni, ŋgwa kwiirǝrǝlɔ kelgeny-na kǝthi liminaara dɔvokwɔɽony lir ḏahab.
2 “Nyii kwilŋithi ŋothɽor ŋɔɔŋa, ninyelŋe ethaarɔŋw a kwǝṯi akkɔ ŋothɽor tig-tig, kwimthi ṯɔgwori beṯṯen. Nyii kwilŋithi rac a kwiti kwǝthi ŋɔma kwokwony mac ethisi indinyanni naana ligii, na nǝsi ṯǝcci kila lǝṯi ruusi rogɽo reeŋen yaavɔr, ŋunduŋǝ-tǝ liti lir yaavɔr mac, mindaŋ nǝsi kaṯṯasi lir lǝluŋw. 3 A kwǝṯi mithǝ ṯɔgwori, nǝ nǝŋi rǝrinni ŋǝni sǝbǝb kwiinyi, mindaŋ neere mɔɔli mac. 4 Laakin ninyjǝthithǝ ŋaaŋwɔ naana ŋette ŋɔ: a kwiti kwǝṯi-nyii amɽi kwokwony mac kaka ethi kerreny-ŋwɔ. 5 Kithaayina-ṯi a kwiidu kaatha-na! Ɔrlacca ŋikiyaŋi ŋɔɔŋa ŋwɔdoŋw, mindaŋ ǝsi ǝrri ŋa ŋǝṯisi ǝrri kerreny. Meere ɔrlacca ŋikiyaŋi ŋɔɔŋa ŋwɔdoŋw mac tǝ, nyiila naaniŋa-gwɔ mindaŋ nyǝvri manaara kithaay kǝzir wuuŋwun, illi mǝ urlǝ ṯɔgwor-lɔ ṯɔɽɔk. 6 Laakin nisǝthi ŋette tok ŋisaaw, a kwǝṯi uwǝzi ŋothɽor ŋǝthi Nɔgɔɔlaawiiyyiin ŋa ŋǝṯi-nyji uwǝzi nyii tok.
7 “Ŋgwa kwǝthi yǝni yǝthi-yi neŋne ethɔ-ŋwsi neŋne ŋa ŋandicasi Ṯigɽim yǝniisǝ! Kila limǝ illazi kii, ǝnyji ruusi lɔvthanna ethi yee nyɔɔrɔ nyǝthi kwaaɽi kwǝthi ŋimiitha kwɔnaanɔ ki Fǝrḏɔɔs-nǝ kwǝthi Allah.
Juwaab kwɔlɔccar kǝniisǝ kǝthi Simiirna-ŋwɔ.
8 “Lɔccasi meleka kwǝthi kǝniisǝ kǝthi Simiirna-ŋwɔ:
“Ŋiɽaŋal ŋɔ ŋir ŋǝthi ŋgwa kwiŋna nǝ kwirimthithɔ, kwɔmǝ ai, mindaŋ nɔŋw miitha kwokwony. 9 Nyii kwilŋithi ṯurvǝ ṯɔɔŋwa rac; nǝŋǝ elŋe ethaarɔŋw a kwir kwɔwaay, laakin noro kǝniny kwɔrṯɔ rerrem! Nyii kwilŋithi kwomne ŋgwa kwigii-kwigii kwǝṯiŋǝ kila andisasa naana, lǝṯaarɔŋw lir mǝnyjǝ Yahuuḏ laakin nǝreere oro Yahuuḏ mac; lir lette lǝthi dɔŋw lǝthi Shiiṯaan! 10 Ǝṯiisi ṯiinya ŋeere mac ŋinḏi-ŋǝ ethi inḏini ṯurvǝ. Niŋna-ṯi! Ibliis winḏi-ŋǝsi ethi kagiṯṯɔ lokwo ki-sijin-nǝ, ethi ṯǝcci ŋaaŋwɔsi, ǝŋǝsi ṯurvǝ ǝnḏithǝ mindaŋ ŋwaavi ŋwaamin wrii. Rɔɔthathi-tǝ kwirllalɔ tittir, mindaŋ mǝr-tǝ kinnǝni ǝni ŋiɽany tok, e-ta ŋa inḏithǝ taŋgiŋi tǝthi ŋimiitha.
11 “Ŋgwa kwǝthi yǝni yǝthi-yi neŋne ethɔ-ŋwsi neŋne ŋa ŋandicasi Ṯigɽim yǝniisǝ! Kila lillazi kii ǝsi ŋiɽany ŋir nimrǝ kwuɽǝn ere ǝccǝ ŋiɽaŋali ŋeere mac.
Juwaab kwɔlɔccar kǝniisǝ kǝthi Barghaamɔs-ŋwɔ.
12 “Lɔccasi meleka kwǝthi kǝniisǝ kǝthi Baŋghaamɔs-ŋwɔ:
“Ŋiɽaŋal ŋɔ ŋir ŋǝthi ŋgwa kwǝthi kaalala kiiranna raay tok. 13 Nyii kwilŋithi ǝzir wɔnaaniŋa-gwɔ, wa wǝṯi-gwɔ kwɔrsi naani kwǝthi Shiiṯaan. A kwǝṯi mithǝ yiriny yiinyi tetter, mindaŋ neere ǝvrinni ṯǝmminǝ ṯǝni nyii mac, nǝ ki-ŋwaamin-la ŋwɔthi Anṯiibaas kwɔrɔ shuhuuḏ kwiinyi, kwir kwette kwiinyi kwirllalɔ, ŋgwa kwiɽinyithir daŋgal-na, kǝzir wǝṯi-gwɔ Shiiṯaan naani. 14 Laakin ŋɔ ŋǝthi-nyji ŋoko ŋigii ŋaaŋwɔ naana: kila linaanɔ lokwo daŋgal-na lǝṯi kwakithatha ṯa@liima-lɔ ṯǝthi Bal@aam, ŋgwa kwǝccǝ Baalaag-ŋwɔ @allima, ethi mɔltatha lizi lǝthi Israa-iil ki-ŋikiya-na, nɔkwɔrmɔṯasa-ŋwsi ethi yee ethneya wirllicǝr libaayila-lɔ, nǝ ethisi ǝrri ŋir ŋiijin tok. 15 Nǝ nǝrṯoroŋw tok, nǝthi lizi daŋgal-na lǝṯi kwakithatha ṯa@liima-lɔ ṯǝthi Nɔgɔɔlaawiiyyiin. 16 Ɔrlacca ŋikiyaŋi ŋɔɔŋa ŋwɔdoŋw! Nǝ miseere ǝrri ŋɔ mac tǝ, nyiila fittak naaniŋa-gwɔ, nyii ṯɔgthi lizi-li kila kaalala-gi ŋga kuruuthu kworo-na kwiinyi.
17 “Ŋgwa kwǝthi yǝni yǝthi-yi neŋne, ethɔ-ŋwsi neŋne ŋa ŋandicasi Ṯigɽim yǝniisǝ! Nǝ kila lithiinyi, ǝnyji inḏǝthǝ manna kwuluccunǝ. Nǝ ǝnyji inḏǝthǝ tok leere-leere kaali kifiithɔ kɔlɔɔthɔna yiriny naana yiiyaŋ, yiti yǝsi kwizi kweere ere elŋe mac, illi ŋgwa kwaavasi ṯɔɽɔk.
Juwaab kwɔlɔccar kǝniisǝ kǝthi Thiiyaaṯiira-ŋwɔ.
18 “Lɔccasi meleka kwǝthi kǝniisǝ kǝthi Thiiyaaṯiira-ŋwɔ:
“Ŋiɽaŋal ŋɔ ŋir ŋǝthi Tɔr tǝthi Allah, kira tɔfɔɔdɔ yǝy yuuŋwun kaka iigǝ, tiithɔ yaaga-lɔ kaka nɔhaas kwɔsɔɔɽɔ. 19 Nyii kwilŋithi ŋothɽor ŋɔɔŋa. Nǝnyii elŋe ṯamɽa ṯɔɔŋwa, nǝ ṯǝmminǝ, ŋothɽor, nǝ mithǝ ṯɔgwori kwɔɔŋa ṯindinyanna-thi naana. Nyii kwilŋithi rac ethaarɔŋw, ŋa ŋǝṯisi ǝrri ŋithǝmthǝlɔ ethi kerreny-ŋwɔla. 20 Laakin ŋɔ ŋǝthǝthi-ŋǝsi naana ŋette, kaka nuduŋgwǝcǝ-ŋǝ gwɔ kwayɔ kwǝni Izaabil, kwuruusǝ rogɽo ruuŋwun kwiɽii kwǝthi Allah. Ṯa@liim-thi ṯuuŋwun nɔŋw ṯuusi yaḏaama yiinyi ethisi ǝrri-ri ŋir ŋiijin, nǝ ethi yee ethneya wa wirllicǝr libaayila-lɔ. 21 Kwɔmǝ-nyii inḏǝthǝ lɔɔmɔri lǝthi-li ɔrlacca ŋikiyaŋi ŋwɔdoŋw, laakin nɔŋw derne ethi ɔrlacca ŋiijinǝ ŋuuŋun ŋwɔdoŋw. 22 E-ta ǝnyii ippi kimǝthi-gi, nǝ kila tok lǝrrǝr-li ŋiijinǝ ǝnyji inḏǝthǝ ṯurvǝ ṯiraara ṯeṯṯec, illi mǝrsi ɔrlacca ŋa ŋigii ŋwɔdoŋw ŋa ŋǝrrǝrsi ŋundu-gi. 23 Nyii ippi nyiɽiŋǝyin mindaŋ nyji ɽeenye. E-ta a yǝniisǝ tatap elŋe ethaarɔŋw, nyii kwɔrɔ kwette kwǝṯi elŋe ǝfkǝrǝ wǝthi lizi tatap, nǝ ŋiɽaŋal tok ŋǝthi rɔgwor reeŋen. E-ta ǝnyji inḏǝthǝ tatap ɔjra wir kaka wǝthi ŋothɽor ŋeeŋen ŋǝrrǝrsi. 24 Laakin kila lithaathɔ lǝthi Thiiyaaṯiira-ŋwɔ, liti likwakithathi ṯa@liima-lɔ kɔthɔ ṯigii mac; ŋaaŋa liti limǝ aari kinnǝ @allima mac, ŋiɽaŋail ŋa ŋǝṯisi lizi iithaathɔ ǝnyjici yiriny yǝni ‘ŋejmeth ŋǝthi Shiiṯaan ŋuluccunǝ lac-lac’. Nyii kwɔŋǝsi ǝccǝŋw, nyii kwiti kwɔŋǝsi kiɽǝcci ṯɔɔvi ṯeere ṯir ter mac. 25 Laakin mithirsi ŋa tetter ŋǝthi-ŋǝsi mindaŋ nyii ɔppatha. 26 Kila lillazi kii, nǝ kwǝsi-tǝ ǝrrizǝsǝ ŋa ŋinaŋna-nyji, ǝnyji-ṯǝ inḏǝthǝ sɔlṯa ethi-gi mithǝ ŋeelenyi, 27 mindaŋ ǝrsi mithǝ ethisi iili ṯɔmɔr-ri ṯǝthi sarṯɔ, mindaŋ ǝrsi kikiiyi, kaka nyii nyǝthi kɔlɔɔ kaka naavany-gwɔ ŋɔma naanɔ-gwɔ Papa kwiinyi. 28 E-ta ǝnyji inḏǝthǝ tok ṯɔɔrɔmi ṯǝthi ŋɔrpanaŋw.
29 “Ŋgwa kwǝthi yǝni yǝthi-yi neŋne tǝ, ethɔ-ŋwsi neŋne ŋa ŋandicasi Ṯigɽim yǝniisǝ!”