aza 17
kwaw kwir kwijin na kwɔmne kwumiiḏu kweḏi ŋerya
1 mindaŋ nuŋw ila kwete kweḏi limaleyka dufɔkwɽeny, leṯapi nyiṯraŋi dufɔkwɽeny, nuŋw eca nyuŋwu ŋwu: ila, nyi kwɔ ŋa baŋaci hukma weḏi kwaw kwir kwijin kwiki beṯen, kwunanalu ŋaw la ŋuru, 2 ŋimerzerri leleny li leḏi ṯurmun ŋir ŋijin, na kla linani ki ṯurmun-na limɔ urleli nabiṯ gi kwir ŋijin ŋuŋun. 3 nuŋw dima nyuŋwu ŋuma ŋi ŋeḏi Ṯigɽim ṯirlinelu ter kwuḏer-na, nenyeze kwayu kwete kwelliḏi kwɔmne la kwumiiḏu kweḏi ŋerya kwori nana, kwuluḏina yiriny nana yitezir yeṯuŋw yi ellineḏa Allah nana, nuŋw eḏi ŋwoɽa dufɔkwɽeny na ril wri. 4 na kwaw kwukinna yireṯi yeḏi ŋele ŋiɽen ŋori, ɽiyer, kwɔgwuɽana ŋamal nana ŋir ḏahab, na ŋir ter ŋifiiḏu ŋir kaka ŋan ŋeni lulu, kwapa titraŋi ki ṯii tir ḏahab, turena ŋiɽaŋal-na ŋir ŋudur ŋeḏi ŋijin ŋuŋun; 5 na kuḏul la kuŋwun na yiriny lɔḏine yiti yilŋiiḏina mac, yeni ŋwu: baabil kweni kwupa, kwir lenyin kweḏi lijin-ŋa na ŋudur ŋeḏi ṯurmun. 6 nenyeze kwayu kwurlelu ŋin ŋi ŋeḏi lizi lirlinelu ter, na ŋeḏi kla limerzi eɽenye ŋiɽaŋal ŋi ŋeḏi Yecu.
menyeze ŋunduŋwu nenyi liŋɽi kaka aḏa kwere. 7 lakin nenyi maleyka eca ŋwu: a kwɔḏɔ kwiliŋɽi? nyi kwɔ ŋa andaci ŋiɽaŋali ŋulucina ŋeḏi kwaw ŋgwu, na ŋeḏi kwɔmne ŋgwa kwumiiḏu kweḏi ŋerya, kwelliḏuŋw gwu la, kweḏi ŋwoɽa dufɔkwɽeny na ril wri. 8 kwɔmne ŋgwa kwumiiḏu kwizaŋa, kwunani kerreny nuŋw ere nani kirem mac, na kwinḏi eḏalliḏa kezir woɽu lac kuṯelu eḏele kezir weḏi ṯikiraḏa lu; na lizi leḏi ṯurmun, kla liti leḏi yiriny yeŋen kiṯam-na mac, ŋga keḏi yiriny-na yeḏi kla tatap leḏi ŋimiiḏa, yuluḏina ki lomur likitina li ṯurmun, er liŋɽi eḏeze kwɔmne ŋgwu kwumiiḏu kweḏi ŋerya, kaka muŋw gwu nani kerreny, nuŋw ere nani kirem mac, na kwinḏi eḏila. 9 a kwunaŋnar ṯeḏinayeyna eḏizelŋe ŋu. ŋwoɽa ŋwa ŋwir dufɔkwɽeny, ner orɔ yayin dufɔkwɽeny yinani gwu kwaw la; 10 ner orɔ tɔk leleny dufɔkwɽeny; na ṯuḏni deŋgen-na ner iidi, kwete kwunani kirem, na kwuḏaḏu nuŋw ere ila kinna mac, na muŋw ila, ŋwu kinna nani kwɔkwɔ domony. 11 na ŋiɽaŋal ŋeḏi kwɔmne ŋgwa kwumiiḏu kweḏi ŋerya, kwunani kerreny, kwiti kwunani kirem mac, ŋiri ŋu, nuŋw orɔ nimra dufɔkwupa, lakin nuŋw orɔ kweḏi ŋgwa kwir dufɔkwɽeny, ŋwu ele eḏi kiraḏa lu. 12 na ril wri rizaŋa zi, riri leleny wri liti limafi ŋelenyi ŋeŋen kinna mac, lakin er afi zulṯa kaka leleny zaa kwutuput, kwɔmne gi ŋgwa kwumiiḏu kweḏi ŋerya. 13 na kla tatap leḏi ŋiɽaŋali ŋutuput, er emni eḏinḏeḏa kwɔmne ŋgwa kwumiiḏu ŋuma ŋeŋen na zulṯa kweŋen tɔk. 14 linderṯa linḏi eḏi ṯugwuḏi Tirany ri mindaŋ ezi Tirany illazi ki, kaka urŋw gwu Kweleny kweḏi leleny, na Melik kweḏi limelik. na kla linani nanuŋw gwu lir kla limɔŋw zi ornuṯi, limɔŋw zi ece-na tɔk, leni lirlalu.
15 nuŋw eca nyuŋwu ŋwu: ŋaw ŋa ŋizaŋa zi, ŋinani gwu kwaw la ŋgwa kwir kwijin, lizi liri, na ŋwuduŋw, na ŋeleny ŋir-na ter ter, na kandiza kir-na ter ter tɔk. 16 na ril kra wri rizaŋa zi, ŋunduŋa kwɔmne gi ŋgwa kwumiiḏu kweḏi ŋerya, er uwezi kwijina ŋgwa, er ruzi ŋunduŋwu kaka kwete kwumer durnaḏa lu, lufduṯu; er ye yiiḏi yeḏi aŋna wuŋwun, er uɽezi igə yi, 17 kaka kitizazi gwu Allah ki rugwor-na reŋen eḏizerri tugwor ṯi ṯuŋwun, mer eḏi ŋiɽaŋali-na ŋutuput, na eḏinḏeḏa kwɔmne ŋgwa kwumiiḏu kweḏi ŋerya ŋelenyi ŋeŋen eḏi zi miḏa, mindaŋ ma ŋiɽaŋal ŋeḏi Allah ṯimayini kworɔ dap. 18 na kwaw ŋgwa kwizaŋa, kwiri meḏiina kwupa kweḏi zulṯa kweḏi leleny leḏi ṯurmun.
Kwiijin kwɔppa ŋiɽaŋali.
1 E-ta nǝ kwette kwǝthi limeleka lir dɔvokwɔɽony kwǝthi looro dɔvokwɔɽony, iila nɔŋwɔccǝ nyuŋwɔ-ŋw, “Ila, mindaŋ ŋǝ baaŋaci hɔkwɔma wǝthi kwiijin kwɔppa ŋiɽaŋali, ŋgwa kwir mǝḏiinǝ kwɔppa kwǝccinǝ ŋaaw kǝni ŋittǝzir ŋǝthi libahar lokwɔɽony. 2 Kwǝṯi-gi limǝlik lǝthi ṯurmun ǝrri-ri ŋiijinǝ ŋundu-gi, mindaŋ nǝ lizi lǝthi ṯurmun tatap urlǝli kiɽica-gi kiithir kǝthi ŋiijin ŋuuŋun.” 3 Nɔŋw dimmi nyuŋwɔ Ṯigɽim-thi nɔŋwiili nyuŋw ki-sahraa-na. E-ta ninyeese kwayɔ kwɔnaanalɔ ki-haywaan-la wɔɔri, wuurǝnnǝ yiriny naana deddep yǝthi-yi ollo Allah, nǝ nɔŋwɔthi ŋwɔɽa dɔvokwɔɽony, nǝ rill wrii. 4 Nǝ kwaaw kenne yirethi yǝthi ŋeele ŋiɽǝn ŋɔɔri, mindaŋ nɔŋw kenne ŋaamali naana ŋir ḏahab, yall yir ghaali-ghaali, nǝ lu-u-lu-a tok. Nɔŋwappi tiṯraŋi tǝthi ḏahab ki-thii-na ṯuuŋwun, tuurǝnnǝ ŋiɽaŋali-na ŋir ŋudur-ŋudur ŋǝthi ŋiijin ŋuuŋun. 5 E-ta nɔŋw lothone kuthul-lǝ kuuŋun yiriny yǝthi ma@na kwuluccunǝ kwǝniŋw, “Baabil kwɔppa ŋɔɔrɔ, kwir lǝnyin kwǝthi liijin-ŋǝ, nǝ ŋudur ŋǝthi ṯurmun.” 6 E-ta ninyeese kwayɔ kwurllǝlɔ ŋin-ŋi ŋǝthi lizi lǝthi Allah, nǝ ŋin-ŋi ŋǝthi kila liɽinyithirsi kaka niinyicǝr-gwɔ Yǝcu-ŋw naana.
Mindaŋ mǝnyii dimmi yǝy minyeese tǝ, nenyii liŋɽalɔ beṯṯen.
7 Ṯaŋw nenyii meleka uṯicǝlɔ nɔŋwɔccǝ nyuŋwɔŋw, “A kwotho kwiliŋɽɔ? Nyii kwɔŋǝ andaci ma@na kwuluccunǝ kwǝthi kwaaw, nǝ haywaan tok wǝthi ŋwɔɽa dɔvokwɔɽony nǝ rill wrii, wa wǝllithi-ŋgwu-lǝ. 8 Nǝ haywaan wa ǝni wɔnannɔ kerreny wɔmiithɔ, laakin tǝ ŋweere miithi kwokwony mac; wɔmaadithi ethi allitha kinaŋw kuṯṯǝlɔ lac-lac, mindaŋ ŋweele ethi kiirannalɔ. E-ta a lizi kila linaanɔ ki-ṯurmun-nǝ liti lilɔɔthɔna yiriny yeeŋen kiṯaab-na mac kǝthi ŋimiitha, kinaŋw niti nigittina-gwɔ ṯurmun kinnǝni mac, ǝri liŋɽi tatap mǝreese haywaana. Nɔŋwɔni wɔnaanɔ kerreny wɔmiithɔ, nǝ kirem tǝ ŋweere miithi mac, laakin ŋwɔ-tǝ ruwǝnnǝlɔ kwokwony rac. 9 Ŋiɽaŋal ŋɔ ŋinaŋna ṯǝthinǝ yǝnǝ nǝ ṯilŋitṯana tok. Ŋwɔɽa ŋwir dɔvokwɔɽony ŋwir ŋwundǝr ŋwir dɔvokwɔɽony ŋwɔnaanɔ-gwɔ kwaaw-la. 10 Na nǝ limǝlik dɔvokwɔɽony naani tok, ṯɔthni deŋgen-na nǝrǝni limǝ ai, kwette nɔŋw-tǝ kǝnnǝ mithǝ ŋeelenyi, nǝ kwɔthaathɔ tǝ nɔŋweere iila kinnǝni mac; nǝ mɔŋwiila tǝ, laazim ŋwaari haakima rɔɔmɔri tokwɔɽoc domony. 11 Nǝ haywaan wa wɔmiithɔ kerreny witi wɔmiithɔ kwokwony kirem mac, nɔŋworo mǝlik kwir nimrǝ dɔvokwɔppa kwir ṯaba ṯǝthi kila lir dɔvokwɔɽony, kwinḏi ethi ruu etheele ethi kiirathalɔ. 12 Nǝ rill rir wrii riisa-ŋǝsi nǝroro limǝlik lir wrii, kila liti limaavi ŋeelenyi kinnǝni mac, laakin lǝrsi inḏǝthǝ sɔlṯa rac ethi mithǝ ŋeelenyi kaka limǝlik-gǝ, saa@ kwɔtɔpɔt ŋundu-ŋǝ haywaan-ŋǝli. 13 Nǝ kɔlɔ tatap lir wrii, nǝrǝthi fikirǝ kwɔtɔpɔt, mindaŋ nǝr inḏǝthǝ haywaana ŋɔma ŋeeŋen nǝ sɔlṯa tok. 14 Mindaŋ ǝri ṯɔgthi Tirany-ri laakin ǝsi Tirany-ŋa lizi-li luuŋwun kila lɔrnɔṯɔrsi lǝllirsi-nǝ lirllalɔ mindaŋ ǝrsi ṯiinyi, kaka nɔrɔ-ŋgwɔ Kweeleny kwǝthi leeleny-ŋa, nǝ Mǝlik kwǝthi limǝlik-ŋa.”
15 E-ta ninyaaɽi nenyii meleka ǝccǝŋw kwokwony, “Ŋaaw-ŋa ŋittǝzir ŋiisa-ŋǝsi ŋinaanɔ-gwɔ kwiijin-la, ŋir ŋeeleny ŋirna ter-ter, ŋwɔdɔŋw, nǝ lizi mindaŋ, nǝ riŋla rirna ter-ter. 16 Nǝ rill kira iii wrii riisa-ŋǝsi, nǝ haywaan tok, ǝri wǝzi kwiijinǝ; mindaŋ ǝri aagatha kwomne tatap kwǝthi-ŋwɔ, mindaŋ ǝri duŋgwǝcǝlɔ lɔvdɔṯṯɔ; nǝ ǝri yee aŋna wuuŋwun mindaŋ ǝri uɽǝzi iigǝ-yi wǝr. 17 Kaka nigitticasi-gwɔ Allah karatha kɔtɔpɔt ki-rɔgwor-na reeŋen, mindaŋ ethisi ǝrrici ṯɔgwor-thi ṯuuŋwun, mindaŋ ethi inḏǝthǝ haywaana ŋɔma ŋeeŋen, ethi-ŋi mithǝ ŋeelenyi, mindaŋ mǝ ŋiɽaŋal ŋǝthi Allah rattathi kworo kimaara. 18 Nǝ kwaaw ŋgwa kwiisa-ŋa, nɔŋworo mǝḏiinǝ kwɔppa ŋiɽaŋali, ŋgwa kwimthi limǝlik-gǝ tatap lǝthi ṯurmun.”