aza 16
1 mindaŋ nenyi neŋne ṯɔgwɽɔ ṯupa ṯiruḏi ki heykal-na ṯandica limaleyka dufɔkwɽeny, nuŋw zi eca ŋwu: inḏir a balizi nyiṯraŋi lu dufɔkwɽeny nyir ŋirŋaza ŋeḏi Allah ki ṯurmun la.
2 ŋwu ṯa, na maleyka kwir nimra kwete ele nuŋw balizi tiṯraŋi lu tuŋwun ki ṯurmun la, na yama yiki beṯen yu tɔrtɔr ellini lizi nana, kla leḏi ŋwuli nana ŋweḏi kwɔmne ŋgwa kwumiiḏu kweḏi ŋerya, na kla tɔk leṯikwoce zura lu kwuŋwun.
3 na maleyka kwir nimra kwuɽen balizi tiṯraŋi lu tuŋwun ki ṯujul-na, na ŋaw orɔ kaka ŋin ŋeḏi kwizi kwayyu, na kwɔmne tatap kwumiiḏu ay, kwunani ki ṯujul-na.
4 na maleyka kwir nimra ṯɔɽɔl balizi tiṯraŋi lu tuŋwun kufurṯa-na, na ki le-na leḏi ŋaw, ner orɔ ŋin. 5 nenyi neŋne maleyka kweḏi zulṯa kweḏi ŋaw, kwaruŋw:
hukm wɔŋa wir wu weni wirlalu,
ŋa, kweni Kwirlinelu ter, kwunani kirem na kwumɔ nani.
6 kaka mezi gwu lizi ireci ŋina lu ŋeḏi kla lirlinelu ter, na leḏi liɽi tɔk,
nezi inḏeḏa ŋina eḏi zi ii.
ofḏanicarzi ŋu!
7 nenyi neŋne ŋweḏgwuna ŋwaruŋw:
emba. ŋa kwir Kweleny kweni Allah wuṯemḏizi la tatap ŋuma ŋi,
hukm wɔŋwa wiri wirlalu rerec!
8 na maleyka kwir nimra kwaɽŋan balizi tiṯraŋi lu tuŋwun aŋwun nana, mindaŋ na aŋwun eḏi zulṯa eḏi məŋ lizi nana igə yi wuŋwun; 9 na lizi limɔ məŋni nana, kijaŋ gi kufuḏu circir, ner ɔllɔ yiriny yeḏi Allah weḏi zulṯa kweḏi jiiza ŋgwu, ner ere urla rugwori lu mac, eḏi nii ŋunduŋwu-na.
10 na maleyka kwir nimra ṯuḏni balizi tiṯraŋi lu tuŋwun kwurzi la kweḏi kwɔmne ŋgwa kwumiiḏu kweḏi ŋerya, na ŋeleny ŋuŋun orɔ kirim; na lizi ye riŋla reŋen ŋiɽaŋal ŋi ŋeḏi ṯirara ṯeŋen, 11 ner ɔllɔ Allah weḏi kilerena, ŋiɽaŋal ŋi neḏi ṯirara ṯeŋen na yəma yeŋen tɔk, ner ere pinici ŋikyaŋi rugwor-na mac ŋimerzerri.
12 na maleyka kwir nimra nyirlil balizi tiṯraŋi lu tuŋwun kufurṯa la kupa keni al furaṯ, mindaŋ na ŋaw ŋuŋun enḏelu nyim, eḏi ketize lelenyi ṯay, kla linani kezir weṯi gwu aŋwun alliḏa. 13 nenyeze rigɽima ṯɔɽɔl riki rir kaka lurɔ ruruḏi kworɔ-na kweḏi kumow ŋga kupak, na kworɔ-na kweḏi kwɔmne ŋgwa kwumiiḏu kweḏi ŋerya, na kworɔ-na kweḏi kwiɽi kwir kwəluŋ; 14 kaka urir gwu rigɽim ŋunduŋa reḏi ibliiz reṯizerri ŋir ŋilim, na eṯir ru eḏele nani gwu leleny leḏi ṯurmun ndendeṯ, eḏizaɽazi duŋw eḏi ṯugwuḏi, ki lamin lupa leḏi Allah wuṯemḏizi la tatap ŋuma ŋi. 15 (kaka ŋuluḏina, ŋaruŋw: izaṯi, linderṯa liri lamin linḏi nyi li eḏila nyetec kaka kwoɽam. ŋgwa kweṯaŋraḏa, kwukinna yireṯi yuŋwun, mindaŋ muŋw ere ru lufduṯu mac eḏi lizi eze aŋna domony, kweni kwortani.) 16 ner zi aɽazi duŋw kezir weṯir eca armajiḏun kandiza gi keḏi yahuuḏ.
17 na maleyka kwir nimra dufɔkwɽeny balizi tiṯraŋi lu tuŋwun kurun-na, na ṯɔgwɽɔ ruḏa ṯupak ki heykal-na, nani gwu kwurzi kweḏi ŋeleny, ṯaruŋw: ŋimɔ rataḏi. 18 na rimen erṯelu kec kec, na kwurna aliu kwupak, na lere ufḏuḏi-na, na ureyu rigini, ṯirigina ṯi ṯupak ṯiminni, ṯiti kinna ṯimerrini ṯir ŋwu lamin lere mac, nani gwu lizi ki ṯurmun. 19 na meḏiina kwupa uɽeni-na ṯɔɽɔl, na limeḏiina leḏi ŋeleny tatap iidi, na Allah ṯiŋayini baabilŋw, kweni kwupa, eḏiici ŋunduŋwu tiṯraŋi turena ŋirŋaza-na ŋeḏi ŋarriny ŋuŋun. 20 na lijaziira tatap enḏelu nyim, na yayin ere inḏini yere kwokwony mac, 21 na ŋworum irda ŋwupak, ŋwini didip, ner irda kilerena ki lizi la, mindaŋ na lizi ɔllɔ Allah ŋiɽaŋal ŋi ŋeḏi jiiza kweḏi ŋworum, kaka kii gwu jiiza ṯga-ṯga.
Looro lǝthi ŋirŋasa ŋǝthi Allah.
1 E-ta nenyii neŋne ṯogɽo ṯɔppa ṯuruuthu ki heikal-na, ṯandica limeleka lir dɔvokwɔɽony, nɔŋwsǝccǝŋw, “Nḏir ele a balsa ŋirŋasa ŋǝthi Allah ki-wurǝyu-lǝ, ŋa ŋinaanɔ ki-looro-na lir dɔvokwɔɽony.”
2 E-ta nǝ meleka kwir nimrǝ kwette ele nɔŋw balsisa ṯurmunǝ kwooro naana kwuuŋwun balac. Nǝ yǝmmǝ yiraara ṯeṯṯec ruuthǝ lizi naana kila lǝthi @alaama wǝthi haywaan, nǝ kila lɔgwɔcca suurǝ-lɔ kwuuŋwun.
3 E-ta nǝ meleka kwir nimrǝ kwuɽǝn balsasi bahara kwooro naana kwuuŋwun balac. Mindaŋ nǝ ŋaaw oro kaka ŋin ŋǝthi kwizigwunǝŋ kwaayɔ, mindaŋ na kwomne tatap kwɔmiithɔ ai ki-bahar-na.
4 Ŋwɔṯaŋw nǝ meleka kwir nimrǝ ṯoɽol balsasi kwooro kwuuŋwun libahara naana lokwɔɽony, nǝ ruwǝ rǝthi ŋaaw tok, mindaŋ nǝr reethe nǝroro ŋin. 5 Nǝ nenyii neŋne meleka kwir rǝ-iis rǝthi ŋaaw tatap, nɔŋwaarɔŋw, “Ŋa ŋgwa kwirllinǝlɔ ter, kwɔnannɔ kire-kirem, nǝ kwɔnaanɔ kerreny tuk, hɔkwɔm wɔɔŋa wɔgittaŋa wǝni wirllalɔ! 6 Kaka niirǝzǝr-gwɔ ŋiinǝ-lɔ ŋǝthi lizi lǝthi Allah, nǝ ŋǝthi liɽii tok, mindaŋ nǝsi inḏǝthǝ ŋiinǝ nǝrsi ii. Kaka nɔvthannicarsi ŋɔ!” 7 Ṯaŋw nenyii neŋne ṯogɽo ki-ŋwɔthgwun-nǝ ṯaarɔŋw, “Kweeleny kwir Allah wǝthi Ŋɔma Ŋɔppa! Hɔkwɔm wɔɔŋa wir rerrem nǝ wirllalɔ tok!”
8 E-ta nǝ meleka kwir nimrǝ kwaɽiŋan balsi kwooro kwuuŋwun aaŋwɔna naana, mindaŋ nǝr duŋgwǝci ethi uɽǝzi lizi kiijaŋ-ŋgi kuuŋun kufuuthu cir-cir. 9 Nǝrsi dɔnni mindaŋ nǝr ollo yiriny yǝthi Allah, wthi sɔlṯa ki-jiizǝ-lǝ ŋgwɔ. Laakin nǝreere urlǝ rɔgwor-lɔ mac ethi nii ŋunduŋw-nǝ.
10 Nǝ meleka kwir nimrǝ ṯɔthni balsi kwooro kwuuŋwun kwɔrsiya naana kwǝthi ŋeeleny, kwǝthi haywaan. E-ta nǝ kirim aaɽathi ŋeelenyi naana tatap ŋǝthi haywaan, mindaŋ nǝ lizi yee riŋla reeŋen ŋiɽaŋal-ŋi ŋǝthi ŋijma ŋeeŋen, 11 na nǝr ollo Allah wǝthi ki-leere-naŋw, ŋiɽaŋal-ŋi ŋǝthi ŋijma nǝ ŋǝthi yǝmmǝ yeeŋen. Laakin nǝreere urlǝ rɔgwor-lɔ kǝmthi, ki-ŋothɽor-na ŋeeŋen ŋigii.
12 Ṯaŋw nǝ meleka kwir nimrǝ nyirlil balsi kwooro kwuuŋwun ki-bahar-la kwokwɔɽony kwǝni Alfɔraaṯ kwɔppa ŋɔɔrɔ yǝnǝ, mindaŋ nǝ bahar kwokwɔɽony ɔnḏathalɔ kwɔrop, ethi daɽimac’ limuluuk-gǝ ṯaayi-lɔ, lǝṯiila ǝzir-yi wa wǝṯi-yi aaŋwɔn dallitha. 13 E-ta ninyeese rigɽimǝ ṯoɽol rigii raaɽinna lɔroo, luruuthu kworo-na kwǝthi haywaan, nǝ kworo-na kwǝthi kwiɽii kwir kwǝluŋw. 14 Kaka nɔrɔr-gwɔ rigɽim rigii rir Shayaaṯiin rǝṯi ǝrri-ri ŋilima. E-ta nǝ rigɽim rir ṯoɽol kɔrɔ ele naanɔ-gwɔ muluuk tatap kwǝthi ṯurmun, ethisi aaɽaci ŋǝriyǝ dɔŋw ki Laamin lɔppa lǝthi Allah wǝthi Ŋɔma Ŋɔppa. ( 15 “Niŋna-ṯi! Nyii-ŋgwa kwinḏi kaka kwɔɔɽam! Kwɔrṯanni ŋgwa kwɔnaani yǝy-yǝlɔ, eṯhi aŋraci yirethi yuuŋwun, mindaŋ etheere iirǝrǝlɔ lɔvdɔṯṯɔ mac, mindaŋ ethi ṯɔrony ere mithǝ ki-lizi-nǝ mac!”) 16 E-ta nǝ rigɽim aaɽisa muluuk-gǝ dɔŋw kǝzir wǝnyjicǝr yiriny @ibraaniiyyiina yǝni Harmajaḏuun.
17 E-ta nǝ meleka kwir nimrǝ dɔvokwɔɽony balsa kwooro kwuuŋwun ki-leere, mindaŋ nǝ ṯogɽo ṯɔppa ruuthǝ kwɔrsi-na kwǝthi ŋeeleny, kwɔnaanɔ ki heikal-na ṯaarɔŋw, “Ŋimǝ ǝrrini!” 18 Nǝ fɔɔri naani kwǝthi rimen, nǝ ŋweere ɔppɔthɔna, nǝ wurǝyu riiginni tig-tig. Nǝ kinaŋw tuk nigittinǝ-gwɔ kwizigwunǝŋ nǝ wurǝyu ere riiginni laamin leereŋw ḏuṯ, nɔŋworo ṯiriiginnǝ ṯithǝmthisi-lɔ tatap! 19 Nǝ mǝḏiinǝ kwɔppa uɽǝnninǝ yithrithana ṯoɽol, mindaŋ nǝ muḏun kwǝthi libǝlǝḏ tatap kiirathalɔ, mindaŋ nɔŋw icci kiɽicaŋi ki-tiṯiraŋ-na tuuŋwun kǝthi ŋirŋasa ŋuuŋun. 20 E-ta nǝ lijǝziirǝ tatap irṯathalɔ, mindaŋ nǝ yaayin ere iijini kwokwony mac. 21 Nǝ ŋwɔɔrɔm ŋwɔppa-ŋwɔppa irdidǝ-thǝ lizi naana ki-leere, ŋwir wǝzinǝ weeŋen weere-weere roṯola ruɽi-ṯɔthni mindaŋ nǝ lizi ollo Allah ŋiɽaŋal-ŋi ŋǝthi jiizǝ kwǝthi ŋwɔɔrɔm, kaka nigii-ŋgwɔ ŋirinyǝ beṯṯen.