aza 12
kwaw kwete na kumow kete kori kupak
1 na ŋiɽaŋal ŋete ŋupa ruwene lu kilerena, kwaw kwete kwukinna aŋwunu, na owa ta nuŋw nani ŋwara-na ŋwuŋwun, na kindala luŋwun nuŋw kenne taŋgiŋi tidaɽmina rorum ri wri-kwuɽen. 2 kwiiḏa, kwari kwola kaka yaḏi gwu ŋijma eḏelŋe. 3 na ŋiɽaŋal ŋir ter ruwene lu kilerena; izaṯi kumowa kete kori kupak, keḏi ŋwoɽa dufɔkwɽeny na ril wri: nuŋw eḏi nyaŋgiŋi dufɔkwɽeny ki ŋwoɽa la ŋwuŋwun. 4 na rorum reḏi lere yiḏriḏa tɔɽɔl, na ṯia ṯuŋwun mulɔtɔ kete nuŋw zi kaṯa kureyu lu. na kumow kupak rillaci kwayu lu ŋgwa kwadiḏi eḏelŋe toru, mindaŋ eŋguŋw elŋe, eŋgi kumow ŋga yaḏa toru kra teŋguŋw elŋe; 5 nuŋw elŋe tɔŋwora, tinḏi eḏorɔ Kweleny kweḏi ŋeleny tatap ŋir-na ter ter tumor ri tir zarṯu, lakin ner urṯeḏa toru tuŋwun nuŋw allu nani gwu Allah, nani gwu kwurzi kwuŋwun tɔk kweḏi ŋeleny. 6 na kwaw ta, nuŋw afri nuŋw ele kwuḏer-na, kezir wudaɽmica Allah lu eḏi gwu aŋraci kinanɔŋw ŋwamina ŋwuru dedep, ŋwir wahiḏ alif wa miyaṯen-wa-ziṯṯiin, ŋwir 1,260.
7 na tuwən diɽeḏizi kilerena, na mikayiil-ŋa limaleyka li luŋwun ṯugwuḏi kumow gi kupak; na kumow-ŋa limaleyka li luŋwun tugwuḏi, 8 lakin ner zi illazi ki mindaŋ mer ere eḏinḏa ezir mac kilerena, 9 ner kaṯa kumowa ŋga kupak kureyu lu, kinderṯa kir kumow kuɽun keni ibliiz na zeyṯaan tɔk, keṯi zi kekɽinjelu leḏi ṯurmun ndendeṯ—ner kaṯa ŋunduŋwu kureyu lu, limaleyka li luŋwun. 10 nenyi neŋne tɔgwɽɔ ṯete ṯupak kilerena, ṯaruŋw: ŋigileḏa ŋimila kirem, na ŋuma tɔk, na ŋeleny ŋeḏi Allah weri, na zulṯa kweḏi Kwruztu kwuŋwun, kaka mer gwu kaṯa ŋgwa kweṯi ruzi lieŋgeri ŋwuzi kaṯi kaŋwun kaŋwuŋ kulu kulu ki yey-na yeḏi Allah weri. 11 na ŋunduŋa ta, ner illazi ŋunduŋwu ki, ŋiɽaŋal ŋi ŋeḏi ŋin ŋeḏi Tirany, na ŋiɽaŋal ŋi ŋeḏi ṯunḏiza ṯeŋen ki, kaka iti mer gwu amɽi ŋimiiḏa ŋeŋen mac, mer kinna inḏa ŋiɽany. 12 ŋwu ṯaŋwu, eṯi nyeŋlena, ŋa kwir kilerena na kla linani gwu-na tɔk! lakin, eyewey kweḏi ṯurfa ṯalu, ŋa kwir ureyu, ṯujul ṯi, kaka ma ŋazi gwu ibliiz dapiḏana ŋirŋaza ŋi ŋupa, kaka ilŋiicaŋw gwu eḏaruŋw: nyi kweḏi lomuri lɔkwɽoc liminni.
13 na ma kumow ŋga kupak eze rɔgwɽɔ ruŋwun kimɔkeṯina kureyu lu, nuŋw eḏici kwayu kwumelŋe toru tir tɔŋwor ŋerya, nuŋw kwakiḏaḏa lu. 14 lakin ner inḏeḏa kwayu yufu yiɽen yupa yir yeḏi lufurṯaŋ lupa eḏi yi diɽi, eḏartiḏa kumowa lu ŋga kupak, eḏele kwuḏer-na kezir weḏi gwu aŋraci yiḏleyu ṯɔɽɔl na nuzz. 15 na kumow kupak ruwa ŋaw kworɔ-na kwuŋwun ŋir kaka kufurṯa, eḏi ferṯe kwayu kiṯay kiiru gi. 16 lakin na ureyu meci kwayu, nuŋw diŋelni kworɔ, nuŋw ṯemne kufurṯa ŋga kiruḏi kworɔ-na kweḏi kumow kupak. 17 mindaŋ na kumow kupak eḏizi kwayu ŋarriny, nuŋw ele eḏi ṯugwuḏi nyoru nyi nyeḏi kwaw kinya nyiḏaḏi-na, nyeṯi miḏa amra weḏi Allah, na nyeṯunḏizi Yecuŋw ki.
Kwaaw-ŋǝ kimǝw-gi.
1 Ŋwɔṯaŋw mindaŋ nǝ kwomne kwette kwɔppa kwɔthimthina ruwǝnnǝlɔ ki-leere. E-ta nǝ kwaaw naani kwette kwɔginna aaŋwɔna, nǝ ǝwǝ wɔnaanɔ ki-yaaŋa-na yuuŋwun, nǝ kindala luuŋwun nɔŋwɔthi taŋgiŋi tǝthi rɔɔrɔmi wrii-kwuɽǝn. 2 Nɔŋw aadithi keṯe-keṯṯok ethi elŋe, nǝ ṯiraara ṯǝthi ŋijma ŋǝthi ŋelŋe ǝrinni ŋwal cir. 3 Naaɽi nǝ kwomne kwette kwɔppa ruwǝnnǝlɔ ki-leere. Nǝ kimǝw naani kette kɔppak kɔɔri, nǝ kwomne ŋgwa ǝthi ŋwɔɽa dɔvokwɔɽony, nǝ rill wrii, mindaŋ nǝ nyaŋgi naani ki-ŋwɔɽa-la ŋweeŋen nyeere-nyeere. 4 Nɔŋw mɔlo ṯiya-thi ṯuuŋwun kithritha kette kǝthi ṯoɽol kǝthi rɔɔrɔm ki-leere, mindaŋ nɔŋwsi kaṯṯa ki-ṯurmun-nǝ. Nɔŋw rilli kiyǝnǝ yǝthi kwaaw ethi yanni tɔɔrɔ tɔc, mǝ kwaaw ilŋitha pɔroc. 5 E-ta nǝ kwaaw elŋe toŋwora, tinḏi ethi mithǝ ṯurmunǝ tatap ṯɔɔ-thi ṯǝthi sarṯɔ. Laakin nǝr urṯǝthǝ tiɽiŋǝyin, nǝr dimmǝthǝ nǝr-ri ele naanɔ-gwɔ Allah, nǝ naanɔ-gwɔ kwɔrsi kwuuŋwun kwǝthi ŋeeleny. 6 E-ta nǝ kwaaw avri nɔŋweele ki-sahraa-na, kǝzir wɔdaɽimica Allah ŋunduŋw, ethi-gwɔ aŋraci kinanaŋw ŋwaamin ŋwir alf miiyǝṯein wa siṯṯiin.
7 Ŋwɔṯaŋw nǝ ŋǝryǝ diiɽǝ ki-leere-na. Nǝ Miikhaa-iil-ŋǝ limeleka-li luuŋwun ṯɔgthi kimǝw-ŋǝli, ŋga kimǝsi diiɽǝthǝ naana ŋǝryǝ-ŋi limeleka-li luuŋwun tok, 8 laakin nǝr ṯiinyi kimǝwǝ kɔppa, mindaŋ nǝrseere duŋgwǝci kwokwony mac limeleka-li luuŋwun ethi naani ki-leere-na. 9 E-ta nǝr kaṯṯa kimǝwǝ kɔppak par kithaay, ŋga kǝthi kerreny-ŋwɔ tuk kǝṯir ǝccǝ Ibliis ya Shiiṯaan, ŋga kǝṯi kǝkiɽinyji ṯurmunǝ-lɔ tatap. Nǝr kaṯṯa kithaay ki-ṯurmun-nǝ limeleka-li luuŋwun tatap.
10 E-ta nenyii neŋne ṯogɽo ṯɔppak ki-leere-na ṯaarɔŋw’ “Ŋiglǝthǝ ŋǝthi Allah ŋimiila aŋwɔnɔ! Allah wɔmǝ-nyji baaŋaci ŋɔma ŋuuŋun kaka Mǝlik-gǝ! kire-kiren-ŋgwɔ nǝ Kwɔrɔstɔ kwuuŋwun ruwǝzi sɔlṯa-la kwuuŋwun! Kaka mǝr-gwɔ kaṯṯa ŋgwa kithaay kwǝṯi ǝccǝ liyǝŋgǝri-ŋwɔsi ishṯǝki kaaŋwɔn-kaaŋwɔn kulu-kulu kiyǝnǝ yǝthi Allah wǝri. 11 Mindaŋ nǝ liyǝŋgǝri lǝri ṯiinyi ŋunduŋw ŋin-ŋi ŋǝthi Tirany, nǝ ŋiɽaŋal-ŋi ŋǝthi shahaaḏa kweeŋen tok, mindaŋ nǝr amɽi ethi kiirasi ŋimiitha-lɔ ŋeeŋen mindaŋ ethi ai tok. 12 Aamir-na ŋaaŋa kila tatap linaanɔ ki-leere-na! Laakin ǝyǝwǝy ǝnnǝ ṯurvǝ ṯǝthi wurǝyu-ŋǝ bahar-gi, kaka mǝŋǝsi-gwɔ Ibliis ɔɽatha-na ŋǝryǝ-ŋi ŋɔppa, kaka ilŋica-ŋgwɔ ethaarɔŋw kwɔthathina tɔɔmɔri tokwɔɽoc domony.”
13 Ŋwɔṯaŋw mindaŋ mǝ kimǝw kɔppa elŋece ethaarɔŋw limǝ-nyii kaṯṯa kithaay ki-ṯurmun-nǝ, nɔŋwaari ibṯǝḏi ethi urtuti kwayɔ-lɔ ŋgwa kwilŋithi togwora. 14 Laakin nǝr inḏǝthǝ yɔvɔɔ yiɽǝn yǝthi lifirṯaŋ lɔppa yǝthi-yi diiɽi etheele kǝzir wuuŋwun ki-sahraa-na, kǝzir winḏir-gwɔ ethi aŋraci ŋunduŋw kimǝwǝ naana kɔppa, yithlǝyu ṯoɽol nǝ nus. 15 Nǝ kimǝw kɔppa balsa ŋaaw kworo-na kwuuŋwun ŋir kiiru ŋikwaathathi kwayɔ kuṯṯunǝ ethi ferṯe kithaay pireṯ. 16 Laakin nǝ wurǝyu mǝcci kwayɔ, mindaŋ nɔŋw kiṯṯini kworo, nɔŋw juriny ŋaaw ŋa juric ŋurwǝzi kimǝw kɔppa kworo-na kwuuŋwun. 17 E-ta nǝ kimǝw kɔppa urǝcci kwayɔ ṯɔgwori deddep, mindaŋ nɔŋw ruwǝthǝ ŋwɔɔla naana ŋwuuŋwun ŋwɔthaathɔ ŋǝryǝ-ŋi, nǝ kila tatap lǝṯi iinyici awaamira naana wǝthi Allah, nǝ kila lirllalɔ ki-ŋiɽaŋal-na ŋir rerrem ŋǝṯir-ŋi kette shahaaḏa kwǝni Yǝcu. 18 E-ta nǝ kimǝw kɔppa rilli bahara kǝni.