aza 10
maleyka kwete kwifirli na tiṯam tete
1 mindaŋ nenyeze maleyka kwete kwir ter, kwifirli teter, kwoɽu kilerena kwukwuɽbene lu lebleṯ li, na ṯululu nani kindala luŋwun, nuŋw orɔ kiyeyna kaka aŋwun, na ŋwara ŋwuŋwun orɔ kaka ŋwuɽi ŋwir igə. 2 nuŋw eḏi tiṯami tete ki tii-na tuŋwun tikiṯina, nuŋw kete lara luŋwun leḏi mini ki ṯujul la, na leḏi ŋogwur kureyu la, 3 nuŋw ornuni tɔgwɽɔ ṯi ṯupa, tir kaka teḏi zundaŋ; nuŋw ornuni, na lere ufḏuḏi-na nyamin dufɔkwɽeny. 4 ma kwurna kweḏi lere ufḏuḏi-na nyamin-na dufɔkwɽeny, nenyi naŋni eḏi zi lɔ tuc, lakin nenyi neŋne tɔgwɽɔ tete turuḏi kilerena, taruŋw: miḏizi nyetec ŋa ŋandizazi lere; eti zi luḏi mac. 5 na maleyka ŋgwa kwizanyi kwurilli ki tujul la na kureyu la tɔk, nuŋw allazi ṯii la ṯuŋwun ṯeḏi mini ki lere, 6 nuŋw ṯemzi rɔgwɽɔ ruŋwun ŋundu ŋgi ŋgwa kweṯi miiḏi dɔk ḏɔk, ŋgwa kwukete lerya na kwɔmne tatap kwunani gwu-na, na ureyu tɔk na kwɔmne tatap kwunani gwu-na, na ṯujuli tɔk na kwɔmne tatap kwunani gwu-na, na maleyka ŋgwa kwuṯemza rɔgwɽɔ, aruŋw: er ere ɽindaŋnalu kwokwony mac, 7 lakin ki ŋwamin la ŋweḏi bruz, kwinḏi maleyka kwir nimra dufɔkwɽeny eḏəri, a ŋiɽaŋal ŋeḏi Allah, ŋulucina kerreny, rataḏi kaka ŋandicaŋw zi yaḏaam yuŋwun yir liɽi.
8 na ṯɔgwɽɔ kḏa tiniŋnacanyi tiruḏi kilerena, andaci nyuŋwu kwokwony, nuŋw aruŋw: inḏi, a afi tiṯami tikiṯina, tinani ki tii ṯeḏi maleyka kwurilli ki ṯujul la na kureyu la tɔk. 9 ṯaŋwu nenyele nani gwu maleyka, nenyeca ŋwu: inḏeḏenyi tiṯami tɔkwɽeny. nuŋw eca nyuŋwu ŋwu: dime a ye; na ta ŋa ɽiyaḏa kari-na, lakin ta ŋa nyiŋlaḏa kworɔ-na kaka layu. 10 nenyi dimi tiṯami tɔkwreny ki tii-na ṯeḏi maleyka, nenyi ye; nuŋw ami kworɔ-na nyel nyel kaka layu, mindaŋ menyi ṯemne ta, na kari kinyi ɽe-na cercer. 11 ner nyi andaci ner nyi eca ŋwu: ŋofḏana duŋgwɔŋwa eḏizandaci ŋiɽaŋali ŋinḏeḏa zi Allah leni luru, na ŋeleny ŋuru, na kandiza kuru kir-na ter ter, na leleny luru tɔk.
Meleka-ŋǝ tiṯaab-ri tokwɔɽony.
1 E-ta ninyeese meleka kwɔthaathɔ kwǝthi ŋɔma kwɔdappɔ ki-leere-na. Kwippǝnnǝ leblethi naana, ṯɔɔlɔlɔ-thi ṯirikkathɔ nda-lɔ luuŋwun, kwir kiyǝnǝ kaka aaŋwɔn, nǝ rindiny ruuŋwun oro kaka ŋwuuɽi ŋwɔthi iigǝ. 2 Nɔŋwɔthi tiṯaabi tokwɔɽony tigittina ki-thii-na ṯuuŋwun. Nǝ nɔŋw kette kaaga kuuŋun kǝthi mɔni ki-bahar-la; nǝ kǝthi ŋǝgwur nɔŋw kette ki-wurǝyu-lǝ, 3 mindaŋ nɔŋw urnuni ṯogɽo-thi ṯɔppa, ṯaaɽinna ŋwal ŋwɔthi sɔndaŋa, nǝ mɔŋw urnuni tǝ, nǝ kwuurunnǝ kwir dɔvokwɔɽony kwǝthi leere andisa ŋɔmmaŋi. 4 Nǝ nandisar-ṯǝŋw nenyii naŋni ethi lɔɔthanni tɔc. Laakin nenyii neŋne ṯogɽo ki-leere-na ṯaarɔŋw, “Luccǝzǝzǝ-lɔ nyettec ŋa ŋandisasi kwuurunnǝ kwir dɔvokwɔɽony kwǝthi leere; mindaŋ ǝseere lo mac!” 5 E-ta nǝ meleka ŋgwa kwiisa-nyii kwirlɔ ki-bahar-la, nǝ ki-wurǝyu-lǝ tok, allasi ṯii-la ṯuuŋwun ki-leere ṯǝthi mɔni, 6 mindaŋ nɔŋwaari haalifa yiriny-yi yǝthi Allah, wǝṯi nannatha dok-dok, wɔgitta leereya kwomne-gi ŋgwa kwǝṯi-gwɔ nanni-na, nǝ wɔgitta wurǝyuŋi kwomne-gi-na ŋgwa kwǝṯi-gwɔ nanni-na, nǝ wɔgitta bahara kwomne-gi-na ŋgwa kwǝṯi-gwɔ nanni-na tok. E-ta nǝ meleka aarɔŋw, “Ŋiti ŋinḏi ethi ɽindaŋnalɔ kwokwony mac! 7 Laakin mǝ meleka kwir nimrǝ dɔvokwɔɽony ǝrii kibooɽonya tǝ, a Allah ṯimmasi ŋejmethi ŋuuŋun, kaka ŋa ŋandica-ŋwsi yaḏaama yuuŋwun yir liɽii.”
8 Ŋwɔṯaŋw mindaŋ nǝ ṯogɽo kitha ṯiniŋnaca-nyii ṯandisa ki-leere-na, nɔŋwɔccǝ kwokwony nyuŋwɔ-ŋwɔ, “Nḏi a dimmǝ tiṯaabi kira tigiṯṯinǝ tinaanɔ ki-thii-na ṯǝthi meleka-ŋgwa kwirlɔ ki-bahar-la, nǝ ki-wurǝyu-lǝ tok.” 9 Ŋwɔṯaŋw mindaŋ ninyeele naanɔ-gwɔ meleka nenyii andaci ethi inḏǝthǝ nyuŋw tiṯaabi tokwɔɽony; e-ta nɔŋwɔccǝ nyuŋwɔ-ŋwɔ, “Dimmǝ a yee; nǝ tiŋǝ ɽiyatha kaari-na kɔɔŋa, laakin tǝ ŋwɔ nyiŋlatha ŋaaŋwɔ kworo-na kaka laayɔ.” 10 Mindaŋ nenyii dimmǝ tiṯaabi tokwɔɽony ki-thii-na ṯǝthi meleka, nenyii yee; e-ta nɔŋwaamitha nyuŋwɔ kworo-na kaka laayɔ, laakin mǝnyii demne tǝ, nɔŋw ɽiyatha nyuŋwɔ kaari-na kiinyi. 11 E-ta nǝrnyii ǝccǝŋw, “Laazim andasi ŋiɽiiya-ŋi kwokwony ethisi andaci lizi littǝzir, umama mindaŋ, riŋla mindaŋ, nǝ limǝlik tok.”